二五仔世家 朱泙漫屠龍記
http://johnchrysostom.blogspot.hk/2013/08/blog-post.html'筆者拙文《英倫諜戰Cambridge Five》曾經介紹了在冷戰時代最轟動英倫的間諜集團Cambridge Five五子，包括Kim Philby、Donald Maclean、Guy Burgess、Anthony Blunt和另外一名身份仍未偵破但據說是身居要職的超級間諜。其中Kim Philby這名二五仔生父也是一名劃時代的二五仔兼一手促成沙地阿拉伯(Saudi Arabia)石油業興起的拆家Hillary "Harry" St-John Bridger Philby。 話說在一戰前夕，英法在邱吉爾主導下想逐步獨霸中東、沙地阿拉伯半島乃至波斯的油源。一戰時英軍美索不達米亞遠征軍(Mesopotamian Expeditionary Force)在中東一帶正蠶食西亞病夫奧斯曼帝國的領土。1915年遠征軍政治部主管Percy Cox招攬失意於印度官場的劍橋畢業生Jack Philby加入遠征軍負責雜務工作。到了1917年11月，Jack Philby正式被編入MI6負責前線任務的特工，深入沙地阿拉伯半島聯絡當時仍是窮得兩餐不繼的沙地酋長Ibn Saud替英國效力，這名Ibn Saud便是後來中東產油大國沙地阿拉伯King Abdulaziz。
Ibn Saud生於利雅得(Riyadh)一個遊牧家庭，年少僅有的地盤被Al Rashid族人佔據而四出流浪，最終投靠了科威特酋長Mubarak Al-Sabah，奠定了兩家日後世家關係。後來Ibn Saud及家人聯手武力驅走Al Rashid族人，嬴得眾沙地族人(House of Saud)支持而一統沙地阿拉伯半島。本來Ibn Saud希望認奧斯曼帝國為宗主國，豈料土耳其人還之以刀刃，結果Ibn Saud一怒之下在Jack Philby策反投靠了英國。當年英國人正猶豫Ibn Saud是否真正完全掌握沙地阿拉伯半島，於是Jack Philby便由利雅得穿過沙漠到達吉達(Jeddah)以證明Ibn Saud他在當地的政治實力。
一戰後Jack Philby在倫敦和中東主力協調錫安主義者(Zionists)有關在巴肋斯坦立以色列國的準備工作，其中包括Baron Rothschild(見拙文《伯爵特工》)。也許其本人一直以來在英國政壇非藍血貴族，後來決定離職而成為Ibn Saud的私人顧問兼做當地的貿易生意。據說Jack Philby為了娶四個老婆而甘受割禮成為伊斯蘭信徒。當年Ibn Saud的沙地王國除了萬里黃沙外收入只有靠到當地朝聖的伊斯蘭信徒，所以Jack Philby當年連兒子Kim Philby和家人的生活費也甚拮据。當年Ibn Saud曾希望像波斯一樣開發石油，可是由於沙地阿拉伯半島受當年Turkish Petroleum Company的Red Line Agreement下已被劃定為Anglo-Persian Oil Company的勢力範圍。英國為免沙地跟波斯競爭而不願開發。
到了1932年，美帝Standard Oil of California(SoCal)透過Jack Philby向Ibn Saud招手油源開發。在談判中Jack Philby聯同Ibn Saud把英國人的Anglo-Persian Oil Company踢出局，最終以相當於175,000美元的黃金為上期，奪得沙地60年石油開採專營權。後來SoCal把沙地石油權益和Texaco擁有的East of Suez權益合併注入一間公司，便是後來我們熟悉的Caltex。不久二戰爆發，二五仔之父Jack Philby還向德國和西班牙商討石油貿易，研究透過當時中立的西班牙向納粹德國出國石油的可能。
據說Jack Philby對當年在印度官場因性醜聞被炒一直耿耿於懷，加上他的反猶太人思想，所以在加入MI6之後一直以英國機密情報私下過料給Ibn Saud甚至美國石油公司。其子Kim Philby劍橋畢業後雖在MI6平步青雲，但畢竟虎無犬子，最終也變節投靠到蘇聯的懷中。事頭婆在二十世紀日漸沒落，也許多得這些二五仔不少！
999誰是二五仔？ 朱泙漫屠龍記
http://johnchrysostom.blogspot.hk/2014/10/999.html近日除了接二連三爆出CY Lai接受米帝資金以佔中為名在香港攪推翻共匪陰謀，又再傳岀其沽空期指套利。此際左仔和販民的街頭決戰似有緩和之勢，而恆指乘接上一個交易日下午單日轉向，於今天(2014年10月6日)升250.48點，收23,315.04點，成交港幣725.70億元。在上星期六瘋傳解放軍即將入城血洗之際，股市似乎成為了政治領先指標。不如今天筆者再引用羅富齊家族御用傳記作家尼爾·弗格森(Niall Ferguson)的鉅著『The House of Rothschild』去記述羅富齊家族於十九世紀利用其經濟力量參予影響歐洲政局的手段。
五枝火柴是羅富齊家族的標誌，代表在十九世紀其五大分支Nathan、James、Salomon、Carl和Amschel分別掌管其英國、法國、奧地利、意大利和德意志分舵的業務。作為猶太金融業的新冒起成員，Nathan Rothschild於拿破倫戰爭時已經投靠大英帝國。在英法戰爭高潮之際，大英帝國利用羅富齊家族五大分支的匯款網絡優勢向歐陸各公開和潛在反對拿破倫的國家或地方勢力「派片」以收賣他們的支持和支付軍事開始。如此龐大的匯款流向(其實相當於今天的SWIFT系統)令羅富齊家族早一步得知資金動向而在不同國家的外匯和貴金屬市場上下其手。這些內幕交易也許在今天是死罪，但羅富齊家族仍保有當年的會計和文書記錄，所以外匯市場其實和股市均是莊家打骰的地方。
以十九世紀羅富齊家族神級的金融機構地位，其放數的對象基本是歐洲的皇親國戚及其國家或領地政府。日漸沒落的歐洲貴族田產所出不足以支撐其奢華的生活，加上歐洲諸國在戰爭的陰影下必須舉債以支撐其軍事和公共開支，在如斯情況下羅富齊家族五大分支和歐洲的皇親國戚及其國家在債務上連結起一條微妙而錯踪複雜的關係網。這些皇親國戚鉅債令其或多或少成為五枝火柴各分舵的扯線公仔，而作為十九世紀歐洲公債之王的羅富齊家族又手握諸國公共財政咽喉而直接干擾其內政或就一些國家之間的角力作中間調停人的權力拆家(Power Broker)。
雖然羅富齊家族財雄勢大，但國家政局不穩甚至戰爭分分鐘令其有沒頂之災。碰巧十九世紀中葉出現了史前無例的革命風潮，這些遍地開花的革命沒有為歐洲帶來更美好的政治環境。以後法國為例，十九世紀內便是發生了多次戰爭、革命性和政變，這沒有帶來革命所預許的美好將來，而是而內政不修公共財政崩潰。以法王查理十世(Charles X)當政期間為例，法國國債(Rente)不斷下跌，令Nathan必須要從倫敦大量調金銀以保持James的法國分舵有足夠的現金頭寸。由此可見五大分舵攻守同盟分散了歐洲不同地域的地緣政治風險。
不過當年是英、法、普、奧、俄五強逐鹿歐洲，大規模歐戰隨時爆發，一旦爆發全面歐洲戰爭那麼強如五大分舵攻守同盟結構亦可以一鋪清袋。基於避免爆發全面戰爭的風險，羅富齊家族要不拒絕貸款予好戰的國家，要不便扶植「愛好」和平的領導人上場。以1830年比利時革命為例，當年荷蘭南部諸省脫離獨立觸動了五強的軍事平衡，在大戰一觸即發的壓力下羅富齊家族居中調停五強直接就比利時獨立問題講數。所謂比利時人的民族自決，還不是要由國際列強和羅富齊家族拍板決定其命運。
筆者一直有個疑問，究竟近日有關CY Lai及一眾販民涉及的政治獻金的消息和證據何來？！也許是共匪造謠抹黑，但亦有可能是國產零零漆刮回來。不過由近日的新聞可見似乎這些料是由美國人以是非作人情爆出來。中美經貿關係龐大，項莊舞劍，米帝佔中可能希望由共匪換取更大經貿或地緣政治合作的目的。須知道美國亦有反共和親華派，一派資助佔中一派篤背脊也不奇。但奇便奇在為什麼只交CY Lai出來呢？這是因為他落格？不聽號令？還是米帝應共匪要求把他的罪證交出來？無論如何，睇通這場縮骨革命局中局，便可以揣摩出政經之間微妙的互動，這或者是未來投資港股的一些啟示！
老美二五仔（下）
上回講到，美國二五仔大兵曼寧，將佢老美駐全球各領事館的超卨25萬份情報電文，泄咗俾維基解密，爆到全球都係，結果曼寧被判坐監35碌，如果真心支持資訊自由平等人權，對曼寧表達支持的最好方法，就係唔好浪費佢一番心血，閒時重温吓佢爆俾維基解密的內容，包括大約950份由香港老美領事館發出的情報電文。
香港政商高人當中，最經常出出入入花園道老美領事館、兼且最大口的，大家又估吓係邊個？苦瓜李柱銘？錯。多銀教主陳日君？錯錯。民主阿婆陳四萬？又錯。大話精CY （Lai）？都錯。
冇錯，頂頭張相查實已開估，答案係任志剛呢條「香港第一拎」。下文引述咗部分維基解密有關任一蕉同美國使館人員的會晤內容，各Reference ID後的Hyperlinks，就係任一蕉在花園道的一條條腳毛。
普通人去老美領事館，通常都會媽媽聲，又打手指模又排隊，任一蕉當日作為香港金管局行政總裁，全球人工最高的所謂「中央銀行家」，工作只有一樣，就係含住聯繫匯率條拎（Link），佢摸上老美領事館，好似普通人返阿媽屋企食飯咁平常如入冇人之境，例如有次去開搞護照，都會特登走去同老美領事打吓招呼嗲幾句。（Ref ID:
08HONGKONG1746）
眾所久知，任一蕉仲話得事的時候，堅持唔肯改革香港聯匯，不過對住美國佬講起大陸的匯率，條友又會雙重標準，兼且好鐘意阿吱阿咗，例如在2006年3月，有幾件老美參議員，訪華兼順便訪港，作為常客，任一蕉例牌衝去花園道打招呼，同人哋講人仔匯率改革步伐「不幸地緩慢」（Unfortunately slow），當年人仔匯率係中美關係熱點，任一蕉作為香港金融要員，鼓勵美國參議員，繼續向中國施加政治壓力（the U.S. should by all means continue to put political pressure on China），唔知算唔算手指拗出唔拗入？（Ref ID:
06HONGKONG1285）
咁都未算，同一場合，任一蕉更加在老美參議員面前，大口點評北京領導人，明示暗示，在人仔匯率改革問題，當時的總理溫家寶太保守阻頭阻勢，人行行長周小川面對太多官僚掣肘，如果周小川話得事，人仔改革晨早掂咁話。（If it was just Zhou, you'd be there）當年的副總理鐵娘子吳儀，在老美圈內評價甚過，任一蕉仲提醒美國朋友，由金融改革的職責到認識，吳儀其實只係一知半解。（her responsibilities and knowledge with regard to reform of the financial system are limited）
查實2005年7月匯改之後，人仔一直在上升軌跡，2006年3月的時候，兌美元已經開始衝「八算」，換句話講，港元咬住「7.8」，人仔兌港元好快見「一算」壓力（2007年1月人仔兌港元突破Parity一兌一），阿水都見到，內地同胞嚟香港買樓掃名牌，折扣越嚟越大，任一蕉堅持聯匯對香港冇構成通脹壓力，唔知呃邊個。佢老味，呢班友仔對住美國佬又係另一套講法。2006年4月一份外交電文顯示（Ref ID:
06HONGKONG1383），有條坐喺香港政府某委員會的二五，同美國駐港領事館爆料，話有關聯繫匯率廢存問題的內部討論，查實已經展開！（One financial contact told us that the conversation about the future of the peg has already begun within a Hong Kong Government advisory committee that he sits on）夠資格為匯率向港府提供意見的委員會，唔會有好多個，最大嫌疑，就係嚟自金管局樓下的外匯基金諮詢委員會，呢條二五仔係邊個，呼之欲出啦。
當然，唔排除有人提供流料跣尻佢老美的，不過如果閣下在未來五至十年退休，強積金、保險等以美元計價，閣下又相信假如脫鈎之後港元兌陰司紙可能升值的話，就要諗諗自己份防老儲備會唔會唔見一截。（順叔近年買的保單，已經全部轉買港元，因為預咗在香港退休）
公道講句，港元既然拎咗陰司紙，作為金管局阿頭，任一蕉同佢老美保持緊密聯繫，了解美國金融政策變化，可以話係職責一部份，不過，任一蕉同佢老美係未行得太埋，唔同人可以有唔同判斷。例如在2009年3月，任一蕉上京之前，預先拜會花園道，爆響口話中國即將容許幾百間公司作為人仔貿易結算的試點。（REF ID:
09HONGKONG559）
又例如在2009年10 月，任一蕉同美國金融情報官Stuart Levey工作午宴，條美國佬提出北韓利用香港銀行進行核計劃相關的財務交易，點晒名（姓名、公司同埋銀行都有）要任一蕉幫手，任一蕉就拍心口話金管局在香港擁有「高度自主」（high degree of autonomy），不過有關北韓資金的問題，佢會透過「私底下、非正式的對話」（private, non-official conversations with local banks on UNSCR-related issues）向香港銀行提出溫馨提示咁話。（REF ID:
09HONGKONG1266）
可以試吓想像，如果任一蕉同老美咁熟，同當年捧佢上神枱的英國阿蛇，關係又點會疏遠，去得花園道出出入入，又點會唔順便行過正義道探吓英國駐港領事館？事實上，任一蕉向英國前老闆提供的情報，細緻到包括北京領導人的飲食習慣！ 根據2009年6月在北京美國領事館發出的電文，引述咗英國駐北京使館官員Tamsin Rees所透露、有關中英經貿對話的細節，條女提到，任一蕉聲稱同中國副總理王岐山好老友，經常一齊飲酒 （the former head of the Hong Kong Monetary Authority had said he used to go drinking together with Wang），點知跌尻咗英國阿蛇一鑊金，話說2009年王岐山訪問英國，英國人於是根據任一蕉提供的情報，準備咗盛大的「Whisky dinner」，點知王岐山話自己「酒精敏感」，滴酒不沾，搞到成件事變咗「bloody disaster」。（REF ID:
09BEIJING1582）
北京自己都養埋一大堆大陸密探零零柒，應該已經建立自己人事檔案，邊個係花園道正義道常客，應該心裡有數，老美電文亦唔涉及乜嘢高級別的機密，對來自大陸的「有心」讀者嚟講，涉及香港人和事的老美電文，最有睇頭的，反而係香港目標人物在美國佬面前、非公開場合的意態：邊位人兄講咗乜嘢、人前人後表現有冇唔同。當25萬份電文，透過維基解密爆到通街都係之後，在2009年5月底，就爆出任一蕉唔會再冧莊金管局總裁的消息，唔知通佢老美電文的內容，有冇影響到任一蕉的仕途呢？既然任一招係千年難得一見的能吏，值千九幾萬港銀一年，點解退休之後，在大陸金融體系乜嘢顧問角色都冇？唔通北京覺得呢條友養唔熟？
眾所久知，英國契媽的殖民年代，香港在國際財經事務上，屁都唔會放一個，毫無角色，在後過渡期，出現180度大轉變，「香港」開始出席（出現）世界貿易組織、APEC、世界航空、航海協議、設立駐華盛頓及倫敦「專員」等。好簡單，如果香港呢隻當年會生金蛋的鴨，唔可以再為契媽服務，97回歸之後，對英國最有利的發展，就係香港在國際財經事務上，保持高度獨立自主，根據前港英政治部Agent羅亞所講，呢招叫做「己所不欲盡施於中國」。（見《香港絕密檔密》第121-123頁）
在「高度自主」的香港，最「高度自主」的財金系統，唔使問阿桂，莫過於金管局，而任一蕉在位咁多年，有眼睇，力保金管局「獨立王國」地位不遺餘力，舉個例，又係維基解密，在2008年10月，任一蕉向老美使館講，希望香港在討論國際金融危機的Financial Stability Forum，擁有獨立一席位，（REF ID:
08HONGKONG1984）暗示唔想只係作為G20成員中國代表團的成員之一，任一蕉甚至講到出面，呢個問題佢唔好意思開聲，最好由佢老美代勞（Yam replied that it would be difficult unless someone outside of Hong Kong raised it with Beijing），到咗2009年3月，Financial Stability Forum議決取消香港席位，任一蕉又即刻跑上花園道喊苦喊忽，話呢個係忽視香港重要金融中心地位的嚴重錯誤云云。（REF ID:
09HONGKONG530）
有人話國際城市的獨特地位，係保持競爭力的重要元素，呢個講法，唔會有太多人反對，不過呢，如果同一班友仔同你講，又要擔心香港被上海新加坡超越的話，就屬於硬膠性的自相矛盾。假如一黨專政的上海、一家專政的新加坡，都有條件成為國際金融中心，咁香港經濟體系向大陸靠攏，又點會影響競爭力？
當然啦，最能將香港阻隔於大陸經濟，同陰司紙體系緊緊綁埋一齊的，就係聯繫匯率呢條冚家拎，而最出力捍衛呢條冚家拎的，之唔係就係任一蕉。任一蕉執掌金管局呢個獨立王國16年，咬住七點八唔放，拍拍屎忽走人之後，2012年又話係時候檢討聯匯，邊度有人咁屎忽架，可以好公道咁講句，全香港最冇資格講檢討聯匯的，就係任一蕉。
講到呢度，近排陰毛上腦的順叔，忍唔住要引述羅亞有關98年亞洲金融風暴的陰謀論（見《香港絕密檔密》第90頁）：
「九八年來政局氣象，似乎也因應過渡後而趨新，陰謀論者以為前港英政府開始發動其隠藏殺著，出手狠毒，招招針對要害，向本港命脈痛下殺手。局內人以為過去港英運作百年，香港成功因素己是公開秘密，前朝鷹犬如肥彭之流，「俸祿」仍舊照支，未致貽害特區，但若能泄漏玄機，把本港賴以謀生的金融經濟要害公諸西方財閥，利用本港自由銀行體系弱點，投下賭注一舉而攻下香港。
深諳前朝歷史讀者，當會知道過去最少英裔官員控馭的部門，正是金融銀證經貿機關，全數任用華人忠貞分子，為港英最早實驗「本地化」計劃之所。此批前高官技藝招式有限，份屬英式流派，此時任由其施展所長，全部不出對手所料。國際投機打手如索羅斯之輩，早己獲前朝傳授絕招解拆，只懂一式半招的特區高官，早在敵方掌握之中。
事有湊巧，過渡後港府屢遭考驗，特區危機此起彼落，最早有禽流感事件，經而有港元遭受衝擊脫鈎可能，近日發展金融體系更受創，港府官員笨拙手法，一一表現無遺…」
話時話，98年三英戰大鱷，氣吞天下的當奴，臨退休幾乎過唔到世，肥龍當然亦一身蟻，唯獨任一蕉繼續風騷人間。查實，任一蕉都有鋪癮買Penthouse的，近的唔使講，真金白銀買落IFC頂樓的金融雲端，幫外匯基金增值唔少，跑馬地蔚雲閣頂層複式單嘢，唔知又有幾多人記得？
關連文章:1.
老美二五仔（上）｜
（下）2.
抽水兩條拎（上）｜
（下）3.
脫鈎任尻噏伸延閱讀:1. 羅亞：
《香港絕密檔密》第121-123頁2. 羅亞：
《香港絕密檔密》第89-90頁3. 壹周刊：
任志剛的不尋常交易4. 星島日報：
任總自爆20年買樓詳情 5. 林本利：
新地優質品牌的背後
同場加映：
同場再加映：
老美二五仔（上）
今期，如題，開二五仔。
所謂二五仔，查實睇吓閣下企邊面，有美國人選擇同老美作對，亦有唔少香港人成身老美味。代史上跣老美最大劑的二五仔（Whistleblowers），包括啱啱被判35碌的大兵曼寧 （Bradley Manning，見左圖），特別要提吓呢位「哥」仔，因為順叔真心覺得佢做咗一件大好事。
曼寧當年派駐伊拉克負責情報分析工作，因利成便，爆入老美機密資料庫，存取大量資料，後來仲泄埋俾維基解密（Wikileaks）。經曼寧爆出嚟的猛料，包括老美在伊拉克及阿富汗的近50萬份軍事報告，有聲有片（例如轟炸阿富汗Granai時冧咗百九幾個平民的大屠殺），仲有超過25萬份老美外交電文。結果，曼寧被老友黑客篤背脊，被老美周咗，上星期被判35碌，廿六歲人，慘。
到今時今日，好多人寧願信維基百科，都唔相信維基解密，無他的，相信唔少人跟本冇親眼睇過維基解密內容（或者唔識用），同埋唔知呢個爆料網站開邊辨，凡係有人提及，往往會條件反射式的大腦自動閉塞。
維基解密係咪可信，查實有兩個重要佐證，第一，被爆大鑊之人，由老美自己到香港的政商大腕，從來冇人夠膽話純熟流料；第二，睇睇維基解密創辦人阿桑奇（Julian Assange）而家幾折墮。
如果袋裡面冇番幾粒核彈（例如普京、金正恩），公開同老美作對，通當常冇乜好收場（例如薩達姆、查韋斯），維基解密大爆曼寧提供的機密資料之後，老美唔單止煮死曼寧，仲要徹底收阿桑奇皮。如果阿桑奇只係撒播吓無傷大雅的惡搞流言，又點會因為扑嘢變成「性罪行」成為國際通緝犯咁大劑？
同另一位老美二五仔斯諾登（Edward Snowden）相比，曼寧真心膠味更重，最新動向係要求「變性」，以「女人」身份服刑，仲叫傳媒稱呼佢做「Chelsea Elizabeth Manning」（見右圖）添。
咁多年嚟，唔同人向維基解密爆料，可能有唔同政治目的，亦有唔同手法，好似斯諾登咁，明顯就係好有部署，爆極都仲有嘢爆（可能有曼寧前科，仲好識保護自己）。曼寧就好唔同，幾十萬份文件，一次過隊晒俾維基解密，大家可以想像，50萬份軍事報告，加埋25萬條外交電文（來自全球各國），曼寧冇可能全部睇晒、消化完再選擇性爆料，換句話講，有關資料更加可信，動機亦更純正（曼寧自稱睇唔過眼老美在伊拉克所作所為），順叔話真心佩服曼寧，就係咁解，就算唔俾諾貝爾和平獎，乜嘢新聞自由大獎，都應該頒返幾個俾佢。
維基解密上251,287條老米外交電文，最初並唔公開，以TORRENT形式流傳，仲要有PASSWORD先睇到，當時維基解密同部份英美傳媒合作，確保電文提及大口仔二五仔身份獲保密或人身安全之後，先會在公眾傳媒公開，具體情況順叔都唔係好掌握到，聽講後來PASSWORD被GUARDIAN爆大咗，阿桑奇又被老美趕得太絕，結果在2011年9月初，將廿幾萬條電文，一次過全部公開，冇遮冇掩。
掀開舊報紙，可以發現，2011年9月開始，香港傳媒開始大量引述美國駐香港領事館的電文，爆吓呢樣爆吓嗰樣，冇錯，所有相關資料，就在曼寧彈俾維基解密的25萬條外交電文當中，換句話講，香港人之所以得知有乜二五仔同老美有乜關係，都係多得曼寧。
曼寧家陣被判35碌，斷估唔需要坐足，但十年八載都唔會走雞，出到嚟已經係一個中坑，為咗表示對曼寧的支持及同情，唯一可以做的，就係唔好浪費佢一番苦心，將老美電文裡面，有關香港的資料，抽幾份歷久常新，但又冇乜人講過的細節，分享一吓。
由於電文內容，幾乎全部最係閂埋門傾偈，可以發現，唔少香港政商人事，在老美前鏡頭後，同平時的表現談吐有好大分別。邊啲人好鍾意行入老美領事館阿吱阿咗，在乜嘢場合以乜嘢形式同邊個美國官員放料，好多嘢可以睇。除咗記錄邊個講咗乜嘢，電文對放料人士講嘢時的態度，亦有相當詳盡的描述，甚至評價，查實更加精彩。有心機細心睇吓，對了解香港的政經互動，肯定有用過睇報紙千百倍，退一萬步，望吓有關埃及、敍利亞的電文，亦肯定好過睇經濟學人，可能更加明白，點解茉莉花之後，埃及敍利亞點解會咁仆街，老美又做咗乜嘢好事正義事。
言歸正傳，維基解密披露涉及香港的電文，大約950份，絕大部分在2005年至2008年發出，即係美國駐香港總領事郭明瀚（James Cunningham）、2008 年至2009 年的總領事唐若文（Joseph Donovan Jr.）期間的香港情治報告。
如果邊位有興趣自己睇，可以Click入去下面呢條Link：
Secret US Embassy Cables: Browse by Consulate Hong Kong另一個使用方法，就係用文字做關鍵詞搜索，可以Click入去下面呢條Link：
Secret US Embassy Cables: Full-text search everything舉個例，如果想知道，「CY LAI」係咪老美二五仔，可以用「JIMMY LAI」做關鍵詞，摷返生果肥西在花園道26號留低咗幾多腳毛；腸實阿誠伯有冇做過二五仔，就可以用「LI KA-SHING」做關鍵詞，搜索一吓（記住用開關引號刮住佢，例如" JIMMY LAI "、"LI KA-SHING"咁）。
下回再續。
關連文章:1.
老美二五仔（上）｜
（下）同場加映：
I am Bradley Manning
新老闆要舊客名單 員工迫做二五仔？
1 :
GS(14)@2014-09-03 18:07:34https://hk.news.yahoo.com/%E6%96 ... B%94-224641621.html
【晴報專訊】所謂同行如敵國，有打工仔在網上訴苦，指新工上任即被僱主索取舊公司客戶資料，他不想做「二五仔」，又怕得失新老闊，感到左右做人難。人力資源顧問指，僱主「套料」的做法低劣，律師亦指員工「放料」或違法。
不少行業也要「跑數」，客戶資料猶如打工仔的一部分資產。早前有自稱做家電送貨的年輕人在討論區撰文，指新工上任一個月多，老闆便要求他交出舊客戶名單。文中指他雖然沒有跟舊公司簽署保密協議，但也擔心披露客戶資料後，一旦被發現，會被視為「二五仔」。如果不妥協，又怕得失新老闆，甚至被「炒魷魚」，於是向網民討教。
70後拒交舊客資料 即日辭職
有人指事主的新公司可能為「攞料」，猜測他交出資料後，隨時飯碗不保；要是被同行知道他做「二五仔」，日後更難在行內立足。亦有人留言回應，指需要「跑數」的銷售員帶同客戶資料「過檔」新公司，屬見慣不怪。
現實中，七十後的陳先生從事雨具銷售多年，累積不少舊客，早前他擬轉行做採購員，豈料首日上班新僱主已向他索取舊客資料。「他叫我列出所有舊客資料，包括姓名及電話，還要求交出他們的卡片。」他擔心新僱主「攞完着數」便藉詞解僱他，於是拒絕要求，更即日辭職。
文件印有標誌 屬舊公司財產
思酬智路人力資源管理顧問公司資深顧問林敬新指，大部分公司會在僱傭合約及員工守則設立保密協議，訂明僱員離職時不可取走客戶資料，否則有權追討相關損失。若僱主於新員工就職當日，便索取這些敏感資料，在情在理也不恰當。「除非資料輕易在網上找到，反之文件印有舊公司標誌，也是公司財產之一。」
卓越人力資源顧問（ExcelNet）總監梁美儀坦言，老闆期望新同事連人脈一併「過檔」，以擴展生意，是無可厚非，惟單刀直入向員工「攞料」，會令人質疑公司可信度，亦會惹來僱員反感，處理手法差劣及短視。「上司可鼓勵下屬聯絡舊客，知會已轉工，有需要可聯絡他，把選擇權交給員工及客人，他們會較易接受。」
環球管理諮詢有限公司董事總經理李漢祥建議，打工仔可先聯絡舊客，看看是否願意將資料帶到新公司。「這樣做既表現事主有人脈，亦可呈現他的誠信，未嘗不是好方法。」
未經客戶同意 轉交資料屬違法
打工仔帶走客戶資料，隨時違法也不知。執業大律師龔靜儀表示，若僱傭合約訂明離職後不可將客戶資料外洩，如果僱員違反守則，前公司可循民事途徑追討相關損失，能否成功追討需視乎證據是否足夠。
另外，她又指僱員擅自披露客戶的個人資料，可能已違反《個人資料（私隱）條例》，一經定罪，可被處罰100萬元及監禁五年。「客戶提供資料給舊公司，是基於雙方的交易及信任，即使僱員擁有這些資料，但離職後亦不可隨便轉交新公司。」
草彅剛憔悴深鞠躬木村做二五仔 遭SMAP四子孤立
1 :
GS(14)@2016-01-15 17:33:53日本神級組合SMAP前日傳出解散，震驚亞洲。日本傳媒報道SMAP五子除木村拓哉會留在所屬的尊尼事務所外，其餘4人草彅剛、中居正廣、稻垣吾郎與香取慎吾，都會脫離尊尼。據指今次SMAP解散涉及事務所鬥爭，更有指木村在鬥爭中做二五仔！其實早於一年前SMAP已被傳離巢或解散，皆因尊尼副社長喜多川Mary與SMAP經理人飯島智三出現內部鬥爭，Mary更公開指：「再與我鬥的話就請她帶同SMAP滾！」又諷刺SMAP舞藝差。據雜誌《週刊新潮》指，報道出街後中居感到受辱，已開始考慮離開。到去年下年半，飯島安排SMAP演出多個NHK電視台節目，希望他們成為去年NHK《紅白大賽》司儀，但Mary再出手阻止，威脅NHK若SMAP任司儀，其餘尊尼組合將不會出席《紅白》，SMAP與飯島均感冇癮，決定離開尊尼。
■SMAP除木村外，四子將會離開事務所。
■SMAP本來爭取做《紅白》司儀，但結果由V6成員井之原快彥（左）擔任。
■草彅剛昨早現身直播節目，並沒提及解散一事，更強擠笑容。
臨時決定留低
有爆料網指木村其實是二五仔，雖然SMAP一直跟隨飯島，但木村暗地裏與Mary有聯絡，其餘四子在11月中決定跟飯島走人，當時以為木村亦一起走，到上個月中木村才突然決定留在尊尼，令組合分裂以至解散。據指在《紅白》綵排時，木村已被隊友孤立，獨自企埋一邊。亦有指木村因妻子工藤靜香勸他不要離開所以才留低。現時木村在京都拍《無限之住人》，暫未有回應。草彅剛昨早現身朝日台節目《Morning Show》宣傳劇集《科研之女》特別篇，他全程沒提到解散一事，但明顯有點憔悴，間中被影到沒心機的表情，但他亦有死撐展露笑容，到節目最後向鏡頭深深鞠躬，似向粉絲表示歉意。SMAP粉絲發起「購買運動」，希望將其大熱單曲《世界上唯一的花》總銷量推至300萬，以示支持，並望他們不要解散。撰文：泉水
來源:
http://hk.apple.nextmedia.com/entertainment/art/20160115/19452288
Next Page
