一埋身即中招蔡思貝緋聞男友多到
1 :
GS(14)@2017-07-01 09:53:41蔡思貝自2013年當選港姐亞軍後，順利簽約成為大台旗下藝員，入行4年，緋聞男友數目一隻手都數唔晒，幾乎同佢合作過嘅，都難以逃過蔡思貝嘅手指罅……
崔建邦
近年轉形象，以打拳男正面發展嘅崔建邦，喺同唐詩詠分手後，一度同蔡思貝名字搭上。話說蔡思貝備受高層重用，但係經驗不足，經常NG，更有傳佢被拍檔林曉峰明窒明耍，仲講到蔡思貝匿埋喊，另一拍檔崔建邦見狀不單止開口護花，有次兩杯落肚後仲明言冧蔡思貝。
洪永城
同崔建邦一樣、曾經係「絕世好女友」唐詩詠前度嘅洪永城，喺舊年仲未單身時，被目擊放假時約埋蔡思貝去做運動，搞到唐詩詠嬲豬嗌分手，最後洪永城成功箍煲。不過，到今年洪永城同唐詩詠真分手時，有傳因為係蔡思貝做第三者介入，但當時洪永城否認，仲話「思貝係我同事、朋友」，亦表明大家係同事，唔會避嫌唔見。
沈震軒、羅仲謙
蔡思貝擔正演嘅《衝線》，一次過「搭上」兩位男主角，沈震軒及羅仲謙。當時仲未結婚嘅謙謙，有傳劇組到台灣拍外景時，蔡思貝主動黐實謙謙，搵到楊怡嬲豬，累謙仔被楊怡趕出家門。另有指蔡思貝喺拍劇期間，姣電沈震軒，令眾人眼中嘅cool man融化。
周志文
另一個喺拍《衝線》時已經同蔡思貝傳緋聞嘅人，仲有周志文，雖然舊年蔡思貝身陷虛報學歷及戲屎等醜聞，但都無礙佢收兵，有指佢趁正印男友麥秋成赴京公幹期間，背住男友同周志文去睇三級戰爭片《絕地戰場》，深夜更殺上男方位於藍田300呎公屋，孤男寡女喺斗室共處18小時。
鄭俊弘
因處理感情不當導致人氣下滑嘅鄭俊弘，喺2014年曾經被傳獲蔡思貝力追，有讀者當年向《蘋果》爆料，指當時與姜麗文拍拖嘅鄭俊弘，唔敢公開承認戀情之餘，另一邊廂仲同主動出擊倒追自己嘅蔡思貝孖住去睇台灣組合蘇打綠嘅演唱會，而蔡思貝頻頻藉捧場冧暈男方，包括對方擔任演唱會嘉賓，或出席活動時，都見蔡思貝到場支持。
溫家偉
與「大隻仔」溫家偉被影到拍拖到先達修理iPhone，另又被拍到收工後與大隻仔嘆茶時並肩而坐，更獲男方做柴可夫駕車接載，不過溫家偉回應緋聞時話過：「乜佢有男友㗎咩？同佢係好朋友，呢行好難得可以同女性做朋友咁close，同佢好似sister咁。」
來源:
http://hk.apple.nextmedia.com/entertainment/art/20170629/20072845