📖 ZKIZ Archives

科技股龍頭騰訊（700）本週四就正式將股份一拆五，到時每手（100股）騰訊嘅入場費，由五萬減到變成一萬，唔少散戶都心鬱鬱。只是升得急亦跌得快，過去兩個月，騰訊由$646高位掉頭，直插至$473，股價如坐過山車。最近，唔少投資者憧憬拆細後有助騰訊再炒上。不過，騰訊股東名冊上持股最多的散戶、有「赤柱股神」之稱嘅張程光，就唔多睇好：「拆細只係方便基金散貨，對散戶冇乜著數。」

由$246蚊開始買騰訊嘅張程光，持股量一度超過六十萬股，市值近四億元。佢透露，喺今年三月股價最高位時，沽咗二十萬股，平均入貨價約$400，持貨唔夠半年就賺咗超過四千五百萬！佢風騷咁話：「真係好彩，我年初定下嘅目標價係$650，見升到$640左右就諗住沽貨，點知真係比我撲中最高位$646。」張程光一貫嘅持倉策略係，一半長揸，一半短炒。佢警告散戶唔使趕住係拆細後入市：「啲大戶同基金都想散貨，以前五六萬銀一手，唔係個個都買到，而家一萬蚊，好多市民都買得起，咪易啲沽貨囉。騰訊個價咁高，都係靠基金頂住，所以短期內好難大升。而且阿里巴巴準備上市，都會影響騰訊嘅資金流走。」唔使驚住，長遠來講，張程光仍睇好騰訊：「間公司唔受國家調控政策影響，嚟緊又搞網上銀行，識得不斷開財路。」對於想長揸嘅散戶，佢指最好等到$450先入貨。佢自己最近就玩短炒為主，策略係：「每次入貨都以一百萬元為起點，每跌十蚊，就入一次貨，升到十至廿蚊就沽。有時一日上落都會有十蚊，係得騰訊可以咁樣炒波幅。」

報憂更重要

很多人覺得匯報或做報告很麻煩，做得好，上司未必讚，做得不好，又被上司質疑辦事能力。其實，寫報告是表現自己的機會。在什麼情況、時間及如何向上司匯報，有下列提議：1. 當發覺項目開始出現問題而你不能控制。2. 當察覺上司開始對你負責的項目感焦慮及不耐煩，並預備向你提問時，要主動匯報。3. 許多時你的上司也要向他的上司匯報，所以你最低限度要在48小時之前向你的上司匯報，令他有時間看清楚報告內容，作出應對。上司最怕下屬報喜不報憂，下屬有問題即報告，上司比較有經驗，就能夠掌握情況，想出對策，把損失減到最低。反之，若隱瞞情況，任由傷害擴大，最終只會令公司虧損。我做事達三十多年，從來未見過拖延問題，問題就會消失，問題就像繩索打結一樣，愈早拆愈容易。上司交工作給下屬，會希望下屬能夠定時作出簡報，我看過一個例子，有上司同時叫兩名下屬做程式設計，A做得較快而bug較少，但上司傾向發給B更多工作，原因是B下屬會定時向上司報告進度，上司能夠掌握他的進度，確保沒問題，因而放心。但A接了工作，到交貨期間，則音信全無。其實B寫的中途報告非常簡單，只有廿多個字：「系統的部分已經寫好了，目前工作大致已完成了四成。」上司是非常忙的，作為下屬，報告最好能符合以下幾點：1. Executive summary擺在前，上司能夠用一兩分鐘把握到來龍去脈。2. 實話實說，不要加個人意見，最好數字化，例如不要說項目會超支或超時，要說大約超支多少，超時多長及原因。3. 提出建議，最好有兩三個選擇，只提出問題而不提出解決方案，你本身就是一個問題。

港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。

呂志和：普選唔關我事！

濠賭股上星期爆發股災，靠銀娛（27）跑出成為亞洲第二大富豪嘅呂志和，身家唔見一截。單係上週四，就蒸發咗一百億，年初到依家，更無咗成六百億。不過都無影響呂志和睇歌劇的興致，仲好輕鬆咁話：「都係數字遊戲！我仲睇好澳門賭業嘅發展。」經濟好，濠賭股先有運行，所以呂志和呢頭話唔緊張，嗰頭就話反對「佔中」，怕搞衰香港經濟咁話。「佔中」目標係想爭取普選特首，但呂志和就明顯緊張經濟多啲，講到明：「普選唔關我事，我淨係想搞好經濟，想大家都幫香港做多啲事。」咁點幫香港做事呢？呂志和即大講金句，要大家「講真話」。至於點先為之講真話？就冇再補充啦。弦外之音，莫非講緊近年香港政壇最流行嘅「語言偽術」？最善此道者，正是特首689。小宗突然想起，早前首富李嘉誠都爆咗金句：「有能力嘅人唔出聲，冇能力嘅人又爭住去做！」異曲同工，各位自己參透嚇啦。

許大官人幫納稅人慳荷包

許大官人涉嫌貪污案開庭，控辯雙方律師團隊多達三十四人；星光熠熠，皆以資深大狀、御用大狀列陣不在話下，仲以全包宴形式聘用，以免佢哋同時接幾單案而分心。呢單案預期審七十日，條數睇怕一般計數機未必計得掂。令人奇怪者，係破咗產嘅許大官人。佢幫納稅人慳荷包，冇申請法援，但一樣有蔡維邦大狀幫佢（蔡大狀幫過龔家同哨牙通揮過）。世風日下，人心不古，莫非喺笑貧不笑娼、唯錢是視嘅香港仲興俠義呢味嘢？考起。

金牙大狀講嘢

一百萬銀係幾多錢？鬍鬚曾喺網誌轟拉布，話如果五月中都過唔到預算案，醫管局大有可能要提取存款應急，佢哋會因而損失一百萬元利息收入咁講。如果鬍鬚曾班文膽扭盡六壬至搵到個咁嘅案例，咁唔該佢哋早抖啦。攞政府成盤數嚟講，一百萬銀究竟係幾多錢啫？呢個財政年度，政府之總開支為4,112億元，相當於四十一萬一千兩百個一百萬元。一年三百六十五日，即係政府每日使緊一千一百二十七個一百萬元。一日有二十四個鐘，亦即係每小時使緊四十七個一百萬元，或者每分鐘零點八個一百萬元。要幫納稅人慳番一百萬元又何難之有哉？政府停止運作分零鐘已喺曬度矣。政府使錢已經到咗令人麻木嘅地步，高鐵冇七、八百億元肯定埋唔到單；港珠澳大橋又講緊六、七百億元。使公帑直情好似倒水咁，完全冇人理；咁嘅環境，你鬍鬚曾竟然攞一百萬銀嚟做文章，唔係吖嘛？

中環人語迷你版

《Start up擂台》自上年開辦後，追訪過大大小小不同的年輕人，當中有白手興家，亦有靠強大父蔭。今次的主角，可說是集最年輕及最強家底於一身──洗米仔（周柏豪 Pak H. Chau）。

剛過了二十歲生日的洗米仔，中三由澳門轉到英國升學，中七時因與老師鬥氣，決定開始第一盤生意，竟被他賺取第一桶金。之後愈做愈上癮，決定放棄升讀大學，回港搞體育app《WOW Sports》，發掘新一代球星。

香港體育界出名長期被忽視，有業界指在港搞體育app「死路一條」，洗米仔坦言被不少世叔伯「睇小」、「好想我衰」。連老豆洗米華都不看好，講明「唔會開水喉」。

今次擂台請來香港體育app奇葩，app界「籃」神林基偉（Keith）做評判。訪問前他大讚洗米仔夠膽識，印象分大增，但甫開始已經叫洗米仔「快啲走」，到底點解？

我點sell？ 二百英鎊起家

相信不少讀者對洗米仔做Start up第一個印象都是「都係靠屋企啫！」他亦向記者透露「好多人想我盤生意死」，「唔通我仲要投訴？我依家可以做我自己鍾意做嘅嘢，我無嘢要唔開心！」同為澳門賭業猛人後代，另一邊廂何家公子升讀名牌大學，準備打理家族生意。而洗米仔卻認為升讀大學「冇乜用」，寧願早點投身社會另起爐灶。令他有此想法，全因好勝的他跟老師「鬥嘴」，「中七嗰年，有個教商科老師就話一直有個idea，向啲鋪頭拎優惠，之後整一張優惠卡賣俾啲學生，我就覺得個idea幾好，就即刻去做，之後佢同我講自己講呢樣嘢都好多年，根本無學生理佢！」由於「洗濕咗個頭」，洗米仔惟有硬着頭皮繼續，一開始只用了二百英鎊（當時匯價約二千五百港元）起家，卻給他愈做愈順利，「之後連Pizza Hut都有用到，發展埋出app。當時顧住做，A Level考得唔太好，我就覺得兩頭唔到岸，決定唔讀書。」

嫌老豆入股「阻住晒」

洗米仔指出，當時積分卡賺了約二百萬港元資金，曾希望父親可以資助，卻換來一句：「係你自己話創業，你聽我講就繼續讀書啦。」他亦深感有道理，「因為咁我學到好多嘢，講真我都要感激佢冇阻住晒，佢都唔係呢個industry，要搵投資者有其他選擇啦！」本身熱愛籃球的洗米仔，就決定向相關行業出發，整個app的目標亦十分清晰：「就係想搵一批志同道合嘅人，好似鍾意玩籃球、網球，我就鼓勵佢哋一齊將叻嗰面影低放上網。」App內會將片段隨機與其他用家比較，最厲害的就會登陸在排名榜內，「我就做一個connection，搵一啲贊助商去搞比賽，將佢哋嘅才能發掘出嚟。」

回港與繼母「解決」家事

沒有工作經驗的他曾以為做過大公司的人資歷就較好，他就指曾重金禮聘大公司的經理，不久就辭退該員工，「一開始可能期望太高，俾三樣嘢佢做，佢做得一樣，之後問係唔係方法唔啱，都係改唔到。第三次都唔得就拜拜，無得唔炒。」性格與父親一樣我行我素的洗米仔，表示回港發展後彼此關係改善不少，問到會否與後母Heidi合力「擊退外敵」，他霸氣回應：「對於我嚟講，要解決嘅就叫佢哋去解決！」

專家點評：點解喺香港搞？

今次《擂台》請來app界「籃」神林基偉。他做過中學籃球隊教練，之後設立的《Coach's Clipboard》，因蘋果將程式放在App store首頁而一夜爆紅，之後更獲美國職業籃球聯賽（NBA）的球隊使用，可謂香港體育app界神話。他直言《WOW Sports》理念在歐美十分流行，能吸引年輕人使用，雖然質疑在亞洲區的可行性，但一聽到記者邀約更建議「先打波、再討論」。但訪問開始時，因洗米仔出現突發情況，令球賽被迫取消！

林：林基偉W：WOW Sports林：你怎樣吸引用家再次使用？W：加入這個app之後，用家就會與其他人去比較，他們就會想知道其他人的記錄、到底排名是多少，我們會設一些獎牌，鼓勵他們繼續。以及他們可以找其他人挑戰，朋友與朋友去比較。但長遠來說，我就是想令他們可以接受真正的專業培訓。

林：那如果名次較後的，他們未必會再想去與強的人比較。W：我們暫時想到兩個方法，第一個是如果有進步的話，可能會有一個特別的獎牌，給自己的朋友看。下一步會是只在他們的朋友圈去比較，或者只在特定區域去比較。

林：為什麼要在香港發展？W：我都覺得有一點點選錯了，（如果選錯可以重新發展）但是現在地點及員工都設立了，很難再改，而香港最大的困難就是請人，其他都可以。但我覺得如果市場是全世界的人，我又覺得在哪裡開都一樣。

林：我覺得以之前經驗，叩門都可以成功找到partner，例如在美國，只要你經常到他們出席的地方碰頭，想找Stephen Curry（籃球明星）做代言人都不是難事，但香港幾乎沒有機會。W：我反而覺得在香港，做Start up風氣不算太強，我都會有興趣知道到底是不是。

林：公司發展到一定程度，就會打算上市，或者被收購。上市門檻當然更高，美國大多數公司都會選擇收購，但哪個財團會選擇收購一間體育公司？就算有興趣他們都會有很多考慮。

終極判決：最好搬去美國

成個business model我都覺得幾好。十分我會給八分，我始終覺得如果你目標的贊助商不在香港，而你在香港開公司，就要經常離開香港。另一個扣分位是經驗方面略嫌不足，但我相信未來一、兩年他可以成功籌集到資金。但重要的，守時是十分重要，尤其是有關體育的公司。

中學生：唔識洗米華！

記者找到中學籃球校隊成員Anson及Jimmy試玩「洗米app」，他們都認為介面不錯，但就質疑：「香港人三分鐘熱度，用一陣就唔用！」當告知創辦人為洗米華的兒子時，Anson反問：「係乜水？」看來洗米華在中學界知名度頗為薄弱，訪問時更指Mandy Lieu比洗米嫂美麗！

撰文：梁延宇攝影：關永浩、廖健昌攝錄：廖健昌、關永浩[email protected]