ZKIZ Archives


無綫咪神離巢陳潔玲:可能佢哋覺得你想走呀?走囉!

1 : GS(14)@2017-05-18 01:10:52

「我的離開也是愛……」許廷鏗就咁樣唱,至於前港姐「咪神」陳潔玲離開大台又因為乜呢?佢昨日接受《蘋果》電話訪問時,咁樣形容同大台嘅「分手」:「都係和平結束賓主關係」。由參加港姐至今,差不多五年,陳潔玲坦言最唔捨得同事:「尤其係訓練班嗰啲,好多幕後同事對我好好,雖然啲人話公司冇咩人情味。」陳潔玲表示半年前已開始動念想走,沒有代表作亦是原因之一,於是佢走咗去問訓練班教過佢嘅阿旦鄭丹瑞:「佢好知道我性格,佢話:『你走啦,你牛皮氣,你留喺TVB咪又係又痕又怕痛,繼續留喺到又係囉囉攣,不如0依家走啦』。」咁啱五月份死約完咗,就決定離開。至於大台可有挽留?陳潔玲稱:「又冇喎!(由你走?)係呀!(咁都得?)我又冇諗呢樣嘢喎,可能佢哋覺得『你想走呀?走囉!』我都有啲驚,其實我計過我有半年冇返公司,可能爭公司一啲show,驚公司叫我還show,佢淨係話『你返嚟填番啲文件,搞番啲手續就ok』。」「當初入嚟係想見識下心態,做耐咗就發現,公司太大,太多部門,架構太複雜,好多時佢冇可能照顧每個需求,喺入面好被動,真係要等機會,唔知要等幾耐。喺大機構工作,大家都明要做好多門面嘢,要比較卑躬屈膝啲,但我自己有個堅持,我係想做演員,唔想為咗得到機會而磨平自己啲棱角,如果咁就冇咗自己character。」她補充:「我以前係仲倔,TVB已經成長咗好多。」0依家咁多平台,陳潔玲自言想試多啲嘢,會嘗試拍電影,例如網絡電影咁;至於簽經理人,佢話暫時想自由身先。




來源: http://hk.apple.nextmedia.com/entertainment/art/20170517/20024199
咪神 神離 離巢 巢陳 陳潔 潔玲 可能 覺得 你想 想走 走呀 走囉
PermaLink: https://articles.zkiz.com/?id=333154


ZKIZ Archives @ 2019