|
||||||
|
雖然話樣樣電腦 化，幾乎所有資料都可以上網搵到，但左丁山仍然喜歡每年買番兩三本「香港統計月刊」，放在書架，方便翻閱。十月中就買咗「香港統計月刊」二○一○年九月 號，今期有一篇專稿，就係「二○○九年就業綜合估計數字」，○九年有三百四十八萬六千九百人就業，點樣劃分呢，百分比如下：公共行政、社會及個人服務（包 括政府、教育、保健、藝術娛樂及其他社會個人服務），有25.1%；金融保險地產以及專業及商用服務，18.4%；資訊及通訊業2.6%；運輸、倉庫及速 遞服務，9.2%；住宿及膳食服務業7.3%；進出口貿易、批發及零售業25.4%；建造業7.5%；製造業3.8%；電力、燃氣、自來水供應及廢棄物管 理業0.4%，其他0.2%。 睇吓呢啲數字，就唔會人云亦云，最近張炳良教授在《南華早報》撰文講香港太過倚賴金融地產業，啱唔啱呢？睇吓 統計數字，就知道張教授可能係「想當然耳」。以就業人數而論，香港兩大僱主係「公共行政、社會及個人服務」與「進出口貿易、批發及零售」，兩者已僱用一百 七十六萬人，佔總就業50.5%，超過一半。金融及保險業，地產業加專業，只排第三，僱用六十四萬人。至於有人講工業政策，重振製造業，對唔住，製造業只 聘用十三萬二千五百人，點可能為香港提供大量職位呀？畢竟二○一○年唔係一九八二、八三年，當時製造業僱用八十幾萬人，之後工業北移，工人轉業，即使今天 有人要在香港開廠，去邊度搵熟練工人已是一個大問題。 睇吓GDP數字，製造業嘅份額在二○○八年係2.5%，服務業佔咗92%，其中批發零 售進出口佔28.2%，金融保險業26.7%，社區社會及個人服務17.9%，樓宇業權11.5%，可以見得今天香港仍然講得係一個商埠，GDP仍然以進 出口批發零售為主，並非過份倚賴金融地產業。本來呢啲數字係好公開嘅，睇吓就知，偏偏香港不少評論員、教授（非經濟學）每每憑印象發言，唔睇吓數字，香港 已經係一個服務業經濟體系，再講振興製造業，廠家都掩住嘴笑。 |
||||||