祖藍蜜月騷大頭冇景李力持鬧爆又懶又廢
1 :
GS(14)@2015-03-07 09:00:36
呢期大台播緊一對新婚夫婦喺求婚之前已經拍好咗嘅蜜月節目，仲係某旅行社贊助拍攝，一連五集。唔使講大家都估到，男女主角係王祖藍同李亞男。節目去到紐西蘭南、北兩島取景，節目介紹仲話帶你親身體驗當地刺激有趣嘅必玩活動，但有人就覺得貨不對辦！話說前日李力持睇咗一集，唔睇還可，一睇幾把火，佢仲嬲豬到影埋相擺上fb，話喇:「去到咁遠，風景咁靚，但可以不停影大頭吹廢話，好嘢！精彩！唔想拍就咪拍啦，睇下人哋韓國，歐洲，台灣等旅遊特輯，拍到咁很悶，真係學到嘢！」係喎，真係張張cap圖都係大頭，說好的風景呢？佢前前後後仲話：「邊有懶成貢，廢成貢，服！」同埋「我想等個wideshot嚟影，等幾分鐘都係大頭廢up，明知演員唔掂就帶個寫稿啦，又要慳，頂！」等等。其實李力持都曾效力無綫，但佢今次真係老實不客氣鬧。最正仲係呢句:「我out晒啦！祖藍就in！我唔喜歡係我精神有問題，一定有人睇到感動到喊。」王祖藍喺大台已經出晒名叫做「王監製」，望名思義，李力持依家咁講，難免令人聯想到……不過，李生即刻話:「演藝學院出嚟，祖藍發展算無得頂啦，都鼓勵演藝同學多些蒲頭，咪淨係做話劇。」轉數確係快。
來源:
http://hk.apple.nextmedia.com/entertainment/art/20150307/19067061