ZKIZ Archives


財女手筆:買新樓以為好易?

1 : GS(14)@2016-03-09 16:24:11

二手交投回暖,上車盤都好旺場,元朗映御更賣出可售單位的90%,發展商為買家提供最高八成一按,另有最高樓價25%的二按,首18個月免息。聽到二按,會否覺得好安心?咁你就中伏啦。二按即所謂的「包按」,其實真係好頭痕,銀行目前只提供六成按揭貸款,若果你想買400萬元以上的樓盤,需要有四成首期,160萬元,無?若果自住,可以向證券按揭公司借多兩成,你只要畀到80萬元首期就可以啦,80萬元都無,無問題,發展商提供二按,你得20萬元都可以上到樓。不過,有朋友剛剛買完新樓,形容地產商完全唔會同你計數,只想收咗你張票,仲不定時叫你借上借!當然,買樓係你,自己計最穩陣,先發現二按的光環只不過係螢光棒,到期就唔會照你。二按首3年息率為2.15%,比市場平,3年後,息率升,若再加息2厘,息率已大增兩倍至7.25%。以月薪3.2萬計算,即使你按年加薪4%,供樓佔收入比例亦由43%升至64%,如果再加息,你可能未必供得起樓,除非你唔使生活。結論,好明顯,做人唔好貪小便宜,要腳踏實地,如果未有充足儲備,千祈唔好貿然入市!
Melody本欄逢周三刊出





來源: http://hk.apple.nextmedia.com/financeestate/art/20160309/19521383
財女 手筆 新樓 以為 好易
PermaLink: https://articles.zkiz.com/?id=297321

財女手筆:居屋游離票求安心

1 : GS(14)@2016-03-16 14:17:07

新一期居屋申請昨晚截止,暫收逾4萬份申請,較上一期居屋申請少近七成。連特首梁振英都話,樓市回軟,少咗人需要居屋上車。綠表申請更加唔夠數,較上次新居屋大減96%,公屋居民心諗:「我抽都費事!」本身有公屋住,樓價下行,以樓換樓,風險雙倍。首先,你無咗平租公屋的福利,其次,一買新居屋就供貴樓,當你等咗4年終於有得入住,用7,000蚊未補地價呎價供居屋,隔籬私樓呎價已經唔使9,000蚊,仲有會所配套、買賣自由……咁點解要用公屋換咁大風險嘅遠期樓花呢?簡直係雙輸!至於白表申請者當中,當然有真心想買居屋的市民,但好明顯大部份申請係「游離票」!樓價今年起累跌約10%,個別屋苑更跌20%,距離今年7月揀樓,尚有4個月,恒指4個月後升定跌?大家都睇唔透,入個票求安心。計數就睇得透,居屋以去年9月樓價高峯定價,去年9月至今年1月,樓價已下跌9%,尚未計及近月跌幅,若再少少地計算,未計政府確認樓價下行鬆手,據上述跌速,樓價每月再跌2%,到今年7月,居屋申請人唔小心,一心動揀咗樓,即坐艇,至少蝕兩成。
Melody本欄逢周三刊出





來源: http://hk.apple.nextmedia.com/financeestate/art/20160316/19531409
財女 手筆 居屋 遊離 離票 票求 安心
PermaLink: https://articles.zkiz.com/?id=298118

財女手筆:小米前景勝Apple

1 : GS(14)@2016-03-30 14:23:08

蘋果公司(Apple)頹勢越來越明顯,窮得只有iPhone,係「技窮」個窮,急急腳推平價iPhone SE,滿心渴望開拓一條新水喉賺錢。回帶一年前,Apple市值是Google的兩倍,今時今日,Google已經成為全球市值最高的企業,提起本業多不勝數,如無人駕駛汽車、Google Maps、網頁搜索引擎、高速寬頻……全方位發展,全方位吸錢!出身高貴可能係掣肘,相較Apple,鄉村出身的「小米」,完全無家世負擔,玩過平價手機,再推出小米尊貴版賺錢,更不停踩過界發展,昨日最新推出小米IH電飯煲,外型簡約似日式,專攻去海外暴買的內地旅客市場,加入用App遙控調校白飯軟硬度,比其他品牌電飯煲更有gimmick。中國每年賣出5,000萬個電飯煲,小米如果開拓到10%市場,可以賣出500萬個,以每個售價999元人仔計,至少係一條新財路,有錢先有say,OK?回頭睇吓Apple,當創意不再,但又放不下高貴的身段及尊嚴,發展智能本業以外業務,只可不斷「炒冷飯」,賣銷售量一年差過一年的iPhone同減價求售的iPad和iWatch,以盈利前景而言,小米業績可能仲明朗過Apple。
Melody本欄逢周三刊出





來源: http://hk.apple.nextmedia.com/financeestate/art/20160330/19549554
財女 手筆 小米 前景 Apple
PermaLink: https://articles.zkiz.com/?id=298709

財女手筆:還地盤系一個公道

1 : GS(14)@2016-04-13 17:00:21

上一輩人生活艱苦,日做夜做,養大仔女,誓要佢哋成為「第二個李嘉誠」,未來職業?當然要成為醫生、律師、金融界尖子最好,話晒都叫「師」之輩,專業人士搵錢夠多,一定可以飛黃騰達,點知,今日一睇新聞,原來,最好唔及地盤好!不少人對工程認識不多,做通風、商場冷氣規劃、室內設計、或者做港珠澳大橋?咪又係落site做地盤,一律被統稱為「地盤佬」。地盤工程行業高薪缺人,香港大型工程一單又一單,即使你我再唔情願,政府仍然一車車、幾百億咁支持基建工程,大學生入職起薪都有兩萬蚊,勁過好多BBA畢業的人工,但仍然會聽到父母、親人,甚至女朋友慨嘆:「唉,始終都係做地盤,都叫佢搵份寫字樓工啦!」,硬係要將各個項目工程師講成「地盤佬」。近年不斷有建築、土木工程股上市,當年,可能大家唔睇一眼的「地盤佬」,今日搖身一變成為上市公司主席、CEO,大家對身邊嘅工程師,有無另眼相看?唔理佢哋家陣上市目的係咪「啤殼股」,至少,大家又將佢哋捧得高高哋,訴說一個個勵志的故事,係咪要還你身邊「地盤系」的朋友一個公道?
Melody本欄逢周三刊出





來源: http://hk.apple.nextmedia.com/financeestate/art/20160413/19568489
財女 手筆 地盤 一個 公道
PermaLink: https://articles.zkiz.com/?id=299182

財女手筆:英國唔脫歐更慘

1 : GS(14)@2016-05-21 13:09:18

合久必分,2014年,蘇格蘭公投脫離英國,下個月23日,到英國公投脫離歐盟,完全風水輪流轉。英國一話脫歐,不少銀行、金融機構就急急腳製造「白色恐怖」,指英國脫歐,將會令位於英國的製造業搬廠、銀行搬office、多少人失業、經濟重挫等等,不過,相較「英國脫歐幾咁災難」,又有多少人諗過:「英國留在歐盟更災難」?有人話英國政府實行「恐懼攻略(Project Fear)」,不斷恐嚇國民脫歐後,每年至少會賺少幾多千英鎊。不過,英國繼續留在歐洲,單計拯救債務沉重的「歐豬五國」,已經有機會令英國人每年使多幾千英鎊。銀行、金融機構的話事人如非英國人,sorry,只可以出口,無機會出手投票,但英國人就有。脫歐賺少幾多錢、影響幾多業務,對金融機構好重要,但對英國人而言,可能難民潮所影響的民生問題更貼身。而且,英國並非蘇格蘭,蘇格蘭經濟、貨幣、國防、醫療體系等等,全部依附英國,但英國作為世界最重要經濟體之一,歐盟會斷絕每年600億鎊的貿易生意?蘇格蘭未能成功脫英,英國能否成功脫歐,還看今朝!
Melody本欄逢周三刊出





來源: http://hk.apple.nextmedia.com/financeestate/art/20160518/19616251
財女 手筆 英國 唔脫 脫歐 歐更 更慘
PermaLink: https://articles.zkiz.com/?id=300514

財女手筆:則樓重傷你要知

1 : GS(14)@2016-06-01 11:33:46

建築界的傷痛忽然攤在所有人面前,其實今日85折出糧的主角王歐陽(Wong and Ouyang)只係冰山一角,更多更大的跨國則樓,今年初已經叫晒救命,裁員一間接一間,可惜苦無人知!中國經濟放緩,其實影響好大,中央政府不再以基建、樓宇等推動經濟,以往每年過千億、過萬億人仔的投放消失,發展商對建築的需求大減,幫人做建築設計的則樓,根本無新jobs。王歐陽在則樓界中只能稱得上為「大firm」,仲要係local firm,則樓中人好多都話唔明白點解王歐陽一夜爆紅,實情係,行外人根本唔知則樓界一早風聲鶴淚。據我所知,則樓中被稱為「Big Five」、做過高鐵總站設計的跨國則樓Aedas,去年中已經開始減人工,四成員工減薪最多20%。不過財女朋友話,Aedas不嬲炒開人,咁另一間「Big Five」則樓HOK亦頂唔住炒人,同為跨國則樓、出名唔炒人的Benoy,今年初更開先河、大刀裁員,對本港經濟又有幾大影響呢?前路茫茫,建築界不知幾珍惜有工開,下次張德江或某某領導再光臨,唔該體諒一下喺所謂大國L型經濟放緩下,生活大受影響的小市民!
Melody本欄逢周三刊出





來源: http://hk.apple.nextmedia.com/financeestate/art/20160601/19635665
財女 手筆 則樓 重傷 你要 要知
PermaLink: https://articles.zkiz.com/?id=301569

財女手筆:最識玩政治的英國人

1 : GS(14)@2016-07-06 08:10:00

英國脫歐公投前,明明有四成人支持脫歐,四成人支持留歐,公投一役過後,脫歐忽然消失晒?公投結果,證明脫歐派得到大部份英國人支持,原本應該成為雄厚的政治資本,不過,脫歐派忽然全部玩失蹤,甚至辭職唔玩,脫歐派唔通無後着、唔小心玩大咗?英國人被喻為全世界最識玩政治的人,狂撐脫歐的英國獨立黨黨魁Nigel Farage居然辭職,指自己的政治工作已經完成,希望回歸生活,咁新首相係邊到?難怪歐盟委員會主席Jean-Claude Juncker直情話,脫歐派並非愛國,因為愛國者面對困難,會留守救國,而非跳船!大家以為脫歐後可以見到新世界,金融界就見識到真正的新世界,市場動盪,不少金融機構或面臨重組,估計倫敦投資銀行獎金池縮水至少四分之一,因為要重新安置員工,留英或者搬office,同時,若果生意沒有起色,減人工少不免,倫敦投行9月可能會再裁員,保住工作都成問題。玩政治的最高境界?等其他人付出代價,自己重投期望已久的脫歐生活。
Melody本欄逢周三刊出





來源: http://hk.apple.nextmedia.com/financeestate/art/20160706/19682743
財女 手筆 最識 識玩 政治 英國人 英國
PermaLink: https://articles.zkiz.com/?id=302666

財女手筆:比卡超稱霸全球

1 : GS(14)@2016-07-13 05:09:49

比卡超熱潮席捲全球,大家將目光又再次重回任天堂,咁啱聽日中學文憑試(DSE)放榜,今屆中文作文題目完全係任天堂嘅寫照——「傳統往往是創新的包袱」!被譽為「任天堂喬布斯」的任天堂第四任社長岩田聰,由紅白機到NDS、Wii,多次將任天堂起死回生,可惜,早於幾年前,一早已經有人問岩田聰,任天堂幾時會打入手機遊戲,當時佢嘅答覆係肯定嘅:「絕對唔會!」卻造成任天堂其後迷失多年,當時,大家已經開始用智能手機打機,專攻小遊戲的立體3D遊戲機3DS,以及升級版屋企遊戲機WiiU,均未能形成風潮,正正反映傳統成為創新包袱。換個角度,創新只係一刻,只要有能力掀起熱潮,就會成為經典傳統!岩田聰願意承認失敗,最終回頭決定推出手機遊戲,Pokémon GO在美國、澳紐熱爆,相信其後開放更多國家地區,任天堂靠比卡超再次成為世界第一,至少稱霸世界App榜第一,相信未非難事,可惜,Pokémon GO係岩田聰嘅遺作,去年中因癌症病逝嘅岩田聰未能親眼見證,任天堂再次受全球捧為神明。
Melody
http://www.facebook.com/whichroad本欄逢周三刊出





來源: http://hk.apple.nextmedia.com/financeestate/art/20160713/19692330
財女 手筆 比卡 稱霸 全球
PermaLink: https://articles.zkiz.com/?id=303502

財女手筆:樓盤反價武林秘笈

1 : GS(14)@2016-08-04 04:04:22

身邊有不少朋友籌備上車、換樓,遇上不少反價盤,不過實情係,未必真係業主反價,而係賣家喺各間地產放盤,個盤畀人賣咗,經紀唯有講業主反價,開出一個你唔會接嘅天價,實情可能係個經紀搶唔到個盤!所以,買樓要搵多幾個經紀,先知道實情係點。網上巧遇一間地產舖寫出「反價武林秘笈」,內容生鬼有趣,教經紀遇上反價業主,點樣令準買家追價追得心甘情願,咁經紀就可以袋袋平安!武林秘笈內有一招「保住個勢」,講個客喺業主反價後一定有道氣,教經紀千祈唔好令個客嬲業主反價,所以首先要識「搵個代罪羔羊」,例如話係行家搞破壞,搶高個價;一係話新聞寫到個市好旺,總之搵個代罪羔羊出來畀客人消消氣,再要「說出動人故事」,令個客明白業主唔想反價,只係為勢所逼。秘笈內仲有一招「借力打力」,教經紀好好利用業主反價時,客人嗰一刻嘅失望,因為「係成交最大機會」,指準買家通常喺反價後會一鼓作氣。一追價,就會「肯offer之前唔肯加嘅條件」,所以就算傾唔到心水盤,亦都要令佢「成交到第二選擇」,當然係貴少少、本身唔肯買嘅盤!其實,無論講到天花龍鳳,反價只係業主想賺多啲,係幾百萬嘅「薄利」下,仍然為賺多5萬、10萬而斤斤計較。一反再反,經紀想做成生意,當然只有出盡辦法,氹得雙方開開心心。
Melody
http://www.facebook.com/whichroad本欄逢周三刊出





來源: http://hk.apple.nextmedia.com/financeestate/art/20160803/19720009
財女 手筆 樓盤 反價 武林 秘笈
PermaLink: https://articles.zkiz.com/?id=304256

財女手筆:十年未有沙中綫

1 : GS(14)@2016-08-10 07:53:29

港鐵(066)工程延期又延期,沙中綫為當中之最!沙中綫分為兩段,大圍至紅磡段及紅磡至金鐘段,大圍至紅磡段最早原定2015年竣工,全程計劃於2019年竣工。不過,據港鐵今日最新的業績報告,沙中綫最快要於2021年完工。港鐵及九鐵於2007年合併,原本由九鐵持有的沙中綫項目轉手予港鐵,早於2007至2008年度施政報告已有提及,沙中綫將會2010年動工,但期間沙中綫途經站多次改動,加上刊憲時間較原定押後1年,沙中綫最後正式獲批,2012年正式動工。沙中綫動工之年,大圍名城首期至三期,已經全部售罄。想當初,大圍名城賣點除了為「香港的中心」,亦包括整個屋苑位於未來沙中綫的大圍維修車廠上方,估計沙中綫工程5至6年時間完工,名城業主可能想不到,等到秋去冬來,沙中綫連影都未有,工程由一拖隨時10年都未完工!名城樓價升幅更跑輸同區,如果根據港鐵路線及政府規劃買樓,想獲得預期的升幅,可能要多少少耐性!
Melody
http://www.facebook.com/whichroad本欄逢周三刊出





來源: http://hk.apple.nextmedia.com/financeestate/art/20160810/19729643
財女 手筆 十年 未有 沙中
PermaLink: https://articles.zkiz.com/?id=305231

財女手筆:AH差價股玩完狠撇

1 : GS(14)@2016-08-17 07:57:01

深港通終於通車!上一次滬港通熱炒AH差價股,大家本身期望AH股溢價收窄,不過結果卻是逆向而行,越炒溢價越大,未開通時係咁,開通後亦係咁。睇番恒指AH股溢價指數,滬港通於2014年4月10日獲批,當時指數報95.37,A股較H股平,炒至11月17日開通前,指數已升至102.7,A股較H股變成貴2%,至滬港通一周年更高見141.31,擴大至A股較H股貴超過四成。滬港通準備七個月期間,市場其實仍能尋得平股,以浙江世寶(1057,深:002703)為例,由滬港通公佈獲批當日,A股較H股貴約7倍,然而炒至正式通車前,A股較H股只貴約2倍,北方資金覺得浙江世寶A便宜,再炒A股,AH溢價再次擴大至目前4倍。據滬港通往績,AH差價股真係炒吓就算,上次通車後,浙江世寶由12蚊跌至8蚊,消失三成股價只需要4日,相信深港通通車後仍有得炒,不過,有上次經驗今次可能更早散水,玩完記得狠撇,唔好痴心做人世!
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20160817/19738924
財女 手筆 AH 差價 股玩 玩完 完狠 狠撇
PermaLink: https://articles.zkiz.com/?id=306200

財女手筆:一隻蚊推低股樓?

1 : GS(14)@2016-09-07 21:44:25

股樓兩市忽然一片歡騰,潛在借勢回調因素,除了恒指14天相對強弱指數(RSI)見76.9,已屬超買水平,影響可能較漫長的寨卡,到底對股樓兩市負面影響有幾勁?寨卡確實不如沙士嚴重,大部份人感染後癥狀輕微,而且絕大部份會痊癒,不過寨卡對經濟的影響力,不在於死亡率,而在於疫情幾時斷尾,影響旅客計劃。本港錄得寨卡感染個案只是遲早問題逼近,新加坡、泰國等港人短線遊熱門地區,寨卡感染個案不斷增加,新加坡更加誇張,由8月27日發現首宗本地感染至今不足兩星期,至今已累積超過240宗病例。寨卡疫情一旦傳入較難斷尾,在寨卡陰霾之下,美國佛羅里達州首當其衝,旅遊勝地邁阿密海灘等被列入旅遊警告範圍,酒店出租率8月下跌3%。而新加坡金管局稱,初步迹象顯示,國內出現寨卡疫情可能對經濟造成小幅衝擊。不過,相信寨卡在本港出現,只是股市回調藉口,對現今瘋狂的樓市,見樓就衝入市的港人而言,不要說與沙士相比輕微,可能甚至連少少影響都無。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20160907/19762502
財女 手筆 一隻 隻蚊 蚊推 推低 低股 股樓
PermaLink: https://articles.zkiz.com/?id=307946

財女手筆:美國利率政策玩埋特朗普

1 : GS(14)@2016-09-14 05:47:52

港股近日被美國可能加息玩到頭暈,號稱「狂人」共和黨總統候選人特朗普都可能被玩!特朗普早幾個月前仍然揚言,支持低利率政策,當選後會撤換美國聯儲局主席耶倫,當時他解釋,低息可保障美國政府19萬億美元債務穩定。特朗普5月時仍然支持低息,因為當然他以為聯儲局一定加息在即,可能7月及年底前再加息,步伐都算快速!不過,直至特朗普終於覺醒,聯儲局原來只係無牙老虎,發現到年底可能只加息一次,甚至不加息,特朗普就瘋狂轉軚,由反加息變成撐加息!其實,反對加息的商家支持希拉莉的可能大於特朗普,特朗普競選政策明顯吸引一般美國平民,所以支持加息反而更加明智。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20160914/19769769
財女 手筆 美國 利率 政策 玩埋 特朗普 特朗
PermaLink: https://articles.zkiz.com/?id=309006

財女手筆:特朗普數到三,就……

1 : GS(14)@2016-09-28 05:00:19

美國總統大選首場激戰落幕,辯論內容不想重覆,反而想講講氣勢。如果大家並非睇精華片,就會發現「狂人」特朗普整個辯論,如鄺神所言「數到三就……」GG了!完全示範「一鼓作氣,再而衰,三而竭」!在辯論初段表現,特朗普絕對稱得上「狂放」,係威係勢,聲大夾惡,可能是早已背稿,以一貫「狂放」姿態指謫中國人搶走美國人飯碗,又話中國操縱貨幣,任由人民幣貶值,令環球投資流向中國,美國只有乞食,確實有「狂人」威勢。對比之下,希拉莉開初太過斯文,氣勢上落後特朗普。不過,未到中段,希拉莉繼續氣定神閒,反而特朗普越攻越弱,單憑聲線,原來「狂人」氣勢只在開端時能維持,即使在剛開始30分鐘,特朗普已經打斷希拉莉超過20次,但反而顯得氣急攻心,尤其被希拉莉嘲笑「從未交過稅」,才為美國財政真正疲弱的原因。滙市、股市一路反映投資者放心,相信特朗普首場辯論已經輸,Twitter更選出辯論「三大必睇時刻」。首位係特朗普話自己脾氣好,適合做總統,相信全球都認同特朗普確實有個別「總統」特質,包括改革、商業能力等,不過,絕非脾氣好……
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20160928/19783919
財女 手筆 特朗普 特朗 數到 到三
PermaLink: https://articles.zkiz.com/?id=310386

財女手筆:自願提早死於太空艙

1 : GS(14)@2016-10-26 08:01:41

太空艙本身並無貶意,有startup企業在辦公室內設置多個太空艙床位,作為startup,經常有員工OT、日夜搏殺,尤其科網、手遊公司更甚,員工食完lunch、加班太夜,入太空艙眠一眠,有電視機、冷氣等,快活過神仙!如果在big four加入太空艙,或者大家會讚賞一句,「照顧員工需要」?日本當初興起太空艙酒店,原意是短暫休息,不少深夜抵達的旅客小休後,繼續轉飛其他地方,密封設計不會吵醒其他旅客。可惜,在錢字行先的中式社會,一件美好的事必然被扭曲,籠屋床位美化成「太空艙」,居然都有人花錢入住,如果人窮被迫屈居籠屋,我相信能屈能伸,人總有出頭天。相信大家會話,獅子跳火圈是被迫;不過,今日見識到,原來跳火坑都有自願,有人願意以5,000元入住豪華籠屋。如果有居住需要,結婚、生仔要買樓,我贊成買入正常單位;新樓越劏越細、管理費比天高,豪華劏房呎價比二手更貴,遲早出現60年代徙置大廈「豪宅宿舍」,一層樓共用「高級品牌」廚房及廁所。如果你都自願買入、租住上述豪華劏房,我只可以講,打劫連刀都唔使出,因為你心甘情願被人打劫!
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161026/19811977
財女 手筆 自願 提早 死於 太空艙 太空
PermaLink: https://articles.zkiz.com/?id=313483

財女手筆:樓照炒 舞照跳

1 : GS(14)@2016-11-10 07:33:33

政府出辣招加印花稅至15%,無論計劃換樓、準備上車的朋友,一致大鬧新政策,指加辣只是增加上車及換樓搵盤難度,限制樓市供應,無人賣樓,何來買樓?其實加辣有其好處,將軍澳藍塘傲是加辣後首個新盤,次輪銷售只賣出77%,低於首輪賣出的98%,辣招唯一好處,是樓市只餘下資金超強大的投資者,部份實力不足的,已退場靜候,想買新樓的人,終於不必等大手買家掃完,買入揀無可揀的「籮底橙」!不過,不少新盤多推出劏房,有居住需要,亦很難說服自己買。只有一種朋友可以食住花生大笑,就是剛剛換樓的朋友!不少朋友主觀希望加辣後樓價大跌,成交減少,樓價自然容易推高壓低,不過只是虛火,實際情況大概半年至一年就會顯現。以今年初樓價下跌不足半年,已尋獲大批買家衝入掃貨,辣着樓市推上高峯,政府2013年推出雙倍印花稅及買家印花稅經驗,樓價未有明顯變化,當港人發現樓價橫行,不想買、無能力買的繼續不會買,要買樓的一年半載相信已經耗盡耐性,自會衝出嚟買樓,加息又如何?香港人適應能力超越整個宇宙,對於中央強力釋法,破壞未來一生、子孫後代的安寧自在,仍然處之泰然,仿如無物,可想而知,港人適應加辣新招、加息,時間非常短,之後會繼續沉醉買樓、炒車位,為資產增值,真係歌舞昇平呀。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161109/19827099
財女 手筆 樓照 照炒 舞照 照跳
PermaLink: https://articles.zkiz.com/?id=314674

財女手筆:享受藤鞭下的自由?

1 : GS(14)@2016-11-16 05:46:06

美國總統選舉特朗普跑贏希拉莉,美國多地有抗議示威,原本狂人姿態的特朗普受到共和黨的壓力,當選後態度軟化不少,希望可以爭取美國人的支持。抗議者並非拒絕承認結果,只是希望特朗普明白美國人對宗教、性別、性向等的意願,特朗普自然不會因而下台,轉為民主黨上場。民主選舉中的真諦,是人民能夠決定政府的政治組合,從而決定未來政策方向,從選舉中勝出的人有一定的代表性。不過,獲得超過5萬選民支持的民選議員,青年新政梁頌恆及游蕙禎卻被取消議員資格,證明民主選舉已經完全玩完。無論議題如何偏向小眾,相信仍然有其支持者,例如你支持少數族裔,他繼續反對濫用免遣反聲請;你支持同性婚姻,她繼續撐傳統家庭價值觀!議會正正是需要不同政見的議員,百花齊放,才不會成為獨裁者的皇宮,如今卻是法治變成人治,完全是梁天琦不獲參選的延續。香港的新聞自由不受干預,沒有不能談的題目,遇過一名人民大學新聞系碩士生,她不認同內地新聞無自由,只要不超過黨的底線已經很自由,戴着「黨的底線」頸圈,那種被框死的自由,她享受得很。如果有任何人認同梁游被褫奪議席正常,相信那個人絕對是一個M(享受性受虐者),熱愛框死下的自由,更感到舒暢無比,相信某些「主流」意願高於一切,法治?只是懲罰老百姓的藤鞭。手持藤鞭?儍豬,當然是當權者,往後才可以鞭打百姓。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161116/19834978
財女 手筆 享受 鞭下 下的 自由
PermaLink: https://articles.zkiz.com/?id=315773

財女手筆:強美元香港GG?

1 : GS(14)@2016-11-23 07:50:31

全球通脹預期上升,反而本港10月整體通脹連續第二個月向下,按年只上升1.2%,是久違了的「1字頭」。隨着美元升值,港幣同樣升值,在強美元、強港元的情況下,香港的輸入性通脹壓力自然減弱,加上樓市不上不下,租金一般不會飆升,通脹壓力更細。政府經常形容本港通脹「溫和」,其實實情是低企,雖然未至於通縮,但本港經濟一旦轉差,通縮自然免不了。剛公佈的10月份通脹是自2010年1月份以來最低水平,本港整體經濟看似不錯,但個別行業其實已經收縮了不少,外資行、財經界、甚至大型上市公司均於年關前裁員,慳番雙糧,確實算上得涼薄。其實,不少行業確實非常好景,包括大數據、科技等等,加人工挖角,獵頭公司自然打電話打到手軟,自有留人處。強港元下,本港最重視的旅遊業、出口自然受打擊,加上本身港人現時消費意欲不大,零售市道一般,來港消費不再便宜,仍然靠回流的自由行支撐,相信本港經濟半死不活的情況仍然會持續一段時間。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161123/19842317
財女 手筆 美元 香港 GG
PermaLink: https://articles.zkiz.com/?id=316628

財女手筆:聖誕鐘炒滙豐

1 : GS(14)@2016-12-07 07:56:29

距離聖誕節仲有三個星期,不過一踏入12月,一眾打工仔耳邊早已響起「Jingle Bells」,半浸淫喺holiday mood之中!今日肥屍大隻嘅滙控(005)應該都聽到聖誕鐘聲近了,忽然事距三個幾月,受回購消息推住個肥pat pat爬山嘅大笨象,休息咗三個幾月,終於又回復活力啦,唔少散戶又開心唱吓「O Christmas Tree」。計一計,滙控係2009年至2015年的七個12月入面,四次升、三次跌,升跌幅介乎4%,戰果一般般,其實,「聖誕鐘」年年講,不過,近10年都未見滙豐有開過party。不過,炒一炒的誘因仍然有,滙控昨日升3%,RSI仍然未過70,加上美國好大機會今個月就加息,今年首聖誕歌好似唱得到。可惜係,聖誕歌總有唱完一日,作為重噸位的大笨象,今次回購更提早出盡洪荒之力,正當大家開心大笨象變身小飛象,大家可能唔記得,小飛象都好重磅,大家放長雙眼,睇住小飛象到底可以飛得幾耐。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161207/19857070
財女 手筆 聖誕 鐘炒
PermaLink: https://articles.zkiz.com/?id=318586

財女手筆:唱美元做定存?

1 : GS(14)@2016-12-21 23:40:37

不少本地銀行近日調高人民幣存款利率,見到超過4厘存款利息,好似好心動?其實,好明顯又是另一個投資陷阱,在美國開啟加息大門後,人民幣繼續只有貶值大方向,估計明年全年仍然勢危,如果本身已有人民幣資金,唱回港幣或其他外幣,定繼續做人民幣定存?外滙投資最緊要唱得低,加上走勢升值,配合定存息率,做一年期定存料屬穩陣之選。近期人民幣定期存款息率又再上升,與今年初情況如出一轍。今年1月初人民幣急跌完一輪,加上2015年人民幣已經下跌5至6%,不少專家估計全年人民幣只會下跌2至4%,點知,據目前情況睇,人民幣今年起碼累跌7%。大家計一計數,今年初若有以新資金轉人民幣再入定存,人民幣滙率一年蝕7%,再扣回年初逾4厘定存息率,都要蝕3%。若以舊資金作定存,雖然人民幣早年唱定,但一年一年蝕滙價,總會重回兌換價。早前有報道指,有銀行的美元定存提供2厘息,但美國加息步伐料加快,至少無大幅貶值風險,相較人民幣定存,來回點只每年賺到2厘回報……除非有人民幣需要,例如公司業務要用人民幣等,需要保留人民幣,否則,早走早着。回想今年初,持人仔的市民仍然話人仔不會大跌,點知今年又跌7%,股票識止賺止蝕,定存都要止賺呀,不過我仍然相信老一輩不會聽。
Melody
http://www.facebook.com/whichroad本欄逢周三刊出




來源: http://hk.apple.nextmedia.com/financeestate/art/20161221/19871668
財女 手筆 美元 做定 定存
PermaLink: https://articles.zkiz.com/?id=319629

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019