ZKIZ Archives


郭炳湘同細佬零交流 無公司100分話新地可以做好啲 李華華

2010-03-25  AD





 

新地(016) 非執董大K郭炳湘,自從08年被人「迫走」無得做主席之後,一度同兩個細佬關係緊張,大K仲多次質疑新地有企業管治問題。事隔兩年,大K啖氣落咗未呢?噚 日華華同班記者行家見到佢,天南地北講樓講港聞,但一問到兩個細佬,佢就唔多想講。有人問:「近排有冇同細佬去食吓飯飲吓茶,或者出吓海呢?」點知大K 話,有時喺寫字樓碰吓頭,咁即係零交流啦!佢跟住仲學外交談判咁,轉頭講話今日天氣幾好,睇嚟三兄弟仲未冰釋前嫌噃。

至於新地嘅問題有冇改 善?佢話所有公司都唔會做到一百分,當然可以再做好啲。講到自己嘅投資,大K話舊年入股永利澳門(1128),回報都幾好,仲睇好澳門娛樂事業有得發圍咁 話!

四叔二公子入股香港資源有大計

前嗰排,四叔李兆基二公子家誠,將揸住金至尊嘅中國金銀一成股權,賣畀岳父徐傳順做執董嘅 香港資源(2882),變相入股。加埋另一股東劉旺枝,亦將三成中國金銀賣畀香港資源,中國金銀變成香港資源嘅全資附屬。搞咁多嘢,你話冇搞作跟尾,講都 唔信。華華搵好友、香港資源執董許浩明問吓單刁有乜下文,Herbert講,好難代表李二公子講嘢,但相信以徐李嘅關係,李公子會透過徐先生代表其立場。

又 係嘅,以自己名義入股岳父間公司,夠晒心意,應該唔會落手落腳做啲乜,得閒都幫阿爸管理千億上市王國啦。不過,Herbert透露,管理層對黃金生意前景 好有信心,加上引入有番咁上下嘅股東,梗係想發大嚟搞。要做大生意,最快就係收購,佢哋物色緊中港澳門都有零售網絡嘅公司。「水源」方面,發債、銀團,仲 有內部股東貸款,大把選擇。

唔會逼人仔升值日圓先生明寸美

美國佬係咁鬧中國操控人民幣滙價,人仔升值變咗近日財經熱話,噚日 嚟咗香港出席瑞信亞洲投資論壇嘅「日圓先生」榊原英資都唔執輸,話人仔確實俾人低估咗。華華聽完個答案,即刻追問佢覺得人民幣應該幾時升值啦?點知木神原 話呢條問題應該留返畀中國人答,仲話自己唔係美國人,係日本人,絕對唔會要求其他國家嘅貨幣升值咁話。佢咁講,擺明係寸美國佬逼人升值啦!

李 華華

LiWaWa@AppleDaily.com



郭炳湘 同細 細佬 佬零 交流 公司 100 分話 話新 新地 可以 做好 華華
PermaLink: https://articles.zkiz.com/?id=14964

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019