|
||||||
港股跌到散晒, 華華同好多散戶一樣,冇晒心機望個市,於是走咗去睇報紙,咁啱睇到一份《武漢晚報》娛樂版,竟然畀華華發現咗「跌市元凶」,報道話,黃百鳴監製嘅電影「忠 烈楊家將」喺8月2號開機,楊令公一角,由秋官鄭少秋演出。以前每當秋官主演新劇出街先有「秋官效應」,估唔到家吓市場反應咁快,開機已經搞到個市立立 亂。 秋官:未輪到我拍 大家可能會話,秋官一年拍N咁多套戲,遇上大跌市只係咁啱。但唔到你唔信,查翻紀錄,8月1日大市升 223點,最高仲升368點見22808點,係7月以嚟嘅高位,點知,第二日秋官套戲開機,個市即跌241點,仲要連跌5日,累積跌咗2172點。如果華 華話只係咁啱得咁蹺,恐怕說服唔到廣大讀者囉!華華都特登打電話去問秋官點睇,秋官講笑咁講,「我已經避開(股災)唔拍住,o依家未輪到我拍,股災又關我 事啊!」 被公認為「秋官效應」來源嘅劇集「大時代」,結局係秋官飾演嘅丁蟹啲仔跳樓死晒,丁蟹就癲咗兼坐花廳,播放期間最高跌幅達12.7%!據華華所知,楊家將嘅下場,無獨有偶,又係全家上下都死得七七八八嗰隻,劇情真係如有雷同,實屬巧合。 恒指自秋官開機以來,最多跌咗11.6%,啱啱開始拍嘅威力已經同廿年前嘅「大時代」播緊時睇齊,華華真係唔知,究竟係市場反應快咗吖,定係秋官效應功力已經去到化境呢? 近年秋官效應威力 《書劍恩仇錄》 2010年10月25日首播,翌日冇事,到27號,恒指跌436點。 《神醫大道公》 2010年5月10日CCTV8首播,11號大陸上證指收跌148.3點,深成指失守萬關。 《桌球天王》 2009年3月30日首播,恒指翌日即跌663點。 《楚漢驕雄》 2008年10月3日重播,至10號一個星期恒指跌2886點。 《潮爆大狀》、《大時代》 2007年8月美國播映,引爆美國次按風暴。 《謎》 2007年5月首播,翌日恒指跌111點。 李華華 |