原本呢篇文，應該係一篇《投資、投誠、投石》嘅文，講嘅應該係香港人有幾熱愛投資，由投資股馬波六合，到投資喺自己身上裝身讀乜班考物試；到喺大時代當下點樣棄暗投明，到最後大家都只可以投石問路，博一舖。
不過，因為一個 Facebook status ，我成篇文由標題到結尾都轉晒。
早兩日有人問我，咁鍾意寫嘢，對咁多嘢都有自己睇法，做乜唔做傳媒。曾幾何時，我都覺得一個人嘅性格，應該同佢做一份點嘅工有關係，但冇任何必然因果關係。即係，你個人吱吱喳喳講嘢冇時停，最好做啲要對客人嘅工作；如果你鍾意計數，就去做會計日日夜夜加加減減；如果你通山跑冇時停坐唔定，唔當差就嘥咗你。
係咪真係咁樣樣？係咪真係好似學友社每逢大學聯招放榜之前畀嘅指引， 50% 興趣、 30% 能力、 20% 現實需要？定係，當大家見到識於微時嘅朋友，再不堪都有自己嘅事業、自己嘅家庭嘅時候，先明白咩叫「百貨應百客」，一本天書點樣可以睇到老？揀科尚且唔可以倒模一號眼二號鼻三號嘴，搵份工，或者長遠啲講建立自己嘅事業，又何來金科玊律？
試下抽離啲咁講，返工其實係一種交易。放心，好符合道德、高主教唔會捉你嚟鞭屍嘅。交易，兩個字，一買一賣。 (喂用到爛喇) 賣嘅係時間同精力，買嘅係金錢及金錢可以換來嘅一切物質享受，以及金錢無法量化嘅經驗。咁好簡單啦，你一開始未必知道自己想要啲咩經驗，但肯定自己想要錢。咁，返工，唔為錢，為乜？
戴一戴頭盔先，以上嘅思路都係建基於萬惡嘅資本主義之上。如果有朝一日資本主義被推翻，勞動階級唔駛被資本家剝削，可以為著自由意志而選擇做愛做嘅事，世界變得真正平等大同，呢篇嘢就可以丟入垃圾桶。喂講真，係咁美好係咁理想嘅，區區一篇文投籃又算得啲乜。
如果返工為嘅係錢，放工為嘅就係駛錢。嗱，我唔係鼓吹腐敗嘅消費主義呀下。只不過，返工已經賣咗一日起碼三分一時間畀老闆，放工剩低嗰三分二時間又要撥啲去瞓覺，有啲浪費咗喺搭車，所餘無幾嗰啲時間唔喺物質上對自己好啲，同條鹹魚有咩分別？唔係叫你亂駛錢，只係應駛則駛。嗰啲「八十後青年人月入一萬儲一萬，五年後儲夠首期上車」嘅含風飲露神話故事，真係睇一篇都會壞腦。見朋友唔飲都要食，唔食都要搭車，唔搭車行路都要著鞋架？下嘛？
返工有糧出，係出賣時間同青春嘅回報。出咗半斤力，想話攞返足八襾，其實係合理期望。 《明報》總編輯劉進圖七年前撰文話「為理想不計較付出嘅年輕人」令人好感動，而事實正正係因為付出同收入唔成正比，年輕人先要以「理想」、「熱誠」、「使命感」去搭夠，去繼續推動自己為新聞行業捱生捱死，直到團火有朝一日熄滅，仲有人要、有能力嘅就轉行，冇得揀嘅、焗住做嘅，亦都學識「為現實不計較付出」，因為已經冇條件再計較。
港英政府時代高薪養廉，目的係令公務員團隊免於受到外界金錢利益所左右。傳媒貴為左右社會輿論嘅公器，縱使出唔到高薪養記者編輯，亦唔好賤賣報格或者台型丫大佬。偏偏便宜嘅政治花瓶名銜或者打開通往神州經商嘅大門嘅鎖匙，就足以收買話得事嗰班人，從而主導喺機器入面操作緊嘅螺絲。換著係你，作為基層新聞從業員，收入比最低工資高啲啲，而所屬機構又違心甚至嘔心，身心俱疲其實係必然結局。
「興趣唔可以當飯食」，老母教落嘅。食飯就食飯，唔好整色整水講興趣。搵到你嘅錢，喺工餘時間追求自己嘅興趣，先至真正盡興。將興趣同碗飯撈埋一齊，一年 365 日周而復始，好大鑊。因為興趣講嘅係興之所至，唔係講責任。
返工若是必然，寓工作於娛樂係令生活愉快少少嘅方法。但要留意嘅係，要喺工作入要搵到樂趣，而唔係將自己本身嘅樂趣擺落份工度。何況，「多好玩的東西，早晚會放低」，何必要透過工作消磨自己對興趣嘅興趣？