入行21年零獎項 網民戥不值滕麗名被推做視后：想唔到咁遠
1 :
GS(14)@2016-07-12 22:06:26■40歲的滕麗名近日在《一屋老友記》中演技獲網民大讚，揚言要力撐她做視后。
無綫之前播映內地劇《瑯琊榜》收視插水，惟有急推收視福將歐陽震華（Bobby）與胡定欣主演的新劇《一屋老友記》救亡。然而，不少網民卻戥有份演出的滕麗名不值，因現年40歲的阿滕，95年無綫訓練班出身，曾是無綫力捧花旦，主演過的《陀槍師姐》系列最深入民心，她在《一屋老友記》劇中演技明顯比主角胡定欣出色，雖然胡定欣去年憑《鬼同你OT》於萬千星輝頒獎典禮贏得最佳女主角，但無奈阿滕於《一》劇只淪配角，難怪網民為阿滕感到不值，揚言要力推阿滕做視后。
■阿滕期望將來可以跟歐陽震華演情侶。劇照
■新劇中配角滕麗名演技比主角胡定欣出色，令不少網民為她不值。劇照
已完成部頭合約
其實在無綫而言，「非親生」仔女攞獎機會一向較低，而阿滕上周六與羅蘭接受新城電台訪問時，透露自己跟無綫部頭合約已經完成，只是合約仍未到期，雖然還未傾約，但她亦會繼續拍劇，揚言渴望跟Bobby演情侶，不禁令人聯想她會否想借續約換獎。
■前年阿滕跟朱建崑結婚，升呢人妻。
■魏駿傑與滕麗名拍拖9年最終分手，不少人均認為是男方走寶。
「唔可以話抵唔抵」
記者前日致電阿滕，對於從未在萬千星輝頒獎禮中獲獎的她，被網民力撐做視后，阿滕說：「啊，呢啲太遠喇，幻想唔到咁遠嘅嘢。其實TVB好戲嘅人有好多，每個人有唔同嘅際遇，都唔可以話抵唔抵嘅。要珍惜自己擁有嘅嘢，我哋對呢個行業喜愛先可以拍到咁耐，廿年來我冇離開過電視，冇呢種熱誠同愛唔會拍到。」不少網民為她只做配角感不值，記者問她可覺得無綫對她不好時，阿滕說：「唔可以話TVB對我唔好，始終佢養到我咁大，所有嘢都係佢畀我，我可以喺大陸拍劇都係因為《陀槍師姐》，凡事都有好多面。」對於網民留言力撐，阿滕坦言開心：「呢啲係我哋嘅精神食糧，其實冇預計觀眾嘅反應，拍嘅時候最緊要自己開心，同班演員又好有默契，應該要原班人馬再拍多次，乜嘢題材都好。」採訪：何慧斯
來源:
http://hk.apple.nextmedia.com/entertainment/art/20160712/19690639