47歲前港姐李綺虹遺傳抑鬱症差啲做儍事
1 :
GS(14)@2017-03-26 15:38:20抑鬱症係一種病，並唔係一個人有幾頑強幾堅毅，便可以豁免。正如94年港姐季軍李綺虹，性格鬼妹仔，又參加過三項鐵人比賽，佢都未能倖免，經歷人生嘅低潮，患上抑鬱症。今年47歲嘅李綺虹，出道以來都順風順水，有一個好好嘅男朋友，可謂愛情、事業兩得意，但講起佢嘅童年，原來都有一個故事。幾年前，佢接受傳媒專訪時曾透露，6歲就同家人移民加拿大，但係爸爸媽媽忙住工作，所以佢好細個已經學會自己照顧自己，直到佢十幾歲，媽媽患上精神病，佢就開始要分擔照顧家人嘅責任，所以佢形容自己從來都唔係溫室嘅小花。李綺虹喺專訪到仲講到自己仲遺傳咗媽媽嘅抑鬱症，02年仲試過病發㖭！專訪中，李綺虹話98年，香港電影市道低潮，開始冇乜人搵佢拍戲，所以佢開始好驚，因為當時佢喺加拿大間屋起緊，錢銀上好大壓力，99年佢就返咗大陸拍劇，第一套劇就係拍住林志穎同蘇有朋嘅《絕代雙驕》，嗰時真係好紅，大陸同台灣都好多人識佢。李綺虹話，到01年，香港就完全冇工開，覺得冇謂喺香港租屋，就決定返加拿大。點知返到加拿大就發生巨變，患上抑鬱症。當時佢返到加拿大，覺得自己好冇用，無緣無故咁起身後，唔停咁喊，又試過揸車時好想衝落天橋，仲有佢講過拍攝電影時，亦因為一啲劇情而影響情緒。佢話記得有一場戲，講佢要自殺，拍咗一個下晝，徘徊喺抑鬱嘅情緒，拍完返到酒店，好在當時有老公Corey陪住。另一次就係拍《顧城別戀》，佢飾演顧城嘅老婆，俾顧城殺死，李綺虹覺得真係唔再值得接呢啲悲劇，因為佢覺得唔值得為工作而影響情緒。至於佢嘅抑鬱症，李綺虹就話好彩有睇醫生，食藥後已經痊癒。佢仲話04年囝囝出世後，做咗媽媽，寶貝仔就係佢最好嘅藥。
來源:
http://hk.apple.nextmedia.com/entertainment/art/20170326/19970390