ZKIZ Archives


歐洲響警號 左丁山

2008-03-11 AppleDaily
次 按債券風暴累親金融股,係人都知。美國聯儲局為咗救市托市,不惜連番削減利率,講到下一次可能會減0.75厘咁多o忝;但減息並不是好消息,愈係減息,股 市愈跌,當初盲目相信減息有用而入貨之投資者,現在無不叫苦連天。散戶如此,大戶亦唔係精仔,歐洲已有對沖基金彎咗,銀行大力收緊信貸,加緊追孖展,即使 大大客戶都冇情講,譬如好有名氣嘅Carlyle Group在上星期二承認未能及時為屬下按揭債券基金補孖展,已收到銀行嘅違約通知(default notice),即係話銀行隨時有權將基金持有嘅債券盤清倉。一片風聲鶴唳之下,瑞士銀行(UBS)嘅策略師William O'Donnell公開哀求美國國會出手打救,因為信貸市場已陷入大蕭條(Great Depression)以來最混亂嘅情況。 信貸市場亂成一片,股票市場就顯得較為表面上寧靜。呢個情形可以維持得幾耐呀?相信股市仍會下跌,尚未見底。貿 易M極少買賣股票,香港人亦唔興買賣債券,故此貿易M一直以為金融市場一片混亂,唔關佢事。點知上星期收到歐洲出口商通知,放賬期由九十天縮短為六十天, 要貿易M立即找咗一批貨嘅賒賬先。貿易M好彩素來理財謹慎,銀行條line(信貸額度)未用晒,可動用部份現金,部份OD(透支額)嚟清咗條數先。以後如 何應付呢?貿易M話:「次按風暴搞死銀行,銀行收緊信貸準則,收縮信貸期限,歐洲出口商無不受影響,呢點我明白嘅,佢哋既然只放六十天賬,我唯有又向香港 批發商放六十天賬啦,信貸期縮短三十天,肯定對一啲財務管理較弱嘅行號有影響o架,特別係嗰啲利用放賬期而去炒兩轉嘅投機商人。」何出此言呢?原來貿易M 知道有啲大型零售連鎖店恃住生意好,日日收現金,但可以九十日後先至找數,於是將手頭上嘅現金拎去炒吓股票甚至炒樓,或作買地舖嘅首期付款。佳寧風暴時代 (一九八二至八四)、金融風暴時代初(九七至九九)就有唔少商號因此而瓜得。現在歐洲出口商開始縮短放賬期,千祈唔好睇輕其連鎖殺傷力。

歐洲 警號 左丁 丁山
PermaLink: https://articles.zkiz.com/?id=528

學習西方 左丁山

2008-04-27 AppleDaily
香 港大學發表畢業生就業報告,透露新畢業生平均月薪一萬七千元。呢個數字認真唔錯,小記者G報道完呢單新聞之後,自怨自艾一番:「讀新聞系做乜鬼吖,我哋畢 業後做記者,做咗五年都冇一萬七千蚊一個月,每日寫稿講通脹、講米貴、講香港打工仔去年加薪幅度,冇時間諗自己嗰份糧,鶽家睇一睇,幾乎喊得一句句。」左 丁山叫佢唔好心灰,一於以新聞界翹楚盧永雄為人辦,盧先生做記者出身,畢業二十三年後貴為星島新聞集團行政總裁,年薪九百萬,足令新聞系學生士氣大振!我 哋知道盧永雄幾多薪酬,皆因上市公司年報要列明董事及主要行政人員嘅薪酬。財務E對呢項披露,十分不滿,因為佢嘅八位數字年薪,現時街知巷聞,令佢受到好 大親戚朋友壓力、同事壓力。佢話:「呢啲所謂公司管治透明度,根本不合國情。」左丁山明白嘅,西方一啲做法,嚟到東方就會變樣,公開晒高層薪酬之後,就會 引發眼紅症、肥上瘦下症、忿忿不平症、貧富懸殊症,症狀之多,令老細都吃不消。另一項公司管治基準就係會計上每年度重估物業及長期持有嘅投 資,即係Mark to Market,財務E話:「呢條橋係啲會計師諗出來為佢哋行業增加生意嘅,短期投資係要Mark to Market,但自用寫字樓物業,一啲對沖性財務工具,係都要估計最新時值,簡直做死人,亦令到盤數亂龍,散戶投資者亦分唔出邊啲係正常營運利潤,邊一啲 係一次過利潤與虧損。」仲有一樣就係學美國發佈季度財務報告,愈係大財團,愈係為此做到死。美國式季度報告往往對公司策略 有負面影響,因為每季要改成績表,美國唔少大公司為咗面子,總要在數字上做吓手腳,避免分析員責怪,行政總裁嘅視野因此唔能夠放得遠,點都要顧全三個月後 可以賺到幾多先。財務E認為美國此制度不值得效法,長期嚟講,投資者是否得益,大家存疑,左丁山以為此乃全球化之代價,香港要做世界城市,被迫追隨世界潮 流。可嘆者乃係我哋通常未學到西方好嘢之前,先學齊啲陋習。

學習 西方 左丁 丁山
PermaLink: https://articles.zkiz.com/?id=802

大郭領導有方 左丁山

>2008-05-08 AppleDaily

《蘋 果》李八方版最近少咗一啲商界八卦料,吸引力大減,點知五月六日失驚無神出咗一張郭炳湘相片,於是引起唔少中環老友注意,議論一番。左丁山望真吓,普通料 啫,呢篇「郭炳湘歸位前哨戰」,標題吸引過內容,張相片應該係標準公關相,只憑郭炳湘企在中間吸引讀者。因為郭炳湘即使在未放大假之前,都比較少有公關照 片發放嘅。老友話:「仲有郭太呀!」咦,又係噃,郭太挽住郭生臂彎,幾親密啫。

李八方話大K(郭炳湘)都快休假結束,正式回復主席職務,事 實會否如此,其實大家都唔知。老友之中,不乏地產界中人,地產B話:「所謂放假事件,頗令我哋行家愕然。大家都知道新鴻基地產係地產金漆招牌,郭氏三兄弟 合作無間,年年賺大錢,好令人羨慕,記得郭得勝老人家喺九○年逝世,大K同年就任新地主席兼行政總裁,十八年來新地一直壯大,大家數得出嘅傑作就有駿景 園、禮頓山、apm、IFC、ICC、凱旋門,無不叫好叫座。沙田間酒店又會成為奧運馬術賽選手大本營,你話大郭係唔係領導有方呢?」

地產 B對新地如數家珍,冇人敢同佢拗。戰後才發達嘅香港大家族之中,以第二代計,最能幹醒目嘅,有郭氏三兄弟、李氏(李嘉誠)兩兄弟,羅氏(鷹石)幾兄弟,呢 三家兄弟嘅商業才能商界無不稱讚。以美國家族企業經驗而論,強如洛克菲勒,福特,去到第三代,家族企業點都會由專業打工仔上位,去到第四代,差不多全由外 姓人打理,創辦人家族最多會繼續成為大股東。香港家族企業甚多,會唔會循此途徑發展呢?

一位老友喺一九九○年之時叫左丁山 買新鴻基地股票,但左丁山聽咗死黨講,儲埋筆錢投資落餐廳度,做咗餐飲股東,至今得個飲字,飲冰水咁飲呀!嗰位老友當時(約九○年底,大郭上任後)買新 地,每股好似係十三個幾。呢日睇見大郭張相,心血來潮打電話問吓佢:「你仲有冇新地股票?」老友笑嘻嘻:「十八年來一直揸住,鶽家係我嘅退休金,時值過千 萬元,比九○年底升咗9.6倍,同期恒指只係升咗7.7倍啫,要多謝大郭與兄弟領導有方。」
大郭 領導 有方 左丁 丁山
PermaLink: https://articles.zkiz.com/?id=859

郭大少可以復職? 左丁山

>2008-05-15  AppleDaily 近 日睇到好多新地主席兼行政總裁郭炳湘嘅八卦新聞,就係話佢預料重新掌權,銷假回歸新鴻基地產,但係未必一定冇阻力噃。大家都記得,新地喺二月十八日突然發 表聲明,主席郭炳湘休假三個月。咦!眨吓眼就夠三個月嘞,不過五月十八日係星期日,照計新地要最遲喺五月十六日星期五發表聲明,為主席休假一事作一個交 代。正因為咁,市場傳聞甚盛,話新地會在今天五月十五日召開董事會,決定郭炳湘嘅前途。

問一問對公司管治素有研究嘅財務A,對呢件事應該如 何分析?財務A話:「新地有一個大特點,就係既係一流藍籌公司,享譽甚隆,但同一時間,又係家族色彩好濃厚嘅公司,阿媽有好大話事權,三位公子雖係飽學之 士,讀完帝國學院、劍橋、哈佛等等,但在處理高層人事方面,要聽阿媽話,特別係邊個做主席。郭炳湘係大仔,做咁耐主席,成績有目共睹,但時至今日,可唔可 以繼續做主席,相信要由阿媽拍板,唔係由董事局。」

大公司嘅最高層唔係董事局決定嘅咩?財務K話:「此乃我哋中國人之DNA,外 國基金經理 一定唔明白,話之你讀完哈佛MBA啦,喺中國人公司,讀《三國演義》與《紅樓夢》更加適合。千祈唔好在家族內公司內講獨立非執董之重要性,識得曹丕,曹 植,王熙鳳在榮國府,先至係大道理。」財務K之言,令鼓吹現代公司管治之人氣餒。左丁山老友張總在中文大學兼職教EMBA,佢對《三國》《紅樓夢》及中國 歷史故事熟到無倫,下學期中大應該請張總開一科叫做「皇阿媽與公司管治:中港台公司個案研究」。科大EMBA叫做世界第一(FT排名),但啲外籍教授邊度 識得我哋中國人公司啲深層文化呀!

上次二月十八日之後各報刊傳出八卦消息話郭大少犯咗「兩宗罪」:一係精神健康 有問題,二 係交上女朋友,鶽家又點呢?財務K話:「即使真係有女朋友。罪不至死,全世界嘅大公司董事局絕少因主席私事而炒主席魷魚,例子多到數唔晒,無謂多講。關於 身體方面,《明報》與《蘋果日報》都話郭大少搵麥列菲菲、胡健維加兩位中大港大教授檢查過全無問題,香港嘅醫學權威話郭大少冇事,董事局成員點敢反駁呀, 唔通叫獨立非執董王于漸,質疑番自己港大嘅醫學權威呀?故此傳聞之兩宗罪全不成立,郭大少應該可以復職,除非另有我哋外人完全唔知嘅別情!」
郭大 大少 可以 復職 左丁 丁山
PermaLink: https://articles.zkiz.com/?id=905

豪門故事多 左丁山

>2008-05-19 Appledaily

上 星期報紙以大篇幅報道新地郭氏兄弟鬥法之事,好睇過花燈,尤其係《信報》竟然喺大半晚之內,將大郭入稟狀譯成中文,實在努力之至,喜歡睇全文之讀者,冇法 子唔讚。老友醫生C便睇得津津有味,上午開始診症之前,閱畢全文。

問佢為何睇報紙睇得如此深入,醫生C話:「我幾年來一直買入新地股票,至今未賣出過,係 忠心股東嚟o架!故此特別關心新地管理層之變動。」原來如此,佢唔係專門等開股東大會就去食番一餐,埋怨點心唔夠熱,生果唔夠多之類嘅老股東,真係用心機 留意公司一切嘅。

既然係醫生,佢對大郭精神健康之事特別敏感,比較相信本地醫學名家(麥列菲菲、胡健維等)之診斷,因為麥列菲菲資格夠晒老,幾乎有資格做 佢老師,唔會空口講白話。至於《信報》與《明報》披露另有一位李誠與麥列菲菲唱反調,醫生C話佢唔會評論。淨係講醫生都有排講,你話豪門家事,公司事嘅劇 情幾咁豐富呢。中午飲茶時份,未行到陸羽啫,就碰到另一位醫生N,佢話睇到《明報》(B2)版講「雙方醫學專家互相指摘」,覺得好有娛樂性,娛樂來源就係 中文大學醫學院精神科學系教授李誠「反駁」麥列菲菲等人嘅報告(按:四位教授、醫生報告話大郭冇事),因為原來李誠根本冇見過大郭,如何可以判斷大郭有事 呢?

醫生N話:「畀我就唔敢未見過病人就寫診斷評估報告咯,講笑咩,麥列菲菲指李誠報告只係paper exercise,可圈可點。此外,嗰位史丹福Dr. Maldonado,睇佢嘅簡介就似乎幾勁,但係即使佢攞到諾貝爾醫學獎都好,嚟到香港,可唔可以診斷郭炳湘呀,照計就唔得,會涉及本港法例問題。」

上到 茶樓,本想捉住律師W問一問,點知律師W另外有約,冇嚟到,飲完茶後,行到返公司已接到編輯T報訊,話好多朋友正努力搜尋神秘人身份,懷疑呢位以報紙遮 頭,坐在郭炳聯身邊之人就係前高官(照片見五月十六日《星島日報》A2版),哎吔,一幅圖片又會揭露案中有案?聽到自己都暈暈哋。
豪門 故事 左丁 丁山
PermaLink: https://articles.zkiz.com/?id=921

AIG之痛 左丁山

2008-05-23  AppleDaily



財 務M以前在美國國際集團工作,現在仍然揸住公司(AIG)股票,但睇住AIG股票由二○○五年二月嘅高位七十二美元跌至五字頭,跌至四字頭,再跌到星期二 嘅三十八個零美元,真係又嬲又無奈。點解唔止蝕呀?財務M提出兩大理由,

(一)AIG係一間好好公司(佢用過去式was),在亞洲尤其稱雄,正當人人都走 嚟亞洲投資之際,AIG在亞洲有近八十年歷史,有乜理由冇前景;

(二)佢仍然對AIG有感情,懷念Greenberg時代。AIG剛於星期二宣佈集資二百 億美元以充實資本嚟填補撇賬損失,集資數目之大令市場驚奇,深恐AIG之撥備仍然陸續有來,於是AIG股票遭受巨大沽售壓力。

財務M話:「自己不敢相信 AIG竟然會投資咁多錢落一啲風險甚高嘅債券度(按:信貸賴債掉期,按揭債券等)。想當年,自己與同事在香港每次有『新橋』,做投資或貸款,請紐約批核 時,十次有九次半會被駁回,每一次嘅理由都係「怕有不可預到風險」。

嗰陣時由Greenberg做主席時代,AIG係一間極度risk averse(畏懼風險)嘅公司,點解呢三年AIG要為投資撥備咁多百億美元o架?」唔明就唔明,香港AIG素來表現良好,作風保守,點會亂咁嚟吖,但紐 約總部由三年前上台嘅Martin Sullivan負責,大概要表演一下,以示同老主席Greenberg一刀兩斷,於是搞出個大頭佛。

AIG今年第一季虧損七十八億美元,撇賬額高達一百 五十二億美元,大到嚇死人。因為咁,喺五月十四日嘅股東大會之中,好多小股東都懷念Greenberg在任之時嘅舊日子。老主席今年八十三歲,做主席做咗 三十八年,喺二○○五年受紐約檢察長斯皮策(Eliot Spitzer,後成為州長,今年因召妓事件辭職)調查,遭指控做假數,虛報利潤,被迫辭職。主席離職後,AIG告佢做假數,老主席就告番轉頭,一於打官 司到底。現在有證據顯示,斯皮策與AIG係錯嘅,老主席有機會贏得官司。諷刺嘅係斯皮策以人民英雄自居,口口聲聲話保護小股東,保護投資者,揭露AIG 「黑幕」,點知現時害死小股東嘅,正是斯皮策趕走Greenberg。
AIG 之痛 左丁 丁山
PermaLink: https://articles.zkiz.com/?id=974

李四叔之言 左丁山

>2008-05-28  Appledaily

當 年與郭得勝、馮景禧創辦新鴻基嘅李四叔兆基老先生,果然越老越可愛,成為香港記者最鍾意爭相採訪的商界大人物。四叔近年鍾意對記者講嘢,首先講股票,預測 股市升勢,後來股市大調整,佢又願意出嚟自嘲一番,話自己係冒牌股神,只係大散戶一名。

講呢番說話好唔容易o架,你見美國布殊總統每年一度出席華府嘅全國 記者會晚宴,做棟篤笑娛賓,笑話集中於自己嘅蝦碌嘢,咪以為好易,大部份唐人,尤其係富豪級人物,就未必做得到。李四叔公開講自己係冒牌股神,可見佢有一 啲鬼佬作風,而且到咗無欲無求嘅階段,可能係多讀道德經之故。

李四叔去到瀋陽咁遠,記者一於死跟,果然四叔又有料到。四叔評論新鴻基地產(新地)郭氏兄弟 之爭,以世叔身份講明,兄弟糾紛並非金錢之爭,只係意見不合及權力之爭,最好三兄弟各自管一瓣,各自負責,互諒互讓,勿生爭拗,不要分家,至於新地主席可 由三兄弟輪流出任,各人做一兩任。講到尾,四叔話支持郭媽媽嘅意向。但四叔已經勾劃咗一個兄弟和解模式,郭媽媽今日以七十九歲之齡代大仔出任新地主席,唔 知贊唔贊成呢?

當年與郭得勝情如兄弟共闖天下之李兆基講呢番說話,似足老人家調停老友繼承人之間不和,係百分之一百中國傳統作風。好似城中另有富豪做中間 人調停,至今不得要領,為何如此,外人有排估;與其係咁,倒不如李四叔親自請三兄弟到恒基總部閉門吃飯,大家傾到掂先至食甜品!適逢老友C自上海回港,於 是問佢如何從中國歷史角度睇二十一世紀之公司內部紛爭。

佢飲啖紅酒之後,不假思索咁話:「第一個故事係玄武門之變,但當時李世民兄弟只係爭做皇帝繼承人, 未做皇帝,所以未算適合亦不適當。第二個故事就係土木堡之變,似乎多一啲線索。」咦,係噃,中學時代讀中國歷史,一定讀過明英宗與明景帝嘅故事(現時學生 就未必識)。明英宗朱祁鎮於1449年畀蒙古人俘擄,向明朝勒索贖金,細佬朱祁鈺,即位為景帝,一於當聽唔到,之後就朝廷多事,明室內鬥,積弱不振矣!
李四 叔之 之言 左丁 丁山
PermaLink: https://articles.zkiz.com/?id=1007

點解樣樣問政府 左丁山

2008-06-28 AppleDaily

東 亞銀行得法庭批准封樓(漢普頓酒店),據說政府高官有微言,其實啲高官平時唔留意新聞,旅遊事務專員唔留意酒店業主與東亞(債權人)打官司,到咗出事就慌 張失措,叫住客去露宿者之家,先至令納稅人有微言。一般商業機構,特別係銀行,不時有錢債官司,唔通私人公司要樣樣呈報政府機關咩?如果係咁,每個局請多 幾個副局長、十個政治助理都睇唔掂。香港人近年似乎凡事鍾意倚賴政府,樣樣都話要政府出手、政府監管,政府負責。其實寫社論嘅主筆與一般當事人,可唔可以 反求諸己,覺得私人責任大過政府責任呢?左丁山幾年前旅行澳洲時,在雪梨歌劇院附近沿海濱漫步,發覺沿岸無欄杆之設,行人或小童一個唔小心,容易跌落海。 當時對老婆講:「如果尖東海濱如此,香港政府一定畀人鬧死。」哈,前幾日睇報紙,有人在新界鄉村步行過小石橋,跌落水坑(或小溪),話要投訴政府唔在小橋 設欄杆喎!又有天水圍天逸邨兩名小童自三十四樓爬出窗外,幸好無事。但有議員批評房署設計有陷阱,又話要求房署為居民免費安裝窗花喎。喂,關房署乜事呀, 家長不管,孩子頑皮,都係政府嘅錯,房署之失?乜家香港人與香港議員都係長不大的孩童咩?有日碰到資深酒店高層M,與佢講起漢普頓酒店之事,佢就批評油 尖旺民政專員唔識得在事件發生後,即刻打電話畀酒店業主聯會求助。酒店M話:「香港有大把酒店房間以不同水平租金出租,臨時接受晒漢普頓啲住客,一啲都唔 難!」左丁山問佢:「有人話,假如漢普頓係君悅,銀行敢唔敢封舖?」酒店M答:「完全兩回事,不可扯埋一齊講。文華東方裝修期間,老早通知全世界唔會接 客,五星酒店管理有程序有系統,邊會在打官司屢戰屢敗嘅情況下,膽敢在收到『遷出通知書』之後,仲繼續接受訂房吖。而且五星酒店嘅業主全部依法行事,財力 雄厚,如債務過多,就會與銀行商量重組債務,好難鬧上法庭嘅!」咁又係,二十年前或更早一啲,北京、西安,上海嘅五星酒店紛紛重組債務,咪完全冇出過封樓 呢類事件!
點解 樣樣 政府 左丁 丁山
PermaLink: https://articles.zkiz.com/?id=1261

有樓賣樓? 左丁山

2008-07-04  AppleDaily

參 加校友會午餐聚會,見到地產W,於是人人問佢:「樓價點睇?」一位多年不見嘅校友L係博士級人馬,從前在中大做教授,移民美國多年後,今年回流,與太太 (亦係校友)租住曼克頓山,亦問地產W一個切身問題:「我應唔應該買樓自住?」地產W語出驚人,位位校友聽到面色凝重。佢話:「手上有樓,快啲清貨,有咁 多賣咁多,L博士你唔好買樓呀,繼續租落去!」地產W在九七回歸前兩三年一直唱淡地產市道,冇乜人肯聽佢枝笛,只有左丁山肯信佢,賣樓租屋,避過一劫。 家佢又唱淡,信唔信好呢?地產W大大聲話:「西九與山頂豪宅,炒到三萬幾到五萬一呎,邊個買得起呀,接貨自己住,唔肉痛咩,要轉售圖利,大儍瓜去邊度搵? 非豪宅地段樓價亦已升到一般打工仔供唔起嘅水平,利息掉頭上升嘅話,供樓壓力更大。」一位校友指山頂級數豪宅自有實力廠家與內地富豪接貨,唔使驚。地產W 立即反駁:「今天油價高企,原材料價格有升冇跌,人民幣升值,美元貶值,珠三角廠家嘅出口生意都唔知幾難做,廠家風光不再了。至於內地富豪,內含炒家不 少,今年給內地房地產套牢,再碰上A股跌到四腳朝天,都唔知有幾多富豪變成陽澄湖大閘蟹,仍然有資格有心情嚟香港掃豪宅嘅,寥寥可數啦。」澳門銀河賭場已 經裁員,正是一葉知秋,內地豪客到澳門賭錢者,人數減少,搬錢嚟香港買樓者,相信人數唔會增加。大客豪情不再,頂級豪宅市道的確會出現受壓情況。畀地產W 嚇完,先至聽番正題。演講嘉賓講能源展望,指出中國、印度、俄羅斯等快速增長國家對能源需求強勁,世界上新的油源以至石油增產,都被中印俄為首嘅新興國家 吸收得八八九九,而歐美日嘅石油需求只係原地踏步。西方國家興起環保風,減排放風,原因之一係大家都了解到破壞環境後患無窮,但原因之二就係歐美(特別係 歐洲)已經發達百幾年唔使再搵錢,注重生活享受,故此叫中印俄亦唔好掛住搵錢,限制排放。中印俄家先至懂得搵錢之樂趣,唔多肯聽歐美之言,有其道理也。
有樓 樓賣 賣樓 左丁 丁山
PermaLink: https://articles.zkiz.com/?id=1270

機場管理大倒退 左丁山

2008-07-08  AppleDaily

肥 仔K自東京回港一行,隔七日就返東京。佢與一班日本同學好識得買便宜機票,知道一啲專做學生生意嘅旅行社有辦法出到平機票,但係訂票之後,要在出發前三 日,先知道坐邊一間航空公司及邊一班機。譬如肥仔K在六月中訂票,六月二十七日回港,到咗六月二十四日,才收到旅行社電郵通知佢六月二十七日晚上乘西北航 空去香港,回程嘅班機在香港時間早上八時許。換言之,就係晚機返香港,早機去東京。你知啦,趕早上八時飛機,朝早五點幾就要起床,幾辛苦o架,不過年青人 就OK啦。機票有幾貴呢?盛惠一千五百港元左右(從日圓折算),來回喎,抵到爛,但係肥仔K睇真啲,須再付燃油附加費一千五百元。

肥仔K晨 早摸到機場,睡眼未消,跟住畀西北地勤職員話佢冇回港機票,可能被日本觀光局拒絕入境,要佢拿出信用卡仄吓,講明如果肥仔K入唔到境嘅話,要坐飛機返香 港,故此要有信用卡傍身。肥仔K為之氣結,但要趕時間,唔得閒辯駁,匆匆趕往入閘。點知離境大堂南區在入禁區前,打晒蛇餅。以前乘客過咗移民關卡之後,先 至驗手提行李。不知何時開始,X光機擺在禁區外,乘客手提行李須檢驗後先至可以入禁區。

機場最識做生意,幾乎每一呎都租畀商舖,行人空間不 多,一下子將啲X光行李檢查機擺放在離境大堂,當然人為製造樽頸,秩序混亂。香港機場管理素來一流,屢獲世界第一機場美譽,何解突然之間,機場管理大倒 退,自製混亂?以往保安檢查方法行之有效吖,從未出過亂子啫。保安人員對肥仔K等乘客話機管局會動用十五億元改進機場安檢,如果用十五億元嚟消減離境大堂 空間嘅話,簡直係笑話,起碼好多香港人都唔知道有呢一回事先。機場在暴雨期間漏水可以講係天災,市民不忍深責,笑吓就算,但係動用十五億元做啲乜嘢工程 呀,唔該交代吓。當日有幾位航空公司地勤人員實地觀察新嘅手提行李如何檢查,低呼「呢次大鑊!」事實上,如此安排,對香港市民極不公平。以前用身份證首先 輕鬆過關,可以行先啲,行快啲做行李檢查。現在就同外國人一齊排長龍,你話幾唔抵呢!

肥仔K煩咗一輪,既眼瞓且肚餓,上到飛機,一睡直達東京,入境時講幾句日文就輕鬆入境,邊度有西北職員所講嘅阻滯吖。
機場 管理 倒退 左丁 丁山
PermaLink: https://articles.zkiz.com/?id=1276

機管局解釋 左丁山

2008-07-10 AppleDaily

星 期二本欄寫「機場管理大倒退」。又有咁啱嘅,星期二早上就碰到機場管理局高層,揸住篇左丁山專欄嚟睇,成個人眉頭皺。呢類場景左丁山見得多,例如前日坐地 鐵去油麻地站落車,行過去窩打老道坐的士去土瓜灣,在地鐵上就見到一位白領揸住《蘋果》副刊,睇緊「名采」版,從佢嘅眼睛移動方向判斷,係睇完「黃金冒險 號」就睇「GG細語」。上到的士,司機立即放低張《蘋果》,一眼就望到佢本來係睇緊「GG細語」。機管局高層對左丁山講:「乜咁大標題呀,鬧我哋之前,搵 我解釋吓先吖。」據呢位高層解釋,機場嘅禁區安檢與出境管制地區會重新配置。現在係旅客一進入禁區,就會憑身份證或護照過關出境,出咗就唔可以行返轉頭。 出咗移民關卡就要排隊檢查行李,如檢出流質物件(如靚酒、名牌香水)就會充公,如果手提行李過多,或oversize,旅客因為唔可以返出去再 check-in,經常引起爭執。未來方法就係旅客入管制區(不是禁區),在管制區內可以走番出嚟,例如檢出上述物品,可以返回航空公司櫃位辦理另一次行 李寄艙,流質物品唔使充公。手提行李檢查完畢後,先至行到移民關卡,辦出境手續,出咗境就唔可以返轉頭。現在櫃台重置工程已開始進行,但因為只會在深夜旅 客少之時開工,時間會拖長,施工期間,啲X光機就擺放在離境大堂商業區,造成擠逼,實在逼不得已喎。機管局高層如此解釋,好似言之有理。但對守規矩嘅香港 市民嚟講,入閘出境嘅時間,究竟係以前嘅方法(先出境後安檢)快啲,還是用以後嘅方法(先安檢後出境)快啲?表面上看,出境時間應該無差別,但實際如何, 難以預料。返到公司,機管局公關來電,話工程費用只係一億元,唔係肥仔K聽到嘅十五億元咁高,詳情會在七月九日嘅記者招待會解釋喎。總之在重新配置工程期 間,大家出外旅行,畀啲耐性可也。但在出境繁忙時間,離境大堂肯定擠逼不堪,希望機管局多派保安維持秩序。
機管局 解釋 左丁 丁山
PermaLink: https://articles.zkiz.com/?id=1280

高油價後果 左丁山

2008-07-18  AppleDaily

油 價如果繼續升,理應刺激其他能源嘅開發,與石油競爭。但係現代社會有好多制約條件(constraints),令到在理論上可以做得到嘅事情,變成不可 能。譬如美國倚賴太多外國石油進口,點解唔在國內生產多啲?理由係環保,不能破壞環境(洛磯山脈與阿拉斯加)及海洋生態(佛羅里達州及加州海岸);核能發 電產生最少排放效果,不倚賴石油,點解唔增加核子發電廠?理由係意識形態,自六十年代興起之反核理念,至今不衰。點解唔多用再生能源?理由係再生能源)太 陽能、風力發電、生物燃料(所佔嘅能源份量太小,相對於煤炭與石油,只係水塘內之幾桶水。況且生物燃料乙醇投產幾年之後,已經刺激糧食價格急升,變成富翁 揸車之環保樂趣建築於貧窮國家嘅窮人糧食上,另外,移植玉米,提煉乙醇之整個過程,並不完全環保,降低不了碳排放!聯合國提出報告,油價升,糧價升(因為 發展乙醇),最後會摧毀地球森林(因為要燒樹林拓展耕地),最後摧毀人類,講得幾嚇人。但係同時又有一單新聞(《金融時報》七月十四日),青島發生青藻風 波,累中國解放軍日夜清場,確保奧運風帆賽可以順利進行,青藻繁殖力極大,兩三日可以增加一倍,一啲研究藻類嘅專家發現,藻可以用作生物燃料,可專門培 養,且用之不竭,如果科技追得上嘅話,青藻紅藻在指定地區內培養,會成為再生能源。之不過,在藻類太盛之海面,海洋微生物缺乏空氣,全部滅亡,到時點樣影 響海洋生態,還在研究階段,睇嚟攻讀海洋生物學、海洋環境工程嘅學生,應有前途!油價未高到摧毀人類之前,可能先摧毀全球化。油價高昂,貨船運費容易變成 妹仔大過主人婆,一條船嘅貨物,價值唔夠柴油費咁高,運輸費太高就會降低國際貿易要求,例如加州工人做波鞋,人工貴過溫州好多,但一對波鞋自溫州運到加州 零售店,會貴過加州之做鞋成本。後果就係名牌鞋不如就在市場所在地製造,不再將訂單送往中國,內銷市場重要過外銷市場,大家向內望,忘卻全球化。
油價 後果 左丁 丁山
PermaLink: https://articles.zkiz.com/?id=1391

寫股只可唱好 左丁山

2008-07-24  AppleDaily



七 月二十一日吃過午飯,在馬莎門口碰到分析T,捉住佢閒談幾句。醒起佢在某報專欄已失蹤一段時期,於是問佢:「係唔係生意好得滯,唔再寫股評與一百萬元開倉?」分析T話:「非也,現在啲散戶做大閘蟹者,遍地都係,邊度有錢炒股吖,一於死守,攬住股票不放嘅就大把,故此我哋公司比較得閒;唔寫稿嘅實情係六個 月前我開始睇淡,逐步清倉,在報紙專欄叫人平倉,止賺,再冇推薦買入邊隻股。編輯就同我講,讀者唔鍾意唱淡,如果你個專欄平晒倉,讀者會流失嘅,鼓勵我挖 空心思,搵幾隻股票推介吓。

我當時真係諗唔到喎!於是報紙就咳咗我個欄。」唔怪得睇報紙股評專欄,專係報喜不報憂,一味推介可買入股票。如果唔係咁,編輯 唔高興也。又係嘅,專家在報紙唱淡,散戶冇股可買,都費事買「天氣報」啦。幾年前路經中環某大廈,買周刊時見到成叠財經報紙,問報販何以如此。

報販話: 「財經報係天氣報,市好就好好賣,市淡就冇人買,呢輪市道差,天氣報咪滯銷囉。」所以寫股皆講冧巴,至受歡迎。全世界嘅股民都只會記得股神,憎恨末日博士 如麥嘉華嘅。

大家睇報紙,見到一片唱好之聲時,唔好以為股市專家完全根據數字分析嚟唱好,實則啲專家無論在甚麼時候都傾向唱好!講番分析T,問佢後市點 睇,佢話恒指兩次接近二萬一千點,到底而不破,立即反彈,最多可以升到二萬四千點,向股民提供今年最後一次走貨、平倉嘅機會,之後會再次考驗二萬一千點, 佢睇勻咁多藍籌股,認為十三號和黃冇乜升過,可攻可守,不妨注意吓。

正想學師奶打電話問功課咁樣,問分析T在甚麼水位買和黃,止蝕位與止賺位時,分析T望 吓嗰手錶,話趕住返公司開市,一個箭步就彈開幾呎,唔通捉住佢不放咩。後來行完街返到公司,股市已收,仄吓指數,恒指上升658點,報22532,全日成 交696億幾,反彈得似模似樣噃,和黃收76.4元,微升毫半,不如再睇吓先。
寫股 股只 只可 可唱 唱好 左丁 丁山
PermaLink: https://articles.zkiz.com/?id=1471

反彈之後 左丁山

2008-07-28 Appledaily

剛 好一個月前(六月廿七日)本欄寫「後市不穩」,引述基金經理L講股市,佢話信貸緊縮而未結束、通脹肆虐,股市仲會努力尋底。與基金L吃飯嗰日,係六月十八 日,恒生指數收市報23,325點,到咗稿件見報之六月廿七日,恒指收報22,042,已經跌咗1283點或5.5%,一個月嘅低位係七月十五日之 21,174點,可見基金L的確言之有物。好嘞,七月二十一日,股市大升658點,恒指收報22,532,輪到基金K請吃晚飯,大家梗係又問佢如何睇後 市。

基金K話恒指由23,325點去到21,174點,跌咗9.2%之後,自低位反彈,好自然,但從基本因素睇,全球經濟皆受美國影響,有人講de- coupling,實在言之過早,亞洲人唔好以為亞洲經濟興旺就當美國冇到,美國爛船有三分釘,佢患大感冒之時,亞洲亦難逃傷風。目前美國聯儲局為咗挽救 經濟,連番減息,放棄美元,意圖透過美元貶值,增加出口競爭力,同時削減入口,亦因美元貶值,外國人以外幣購買美國資產,相對便宜,於是美國資產價格係緩 慢下跌,人民唔感到有多大痛苦。

基金K話:「大家可回憶番九七金融風暴之後,我哋因為攬住聯繫匯率,美元兌外匯升值,港紙跟住,整個經濟調整過程就係減人 工,失業率升,通縮,資產價格大跌,過程緩慢而痛苦,如凌遲至死,香港市民痛苦不堪。當時如果有公投,叫香港市民揀(一)脫鈎貶值,還是(二)擁抱聯繫匯 率,一齊死頂嘅話,我相信市民會選第一項。」經基金K提醒,香港因聯匯唔可以變動(此乃特區政府之聖牛),目前之失業率夠低,通脹高,資產價格大體上升, 剛好係一九九七至二○○三嘅經濟循環之對立面,以前市民為通縮愁苦,現在為通脹驚心。

講到尾,後市點睇?基金K話美國政府大力救市,成效不著,更因碰上油 價拖高糧價,一齊上揚,導致全球通脹,而經濟無起色,正好形成七十年代之經典滯脹局面,帶來嚴重政治後果(如全球運輸界示威抗議油價),基金K認為股市反 彈過後,會再次尋底!(按:七月廿五日恒指收市報22,740點。)
反彈 之後 左丁 丁山
PermaLink: https://articles.zkiz.com/?id=1521

高昂舖租 左丁山

2008-07-31  AppleDaily



舖 租愈來愈貴,《福布斯》調查話香港銅鑼灣舖租高,全球排名第二,僅次於紐約曼克頓,我哋啲普通人真係唔明白人哋點樣打算盤做生意嘅,譬如皇后大道中太平行 一個地舖連地庫及一樓,畀Diesel一口氣租晒改裝成時裝店,聽聞月租近乎三百萬元,數字大到驚人,賣牛仔褲、潮流衣服嘅店舖可以負擔如此舖租,老一輩 生意人要寫個服字。

不止此也,大編輯經常幫襯一間時裝店,買條褲、買件背心,講緊係二三百蚊交易啫,但佢聽到呢間字母時裝店在尖沙嘴開新店,舖頭月租六百 萬元!人哋咁樂觀,抵佢愈做愈大。皇后大道中連卡佛大廈對面係聯成大廈,地下本是中信嘉華銀行,現已搬遷,新租客係佐丹奴,相信月租不菲。至於佐丹奴本與 Bossini為鄰,在舊龍子行隔籬,兩間舖頭現已為周生生金行租用晒,月租唔使講又係百幾二百萬元。至於舊謝瑞麟珠寶位於余道生行隔壁,早已搬走,曾經 掛上喜來登旺舖招牌,上星期已經見到英皇珠寶字號,行內人話月租二百幾萬元,係喜來登旺舖任永賢一手促成嘅,成為今年地舖租務界之deal of the year,至於點解有此外號,行內人話任永賢Sunny出手不同凡響,震驚行內咁講!

唔怪得有時撞到Sunny擔番口大雪茄,面口好到不得了,一望就知係 行運之人。佢以前有隻馬叫做「旺舖之星」,可能係講番自己!香港咁旺,旺在幾個密集地區,就係中環一級商場,雪廠街至中環街市前之一段皇后大道中,尖沙嘴 廣東道至彌敦道一帶,銅鑼灣、旺角等,仲有外國人常到區域如蘇豪、蘭桂坊、灣仔星街等等。環頭環尾嘅舖租視乎人流而定,唔係全部都好景嘅。有人話外國獨立 名牌打唔入置地廣場(LVMH與廸生係大租客),唯有在大道中搵大型地舖,肯付出昂貴租金,係因為除咗做零售生意之外,兼有宣傳作用(例如Coach租興 瑋大廈地舖),租金當作廣告費。大公司請咗好多叻人做管理層,唔會計錯數嘅。
高昂 舖租 左丁 丁山
PermaLink: https://articles.zkiz.com/?id=1561

廠家(子貝)兩座大山 左丁山

2008-08-06  AppleDaily

上 星期六本欄講「鳥去籠空」,鐘錶廠商L來電云:「喂,我哋香港廠商係做得幾慘o架,搬廠其實唔係咁易,一啲搬去越南嘅廠家就喊到收唔到聲。我哋留在東莞死 捱,其實最大嘅苦楚係孭住兩座大山,其一係人民幣不斷升值,你知啦,做廠嘅利錢不到10%,甚至乎得番七個八個巴仙,人民幣已升值七巴仙,叫我哋點頂?出 口去歐洲就冇所謂,因為歐元亦升值,但大部份出口係去美國,我哋支出人民幣(出糧、水電),收番嘅係美元,點會掂吖。想出廠價增加番呀,唔使嚟,美國 buyer一於話no way,事關美國人消費信心不足,房價跌,汽油價升,我哋一加價,訂單就唔嚟,死未!」

「第二座大山係勞動合同法, 人人叫苦,廠家固然呻到樹葉落,工人亦唔高興,曾經有工人示威抗議o忝,以前有生意嗰陣,工人每個月超時工作六十小時,好閒啫,每個超時嘅薪水比正薪多五 成,工人收入大增吖嘛。現在勞動合同法保護工人工時,超時(OT)不得超過三十六小時,故此工人好唔高興,要抗議。呢條法律綁得工人與廠家好死,但內地政 治氣候不容修改,我哋惟有捱得一時得一時。一啲老友見到咁樣勢色,執笠上岸去也,費事再煩氣,受最大損失嘅,就係工人。」

苦 水原來這麼多,唔怪得有報道話東莞有過千家鞋廠結業,鳥去籠空。經濟政策與法規不對頭,憑長官意志立法,往往破壞大於建設。講起內地經濟法規,聽會計A 講,既多且複雜。本港會計師要合乎CEPA協議到內地有資格簽署核數報告嘅話,一定要考呢一科「內地經濟法」及格以及考「內地稅務」及格,香港會計師嘅考 試及格率非常低,原因一係香港會計師慣咗寫英文,中文程度比較差,寫簡體字答卷好唔掂,其二係內地稅務與經濟法唔易理解,故此有CEPA都冇用。點好呢? 會計A話最好大學會計系加開兩門必修科──「內地稅務」與「內地經濟法」,仲要用中文教,用簡體字答卷。咦,中文大學可以用中文教書,中大會計學院佔優勢 噃。
廠家 子貝 兩座 大山 左丁 丁山
PermaLink: https://articles.zkiz.com/?id=1627

梁展文回敬特首? 左丁山

2008-08-08  AppleDaily

在 北京南鑼鼓巷「過客」酒吧商店買咗一件黑色T恤,印上二○○八年八月八日,算係北京奧運會紀念品,今晚八時零八分,京奧開幕,相信各位讀者會齊集電視機前 睇直播。大編輯等人獲招待,上星期六到北京,參觀鳥巢、水立方,看開幕綵排預演,佢話入場規矩有幾十個不准,但現場所見,入場市民照樣舉起手機攝錄、拍 照,帶埋牛奶、清水入場,無人阻止。大編輯呢團人屬報界高層,有預演可睇,究竟睇到啲乜,大編輯話要保守秘密,八月八日晚自有分曉,她只能透露一句:非常 張藝謀!睇過《英雄》、《黃金甲》嘅,會明白多啲,佢話坐在鳥巢「山頂」,方能完全欣賞場面之盛大,坐得低,就只能看到橫切面。

左丁山參加之北京團,住在 北京香港賽馬會會所,位於金寶街,與金魚胡同接壤,出大門口向左轉直行約十五分鐘(約莫相等於由中環中心行到中國銀行大廈),就會到達王府井大街。北京之 馬會會所,以四合院模式興建,總建築面積約三萬八千平方米,裝修美輪美奐,靚過香港馬會會所好多好多,沙田馬會會所與之相比,似係鄉下地方而已。我哋成班 人,冇一個係總編輯,無緣參觀預演,但有事就要做。上星期五晚,編輯Y吃過晚飯就一路打電話,聽電話,非常緊張,幾乎係返咗報館督師咁嘅款。第二朝問佢香 港有乜大事,佢話梁展文加入新世界中國做董事,好唔掂,香港會催生另一場政治風波。

星期一返工,先知道呢場風波真係逐漸形成,慢慢進展至成為三號風球,令 特首辦趕緊發表聲明話會再探究其事。曾特首嘅民望已如浮雲,容乜易畀呢場梁展文風波吹散呀,乜單單都咁杰嘅?星期二碰到一位前朝官員,問佢如何解救。呢位 官員話:「我在董老闆時期已經退休,未領教過曾老闆嘅作風,但聽番啲舊部屬舊同事講,曾老闆最近有啲煩躁浮躁喎。至於CM,我識佢,三年前佢將近退休之 時,嘉亨灣事件一出,曾先生立即話要成立調查委員會查佢,跟住立法會又查,搞到CM雞毛鴨血,退休時,荷蘭水蓋都攞唔到一個。

我諗,呢單嘢係CM計好晒 數,在法理上無懈可擊,吼準政府無可奈何,先至投身地產集團嘅。CM呢次處於不敗地位,做唔做份工好閒啫,頭痕嘅係曾先生,唔係佢自己。」
梁展 展文 回敬 特首 左丁 丁山
PermaLink: https://articles.zkiz.com/?id=1655

楊傳廣第二 左丁山

2008-08-21  AppleDaily

賓 架Y與副手賓架C請食午飯,約在鏞記八樓之Yung Club,成層樓間隔為私家房,有大有細,地方雅致,中式裝修甚為養眼,食物當然係鏞記供應啦。見面時間為下午一時正,當時已知道劉翔因傷退出奧運百一米 跨欄賽,同聲嘆息。中國今年穩奪奧運金牌榜冠軍,得金牌數目破歷史紀錄,但劉翔攞一塊金牌,幾乎等於所有其他運動員之金牌總數,其份量之重,史無前例。全 世界都話劉翔身負整個民族之希望,十三億人之付託,佢未出場開跑就已經退出,唔震動全球就怪。BBC即刻話劉翔退出,係news of the Game,比費比斯攞八面金牌更轟動。與賓架食飯,話題本來係次按,信貸緊縮,經濟情況等等。賓架Y話大家怕晒借錢出街,同業拆息市場(inter- bank market)事實上已不存在,長錢免問,短錢至有商量,銀行謹慎到不得了,所以佢認為股市上升,方是異態,跌市才是常態。銀行閂水喉嘅時候,股市邊度有 資金炒上去呀?

賓架Y所言有理,但我哋講講吓,話題又回復至劉翔身上。

左丁山算係烏鴉口,上星期曾對記者G講:「劉翔壓力太大,恐怕會成為楊傳廣第二。」 記者G年紀輕唔知楊傳廣係邊個,唯有向佢解釋一番,上星期(八月十四日)馬術賽之盛裝舞步賽有一位日本選手,今年六十七歲,一九六四年第一次參加東京奧 運,就正是楊傳廣因傷敗走東京之年,見到呢位老先生出場,令人特別想起楊傳廣之失敗,令至香港市民沮喪之情況。當年楊傳廣背負華人世界之壓力,今見劉翔之 壓力更大,大到足以令佢崩潰。飯後回到辦公室睇NOW,見到教練孫海平在記者會上哭不成聲,令人心酸。孫教練一手提拔劉翔,將佢訓練成才,但恐怕內地憤青 只會記得劉翔chicken-out奧運之事,孫教練將會鬱鬱難言,水洗唔清。教練話劉翔六、七年來,即使在雅典奧運都係帶傷上陣,足部、腿部皆有傷。既 然如此,為何不休息一段長時間,徹底根治?唉,劉翔有唔出場嘅自由咩,正如當年楊傳廣。
楊傳 傳廣 廣第 第二 左丁 丁山
PermaLink: https://articles.zkiz.com/?id=1824

珠寶首飾展 左丁山

2008-08-28 AppleDaily

香 港每年有兩個大型珠寶首飾展覽,一個在三月,由貿發局主辦,一個在九月,由英國公司CMP主辦,兩者皆聞名世界,引來參展商無數,逼爆會展,順帶益埋啲大 酒店,只要九月初唔好打風,造成「鸚鵡」式麻煩嘅話,旅遊界得益甚大。一打風就難講咯,海外買家如果唔好彩,來港遇上颱風嘅話,好似上星期五、六兩日咁, 機場大亂,海外來客自然會留下惡劣印象。肥仔K於星期六下午自東京回港,check in時,櫃枱員問佢肯唔肯坐遲一班,可以upgrade到商務客位,肥仔K諗住自己唔趕時間,有着數噃,一口應承。點知班機一再延遲起飛,直至晚上十時 (香港時間晚上九時),凌晨一時三十分(照林超英先生講法,係清晨)到港,等行李等咗三十分鐘,聽到廣播話行李運輸出現嚴重問題,請耐心等候。卒之三點左 右至可以出機場,已無機鐵、巴士,排候的士人龍有百幾人,返到屋企要黎明(林超英定義)四點過後矣!

但參加珠寶展嘅商人, 唔擔心打風住,要去抗議CMP先!據首飾T講:「明年開始,CMP要一啲中小商戶,以及原材料供應商如珍珠、黑珍珠、未鑲寶石等等,搬去機場亞洲博覽館。 你知啦,珠寶首飾展以行家為主,消費者唔係主要對象,做原材料嘅,最希望啲製成品參展商參展之餘,利用空檔時間去睇吓啲原材料,睇睇吓大家就有生意做。搬 去機場展館喎,啲製成品商人有冇咁好心機特地花個零鐘頭去機場睇原材料呀?」聽落有道理。首飾T係中小企,再問大行嘅公子L,公子L話四大商會,即香港鑽 石入口商會、香港珠石玉器金銀首飾業商會、香港珠寶製造業廠商會、香港玉石製品廠商會嘅會員唔受影響,目前仍持觀望態度,會與CMP繼續對話,私人上,佢 同意首飾T所言,指廿幾年來大家相安無事,家CMP為咗更大商業利益,將參展商分流,將一批人分出去機場,梗係招來不滿啦。首飾T話明年九月會展擴建完 成,可增加千餘展覽攤位,照計夠用,唔使分流,但公子L話目前想參展之珠寶首飾商,名列等候名單(waiting list)者,不計其數,會展有幾多位,一樣爆滿,CMP實識計數嘅,做展覽生意,講錢嘅啫,冇人話要講人情道理o架。
珠寶 首飾 左丁 丁山
PermaLink: https://articles.zkiz.com/?id=1901

為錢誤國 左丁山

2008-9-09  AppleDaily

泰 國商人V係華裔,居港多年,身懷泰國護照、香港身份證、特區護照及回鄉證,唔係聽到佢講泰文,都唔知道佢係泰國人。泰商V最近睇電視,知道曼谷街頭示威不 絕,政府宣佈進入緊急狀態,好唔安心,不顧太太反對,立即飛回曼谷親身觀察,周圍索料。泰國財經界好講人脈關係與邊間學校畢業,V君讀完「易三倉學院」就 入「法政大學」,皆著名學校,校友遍佈政商銀行法律新聞界,好快就聽到一啲「內幕消息」。左丁山搵咗佢幾日查問泰國消息,知道佢人在曼谷,於是約定佢回港 後茶敍。呢日中午見到佢,V君好唔開心咁嘅樣子,佢話:「泰國政客實在腐敗,冇希望咯,大家都係為咗錢啫,上咗台就有權貪污抓錢啦。

講什麼民主政治,精英 政治,都係呃人嘅!」貪污已深入泰國民心,此病有排醫,唔講住,短期內政局如何發展下去?V君話:「收到料,軍人唔會政變,因國會還要通過向法國購買戰機 議案,交通界要向中國長期租入巴士(bus leasing)議案,兩者涉及銀碼近千億泰銖,唔可以亂嚟。據講呢兩個議案會在九月底之前通過,之後由總理簽署,十月初就會有新局面。」近千億泰銖買貨 合約,有人飲肥仔水咯,於是新局面不外乎沙瑪總理(V君話沙瑪係華裔,姓李)辭職,宣佈解散國會,重新選舉或者宣佈全民公投。沙瑪等人嘅「人民力量黨」擁 有大把資源,農村鐵票夠穩陣,贏得選舉或公投不是問題,到時又係沙瑪掌權啫。

反對派又點呢,V君話「人民民主聯盟」嘅領袖Sondhi (佢用泰文讀,發音近乎廣東話──喪D)祖籍海南,貌似知識分子,曾與他信攬頭攬頸,後來因財失義,鬧翻咗,此人不可靠,信佢就係喪一D。V君聽到親政 府、反政府雙方都有派錢,向示威者派五百銖一日,請人上街做「媒」,矇查查之人憑熱血上街嘅,就係雙方嘅「花紅」。V君講故事,愈講愈面紅,幾乎流出眼 淚,哀國家之無望也。
為錢 誤國 左丁 丁山
PermaLink: https://articles.zkiz.com/?id=2100

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019