ZKIZ Archives


林瘋了 左丁山

2012-02-15  AD

紐約尼克隊之控球後 衞( point guard)林書豪( Jeremy Lin)自哈佛畢業,加入 NBA之後,因身矮(六呎三吋)兼來自沒資格參加 NCAA籃球賽的哈佛,不被重視, 2010年選秀時,飽受冷落,最後算係佢「鄉下」嘅屋崙市金州勇士隊因位於三藩市灣區,華人眾多,於是人棄我取,收留咗佢,但長期將佢放在冷板櫈,出場機 會極少,通常只在垃圾時間先至放佢出場打一兩分鐘。上季球季結束後,立即將佢炒魷,今季季初 NBA停賽,林書豪無班可落,侯斯頓火箭隊因姚明腳傷退役,想話搵一位華裔球員代替,竟然叫林書豪去「試工」,但一到 NBA球季重開,就覺得佢冇用,叫佢鬆人,最後紐約因為隊內有三大內線明星,但缺乏控 衞分波供應,隊內之戴維斯已老且傷,碧比無復當年勇,第三名係無名小子,居然心血來潮,簽埋林書豪,但合約到二月七日期滿,隨時可以炒佢。林書豪當年在 Palo Alto中學領軍取得全加州高中乙組冠軍,唔申請籃球獎學金入一啲以籃球著名嘅大學,只想加入佢嘅夢想首選 UCLA,但 UCLA唔收佢,只有哈佛布朗取錄,立即自費入學哈佛,帶領哈佛隊在 Ivy League籃球賽取得佳績,雖然如此, Ivy League不以籃球著名,即使係哈佛球星,都被 NBA球隊視為阿四,冇興趣。照計佢在哈佛主修經濟學,打波四年之餘,仲攞到 GPA 3.1,去大公司搵工都得啦,偏偏選擇要在 NBA流離浪蕩,成無主孤魂,去到紐約,唔知可以留幾耐,唔敢租屋,在細佬屋企瞓客廳梳化,可以講得話有堅毅不屈、為興趣而奮鬥嘅個性。
好啦,紐 約隊戰績不佳,教練自己面臨炒魷危機,前三名控 衞冇鬼用,於是賭一鋪,比賽輸波落後之時搵位大後備上陣,點知林書豪一戰成名,二戰轟動,三戰威震紐約,四戰湖人大明星高比拜仁,投入三十八分,高比甘拜 下風,於是紐約以至美國吹起 Jeremy Lin旋風,創出新詞 Linsanity( insanity就是瘋癲前面加個 L,可譯為林瘋)。一位芝加哥大學韓國裔博士生話,「亞裔開始受重視,始於七十年代 Bruce, 95年 Jackie, 2000年 Yao,今天有 Lin,凡亞裔都覺得興奮!」如果 Lin以後能夠繼續表現出色,佢簡直係奇貨可居, NBA及體育商錫到佢癲,乜唔係呀,哈佛華人球星,對中國市場簡直可以芝麻開門!

PermaLink: https://articles.zkiz.com/?id=31341

Next Page

ZKIZ Archives @ 2019