投資者憂慮全球經濟復蘇步伐放緩，杜指上日大跌141點，拖累全球股市向下。到歐洲股市昨日開市時才定番啲。杜指開市不久再次跌穿10000點，低見9942點，中午回升，但尾市再度回落。值得慶幸嘅係收市仍能企於10000點這個重大心理關口之上。杜指收10015點，微升5點，標普500指數升不足半點，報1049點，納指跌6點至2114點。杜指期貨最新報10029點，比現貨樣高水14點。大市交投較上日活躍，紐約證券所成交逾14億股，比上日多出55%。
港股美國預託證券造好，ADR港比指數收報20629點，比香港收市高93點或0.5%。匯控收76.56元，比香港高1%。中移動收79.86元，比香港高0.9%。
美股終於渡過一個惡夢般嘅八月。杜指全月下跌4.3%；標普500指跌4.7%；納指跌6.2%。係近10年以來最差嘅八月。踏入九月，淡友應該會好興奮，因為九月係美股傳統嘅淡月，32年以來有21年係下跌嘅。不過，惡劣形勢又唔完全一面倒，因為杜指企得好硬，仍能收於10000點上方。
依家市場最大嘅憂慮係呢架經濟復蘇列車，越行越慢，係唔係已經唔夠「無油」呢？呢個憂慮除咗反映喺股市交投淡靜上，亦可以從金價同債券大升睇得到。黃金昨日收報每安士1250.3美元，喺八月份已升咗5.8%，全年漲幅更超過14%！債券價格亦不斷向上，美國10年期債券孳息率跌至2.477厘。反映投資者將資金由較高風險嘅股市搬去買金同債券避險。
市場氣氛悲觀，投資者普遍認為美股昨日應該無運行，誰知又頂得下。主要原因係公佈嘅8月份消費者信心指數為53.5點，好過市場預期；標普公司發布的Case-Shiller房價指數顯示，美國20個主要城市的房價，7月份較去年升咗4.2%，部份原因係稅務優惠推動房屋的銷售，據Case-Shiller指數設計人之一嘅 Karl Case表示，美國房地産市場的狀況已好過去年。這些利好消息一定程度上紓緩投資者嘅憂慮。「恐慌指標」VIX指數亦跌番近半成。
網友大笨袋鼠提到一個好有趣的意見，經濟學實驗有「選美遊戲」，「因為這遊戲設計源自凱恩斯的巨著《通論》(Keynes, General Theory of Employment Interest and Money, 1936)之中，一段有關於他對投資市場的評論中，用上一則報紙美女貼圖選美之讀者比賽為比喻：報紙刊登了六張美女面貌照片，要求讀者投票選出心目中認為是最漂亮的面孔，若果讀者所選的面孔是最多人選擇的，該批讀者便可參加抽獎贏取獎品。於是乎，有心想得到抽獎機會的讀者，他們投票時，要考慮的並不是自己認為最漂亮的面孔，而是要估算那一張是最多人選的面孔。
大笨袋鼠話：「芬佬群每個月要交數，可沒有時間去等醜小鴨變白天鵝，而是很多時侯，要估那一隻鴨會被其他芬佬會追捧出來。」
基金有月結、季結、半年結、一年結，你做芬佬，揸咗一堆醜小鴨，隻隻不單無變天鵝，過得幾個月，仲變成更醜的中鴨、大鴨的話，就如股神巴菲特所講，真想躲到辦公桌下面，有電話都不想接，怕是投資者打到問何日投資才可以見家鄉，這是芬佬的噩夢。
所以實情係咁：第一，芬佬當然會做基本分析，但不會盲信自己的基本分析。他們會信自己有能力選出美女，但也會顧及芬佬社群的口味，他們相中一個美女，也會 留意佢有無市場接受的概念，估吓自己買完，其他人會不會買，若認為口味太冷，其他人未必會買，買都唔會買多。所以他們雖有慧眼，但不一定識英雄，皆因有短 線交數的壓力也，一些購買行為變得即食。
第 二，結果出現一個「趨熱傾向」，例如市場流行新能源，流行風電，就一窩蜂走去炒，以風電設備為例，過去一年由於投資市場太熱，好多生產線上馬，供過於求， 到國家話要限制無效益的風電項目上馬，設施產能過剩的問題馬上浮現出來。但玩這個遊戲的方法是入得快，走得早，有時唔一定要睇基本因素睇得好準，而係估市 場好快會熱起來，所以入得夠狼夠快，入得比人早，到其他人跟入，一有風吹草動就閃，反而較易有好業績。但反過來看，如果你避熱就冷，人地買熱馬好好表現， 你買冷嘢無表現一年半載，就更易被人淘汱。
第三是熱得快冷得也快，睇基本分析不如睇走勢。正如我早前在專欄講起內地消費股係天使股，按道理這些股會一直升，直至到基本因素有變為止，例如季度盈利增 長開始顯著放緩。當然，出現這種情況，股價必將大跌，問題是出現基本因素轉變時，可能已經太遲，股價早已回落，因為市場太多知情者，他們可能是公司的相關 人等，也可能是競爭對手，清楚知道競爭加劇，市場轉壞，業績未反映出來，他們已率先沽貨；更有甚者是這些股份升得太誇，升到過哂籠，升到４０、５０倍市盈 率，未等業績轉壞，就自行踏入一個爆泡過程。
所以即使你唔係炒股，只想投資，買了這些基金愛股，也要小心，因為你唔炒，基金也在炒，佢持貨體積大，會走得比你早，當你見到一段時間（例如一個月）這些好股都係應升唔升打橫行時，可能已是大戶出貨的訊號。騰訊(700)
在3月不能升穿高位後，有三個月橫行上落，估計有一批基金已退場，現時有少少反覆一級級落的形態，若佢季度純利不能維持60%的高增速，小心已見高位。
陸羽仁