|
||||||
|
有人話過，有錢佬有兩樣嘢至鍾意搞，就係政治同埋女人。但計華華話，應該仲有一樣，就係傳媒，而呢一家嘢，近年嘅吸引力，似乎已經超越咗前面嗰兩樣！個個唔係撈開呢行嘅，都話要做傳媒大亨，而就算條路幾難行，都冇打擊佢哋要成為一個傳媒大亨嘅決心！ 好 似台灣米餅大王蔡衍明咁，一單「謎」一樣嘅收購（亞洲電視），再加一句冇香港記者聽得明嘅「炸能狗狗」（閩南話吃人夠夠），令佢個朵響遍粵港澳湛！咁亞視 單嘢o依家上咗法庭，仲喺度膠着緊，但唔使替蔡老闆擔心，因為佢喺台灣已經有電視台，又有報紙，仲趁呢個空檔，蛇咗返鄉下食其大茶飯！ 行家話唔係咁易 寶 島最大嘅有線電視系統中嘉（至少有105萬用戶o架），隨時落入蔡老闆嘅財團！蔡老闆拍住東森董事長王令麟同另一知名富豪蔡鎮宇搞咗間「旺旺寬頻」，打算 收購中嘉，單刁據聞盛惠715億新台幣（即係大概181億港紙），應該係record high，蔡老闆佔「旺旺寬頻」五成一股權，要掟幾多出嚟有數得計。 蔡老闆嘅傳媒版圖幾時可以擴展到有線電視呢？聽台灣行家講，又似乎唔係 咁易。第一，單刁應該要搞9個月先掂，加埋，蔡老闆檔旺旺中時集團，之前因為中視（免費）同中天（收費）兩個電視台引發嘅跨媒體變更，同監管機構 NCC（國家通訊傳播委員會）有牙齒印，家陣話叉隻腳埋有線電視度，唔係話叉就叉得……結果會點？唔知會唔會好似亞視單刁咁戲劇性呢？ 李華華 |
||||||