|
||||||
|
去完史丹頓街，諗番自己熟悉嘅曼谷遊客區，暫時得到一個推論，就係歐美人士來亞洲旅行，喜歡尋幽探勝，專門去一啲在佢哋眼中，有本土風味，亞洲傳統風情嘅地方，反之，如又一城、圓方之類，只係亞洲人中國人讚好，外表及名店夠晒國際化，但內裏遊人就十分本地化。 以此點請教陶傑：「用舊地方、舊風情嚟吸引外國遊客，是否係蘇絲黃情意結呢？」陶傑嗤之以鼻，佢話樣樣自鳴清高者只係反殖情意結嘅反射，腰骨未直，怕以過去真面目示人而已。喺呢方面，泰國人反為更加開放，思想冇包袱，不似香港人咁，賣旅遊景點，又痕又怕痛。 行 史丹頓街，街道狹窄，車又多，人又多，往往人車爭路，但成條街顯得熱鬧有氣氛，行行吓就唔覺唔覺咁，行咗半個鐘頭以上，行返落皇后大道中，不覺辛苦，大概 係沿途有不少舖頭，有嘢睇之故。想起幾年前住在上海浦東君悅，落到樓下，只見幾十層高嘅大樓，一座又一座，這麼近，又那麼遠，大馬路與行人道夠晒闊落，但 馬路旁邊全無店舖，大廈之間無天橋連接，過馬路又煩，幾乎想叫架的士去位於兩條街之遙嘅另一座大廈。一位建築師對左丁山講，呢類建築製造孤島效應，唔使去 浦東，走去將軍澳行吓就可以體會到，大抵所有因為人造市區設計（urban planning）嘅新市區，都犯上呢個毛病，因為嗰啲設計人（planners）不懂如何安排區內之organic growth（區內自行成長），只懂得坐在冷氣房間，根據課本理論憑空劃則，一塊積木、一塊積木咁擺落去。 聽完建築師咁講，忽然想起西九， 他日會否如此劃成好似浦東陸家嘴咁款，宏偉則宏偉矣，奈何人氣稀疏，空洞無物？建築師話：「睇政府採用邊個設計啦。譬如本地薑嘅設計就以街道為主，塑造一 個neighborhood（鄰區）嘅氣氛，街道兩旁有文娛表演場所與博物館，夾雜一啲店舖，人在其中就會覺得好自然，冇疏離感囉！」聽講三個設計各有特 色，但本地薑或者更懂得營造香港日常生活氣氛，不讓西九變成一座又一座從天而降嘅建築物。 |
||||||