ZKIZ Archives


OPPA吸客 岩漿芝士飯月賺$50萬

2015-03-19  NM 
 

 

「我無諗過開一個月就賺五十萬!」酷愛韓風、今年二十二歲的馮泳琳(Sugar),和韓國籍男友、廿八歲的金丙鎮(Jim),今年一月在尖沙咀金巴利道開設韓式餐廳Oppa Coffee Bar。此店賣點,在於效法韓國濟州島近火山口的餐廳,將泡菜炒飯放在熱辣辣的鐵板上,淋上特製芝士汁,猶如熔岩奇觀。

一個賣點並不足夠。在韓國大學修讀廚藝的Jim,專程在韓國招募一批韓仔Oppa做生招牌。這批年輕韓仔負責服侍客人,偶然一句唔鹹唔淡廣東話:「炸雞要有骨定無骨?」女客即時暈得一陣陣。開業兩個月,每日賣出三百份岩漿飯。不過一份岩漿飯賣一百三十八元,芝士排骨要二百多,網上開始有評論「難食」及「回水」,如何走落去是Oppa餐廳面對的最大問題。

Oppa Coffee Bar開在尖沙咀「韓國街」,附近七間韓式餐廳,好處是慳番宣傳,但同時競爭激烈。原本Sugar將餐廳作coffee bar經營:「韓國人好興收工一齊飲酒,所以到處係coffee bar,而香港韓式餐廳最多就係BBQ!」可惜開張首週,生意慘淡:「剛有幾份飲食雜誌來訪問,火山岩漿飯宣傳,意外爆紅。之後開始出現人龍,最誇張試過有一晚出面排三百個人,最後因為唔夠貨要提早收鋪!」

賣點一:韓男吸客

步入Oppa餐廳,開宗明義,見到的就是一個二個Oppa。韓文Oppa的意思是「哥哥」,一般韓國女士對男友或心儀對象,都稱呼為Oppa。Sugar透過男友Jim在韓國大學廚藝部的人脈關係,招募一批有意來港發展的學弟來餐廳工作:「阿Jim每半年返一次母校,教師弟妹煮。好多韓國人想試海外工作,都肯報working holiday來港。」這班正宗Oppa,身形高大威猛,雖然無韓劇男神咁靚仔,但一樣受港女歡迎。他們在餐廳除了擔任廚師,更充當侍應招呼客人:「我歡迎客人光臨同上菜,都係用韓文。如果客人叫炸雞,Oppa就會用半鹹淡的廣東話問:『要有骨定無骨?』」現場所見,不少女客對Oppa表現受落,Sugar更稱曾有客人用餐後要求廚師到樓面合照。Sugar亦鼓勵Oppa們多學廣東話,用更多招數吸引食客。不過Oppa們亦來去匆匆,Sugar指因為餐廳剛開業,暫不能簽發正式工作簽證。根據入境處資料,來港工作假期的韓國配額每年只有五百個,而且不得為同一僱主工作超過六個月,故Sugar要半年換一次「新貨」。

賣點二:原汁韓味

除了熱賣的火山岩漿飯跟足韓國本土製作,其他食物亦保持原汁韓味,「好似炸雞咁,我堅持入口新鮮雞。我炸雞師傅韓國做十幾年,曾經俾客投訴味道太辣。我試過整甜,番香港人口味,但最終都係決定賣番原來版本。」至於熔岩飯,Sugar稱所有原材料都跟足韓國規格,再研究配方,外間難以複製:「我個飯用Mozzarella芝士,配合韓國大豆醬油整成汁,單係點令芝士拉得起,已經用好長時間研究。」餐廳開業頭一個月,確實吸引大批食客貪新鮮試食,但熱潮過後,記者採訪多日,發現不少潛在問題已暴露出來。

問題一:食水深

近日網上不少食客都對餐廳作出批評,內容不外乎:「價錢貴、分量少、鐵板唔夠熱。」記者試過熔岩飯及炸雞,發現熔岩飯分量不多,但由於芝士夠濃及夠多,吃了半碟已飽肚。但問題是價錢頗貴,售價一百三十八元,而成本只需四十多元,毛利高達七成!而一份炸雞及芝士排骨,售價竟超過二百元,一份韓式三文治要八十八元。對此Sugar解釋:「有客同我講,價錢同韓國食開差好遠,由於我餐廳食材都係跟足韓國規格,但係韓國租金平好多;如果香港賣同一個價錢,好難維持落去。」至於不夠熱問題,Sugar解釋倒上飯的汁沒有預熱,經攪拌後可能出現降溫情況,會繼續研究如何解決。

問題二:人工成本高

Oppa有價,對比起本地員工,韓國員工還要提供住宿、機票等費用,令營運成本上升。Sugar稱:「除宿舍租金之外,我仲會每個月將營業額百分之十分俾佢,作為佣金。」除了以佣金留Oppa,餐廳租金亦是一大問題。餐廳位於俗稱「韓國街」的尖沙咀金巴利道,鋪位每月租金達十一萬,有蠶食盈利跡象。但Sugar表示好鋪難求:「呢條街好多鋪位都係同一個業主,佢想引入新鮮感,唔想租俾舊客,先租俾我咋!」

問題三:菜式選擇少

餐廳開店近兩個月,仍未有酒牌。採訪當日更有食客向記者表示,餐牌上食物似是用來伴酒,但第二次光顧仍未有酒賣,要自己攜帶。Sugar解釋:「因為上一手租客在簷篷僭建一個支架,拆除後就可以拎到酒牌。」而餐牌除了招牌熔岩飯、鐵板芝士排骨及炸雞外,其餘選擇並不多。面對網上劣評,Sugar處之泰然:「善意批評我一定會聽,食物有進步空間我會改。但如果係惡意批評,我相信食客一定會分得到。」她也坦言,繼續月賺五十萬元是無可能,但對前景仍有信心:「今個月keep到有上月七成利潤,就已經好滿足。我除盡快拎到酒牌外,亦準備引入韓式甜品,之後仲會研究午市菜單,其實韓國仲有好多好食,係香港食唔到!」

開業資料

(1/2015)裝修及牌費$500,000租金*$450,000入貨$200,000雜費$350,000合計$1,500,000*三按一上

營業資料

(2/2015)營業額#$900,000租金$110,000員工宿舍租金$30,000人工$185,000材料、雜費$70,000盈利$505,000#因營業額理想,Sugar決定將營業額的10%分給員工作為獎勵

一點意見

辛安東元祖奶奶雞負責人Kenny,經營韓國食肆多年,自言得悉鐵板炒飯風潮,也特意前來一看。其後向記者直言:「收得太貴啦!好似鐵板排骨咁,呢度賣成二百幾,我餐廳都係做緊百幾蚊!」Kenny直指韓風在香港未必持久,更大膽預言「韓流」可能在數年內減退。「韓菜始終唔及茶餐廳同小菜,又唔似日本菜咁可以香港玩到三十年,我自己都開始轉型做茶餐廳啦!」他表示現時很多新開的韓國餐廳,營運模式都是:「投資百幾萬,幾個月就維到本,賺夠咪走人囉!」他對剛入行的Sugar有以下建議:價格、款式要調整1. 「我餐廳只係賺一至兩成。食賣得太貴,普羅大眾唔會,而高消費班又唔會同你排隊,變最後做做去都係同一批客。」他直指不能「獨沽一味」靠芝士來維持經營:「就算飯同排骨,都係同一種味,而且來來去去都係加芝士,客好快食厭。」2. 平衡港人口味及韓國原味「遷就邊一種口味,係客人覺得食同唔食關鍵,唔食自然會網上批評。」他建議Sugar要平衡每一款出品的「灰色地帶」,到底堅持原味能否令港人接受。3. Oppa難以維持Kenny指出,如一間食肆大部分員工皆來自working holiday,根本不合適,「俾我都唔會請working holiday後生仔,俾我知我都炒佢!佢做得幾耐?點維持?」

港女識韓仔攻略

Sugar跟韓國男友Jim已拍拖兩年,很多港女都想認識Oppa型男做男友。Sugar就給香港女仔一個攻略:「KakaoTalk呢個app,前幾年香港hit過,但其實韓國仲好hit,當地就好似香港人用WhatsApp咁,幾乎一人都有一個account!」Sugar更稱韓國男仔都很喜歡香港女仔:「佢覺得韓國女仔比『港女』更『港女』,隨時因少少事辭職等男友養,反而覺得香港女仔更溫柔體貼。」

OPPA 吸客 巖漿 芝士 飯月 月賺 50
PermaLink: https://articles.zkiz.com/?id=136416

【港韓姊弟戀】為聽韓妹嗌「Oppa」港男涉虛報年齡或被判「終身」

1 : GS(14)@2016-10-20 08:05:36

韓國老婆關心問「忙唔忙?」日本老公就覺得佢問「多唔多客?搵幾錢?」(《我們結婚了》截圖)



【三個粉絲追韓劇】嫁娶外國人或者係出走香港嘅好方法,不過要維繫異國情緣都唔容易,好似《我們結婚了》嘅曹曹夫婦(現已下車)早前探一對日韓夫妻,日本老公娶咗韓國老婆,只係因為一句說話就上火!情況係老公收工返屋企,老婆咪關心咁話:「辛苦喇,今日忙唔忙呀?」原本係純粹出於關心,點知老公就聽到弦外之音,好嬲咁話:「你係咪想問我今日賺到幾多錢?」原來日本人係唔會問人「忙唔忙」!兩國嘅文化差異容易令夫婦之間產生誤會,有兩位港男都經歷過相同嘅事,一位Gary娶咗韓國老婆十年,另一位Kay就同韓女Chloe拍拖四年。



港男Gary(左)和Kay嘅另一半都係韓國人,都試過因為文化差異嗌交。

Chloe話Kay最初講大話,比真實年齡報大3歲!

Kay解釋話都只不過係想聽Chloe嗌佢「Oppa」,又話當Chloe知道自己大啲,就變得惡起上嚟。

韓女Chloe一講到文化差異,就大鬧Kay為咗「Oppa」(韓文:哥哥)呢個字講大話!佢好勞氣咁話:「曖昧嗰陣我問過佢幾多歲,我係89年出世嘅,佢就話自己係88年,咁我咪認為佢係Oppa囉!」點知拍拖幾個月之後,Chloe睇到Kay本護照先揭發,原來Kay係91年出世,Chloe話簡直無言:「點解要講大話?年紀都可以講大話嘅咩?萬一我發現唔到咁點算呀?」
Chloe邊鬧邊「睥住」Kay,Kay就邊聽邊笑,佢解釋話:「嗰時好奇吖嘛,想聽佢嗌我Oppa!」雖然出發點係甜蜜嘅,但畀Chloe篤爆咗之後,o依家就嗌佢「喂」或者「傻瓜」。韓國人好重視年齡,後輩一定要聽前輩嘅說話,所以Kay話當Chloe知道自己年紀大啲,就惡到o依家!不過有時惡,先係真正愛一個人,連講大話都可以原諒,Kay畀Chloe判終身...照顧佢都抵啦!至於Gary就好享受老婆對佢惡,佢話:「講得上真正愛一個人,就係由太太開始,唯獨佢會對我好嚴苛。」Gary開始話當年,講返十年前識老婆嗰陣,當時得二十幾歲,Gary就有部兩門跑車,仲覺得自己好型添!點知,佢老婆(當時女朋友)竟然話佢:「唉!你都廿幾歲人啦,點解仲揸埋啲死飛仔車呢?」Gary話嗰吓嬲得嚟又有啲甜,覺得佢個人夠真,就認定佢係老婆喇!



Gary就話鍾意老婆惡,好似佢啱啱識老婆嗰陣有部兩門跑車,個個都話型,得佢老婆話:「唉!你都廿幾歲人啦,點解仲揸埋啲死飛仔車呢?」Gary話又嬲又有啲甜喎!

仲有個文化差異係「黐線」兩個字,香港人當口頭嬋,韓國人真係用嚟鬧人,所以Gary老婆和Chloe初初聽都好唔慣,以為人哋鬧佢哋。

至於文化差異,Gary話試過衰喺「黐線」兩個字。佢話教過老婆講「黐線」,有一次同屋企人食飯,Gary妹妹就對住佢老婆笑住講「黐線」,老婆就成晚唔出聲喇。佢問老婆發生咩事,老婆就話:「你阿妹做咩話我黐線?」「黐線」對於香港人嚟講只係口頭嬋,但係對於韓國人嚟講就真係鬧人嘅說話,Kay女朋友Chloe都話有同感。佢話成日聽到Kay啲朋友講「黐線」,都會諗「係咪講緊我?」,後嚟先明白「黐線」係香港人嘅日用語。兩位港男Gary同Kay都已經講得一口流利韓文,希望盡量減少語言上嘅誤會,不過始終唔係母語,未必事事能夠解釋清楚。Gary話韓國人太有禮貌,有好多語言偽術,例如如果女仔問:「我今日靚唔靚呀?」男仔答:「幾可愛吖!」咁即係話個女仔唔靚。又例如男仔約女仔去街,女仔唔會直接拒絕,會話:「睇吓點先啦!」咁其實即係唔去。場地提供:平昌 By BBQ7080地址:佐敦莊士倫敦廣場5樓電話:59017080主持:動主播阿仙、viu韓劇導賞員Ruby記者及繙譯:卓惠媛(Joyce)攝影:陳家文、李錦鏵《我們結婚了》片段由Viu提供:
https://goo.gl/Yx13PE【三個粉絲追韓劇】
http://hk.apple.nextmedia.com/enews/animation/kfans/




來源: http://hk.apple.nextmedia.com/entertainment/art/20161020/19805995
港韓 韓姊 姊弟 弟戀 為聽 聽韓 韓妹 妹嗌 Oppa 港男 男涉 虛報 年齡 或被 被判 終身
PermaLink: https://articles.zkiz.com/?id=312884

【首爾搵食】弘大韓妹Oppa票選街頭小食 No.1係……

1 : GS(14)@2016-11-10 07:40:20

弘大韓妹Oppa一人一票選出最愛的街頭小食,當中烤雞串上榜。



今年首爾米芝蓮的結果終花落誰家,不過,韓國人最愛的街頭小食卻沒有上榜。其實與其跟米芝蓮推介去掃街搵食,還不如問問當地人的意見,看看哪款小食才是他們心目中的No.1。



記者在首爾最多年輕人鍾情的蒲點-弘大做了個街頭調查,發現最多人選的就是年糕,因為甜甜辣辣很美味。其次是紫菜包飯、烤雞串、魚糕及糖餅,也非常受歡迎。記者︰黃映嫚、黃依情、湯珮然攝影︰周芝瑩


辣炒年糕是最多人選的街頭小食,不少人覺得它甜甜辣辣很美味。

綠豆煎餅

魚餅


紫菜包飯

糖餅



來源: http://hk.apple.nextmedia.com/su ... t/20161109/19827235
首爾 爾搵 搵食 弘大 韓妹 Oppa 票選 街頭 小食 No
PermaLink: https://articles.zkiz.com/?id=314756

【今日笑一笑】BB拜年講乜話爆笑Oppa外星話

1 : GS(14)@2017-02-05 10:55:17

農曆新年來到,想逗多點利是,當然要多說點恭賀說話,但對於牙牙學語的小孩而言,大人要多點想像力,才能聽懂他們說甚麼話!學習說話,當然要由模仿開始,片段中的媽媽教1歲多的女兒說「恭喜發財」,儘管小女孩努力模仿,反而說出:「阿公阿財」;學說「新年快樂」時,竟爆笑說出「oppa(韓語哥哥的意思);說到「心想」時,小女孩記起下一句是「事成」,沒有跟着說「心想」,但卻說出下一句「DiDi(模仿事成)」,令人哭笑不得!若非聽到媽媽教她說的話,只聽小女孩所說恭賀說話,相信沒人聽得懂她的外星話!
Facebook片段




來源: http://hk.apple.nextmedia.com/international/art/20170205/19918726
今日 笑一 一笑 BB 拜年 講乜 乜話 爆笑 Oppa 外星
PermaLink: https://articles.zkiz.com/?id=325519

【想嫁Oppa?】住慣細屋係優勢「好彩你係港女」

1 : GS(14)@2017-07-07 01:33:00

港女Ariel加Oppa Joo,喺大阪學日文結緣,因工作定居泰國,佢哋係用日文傾計。



【尋找首爾的香港】一段四國戀情,港女Ariel加Oppa Joo,喺大阪學日文結緣,o依家因工作定居泰國。
Ariel上個月揼低Joo,自己喺泰國飛返嚟香港探父母。佢話自細就鍾意日本文化,點知無緣識到日本男仔,反而喺日文班識到Oppa。未識Joo之前,Ariel對韓國零認識,淨係知道大長今同喊晒口韓劇,當然,韓文程度都係零。Joo亦都唔識廣東話,所以佢哋溝通係用日文!



自細鍾意日本文化嘅Ariel話,莫講話韓文,識Joo之前對韓國零認識。

Joo會帶Ariel感受韓國地道文化,好似掃街,

又會教佢講韓文單字。

透過視像同Joo做訪問,問佢識幾多廣東話,佢就一連串咁爆晒出嚟,「黐線、正仆X、洗手、我愛你、掛住你、殺死你......」Ariel聽到佢講「洗手」就笑,「佢嚟香港,嚟我屋企,我媽咪次次都嗌佢洗手、洗手,所以佢記住咗!」不過,要用第三語言溝通傾計,少不免會詞不達意,或者產生誤會。Ariel舉例話,「我成日話Joo鬧我,鬧嘅日文我哋用『叱る』,Joo對『叱る』嘅定義係指住人哋個鼻嚟鬧,但係我覺得大聲講嘢就係鬧,當大家都唔理解對方意思,就會冷戰!」有時雞同鴨講,有時生活文化唔同,又會產生拗撬,Joo第一時間就諗到「酒」!Joo解釋,「韓國人鍾意飲酒,有時工作上都有需要飲,但係Ariel自己唔飲,佢父母都唔飲,就唔明點解我要飲酒。」Ariel坦言最唔鍾意見到Joo飲醉酒,「真係會飲醉酒嘅,係飲醉,嗰陣就會鬧交喇!」



Ariel話有時好似置身韓劇,Joo會好似啲男主角咁,摸吓佢個頭,又會踎低幫佢綁鞋帶。

Ariel話Oppa係大男人,但其實係顧家孝順,會買架大啲嘅車載佢屋企人喺泰國四圍玩。

拍拖兩年,慢慢磨合,減少衝突,其實當中Sweet嘢仲多!Ariel話有時Joo會令佢好似置身韓劇,「我睇韓劇嗰陣會好冧,就會望住Joo,Joo就話『假㗎!講大話㗎!唔好信呀!』但係我諗返,啲男主角會摸吓女朋友個頭,Joo又真係會摸吓我個頭,都冧㗎!仲有踎低綁鞋帶嗰啲,係真係有㗎!」除咗咁,Joo仲會不其然咁撒嬌,好似問佢喺四個國家中最鍾意邊度,佢就擺出一副想冧香港人嘅樣,話係「香港~」Ariel即刻篤爆佢話「講真話!」佢先笑住話順序係韓國、日本、香港,最後係泰國。唔知你想唔想搵個Oppa男友,Ariel就話身邊嘅朋友都無話好羨慕,只係個個都問佢,「Oppa係咪好大男人?」Ariel無否認,但係認為Oppa嗰種大男人係顧家孝順,因為Joo喺好多事情上,都會主動諗埋佢屋企人。Ariel以喺泰國買車為例,「喺泰國得我哋兩個人,其實佢可以買架型啲嘅兩座位車,但係佢就諗埋我屋企人同佢屋企人,預埋佢哋嚟旅行,要載佢哋周圍去玩,所以買架七人車。」



Joo喺泰國做生意,Ariel做Model,齊齊定居泰國。

佢哋喺泰國租2、300呎嘅屋,Joo覺得細,Ariel覺得ok,Joo就話好彩Ariel係港女,唔介意住細屋。

佢哋定居泰國,係因為Joo喺當地做生意,做Model嘅Ariel又簽咗公司,可以派佢去泰國做嘢。Ariel話喺當地搵屋,Joo就發掘到港女大優點,「我哋喺曼谷租2、300呎嘅屋,Joo覺得好細,但係我就話ok,咁佢就同我講,『你係香港人真係好,我唔洗畀咁多錢租間大屋,將來無錢,買間細屋畀你都會好滿足!』我話係呀,我哋香港人住慣細屋!」嚟緊佢哋搬去芭提雅,一樣租返2、300呎嘅屋。嚟到訪問尾聲,正當Ariel同Joo講bye bye,Joo就大嗌:「等等!」原來「bye bye」令佢諗起多一個港韓文化差異,「喺韓國,收線唔會講『bye bye』,係講『哦~知道了!』但係Ariel成日要講『bye bye』!」Ariel偷笑話,如果Joo唔講「bye bye」佢會嬲,「開頭唔知㗎嘛,我覺得好似無啦啦就cut咗線咁,咪嬲囉!」所以o依家Joo都習慣咗講「bye bye」!アリエル泰國曼谷的韓式・生活
https://www.facebook.com/jooooting/記者:鄒倩婷(阿仙)攝影:峰、Neo剪接:Roy編審:Kaman




來源: http://hk.apple.nextmedia.com/entertainment/art/20170706/20080292
想嫁 Oppa 住慣 慣細 細屋 屋係 優勢 好彩 你係 係港 港女
PermaLink: https://articles.zkiz.com/?id=338195

【知Jargon】乜嘢係「QE」?知啲唔知啲 Oppa話你知

1 : GS(14)@2017-10-09 03:17:07

一般香港人,聽到「QE」,都會解係「伊利莎伯醫院」。不過對於財金人,一聽就會講係「量化寬鬆」。聯儲局今晚揭盎「縮表」派彩,想知咩係「縮表」,首先要知咩係QE!QE英文係Quantitative Easing,即係量化寬鬆,係各國中央銀行嘅吊命手段。「量化」即指創造指定金額既貨幣,而「寬鬆」則指減低銀行的資金壓力。簡單講,即係印銀紙。運作原理係點?大家去食Buffet,開開心心行去搶生蠔,唔知邊個偷聽到侍應講,生蠔就快冇晒啦!於是大家就恐慌,人生只有一個目標,係唔係都搶咗生蠔先!老闆見唔對路,係咁推啲生蠔出黎,高調公佈:「各位放心,生蠔源源不絕供應」。於是大家就唔再驚冇生蠔搶,安心返埋位食嘢。美國聯儲局就係Buffet老闆,08年金融海嘯後,就開始放水,真金白銀買債注錢入銀行體系銀行體系自己多咗錢,即係多咗生蠔。大家就唔恐慌性要Cash儲埋,市場流動性大咗,甚至多到水浸,咁銀行就可以借錢出去畀實體經濟,炒旺市道。至於QE後遺症,就好似生蠔咁,多咗唔興香,美金貶值,同佢掛勾既港紙就跟貶,錢銀唔值錢,咪去晒磚頭度囉。講返「縮表」,意思係「縮減資產負債表」,簡單來講,即係同QE掉轉做。




來源: http://hk.apple.nextmedia.com/financeestate/art/20170922/20160577
Jargon QE 知啲 啲唔 唔知 Oppa 話你 你知
PermaLink: https://articles.zkiz.com/?id=342112

【知Jargon】「蟹貨」係咩唔知道?唔使怕醜豬 Oppa話你知

1 : GS(14)@2017-11-13 03:46:04

「蟹貨」,簡而言之,即為「蝕本貨」。意指買入股票後,股價不升反跌,長時間比原先的買入價更低,所持股份即為「蟹貨」,結果資金就如大閘蟹一樣被綁死。「蟹貨」的出現,其實與股民心理質素有關。傳統投資智慧所言,要嚴守止蝕,不過,不少散戶卻敢輸唔敢贏、止賺不止蝕,自欺欺人地「一日唔沽一日都未輸」,結果資金被綁死,短炒變長揸,當股價較買入價跌至一定的幅度,根本「沽都無謂」,形成蟹貨。至於所謂「蟹貨區」,指有大批股民大量掃貨的股價水平,惟股價一旦跌穿該水平,令所有之前入貨的統統成為「蟹民」。假設股價重上蟹貨區,資金被綁的散戶,眼見股價「返家鄉」,重回買入家,一般會急急沽出股份,令「蟹貨區」出現沽壓,形成蟹貨區阻力。然而,一旦股價突破蟹貨區阻力,表示該股「冇蟹貨」,或是股價大升的先兆。



來源: https://hk.finance.appledaily.co ... e/20171111/20211058
Jargon 蟹貨 係咩 咩唔 知道 唔使 使怕 怕醜 醜豬 Oppa 話你 你知
PermaLink: https://articles.zkiz.com/?id=344122

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019