📖 ZKIZ Archives

中秋佳節，人月兩團圓。四叔李兆基冇留喺香港同家人團圓，而坐咗佢架新私人飛機直飛溫哥華。所為者何？拜祭故人也。

該日佢去咗觀音寺為老友馮景禧上香，並簽咗大筆香油。二十八年前之中秋時候，馮景禧喺溫哥華過身。草創之初，四叔同新地之郭得勝、新鴻基證劵之馮景禧有三劍俠之稱。三劍俠現今只剩番四叔一人，而情義依舊，難得。除咗為故人上香，當晚四叔仲同故人之子湯馬士‧馮永發一家食飯賞月。臨別拎出五百蚊美金俾個侍應；唔係所有侍仔分五百蚊，而係人人五百蚊。真係唔想過個快樂中秋都難也。

本週人有相似

娛樂圈個個都係倒模Angelababy，「撞口撞面」都好正常，但原來政經界都有好多撞樣例子，你又覺得佢哋似唔似？「富豪飯堂」福臨門「五哥」徐沛鈞（左一），年輕時風流倜儻、身材瘦削，鵝蛋形的面上，一對濃眉細眼；驟眼睇，同無綫藝員黃長興（右下圖），又有幾分相似噃。

馬時亨幾時同純官（左二）行埋？呀，唔係，遠睇周大福嘅獨立非執董林健鋒（左一），憑着其向後Gel的髮型、雄偉的身形、圓潤的臉龐，加上一副幼框眼鏡，差啲認錯係人稱「肥馬」嘅前商務及經濟發展局局長馬時亨（右圖）添！

七十年代麥當勞中環分店「泡毛他」（右下圖），不知名不知姓，但見佢九一分界、面形修長、下巴兜兜、眼睛深邃，同前一哥鄧竟成（左下圖）簡直一個餅印！唔通……前一哥年輕時，喺老麥打過工？

金牙大狀講嘢程介南父出殯

小宗週一路經「大酒店」，發現好鬼熱鬧，眼見熟口熟面嘅政商界人士穿插。望一望水牌，地下係永亨銀行前董事長曾永康出殯，二樓則係前政界人程祖鉞。程祖鉞唔係咁多人識，但正是程介明及程介南爸爸。程祖鉞於七月底逝世，終年九十七，笑喪也。他是江蘇揚州人，份屬愛國一族，九九年曾擔任五十周年國慶籌委會執行委員，龍應台寫《大江大海》都訪問過程老先生。呢日老左派吳康民、民建聯譚耀宗、葉國謙、仲有吳克儉及劏房波都有嚟。程介南當年出監後，繼續做政治公關，去年立法會選舉，仲幫鍾樹根、何君堯等搞形象設計。哥哥程介明則係政府策發會委員，兩兄弟繼續撈得住。

Give me a break雪茄盒入門版

近期中環吹起一陣雪茄熱，就算不吸煙的，都買番幾支嚟儲吓，以示「級數」。要將雪茄保養得宜，當然要買番個靚盒收藏。做開上市公司IR（investor relations）嘅喬家熙，幾年前開咗公司Jurali，生產自家製嘅collector box，放响連卡佛寄賣，據佢講，西京投資嘅劉央都係佢客仔。咪以為劉央用得嘅，肯定係貴嘢，原來Jurali出品只係萬多兩萬銀，絕對係呢類收藏盒嘅入門版，坊間有啲盒可貴到幾十萬元。雖然話係入門版，之但係，小宗見啲盒手工相當唔錯，個個盒嘅鋼琴漆面都令立立，外面層木用非洲沙比利，雪茄盒裡面就用西班牙雪松木，打開個盒隔開一米都聞到陣木香，濕度計以及濕度控制裝置呢啲架生，當然亦唔少得。喬家熙話劉央之所以幫襯，全因盒面嘅胡永凱畫作。呢位北京畫家聽聞連朱玲玲都是其粉絲；而Jurali另一位合作嘅畫家，係馬來西亞嘅Eng Tay，喬家熙更將佢其中一幅畫作一分為二，變成一對紅及藍色嘅錶盒。盒上面嘅畫，係先將畫作scan落相紙，再貼上盒面，之後成個盒吊起噴鋼琴漆，再人手打磨。最近喬家熙仲同上年嚟過海港城搞展覽嘅日本畫家Riusuke Fukahori傾緊，睇吓點樣將佢世界聞名嘅立體金魚畫，crossover响收藏盒上。由來咩都可以收藏兼炒一番嘅香港人，又有新對象！

施政不前燒炮仗

林鄭個政助張秀麗劈砲，話「想多啲時間陪父母」。佢係繼幫茂波陳之何建宗，及幫張建宗之莫宜端後第三個辭職之政助。是否出現跳船潮，好難講，689政府有請人、留人之困（特首辦新聞統籌專員鄧惠鈞唔do，半年啦都仲未搵到人頂替）則是不辯之事實。有識之士話咁樣落去會打擊施政。果如此，就燒炮仗啦。咁講法唔係幸災樂禍，只不過自689掌權以來，佢標榜之「政策成熟一項即推出一項」，由改組司局架構到白表買居屋到發展新界東北、擴建堆填區，莫不是鑊鑊新鮮鑊鑊甘。若果佢老哥施政事事順遂，咁特區仲有得剩乎？故此為咗特區好（亦即係為咗國家好），求神拜佛都望689施政行不得也哥哥，否則香港遲早淪陷。君不見班港共唔係話2017冇政改都冇乜大不了，咁施政不前又算係乜呢？