📖 ZKIZ Archives

投資港股：期權(一) 阿牛

http://hk.myblog.yahoo.com/yomagyomag/article?mid=4282

阿牛細細個去麵舖食麵，就像其他小孩子一樣，都喺淨喺識叫牛腩麵。後來食多左，聽到啲aunty，uncle原來可以有啲變化，可以叫腩粗，於是漸漸知道食牛腩麵都有花臣玩，於是又學人叫腩粗。跟住發現仲有腩伊，爽伊，崩沙，走筋，咖哩等等好多招積嘢可以叫，於是阿牛樣樣學吓，樣樣試吓。

        

第一次學人叫『崩沙伊』，嗰位落單叔叔話崩沙賣晒，阿牛其實連崩沙喺乜都未知，但喺仲學人搖頭嘆息，說：冇崩沙咁可惜，唯有食蛋河喇。

      

跟住阿牛學人炒股票，學校放假，就買張信報夾住喺格勒底，去望住個報價機，學人扮股民；第二日又夾番同一份信報，又去過睇報價機；冇錢就唔好日日買信報咁貴，一份可以睇幾日；後來就跟住學埋炒創業版，窩輪，牛熊証，同埋期權。

其實呢啲嘢都唔難學，好似去澳門賭錢咁，是旦行埋一張檯度，見人擺啲錢落去檯面，你又擺多少喺人地側邊，幾分鐘後，自然有人攞左你嘅錢，或者疊多少少錢喺你嘅錢上面，叫你攞番。咁就叫做識玩喇，記得贏輸都要不露形色，好酷咁先似識賭錢嘅。

後來才知道，原來期權同其他衍生工具比較，喺複雜好多嘅，亦喺最有用嘅一種 （相比窩輪同牛熊証）。由於佢複雜所以難學，亦少人玩；如果你去問一個退休阿叔，或者師奶，你想要賭恆指，可以點做，佢多數會話：買期指，或者牛熊証。你 問佢期權點玩，佢多數會話，好危險喎，買牛熊証喇：牛熊証容易睇，容易玩。

當然事實就未必喺咁。

近來好多Blog友都想討論期權，一來因為期權喺期指以外的另一入市的選擇。第二，就喺最近因為個市上上落落，冇乜方向，於是又多左人留意期權嘅街貨量對後市升跌嘅啟示；特別喺如果睇開東方日報嘅讀者，就會更容易睇到『琪權心法』嘅專欄。


呢 樣嘢，其實都好常見，凡喺上落市冇方向，大家就有興趣睇吓有啲乜嘢，俾到啟示我地，因為在上上落落其間，所有投資者，不論喺股民，定喺股評家，都或多或少 會估錯市，估佢升，佢又跌，估佢跌，佢偏偏又升。如果可以早人一步知道後市嘅去向，個心就會踏實好多；喺呢啲時候，真喺塔羅牌同龜殼都攞埋出嚟占卜咁滯。 正如市道唔好，就會多左人去算命，揾大師指點迷律一樣。

(上面第一幅喺歌賦街九記的爽伊同咖哩腩伊，下面喺九龍城德昌嘅蛋河。)


PermaLink: https://articles.zkiz.com/?id=19908
Next Page
ZKIZ Archives @ 2019