奇招發通脹財
2008-07-24 NextMagazine
本週一港府公布最新通脹達百分之六點一，創十一年新高，個個叫救命。
不 過，就有人逆流而上，在通脹壓力之下開出新財路。冰鮮大王郭時興開冰鮮豬肉檔，愈開愈旺；以魚腐湯米線打出名堂的魚米家老闆周榕貴，卻賣魚蛋食多條水；日 本奶粉網站BB-Land引入日本流行的「予購」消費模式，又多條財路。只要有橋，通脹一樣有大把機會搵銀。冰鮮豬變新貴
早上十時，街市買 餸的黃金時間，慈雲山中心街市的德聯冰鮮肉店，聚滿了一群急着買餸的師奶。「（比新鮮豬肉）平咗差唔多一半，佢開咁耐我就幫襯咁耐！」剛在冰鮮店以十一元 買了一塊「梅頭」豬肉的王師奶直言，雖然冰鮮肉的肉質不及新鮮肉，但她仍樂於幫襯︰「味道都係差唔多啫，我返去會用生油、糖、鹽、豉油調味，今晚用來 炒。」
「生意真係多咗好多！我哋要請多啲人，又要開新鋪……」德聯老闆、香港冰鮮禽畜商會主席郭時興，在場笑得見牙唔見眼，他說德聯叫「冷鮮肉店」是標奇立異，開業三個月，有賺無蝕。
「開頭每日賣七、八隻豬，而家每日起碼十三、四隻，我諗（生意）仲會繼續上升。」郭時興說，冰鮮豬是以豬殼計算，來貨每隻約一百斤，來貨價每斤十八個半，而他則以零售價每斤廿至廿八元出售，較新鮮肉平了足足超過四成。
郭時興以德聯為例，說每日賣冰鮮豬肉收入達三萬元，加上店內同時賣冰鮮雞和冰鮮鵝鴨，每日總營業額高達四萬元，扣除租金及人工等開支，利潤有兩成，每月純利廿四萬，還頂死其他鮮肉檔，順勢搶客，「我呢度一開檔，成個場已經一死三重傷！」
原來，場內其中一間豬肉檔已執笠，其餘三間繼續營業的，每日吊鹽水，「佢哋而家每日只係賣一兩隻豬，你話死唔死？」郭說。
開多四間
德聯所在的慈雲山中心檔位，屬領匯管理，月租達四萬三千元，比起食環署管理的同類型檔位，貴了足足三四倍，但郭時興仍然覺得「做得過」，還計劃開分鋪。
現時他有八間冰鮮肉店，其中三間今年開業，他對這門生意的前景相當樂觀，「跟住仲會開四間，而家裝修緊。我諗今年之內，應該可以有廿間！」他又透露自己的經營理論︰「每間鋪平均投資十五萬元裝修、買雪櫃，若果每日可以賣四、五隻豬同七、八十隻雞，咁肯定唔使蝕！」
郭 時興本是經營鵝鴨批發生意起家，九七年本港爆發禽流感，從此禁止內地活鵝鴨輸港，他眼見行業被取締，於是靈機一觸，開始經營入口冰鮮雞鴨兼零售生意，更在 廣東省經營冰鮮雞加工廠。目前郭氏冰鮮雞生意佔本港市場七成，據悉單是冰鮮雞每月的營業額，便達一千萬元，屬業界「一哥」，故有冰鮮雞大王之稱。
○ 六年，郭時興眼見豬肉價格開始失控上升，於是再打冰鮮豬肉主意，憑着他在內地做冰鮮雞生意的人脈，開始引入冰鮮豬肉，豬肉全部來自內地三間持牌冰鮮肉商。 本年初通脹開始上升，市民開始貪平多了買冰鮮豬，郭見機不可失，於是主動接觸食環署及領匯，租用他們轄下街市的空置鋪位，開設更多冰鮮肉專門店。
滿腹密計的郭時興，現在亦正計劃引入冰鮮牛肉。「而家等緊食環署回覆，大陸已經搞掂晒，但食環署就要上去巡視廠房先。」據悉冰鮮牛肉最快可以在九月放行。郭時興估計，冰鮮牛肉會比新鮮牛的價格平三成，屆時，他可賺大錢之餘，市民又可以有平肉食。
入市賣魚蛋
為了避開買貴肉，郭時興選擇搞冰鮮豬，而全港擁有十間分店的魚米家老闆周榕貴，則入市賣魚蛋，於兩個月前開了「魚蛋王子」，「我見年年元宵魚蛋檔三十幾萬租都大把人搶住做，即係香港人鍾情食魚蛋文化唔變，有得做。」他說。
魚蛋王子位於將軍澳坑口連理街商場，佔地二百餘呎，不設堂食，全部只供外賣，周榕貴說：「六蚊五粒魚蛋係間鋪主打招牌貨，唔好睇小六蚊兜魚蛋，日賣三百份，佔間店生意額六成。 」
從四川火鍋概念研創出來「麻辣撈」、碗仔翅，酸辣羹、炸酥餅，不少放工一族都買回家當晚飯加餸。「呢區無街頭小食，六蚊有兜魚蛋食過口癮，而家六蚊都買唔到一支水。」打呔的鄭先生說。
「魚蛋王子」開業兩個月，生意額每月二十多萬元，毛利有一成半，好過魚米家，「二千幾呎一間的魚米家，一個月盈利得百分之六，生意額比舊年少一成。呢度人手比魚米家少三分二，得十個人，開業成本只及魚米家一半，約五十萬元，管理輕鬆得多。」
以小勝大
周榕貴透露，選賣魚蛋是因為魚肉價格的升幅，較豬肉雞肉少。「凍雞翼以前七蚊一磅，而家十五蚊，升咗一倍；魚蛋去年賣十四蚊一斤，而家都只係加到十五六元。而且我的魚蛋供貨商係四海魚蛋，本地製作，避埋人民幣升值的問題。師傅教落，多變先至可屹立不倒。」
人稱貴哥的周榕貴，是一代廚神鍾錦的徒弟。八年前他離開東海集團自行創業，漁民出身的他首創魚湯米線，大受歡迎，八年來開了十間分店，建立自己的餐飲王國。
不過，今年他的魚米家王國面臨通脹洪流衝擊，「以奧海城分店為例，○一年毛利廿萬，現在不夠十萬，盈利不足一成。」
「租 金加一成，食物來貨價加得仲驚人，米由舊年百幾蚊二十五斤加到二百幾蚊，沖奶茶咖啡的黑白牌奶一箱來貨價三百幾蚊，加幅係舊年一倍幾，凍肉、菜成倍成倍咁 加，每日都收到批發商要加價嘅電話，聽到我心寒。我預計呢個通脹潮有排唔退，死守唔係辦法，我知一定要變，唔變就死。」他續說。
師奶格價網
通脹創新高，人人都要「格價」，尋找至抵價。IT人Cindy六月創立「師奶網」（www.c9web.com），在網絡上聚集全港師奶，呼籲網友購物後將貨品價錢及購物地點即時上載。
全部格價行動，出於自發，大家不收分毫，概念恍如維基百科集結網上力量，果然跑出。網站開業僅一個月，已有連鎖平價商戶「價真棧」主動在她的網站報價，又有奶粉商主動找上門想刊登廣告。
中 大數學系畢業的Cindy，從事電腦軟件開發工作。她說自己的購物模式是想買某類產品，便會先MSN問相熟朋友，發覺很有用，於是便設計一個網絡平台，供 各方親朋好友上載購物情報，「最初諗住只係方便自己同班朋友，後來多咗好多網友加入，諗唔到有咁大回響，大家唔識都好，都會响網上交換購物情報。依家想買 咩，都會先喺網上留低產品名稱要求報價；又試過喺朋友度食過一種朱古力，覺得好好味，會放張圖片上去，問吓邊度有得賣同邊度買最平。」Cindy說。目前 該網已有一百二十個「網路師奶」加盟，齊齊做格價特工。
「予購」日本奶粉
冰鮮豬、魚蛋成為逆市奇葩，連日本奶粉的批發商亦生意滔滔。一直經營日本奶粉批發生意的李志文，以先錢後貨的「予購」零售方法，超低價賣奶粉，突圍成功。
事緣李志文近月忽然收到不少客人致電，查詢購買奶粉。原來，一些眉精眼企的母親，見一直幫襯的店鋪奶粉價格不斷上升，於是在網上「左摷右摷」找到李志文這個批發商，希望直接入貨，免除中間人的利潤。
「既然有咁多生意送上門，不如我哋索性做埋零售。」李志文於是在三個月前開始設立零售網站BB-Land，短短三個月已經累積了四千名客人。每位客人平均每次買八罐奶粉，單是過去三個月，便為他帶來額外純利廿七萬元。
「予購」一詞源於日本，即「預先訂購」，「啲客而家訂貨，我哋要佢哋即刻俾錢，然後我哋幫佢哋訂貨，三個星期後送貨。」他說。
他說以這種形式做生意，可以確保不會囤積死貨，而且由於免除匯率變動的因素，亦可以令他「實賺無蝕」。他以森永的細仔奶粉為例，八罐一箱的現貨價為$1560，但若「予購」，售價只是$1360。媽咪買到平奶粉，怎會不繼續幫襯。