ZKIZ Archives


朱Sir講書 左丁山



2010-12-25  AD


 

一位傳媒前輩已 經退休咗,呢日睇報紙見到有留英學生話在酒店住大廳地板,好似集中營(電視訪問嘅原文好似係:有concentration camp咁嘅feel),不禁連聲嘆氣,猛話:「啲年輕記者、編輯、學生唔好亂咁用集中營呢個名詞,住在酒店內,無風無雪,有被冚,瞓吓地板啫,就話似係 住喺集中營,佢地根本都唔知道乜嘢叫做集中營,亂咁噏,捱啲咁多辛苦,就好似天跌落嚟,畢業後點捱世界呀!」呀,前輩有所不知,呢班九十後他日唔駛捱嘅 啫,好得過人地有生性父母,生活無憂,佢地畢業後唔駛搵錢養家養自己嘅,可以好正氣咁去做義工,幫助非洲人。

左丁山未經戰亂,不知集中營係點嘅,睇荷里活電影,例如《桂河橋》或者猶太人在二次大戰時期嘅遭遇,我地就會知道多少集中營生活是何等淒凉,不過呢啲電影或者過氣晒嘞,九十後唔鍾意睇。

富 裕社會唔講捱苦,要講社會責任,企業社會責任。中文大學商學院碩士課程畢業禮在十二月十八日舉行,主禮嘉賓係美國友邦保險有限公司董事局董事及執行副總裁 兼投資部總監朱泰和,人稱朱Sir,就企業社會責任發表演講。叫佢阿Sir,並非擦鞋,而係佢從商之前,係協同中學校長,在學校就俾人叫慣做阿Sir嘅 喇。朱Sir在七四年獲得中大MBA之後,就棄教從商,入咗美國銀行,做香港分行人事部主管,其中一項要務就係為銀行請見習生(trainee),三十六 年之後,大家都係孔明,就知道朱Sir請人,眼光的確獨到,當年美銀經朱Sir部門聘請之見習生,今天係好多間私人銀行嘅頭頭,或係CEO,人太多不能盡 錄,最出名嘅就係梁高美懿(恒生CEO),已退休嘅蘇皇銀行亞太區阿頭袁鯤濤,前美銀亞洲CEO錢乃驥等等,可能係做慣校長,請人時識得揀叻仔叻女啩。

 

朱 Sir在畢業典禮上講CSR,要求畢業生在日常生活行為中,親身體驗,例如慳水,做義工,行善,導人向善,不必倚賴他人,最緊要主動幫助不幸之個體、羣 組,搵工時就要考究埋目標公司是否係一個良好企業公民,有無CSR項目等等。朱Sir講CSR最啱啦,佢為人誠實誠懇,做慣校長識講書,NGO搵人演講, 搵朱Sir就實啱─只要佢得閒嘅話。


PermaLink: https://articles.zkiz.com/?id=20513

又係講書 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120517/16343231

馬會尊重母親節,跑馬日改在星期六,於是左丁山罕有地在五月十三日星期日中午,留在家中,是日有「城市論壇」,題目就係講教科書教材價格。一位講者李慧瓊議員一開口就話教科書好貴,一本小學書賣過百元,仲貴過大作家寫嘅小說。另一位講者係中大金融系教授王澤基(中大畢業嘅 Rhodes Scholar,牛津大學經濟學博士)指整個議題十分無聊,從數字、數據嚟睇,香港教科書行業不存在壟斷及厚利(更唔駛講暴利)嘅問題,不過理性教授遇上一位情緒太太,即係一位樣子甚為富泰嘅家長代表李思傿,就真係有理說不清。睇完第一節,先知道 now635播緊 NBA季後賽, LA湖人對丹佛金塊,連忙轉台,睇緊張嘅 Game7好過。

睇吓波,諗吓香港嘅時事,懷疑特區政府推行政策時,係根據理性政策分析,經濟分析,從數字數據着手,分辨事有大小輕重緩急吖,還是落區聽得多師奶抱怨,基層訴苦就心急行事,向民粹低頭?好似教科書咁,明明只係一個年值十一億元左右嘅市場,在香港眾多行業之中,根本不值一提,講到稅前利潤,攞晒都未必夠在半山買一層豪宅,要賺幾多年先至等於候任梁特首間山頂獨立 house嘅市價?與公屋上樓、土地供應、經濟增長放緩、通脹上升形成滯漲等等大問題比較,教科書價格根本全無優先可言,教育局竟然將教科書煲到成幾日嘅頭版新聞,簡直係同下任政府開玩笑。如下任教育局長真的是傳聞中之人力資源專家吳克儉,佢上任後應該搵佢位中大師弟王澤基攞吓關於教科書嘅意見。鄭大班在報紙撰文講香港應依照英基學校、國際學校做法,每年向學生派發國際通行嘅教科書。鄭大班有所不知,香港特區政府教育局有博士教授級數嘅課程專家,佢地研究設計嘅課程,有香港特色,與國際不同,國際通行之教科書在本地中小學根本不能應用,否則學生在本地公開試一定肥佬!如果本地學校要效法國際學校派書,唔該教育局廢除本地課程先!


PermaLink: https://articles.zkiz.com/?id=33689

Next Page

ZKIZ Archives @ 2019