📖 ZKIZ Archives

套票，見於影視店、美容院又或纖體公司，用套票賣菜，記者也是第一次聽。

年屆四十的陳宏展（Arnold），在銀行打工十多年，不欲再過拼搏生活，於去年在自住的置富花園樓下商場，開設「菩提樹」賣有機零食、乾貨等，只要賺份糧他便心滿意足。怎料，開業初期，幾乎一蚊都無得賺。

他惟有發揮從前在銀行打工時學到的「創意」，度出用「套票」形式賣有機菜，一班師奶、街坊竟趨之若鶩。這一招令店鋪起死回生，更找來前下屬入股做拍檔，下月更在何文田開分店。

一星期有幾天，Arnold和新拍檔阿鏗於早上六時多便起床，親自前往新界農場取菜，以確保有機菜新鮮。前週五，狂風暴雨，駕着客貨車，由置富花園經紅隧到八鄉，Arnold笑說：「行紅隧遠啲，但朝早好快，慳番幾十蚊隧道錢！」到埗後，由於進入農場的路太窄，他們把車泊在一旁，從車尾拿出手推車和幾個大型黑色膠箱，狼狽地一個擔遮，一個推車，徒步十分鐘。Arnold依照客人訂菜款式及數目，細心揀菜，去完一個農場，又到下一個。回程時塞車，遲了半小時才到達鋪頭。Arnold把一籮籮菜放在地上，即趕緊把瓜切好，店員則負責把菜分類。下午一時，再出發往海怡半島、深灣9號、貝沙灣等，把菜送上門。三時多，他們才有空吃午餐。

現在「菩提樹」忙過打仗，但回想一前年，只賣有機食油、零食、有機糖等乾貨，Arnold投放整副心機，「有啲貨我好想賣，但唔知喺邊度搵，走咗去City'super同ThreeSixty入貨。」這樣毛利自然極低，效果又差，鋪頭有時靜得全日只有三、四個客，他說：「入咗三、四百樣貨，但有一半貨品，擺咗幾個月，客人掂都無掂過。入咁多貨都無用，都唔中客人心水﹗」開業半年，收入僅夠交租，由於在鋪頭太得閒，他經常和街坊傾偈，「有人同我講，置富呢頭好難買靚嘅有機菜，叫我賣，咁我就試吓啦。」

轉型第一步揀農莊

Arnold行勻全港大小農墟，如天星碼頭、美孚、大埔、元朗等，有時更帶同女兒、老婆同行，當親子活動，他說：「好彩自己都鍾意行山，寓工作於娛樂，如果見到啲菜款特別同靚，就會問檔主拎卡片，再直接去佢哋嘅農場睇貨。」他指，香港有機農場不少，但品質參差，「真係有心機嘅農場唔多，試過見到有人就咁用黑色膠袋裝住啲菜俾我，見到都唔想買。」經過一個月時間資料搜集，Arnold找到五個農場，包括青協有機農莊、歐羅有機農場及蔬菜統營處等，「佢哋生產量夠大，貨源穩定，大部分貨佢哋都有。」但亦會幫襯一些小型農莊，「好似一間叫錦豐嘅，佢哋種嘅瓜係最靚，買燈籠椒一定幫襯佢。」Arnold入大路菜，亦賣冷門菜，如仙人掌葉、夜香花、白茄子或羅馬生菜等，現時可訂蔬果種類約五十多種，價格每斤三十至六十元不等，毛利二至三成。由於他親自去過不少農場，發現：「好嘅菜可能只有一籮，冇咁好嘅就有好多！」於是幾辛苦都好，決定每個星期親自入鄉拎菜，「你要同啲人熟咗，佢哋先會俾啲靚嘢你。」

轉型第二步度套票

菜講求新鮮，保存期短，Arnold指賣剩就要掉。他擔心客人訂貨後，會不來取貨，「我哋唔同街市，街客唔多，你唔嚟買，未必可以賣俾另一個。」他左度右度，想到用「套票」形式賣菜，客人訂貨後，他就會把訂貨的金額從套票中扣除。客人可選擇親自前來拿貨，或由他送上門，但送貨只限南區。最初他擔心客人對套票有保留，故做定統計：「我用咗兩個月時間，問每一個入嚟鋪頭嘅熟客，如果我用套票賣菜，佢哋買唔買。」結果有二、三十人大表支持，亦成為了他的第一批客。事實上，開始送貨後，他的客源由當初只有置富花園，到現在連鄰近的豪宅貝沙灣、深灣9號等客人，都會瀏覽其網站，再打電話向他訂菜。為令客人放心，套票金額只定於一千五百及五百元，有效期六至九個月，用套票的客人可獲折扣優惠，最高八五折，他說：「雖然金額唔大，但係買菜都係一百幾十蚊，初頭都幾難說服啲客買套票，但後來愈來愈多特別嘅菜賣，客人都接受。」試過有客人搬屋，不能再幫襯他買菜，他讓客人一次過換取乾貨。一年以來，買套票的客人已增加至二百個，Arnold亦放下心頭大石說：「有時要送十幾戶，用套票仲可以慳番找贖嘅時間﹗」每星期都幫襯幾次的麥太說：「知道老闆為人正直，都唔驚佢為咗千幾蚊走咗去嘅！」她大多數訂一斤菜心、半斤青瓜或粟米等，「每次使一百蚊，一年來已買了三次套票，每次一千五百元。」

轉型第三步撰食譜教煮菜

Arnold的客源以街坊客為主，記者看見十個來客，Arnold能夠叫出名的起碼有七個。他為了令更多客人熟悉有機菜，試過自己撰寫食譜派街坊：「好似珊瑚草，俗稱海燕窩，煮之前就浸吓佢，可以煮糖水、煲湯，好易整，食法似雪耳，一樣有益，好過咁貴買燕窩。」Arnold為了跟街坊聯絡感情，亦搞過三次有機農場導賞團，他說：「我同啲街坊好friend，佢哋教我好多嘢，煮餸、養生咩都有。好似之前有個阿婆病咗，佢得自己一個人住，我都叫我老婆煲啲淮山粥拎俾佢食。」他更幫客人找有機貨品，「我真的有本簿寫低啲客想要啲咩，之後再幫佢哋搵，有次個客想搵啲有機食品俾佢隻貓食，都要幫佢搵o架，不過未搵到。」菩提樹本來無小米賣，「但個客聽過食咗可以防癌，咪幫佢買。」

何文田開分店

在銀行打滾十多年，Arnold做過貸款部，位至高級主任，負責借過幾千萬至過億貸款，亦賣過保險，但自四年前跟隨老婆信佛後，人生觀開始改變，不想再為錢過活。而且年屆四十，女兒亦已十七歲，Arnold指家庭負擔漸輕，故希望尋找第二事業，只是開始時計錯數，「諗番自己開始時咩都唔識亂咁嚟，都覺得好搞笑﹗」用了大半年時間，Arnold終於把以往的死貨，以成本價賣掉，現在乾貨只剩下好賣的品種，如因為嚴浩推介布緯食療，近年大熱的椰子油及亞麻籽油等，乾貨佔營業額超過五成，有機菜佔近五成。他覺得全靠有機菜，才令鋪頭起死回生：「有啲客幫我買菜，再買埋乾貨，鋪頭人流多咗，轉型後令總營業額上升八成。」投資開鋪的廿多萬已回本，他更找來前下屬阿鏗入股，走出金融界，在何文田開分店，齊齊返璞歸真賣菜。Arnold認為創業比打工更苦：「朝早六時起身做到夜麻麻，有時商場閂門，我仲要留低搞埋啲手尾，不過個人開心咗好多！」

開業資料（02/12）

租勯金：$44,000 ^入勯貨：$100,000裝勯修：$60,000雜勯費：$50,000總投資：$254,000^三按一上

營業資料（07/13）

營業額：$110,000入勯貨：$65,000租勯金：$11,000人勯工：$10,000雜勯費：$2,000盈勯利：$22,000

一點意見

◆有機食物店「點點綠」老闆◆黃家和1.外判送貨：用套票賣菜是好，而且套票金額合理，惟送貨太花時間及成本，開分店可考慮外判送貨。2.賣特色乾貨：食用乾貨毛利較低，可考慮賣非食用的有機產品，如洗頭水、護膚品，有特色之餘，毛利亦高。3.港島開分店：置富位置優越，選擇正確。要再開分店的話，單是香港仔仍有空間，同區開店會較易管理。