📖 ZKIZ Archives

肥胡要放膽 左丁山

2011-11-08  AD

疑似特首候選人兩位究竟誰人可以勝出，現時因新選委一千 二百人未選出，一啲舊選委對左丁山講仲未收到北風，唔知點樣投票住，故此難以預料。但睇嚇最近啲不同民意調查， CY遙遙領先，亨利大墮後，令啲擁唐派開始擔心咯喎，雖然後台夠硬，有曬祝福啫，但在民意戰線上本來領先二十幾個馬位，唔夠一年反而落後二十幾個馬位，一 來一回，俾落後馬追番五十個馬位有突，若真係在沙田馬場如此跑馬，馬迷必定噓聲四起，話係跑假馬，除非賽後報告證實率先領前馬係嚴重流鼻血、喘鳴，或心律 不正常！
呢日有接近 CY馬房人士與左丁山吃飯，佢自然喜上眉梢，話形勢愈來愈好，睇唔到亨利馬房點樣可以反先，在五個月內追番三十個馬位！佢都知道選委要收北風，但如果亨利 馬房在民意上輸得太遠，選委心理上會有壓力，事先不得不向北大人反映嘅啫。左丁山同意佢嘅睇法，但諗起一件事，立即向佢反映：「嗱，醫學界一啲私家醫生夠 曬坦白，公然發話，要求準特首上台後炒咗胡定旭，否則醫學界選委唔會支持佢，呢番說話，引起好多老友反感，輿論罵聲四起，唔該你向 CY馬房傳達，以我所見，絕大部份朋友贊成輸入海外醫生在公立醫院工作， CY如果支持私家醫生、梁家騮議員啲意見，民望可能大跌！」消息人士話 CY唔會贊成私家醫生言論嘅！
飯後在置地廣場散步，以助消化，碰到另一位消息人士，佢話其實一啲最近非常活躍嘅私家醫生，平時接近 CY馬房多過接觸亨利馬房，故此 CY對輸入海外醫生嘅立場，尚要存疑。
獅 子王就對左丁山講：「你話齊撐肥胡，我唔撐呀！肥胡好細膽，只搵到十個海外醫生願意返嚟，唔係一兩百個，有乜用呀，而且只每人簽約一年，識廣東話，大大歧 視外國籍醫生，除非肥胡及醫管局放寬輸入條件，一份合約以三年為期，否則我唔撐肥胡！」又係嘅，海外醫生除非單身，在外地剛啱約滿，否則嚟香港做一年咁 短，唔知為乜，醫管局唔該諗真啲，一啲私家醫生已經形象插水，駛乜驚佢地呀！

齊撐肥胡 左丁山

2011-11-02 AD

定期飯局輪到財務 A做東，佢請我地去九如坊蘭桂坊酒店嘅名人坊，呢度有名廚鄭師傅主政，早有名堂，原來財務 R係熟客，招呼自然更好，呢晚食得過癮，成班嘴尖朋友話冇得彈，尤其是一味桂花肉（豬肉）乜咁鬼軟熟嘅呢，入口似乎係神戶牛㖭，左丁山素來只識食唔識入 廚，不知鄭師傅有何秘方，亦無意深究。
飯局主要話題本來以股市、樓市、經濟為主，但呢晚財務 A提起公立醫院排長龍，醫生不足問題；佢不久前入醫院探病，一位年青醫生已經面露倦色，企度都幾乎想瞓覺，財務 A對醫生之同情，油然而生，點知醫生對佢地講：「 X先生情況好嚴重，只係時間問題啫，眾位親友請問想唔想……」財務 A一聽就火滾，立即答：「你係醫生，由你決定，唔係我地！」醫生立即告退。
財務 A話：「我唔係有意思鬧佢，啲公立醫院醫生一定係因為工作時間太長，全憑年紀輕，死頂啫！」公立醫院醫生人數嚴重不足，短期解決方法應該全面仿效新加坡， 立即輸入海外醫生。恢復九七前做法，所有英聯邦大學醫學院畢業生可來港執業。初期不妨首先開放，准香港人仔女在外讀醫科嘅，返嚟香港行醫先！
此言 一出，個個贊成，但有人反對噃，咪就係醫生組織囉。我地知道幾個醫生組織反對胡定旭、周一嶽之議，允許海外醫生在本港公立醫院打工，但不得私人執業，呢個 建議幾切中時弊，不會衝擊本港「星球人」、「月球人」嘅利益，對私家醫生無影響，好合理噃，點解一啲醫生反應咁大，聲言要求未來特首炒肥胡魷魚，唔俾佢做 醫管局主席，依家趁特首競選開展之時，乘機要脅呀？將醫生短缺問題政治化呀？聽到都把鬼火，財務 A話要考慮成立一個關注組，與嗰啲醫生駁火！左丁山唔駛搵鍾庭耀做調查，從眾多朋友嘅反應都可以暫下結論，大家力撐肥胡做醫管局主席（只要佢不動搖堅持輸 入醫生嘅話），力撐周一嶽，如果邊位疑似特首候選人向醫生組織威脅投降，就一於向佢柴台！

【飲食籽】為食肥胡飯堂　潮州幫私密廚房

1 : GS(14)@2015-10-11 00:03:56

工夫茶是「工」非「功」，講求工序，肥胡說潮州人不論早午晚也會嘆番杯。



【飲食籽：故味重嚐】架己冷，唔願信命前生早注定。為求個機會，潮州人在百多年前紛紛來港做苦力換取餬口生計。時代巨輪下，怒漢猛火也無處可消，惟有刻苦耐勞，賺得一文得一文。縱然有幸飛黃騰達，骨子裏還忘不了本性──慳。做人如是，作菜亦然。一煲潮州春菜排骨，吃罷加菜再加湯，年頭可吃到年尾；凍魚一次過蒸十條，待涼蘸醬吃也不錯，省時又省爐火。這簡單的味道，也是架己冷醫管局前主席胡定旭的家常味道。趁首屆香港潮州節正舉行得如火如荼，就由自認饞嘴的他帶路，食盡香港正宗潮州菜。


「我係潮州人！」香港架己冷人多勢眾，名人明星如李嘉誠、林百欣林建岳父子和鄭秀文等，當然還有醫管局前主席胡定旭（肥胡），「我父母阿爺阿嫲都係潮州人，可能習慣咗，好鍾意食潮州菜。」即管相約這位正宗「潮人」嘆潮州菜，他首選架己冷私家飯堂香港潮州商會會員俱樂部。「呢度夠地道，係潮州師傅做，又冇味精。」肥胡說。饞嘴者該也知道，一向各鄉派系也會在香港設同鄉商會或俱樂部，做最正宗的家鄉菜，讓流落異地的鄉里能以味覺一解鄉愁。不過，要來這潮州同鄉會開飯不易，皆因入會者除要先付終生會費二千元外，還必須是潮州人，並由會董介紹及核實身份。慶幸這次能托肥胡的福，好讓我這個「非潮人」也有機會一嚐此潮界私竇美食。



慳儉當苦力　西環成潮人地頭

「潮州人好慳，好似凍魚凍蟹，明明蒸好又唔食新鮮，要凍咗先食？因為以前搵個火都係錢，不如一次整十條，留九條之後食，咪慳火又慳力。」肥胡還說，潮州人愛吃的春菜，便宜不過，過年會買一大堆回來做醃鹹菜，或加冬菇、排骨、黃豆做春菜煲，「飲晒加新湯再煲過，年頭食到年尾都得！」簡單，其實也可出神入化。飯局上，由肥胡發辦選的檸檬燉鴨湯，正正是潮州人的住家湯。自家醃製約兩三年的鹹檸檬加金華火腿及鴨燉成湯，鮮甜帶微酸，夏天開胃，冬天滋補，小孩吃最有益。再來一碗甜品銀杏芋泥，也勾起了肥胡兒時甜蜜回憶，「以前屋企人多，最鍾意叫潮州菜到會，食完甜品一齊飲潮州茶，每星期至少一兩次，好開心㗎。」潮州人，本性刻苦耐勞，知慳識儉。問道肥胡何有此特質？他笑言︰「你覺得呢？想當年，上海人廣東人帶住錢落嚟香港，潮州人呢？靠喺三角碼頭做苦力，一分一分錢儲番嚟。」西環的三角碼頭，於上世紀五、六十年代幾乎主宰全港人命運，皆因當時本港白米及副食品九成也經這碼頭進口，而負責扛起此「重任」的大部份是潮州幫。西環成了潮人地頭，潮州菜館也應運而生，發揚光大。早期潮州菜館是擺街檔為主，後來就有以魚翅馳名的上環天發酒家，以及雲集多個潮式檔口的上環文咸西街「潮州巷」，可惜最終因拆卸成絕響。最後潮州菜館散落港九，如今只剩下樂口福、創發、金燕島及百樂等。昔日潮州人但求果腹，能慳則慳。菜式煮法不講究，配料不多加，粗茶淡飯已滿足，「而家你可能覺得海鮮貴，但當年食肉先貴。潮州近海，捉魚後用鹽醃鹹可以擺一段時間。」潮州菜，絕對是肥胡的comfort food，他卻遺憾多年來只到過潮州一次，「安排過好多次喇，最終都冇成行。直至幾年前高永文話不如搞個美食節，你知我最為食，去到真係好大感受，食到非常地道嘅潮州菜。」難怪肥胡甫有空就愛吃盡香港大小的潮州菜館，盼能尋回那份正宗的家鄉味道。



檸檬燉鴨湯　每位$50　潮州人愛自家醃製鹹檸檬煲湯，家喻戶曉，鹹中帶酸，夠醒胃。

滷水鵝伴掌翼四位用$320自家製滷水膽超過12年歷史，甘香醇厚。每間潮州菜館的秘方不同，視乎師傅手勢。

糯米蒸肉蟹　四位用$480　潮式與廣東煮法不同，棄用臘肉，改用蝦米、花生炒香糯米飯，再將肉蟹放面蒸，鮮甜無比。



胡椒鹹菜煮豬肚　四位用$160　這道菜要煮得好，豬肚一定要洗得夠乾淨，不能有臊味。

銀杏芋泥　每位$30　芋泥傳統是以豬油炒香，這兒卻用橄欖油，香濃綿滑但不膩。

非會員如果想到潮州商會吃飯，必須與會員同行。



香港潮州商會會員俱樂部上環德輔道西81至85號1樓



肥胡心水潮州菜館


黃金伊麵$168以前環境差，老一輩的潮州人會在壽宴時才吃糖醋麵，又叫壽麵。

煙韌糖醋麵　講究炸燜煎三部曲

「騌吱騌吱」，將潮州伊麵放入滾油先炸，再加老雞熬成的上湯燜煮，最後在原鑊煎，時而加蓋烘烘，時而拋起反轉，將麵餅兩面煎至金黃香脆，就是潮廳做傳統糖醋麵的不二法門。行政總廚張林波說，此麵難度最高是控制油溫，「油太熱，炸出嚟會燶，唔夠火又炸唔夠。火候要啱啱好，炸完再燜，煎至脆身。」肥胡愛它的做法講究，伊麵底是特別訂製，寧舍煙韌。他認為糖醋麵是潮州傳統文化，加糖加醋先後次序是學問。正宗吃法應先加醋後加糖，否則糖會溶掉失去粒粒質感。



潮廳灣仔皇后大道東375號麗悅酒店2樓


沙律骨香倉魚卷　約$600（時價）魚肉做魚卷，魚骨會加椒鹽炸香脆卜卜，蘸沙律醬吃人間美味也。

拆骨魚卷　魚肉起雙飛考刀工

土瓜灣的四點金飯店雖不算就腳，但開業四年已成潮人飯堂，如肥胡老友高永文常捧場。「潮州人慳吖嘛，好多菜館門面都唔係金碧輝煌，但好實在，四點金算高檔啲㗎喇。」肥胡說。他推介的一道倉魚卷，做法極考工夫，先將鷹倉起肉拆骨，魚片切成雙飛，釀入墨魚膠後，捲起冬菇、中芹及紅蘿蔔絲，最後上粉炸成金黃。這款潮州手工菜，單是將魚片切薄起雙飛已夠繁複，並非經常有機會吃到。



四點金飯店土瓜灣新山道18號地下


工夫鵝頸肉　$160（例牌）汕頭獅頭鵝肉厚味濃，每日新鮮滷製，滷水味盡滲肉中。

爽滑鵝頸肉　每日限四碟

「聽講以前有個住大坑嘅潮州人，晚晚要食消夜，最鍾意滷水鵝。個廚好犀利，將鵝頸啲肉逐忽拆下，變成碟滷水鵝。潮州人食完好鍾意，每晚都要食一碟。」肥胡娓娓道來關於新光工夫鵝頸肉的故事。這道招牌菜每晚只賣四碟，因鵝量有限，兩條鵝頸只能拆成一碟鵝頸肉。因鵝頸較常郁動，彈性十足，肉質嫩滑爽口。



新光潮州菜館灣仔駱克道405號地下



首屆香港潮州節美食

香港潮屬社團總會由即日至12日舉辦首屆香港潮州節，除有滷鵝、熏鴨、牛丸和魚丸等傳統潮汕小食攤位外，還有潮州工夫茶藝、傳統及現代文藝表演，如潮州雙鵝舞、手拉朱泥壺及鯉魚舞等。並有一眾架己冷如高永文、胡定旭及藝人周秀娜等來撐場。


牛肉丸（每碗四粒）$20

大隻佬手槌牛丸

以手槌牛丸聞名，門外有大隻佬真人「打丸騷」，用粗鐵棍在大砧板上將黃牛後腿肉槌成肉泥。牛丸咬落嗦嗦聲，煙韌爽彈，據說彈性媲美乒乓波。


魚丸紫菜湯（每碗八粒）$20

百年古法製魚丸

內地著名美食家汪曾祺曾說︰「沒吃晶華魚丸，不算到過達濠」。百年老字號晶華魚丸早已聞名海外，傳至第四代仍遵古法製魚丸，鮮香嫩脆。


鵝頸一條$920

千金買來滷鵝頸

將肉質肥美的潮汕特產獅頭鵝，以醬油、冰糖、八角等材料滷製，鵝肉滷得香滑入味，肥而不膩。獅頭鵝鵝頸滷水味香濃，肉質嫩滑，每條索價近千元。



香港潮州節時間︰8/10至12/10（10:00至20:00）地點︰中環遮打花園入場費︰免費



記者：黃依情攝影：陳永威、林栢鈞、楊錦文編輯：謝慧珊美術：吳子豪





來源: http://hk.apple.nextmedia.com/su ... t/20151009/19325700

---