ZKIZ Archives


沙中線之後 左丁山

2011-1-26  AD




 

廖秀冬做運輸、環保、工務局局長年代已經話起嘅沙田中環鐵路線,據說因為廖秀冬不大熱心,沙中線變成工程界人士口中嘅「失蹤線」,最近卒之話起動嘞,有望興建,但暫時仲係俾立法會議員卡住,但事隔咁耐先至興建,建築成本已經大漲,納稅人為不斷嘅阻延,付出好大代價。

沙中線起好,啟動之時,左丁山應該已經退休咗,據講到咗二○二○年,在烏溪沙上車坐低,可以坐到屯門,羅湖上車直達金鐘,認真方便,到時已經冇馬鐵、東 鐵、西鐵之分,取而代之嘅係東西走廊(包含馬鞍山線、沙中線、西鐵線),南北走廊(包含東鐵線、沙中線),到時香港各區交通,方便好多。

鐵路代替公路,似係大勢所趨,中國全力投入興建全國高鐵線之外,正大舉南進,從雲南昆明興建快速鐵路到寮國、泰國、越南、緬甸。二十年後,從星加坡坐火車 到昆明,再轉火車嚟香港,有可能成為事實。高鐵火車比在高速公路使用汽車,更能減少能源之使用,減少排放之餘,可增加經濟效率。中國與亞細安國家之自由貿 易協議,去年生效,雙方貿易額大增,同時間,亞細安國家之間嘅貿易,增長迅速,泰國有四分一出口係輸往亞細安區內嘅,有11%只輸往中國,將來啲貨物點樣 運嚟運去呀?用船太慢,用貨車多耗石油,用火車就最快,最環保,亞洲開發銀行就好主張興建快速鐵路。

在此大形勢之下,香港公共交通政策似乎無可避免地要向鐵路傾斜。特區政府最好早作規劃、諮詢(按:講吓講吓就要十年),提出二○二○以後嘅鐵路興建計劃, 咁樣做有一個大好處,就係為建築界挽留工人,回歸之後到沙士期間,建築工人大量失業,因而轉行、老化,搞到年青人唔願做工程師,唔願做三行工人,o依家有 十大基建嘞,發覺熟練技工(如炮王)缺乏,新進工人少,原有工人年紀大,全行都為之傷腦筋。如果十年後基建又試停擺嘅話,今天如何可以說服新人入行呀?

 


PermaLink: https://articles.zkiz.com/?id=21845

Next Page

ZKIZ Archives @ 2019