真假政經 - 王慧麟 安全 (2013年08月08日)
1 :
GS(14)@2013-08-08 09:56:25http://www.am730.com.hk/article.php?article=167083
【am730專欄】依家傾政改，有一個因素，叫做「中國因素」。即係乜嘢？心照啦，喬老爺大剌剌地說，「不能允許與中央對抗的人擔任行政長官」，講咗，成個香港市民依家都應該消化咗。或學術上曰：內化咗。仲內化咗響依家嘅特首方案討論添。
於是就有人話，其實北方擔心嘅係，一旦有一件唔知邊度閃出嚟嘅小巴阿伯，贏咗做領袖，唔知點算，因為唔知呢個人係咪愛國愛港嘛！即係話，上面要響提名嗰陣，卡一卡。要提高北京之安全系數，唔容易㗎。例如上一次領袖選舉，有狼英之爭，仲有一個茄喱啡叫鐵頭，民望大落後。有人會問，按上次經驗，最終提名篩剩三條友，仲唔夠安全？
當然唔夠啦！萬一出現當年台灣嘅陳水扁效應，連宋相爭，漁人得利，到時鐵頭贏咗，北京仲唔頭痕？不過，我估更頭痕嘅係市民，因為會爭住去瓦努阿圖也，原因係怕北京唔肯委任，出現北京香港之對立也。
於是，泛民有人會話，要提高北京安全系數，最好嘅方法就係響提名嗰陣，用筲箕篩剩五個，咁樣就安全啦。因為到時建制至少有三件，泛民至多有兩件，三比二，五條友去選，響數字上一定安全過三個人，杜絕咗陳水扁效應咁話。
呢個聽落好有道理，但實際上，呢個講法，唔係針對北京嘅安全系數，查實係講緊自己嘅安全系數。點解咁講？熟悉泛民嘅朋友都知道，無論係點，有能力選領袖嘅，不外乎係走去密室談判嘅白鴿，同埋走去公投嘅藍血，其他嘅都係冇乜機會。
白鴿呢？領袖老餅老土兼落後，但係就各個山頭有樁腳，雖然俾建制響地區上追打，但係至少每個區都有辦事處幫手，地區組織仲有。藍血呢？就有人氣無樁腳，一旦選領袖，地區上真係鞭長莫及，只能打空氣戰。
當然，一個極好兼一廂情願之願望，就係兩個共同醞釀一件出來，一邊有人氣，另一邊有地區，互相配合，夢幻組合，一定贏。但係，講到底，就係一廂情願。兩批人，意識形態上南轅北轍，點可能共同合作呢？得嘅話，早就合併咗啦，係咪？
所以，如果係用篩，去篩剩三個嘅話，泛民初選就會只有一個人出來。以全港知名度或全港泛民支持者公投來計算，就一定係藍血贏面大。如果係咁，你估白鴿會否瞓身調動全地球助選呢？萬一白鴿冷門贏咗，藍血就會唔會全力支持呢？我講嘅係瞓晒身嗰隻，日日夜夜同你去選舉咁樣。
既然會出現黨同伐異，為免傷和氣，假如我係泛民，我都一定支持篩剩五個人出來選特首，因為到時泛民就可以有兩個人出來，至少白鴿一定有一件。另一件係邊個冇人知。但如果係篩剩三個人，白鴿隨時要陪選，好唔抵也。
政治係充滿計算嘅，要計數計得精，又要聽落好似好有道理，唔容易㗎！
真假政經 - 王慧麟 時光倒流 (2013年08月07日)
1 :
GS(14)@2013-08-08 09:58:25http://www.am730.com.hk/article.php?article=166907
【am730專欄】假如時光可以倒流，你話幾好？二十幾年前，一個專業才俊，三十幾四十歲咁啦，響專業發展方面如日中天，仲要響大行嗰度做緊中層管理，響繁忙的私務之中，仲可以抽空搞公共事務，幫政府出謀獻策，跟手做埋議員(行政、立法都得，兩兼仲正)。發達咯！仲唔係香港精英？
依家？如果你想從政，唔響大學畢業之後投身政界，連選區議員都未必有位，唔計嗰啲仲響度浮沉緊嘅大小地區幹事，做到甩肺博三年後出選。嗱嗱嗱，噚晚響街邊貼緊張單張，通知你中秋有海鮮一日團嗰位，就係佢嘞。所以，時光巨輪日日轉，政治發展日日變。二十幾年前嘅東西，依家未必啱用。好似傾未來領袖，2017年嘅方案應該係點，除咗北京之外，個個都唔知下一步會點。依家開始有些上一輩嘅政界人士話，應該效法當年基本法草委會或諮委會咁樣，搞一個類似之組織，齊齊醞釀一個普選方案喎。
依家八、九十後嘅朋友，可能唔知係乜嘢。梗係啦，呢啲陳年嘢，無五、六十歲，都唔知當年點解有兩件咁嘅物體。簡而言之，為咗落實1984年中英聯合聲明，兩年後，有兩個組織負責搞基本法。一個係草委，即係起草基本法，一個係諮委，收集社會各界之意見。呢兩個組織，當時聲稱係香港開埠以來最民主參與嘅組織，網羅各界人士參加咁話。
但係，後來全宇宙至知，當時仲有一隻黑手，響背後密室談判。嗰隻手就係英國。響政制討論陷於僵局嘅時候，就係中英兩國之七封函件，至搞掂立法局議員直通車等政制問題，亦成為了基本法政制方案臨門最後一腳。
亦都係港英政府嘅影響力，即係港英透過佢地響香港可操控之親港英人士，齊齊出聲力挺基本法，令社會上有一股支持基本法之氛圍，令到基本法響人大通過之後，香港嘅反對聲音真係好似乜都冇。換轉個角度，假如當時港英政府真係處處玩針對，日日玩唱衰，香港人仲唔嚇到投奔怒海？呢啲「英國因素」，當然唔會響中國依家嘅文宣睇到。唔好忘記，當時八九六四之陰影仲籠罩住香港，港人怕唔怕九七之後有事發生？當然擔心啦。依家嘅文宣，一面倒歌頌中國及部分港人響基本法貢獻，咪係偏頗咯。不過，英國佬響香港做嘢素來好陰濕。佢地唔會介意，有冇人公開歌頌佢地幫手響香港推動接受基本法，佢地只係關心，自己有冇響香港有實際得益。歌唔歌頌呢味嘢，冇所謂，咪「她在叢中笑」咯。
好啦，依家話響度重新搞一個類似基草或基諮嘅組織，真係好out。淨係依家嘅政府威望，同1990年嘅港英政府，已經輸九條街。況且，今日唔同往日，任何泛民被委任入去呢個組織，唔怕有激進人士響會場門口插你賣港投共密室談判出賣民主兼英美走狗？2016年有立法會選舉呀！ (二之一)
真假政經 - 王慧麟 心知肚明
1 :
GS(14)@2013-11-13 14:01:12http://www.am730.com.hk/column-181209
好啦，立法會點樣扭盡六壬，都唔能夠通過權力及特權法，即係一場對決已經好清楚：泛民想借用立法會做一些正常的事都沒有辦法。於是響立法會外之集會現場，有人話，市民會覺醒，下次選舉要認清認楚云云。
講呢句話之朋友，斷估都好少留意選舉新聞。香港選舉早就已經係鐵票陣勇戰鐵桶陣。兩邊，無論泛民同建制，響各選區都有基本盤，泛民佔優之選區，建制有幾多票，會拿多幾多，心中有數。同理，建制佔優之選區，泛民可以拿幾多票，亦心知肚明。響區議會層次，基本上大局已分。建制必定贏到開巷，除非建制鬆章，否則泛民好難偷雞，而且，唔好忘記，泛民好多時會有兩個選擇俾選民兼鬼打鬼。所以，當有人大聲叫大家用選票來懲罰投反對議案之議員，發開口夢乎？
到咗2015年區議會選舉期到，wiki件事，早已消化咗，依家未到選舉，地區組織已經玩到派午飯飯盒以支持「扶貧」，你話兩年選民會關心一些甚麼？雞汁台到時到候送晒64場世界盃俾你免費睇，兼有宇宙級無敵主持左麟右李阿叻再加志偉，夾多件金剛同獎門人式遊戲節目，一般市民就會順晒氣啦。到咗投票日，咪又乖乖地唔出門口投票，又或者投建制咯！你唔順氣？冇計，wiki肯唔肯依家就拿四億出來，日日派飯盒派到2015年？
傻啦，有人唔鍾意阿叻響之前嗰個旅遊節目推銷暴發式飲宴，依家佢老人家一樣老神神在在，仲可以響台慶節目做主力。佢講嘅，亦都係事實：你點樣可以杯葛得到萬千星龜賀台慶？個個到時到候坐定定咁樣睇，到時可能仲會用一些表演或或一些遊戲環節來玩全民公投添！到時如果有幾十萬個電話投票支持某個藝人之表演為總冠軍，其legitimacy高過Hello Kitty領袖添！而且，仲可以聲大大地說，杯葛？雞汁，才是宇宙真理！電視正道！
至於會唔會票債票償到2016年之立法會選舉，此說更加傻。響比例代表制之下，個個依家投反對議案之建制派人士，只要響直選之名單內排首位，安枕無憂。點樣償？所以，要真係做到要票債票償，至少、至少真係要大家齊心迫政府改比例代表制為單議席單票啦！大家有冇咁齊心，日日去政總圍到政府一定要改選舉投票模式？香港市民肯唔肯依家開始瞓身去做？Wiki會唔會支持呢樣嘢？
一個社會沉睡了四、五十年，要班市民完全覺醒，根本不可能，況且，閣下如果係唔理政治又忙到唔得閒睇電視的話，雞汁又好，把鬼當歌又好，真係無乜問題。有Smart TV，同網上回看甚至新聞apps，已經好夠。依家香港真係痛到冇晒自由？同北方比較，香港自由度贏足成條街。當然，我哋唔好低估群眾力量，但亦無需高估香港市民，香港市民若果真係愛民主，早就前仆後繼搞革命啦，係未？
Next Page