ZKIZ Archives


中環在線--彤叔:有大事堅叔要出手 李華華

2010-12-9  AD




 

噚日同大家八完「堅叔」梁志堅榮休之後,好多老友問華華,「彤叔」鄭裕彤自己都未退休,點解咁快就放堅叔走呢?呢啲咁高層次嘅問題,試問華華邊有資格代答呢?梗係打返畀堅叔個老闆彤叔,等佢自己答喇!

彤叔一開口就話:「佢(堅叔)係一個不可多得嘅人才,好唔捨得,畢竟大家一齊喺商場打拼咗幾十年……」明嘅明嘅,足足40年喎,堅叔似彤叔個影,又似彤叔嘅左右手,冇堅叔喺身邊,彤叔都應該要啲時間適應吓嘅。

「佢係不可多得嘅人才」

但唔捨得還唔捨得,彤叔最後都好理性接受現實。「我尊重佢自己嘅意願,佢做咗咁多年,係享受人生嘅時候……希望佢真係要好好哋過退休生活,休息吓!」但彤叔你仲留住堅叔做顧問喎,咁咪等於叫人退而不休?有啲矛盾,彤叔又點解釋呢?

「做MD(董事總經理)無時無刻都要掛住做嘢,o依家就係重要時刻先大顯身手。」咁又係呀,新世界發展(017)上上下下都知堅叔係工作狂,仲要係返咗工唔識放工嗰種,佢本字典裏面係冇「放假」呢兩個字o架!

就憑彤叔用好肯定嘅語氣講出以上呢一句,華華相信,堅叔畀咗彤叔嘅40年青春(唔好意思,係光陰至真),係冇白費嘅。唔計金錢嘅回報,淨係佢喺彤叔心目中嘅地位就已經值喇!之不過,華華有啲疑惑……到底咩先叫重要時刻呀彤叔?

李華華

[email protected]


PermaLink: https://articles.zkiz.com/?id=20086

中環在線:四叔要湊孫天匯丟埋一邊 李華華

 

2011-7-29  AD
 

 

 

政府不斷發功,樓市震不停,唔知啲發展商係唔當一回事,定係驚風雨欲來,近期加速推盤。港島區啲樓花盤突然熱鬧起嚟,樓價仲紛紛創同區新高o忝﹗不過,華華收到風,部署重新包裝發售嘅話題新盤──恒地西半山干德道天匯,全球路演時間表,仲要等大老闆四叔李兆基拍板先至可以作實。

環球路演計劃未扑槌

啱啱再做爺爺嘅四叔,可能忙住弄孫為樂,非緊急嘅商業項目,話唔定暫時要擱置落嚟。華華搵咗首席代理第一太平戴維斯住宅銷售部副資深董事張作基收風,佢話,天匯嘅環球路演計劃書已經交咗畀恒地o架喇,但恒地就仲未回覆幾時落實個時間表。佢估,最快都要暑假之後先至可以喺首站開show。張作基仲話,「周圍book場都好難,海外嘅同事都問過啲酒店,話檔期相當緊迫。」

話晒天匯曾經擁有破亞洲呎價新高紀錄前科,但係遇上連環撻定風波,要重新塑造新形象,正所謂「欲速則不達」,上半年恒地單靠賣貨尾都套咗130億蚊,差唔多達到舊年訂下嘅150億全年賣樓目標,環球路演慢得……都有道理嘅﹗

李華華

PermaLink: https://articles.zkiz.com/?id=26626

Next Page

ZKIZ Archives @ 2019