ZKIZ Archives


富事通:精彩政治答問

1 : GS(14)@2012-07-17 22:57:25

http://www.sharpdaily.hk/article ... B%E7%AD%94%E5%95%8F
前晚,發夢見自己睇特首答問大會直播。
政演A:「特首,可唔可以講吓你點睇老人問題?」特首:「議員A,我唔會凉薄到話老人係問題!如你可具體啲,話我知,邊位長者有乜嘢問題,話唔定我有實際行動。」政演B:「香港有好多年青人買唔到樓,你會點幫佢哋?」特首:「議員B,同父母住,好失禮咩?我會勸佢哋量力而為。」政演C:「特區政府會唔會增加土地,對付高樓價問題?」特首:「有地產代理話,中國13億人,最有錢嘅萬份之一,都有13萬,香港樓多多供應都可完全吸納。議員C,我想請教吓,你覺得要增加幾多樓宇供應,同埋點增加呢?」
政演E:「百物騰貴,政府有乜紓困措施去幫低收入家庭?」特首:「低收入家庭幾時都咁慘。最大問題唔止百物騰貴,而係『低收入』。有冇方法去幫佢哋增加收入?有嘅,政府即做。」
政演D:「可唔可以提高最低工資水平?」特首:「嫌失業率低,想推高啲,最有效方法係立例將返工定為刑事罪行。前朝訂立最低工資,就係將部份有人願意做嘅工、有人肯畀嘅錢,由合法變非法。對唔住,咁樣唔會令人賺多咗。」
以上,當然只係發夢內容,現實嘅特首答問大會,我驚睇咗會發惡夢。
李兆富
富事 事通 精彩 政治 答問
PermaLink: https://articles.zkiz.com/?id=280290

富事通:銀行業中衰的意義

1 : GS(14)@2012-07-18 22:29:27

http://www.sharpdaily.hk/article ... 4%E6%84%8F%E7%BE%A9
早幾個月前,溫家寶話銀行業有壟斷,又有銀行老總承認,銀行利潤高到唔好意思講畀人知。有人話,暴利源於壟斷,要反暴利,就要反壟斷。
如果要銀行業真正有競爭,其實背後除咗有進步,更加要有淘汰。但可以肯定,只要銀行出事,由於牽涉存貸雙方普羅大眾,銀行越大,被政府拯救機會越大。因此,銀行業的遊戲規則,一定係越大越着數、越冒進。
又有人話,既然大唔好,就不如限制銀行規模;太大,就唔好畀佢繼續大。不過,從風險管理同成本角度,銀行規模唔可以太細,否則好易出現流動周轉問題。老實講,提出話要監管銀行規模既人,好多時都唔知自己講緊乜。
去到最後,就有人話:「不如降低銀行資產風險,唔畀銀行槓桿放得太大。」不過,話要收緊樓按,一定有人鬧政府打壓樓市。其實新常態下,去槓桿化已經自然出現,資金從銀行流失。
銀行賺少咗,存戶就更加收少咗息,甚至要被實質負利率蠶食儲蓄購買力。平民百姓唯有改變對儲蓄嘅概念,將資本投放真正可以生財嘅資產上面。
呢個宏觀現象,除咗中國,全世界都有出現。但係無咗銀行資本,各國政府又點樣發債融資?唔通真係夠膽加稅?
李兆富
富事 事通 銀行 業中 中衰 衰的 意義
PermaLink: https://articles.zkiz.com/?id=280316

富事通:聯儲局四招

1 : GS(14)@2012-07-20 12:24:47

http://www.sharpdaily.hk/article/fin/20120719/113401
前日伯南克上國會聽證,報道有人話冇方向,又有人話QE3未幻滅。究竟信邊個好呢?
從客觀事實睇,着眼7月31日至8月1日嘅兩日會議,應該唔會有大動作。至少,暫時似乎唔係太多人預期,聯儲局會出手買資產。
不過,聯儲局除咗買資產,另外有三招。第一招,就係將聲明入面,將超低息預期,吹到2014以後。齋吹,冇乜成本;他朝情況有變,又隨時可以改。當然,如果吹得過份咗,下次要再吹得更遠,效力自然會更弱。
另外一招,就係用貼現窗。銀行向聯儲局攞錢,畢竟唔係好事,所以貼現窗多數情況都係備而不用。外邊風大雨大,不穩定性可以忽然急升。要去到用呢一手準備去急救銀行,目標已經唔係刺激經濟,而係嘗試避免災難。可惜,歷史上,次次要搞到急救銀行,之後都唔會有好日子。
零息未必有效
最後一招,就係減銀行額外結餘利率。如果銀行有多餘錢,今時今日利率有四分一厘。有人提出,聯儲局非常有可能,將呢個利率減到零,逼銀行盡量做多啲生意,借多啲錢。主觀願望,當然係希望銀行增加風險胃納,促進流動。不過,銀行亦有可能寧願零息都唔借多啲錢出去。到時,就真係逼住其他更勁嘅招數。
李兆富
富事 事通 聯儲局 聯儲 四招
PermaLink: https://articles.zkiz.com/?id=280356

富事通:柏林欠債過萬億

1 : GS(14)@2012-07-20 12:25:05

http://www.sharpdaily.hk/article/fin/20120720/113919
不過,呢條數,柏林市政府未來五百年都唔會還。
據《路透社》報道,德國小鎮Mittenwalde有歷史學家喺檔案入面,搵到張1562年嘅借據。話說,當年柏林市向呢個中古小鎮,借咗400個金幣(Rheinischer Gulden),連本帶利,今日最少值12000 Guldens,即係億幾歐元。不過,如果計埋通脹同複式利率,鎮長話至少值過萬億。原來,自從1820年,呢個小鎮已經向柏林追討,不過一直都冇結果。
究竟,故事嘅教訓係乜?一,就正如愛因斯坦話齋,複式利率真係世界上最勁嘅力量;不過,用複合嘅通脹一樣有無比摧毀力。二,政府借錢,如果話咗唔還,真係可以好多百年都唔還,而且時間拖得越耐,追得番條數嘅機會就越渺茫。
複合計通脹究竟有幾大破壞力?就以伯南克嘅2%通脹目標計,30年之後,同一筆錢嘅價值,得番五成半。當然,2%係好「輕微」。事實上,通脹加上預期,係會令貨幣購買力下降得更快,2%,好快變成2.5%,3%……通常,一到某個臨界點,就冇可能控制得到。
太陽之下無新事,叫政府回水難過登天。今時今日,各國政府都要將利率壓到近乎零。
如果真係要還錢,佢哋就惟有學柏林市政府,拖一千幾百年囉。
李兆富
富事 事通 柏林 欠債 萬億
PermaLink: https://articles.zkiz.com/?id=280357

富事通:睇長遠就要講持貨力

1 : GS(14)@2012-07-23 09:27:01

http://www.sharpdaily.hk/article/fin/20120723/114268
之前,我寫泡沫熱潮,曾經講過:「泡沫製造信眾,更創造神話。如果有人質疑呢個信仰,就係公敵。」
呢個現象,其實非常古怪。升、跌、輸、贏,乃係投機市場自然現象,就好似出太陽落大雨,無乜好拗氣。
如果天氣預測話未來五日大致天晴,但出於善意,有人提醒大家,夏天間中會有失雲雨,叫市民帶多把縮骨遮,亦唔代表出聲嘅人覺得即刻會落雨,係唔係?
之前,承蒙明報地產版大哥陸振球兄畀面,做咗個專訪,我如常叫人量力而為。報導上星期出街,有舊街坊讚「瘦左喎」,亦有樓市信徒話:「你有乜證據話樓市轉勢?」
老實講,我真係唔識預測未來,唔知樓市會升,定係會跌?我只不過想提醒大家,樓市唔係只升不跌。
睇中市未必實贏
就算你覺得,樓市長遠一定升,但係唔代表唔使諗風險。好多人,就算睇中單邊市,都未必贏。因為未等到最後,都唔知幾時放。幾時買?買乜?只不過係程式嘅前半,幾時賣?賣幾錢?同樣重要。打算buy and hold,都要睇有無能力揸到最後。投機要睇個人情況,正因為並非每個人都有同樣持貨能力。
「量力而為,幾時都啱」有人留言咁講。其實,訪問入面,我都有叫人,一份收入,變兩份,投機一個豪宅,不如多個車位。
多個風險觀點,無壞啫。
李兆富
專欄電郵:SharpHK.Simon@gmail.com
Facebook專頁:www.facebook.com/AppleSimon
富事 事通 長遠 就要 講持 持貨 貨力
PermaLink: https://articles.zkiz.com/?id=280418

富事通:大陸城市人排外情緒

1 : GS(14)@2012-07-24 12:44:55

http://www.sharpdaily.hk/article ... 6%E6%83%85%E7%B7%92
過去周末,上海有個經濟研討會。上一次交流已是近十年前。早兩年被邀請去世博,但冇乜機會同當地人交流,所以今次都算係一次發現之旅。
會議地點屬於蘇州,距離上海市CBD(佢哋真係好鍾意呢個概念)差唔多一個鐘頭車程。搞手話,去蘇州搞,因為上海市政府太麻煩。其實,去蘇州都有好處,可順便睇吓大城市外嘅經濟狀況。剛好會場嘅對面,就係一個樓盤銷售處,附近亦都有唔少新樓。閒談之間,當地人話貴都要買,因為怕之後更加貴。佢哋覺得,之前係外來人搶貴樓價。
大城市,好似上海同北京,一直都抗拒外來人,但近年排外情緒都非常嚴重。事實上,大陸過去廿年來,雖然冇改革戶籍制度,但好多人外出打工,其實對經濟增長貢獻好大。本來有大城市戶籍嘅居民,福利越來越好;不過越係高層管理職位,就越多外來人;而且外來人,稅就有份交,福利就冇得享受。根據朋友所描述,上海、北京同香港,本土人嘅情緒,基本上差唔多。
我最大疑問係:人口流動性減弱,對大陸未來經濟發展究竟有幾大影響呢?
李兆富
富事 事通 大陸 城市 排外 情緒
PermaLink: https://articles.zkiz.com/?id=280429

富事通:財經通才碧斯

1 : GS(14)@2012-07-25 10:29:38

http://www.sharpdaily.hk/article ... D%E7%A2%A7%E6%96%AF
其實一早都想寫Barton Biggs(巴頓.碧斯)。兩個幾星期前佢過身,見到好多朋友都有講佢,反而覺得應該過一陣先寫。
肥仔孫柏文最記得,1993年碧斯仍然喺Morgan Stanley Global Strategist嘅時候,佢話對中國同香港Maximum Bullish。言猶在耳,93、94年就宏觀調控,中國見頂,之後又亞洲金融風暴,預測差唔多要十幾年之後才應驗。
講開又講,肥仔2006年預測,白銀十年見120美元,何嘗唔係要到最後尾幾年,先有機會應驗?
講番碧斯。佢除咗出名,預測大膽,我對呢位仁兄感興趣,更加因為佢由策略師轉行做對冲基金嘅故事。其實,好多人以為,財經都係同一行。
不過,一個投資機構團體入面,有策略師睇宏觀環境,又有分析師刨公司業績行業競爭,更加要交易員,當價格跳來跳去時做決定。三個身份,好難同時兼顧;甚至我覺得,思想模式上,三個身份有一定衝突。
遊走策略師同對冲基金兩個身份,碧斯更加係生意人、推銷員等。佢寫過本叫《Hedgehogging》嘅書,講佢嘅所見同感想。對呢行有興趣嘅朋友,應該一讀。近年,財經書,越來越講求文字可觀性。Biggs喺耶魯大學修文學創作,呢本書,乃代表作之一。
李兆富
富事 事通 財經 通才 碧斯
PermaLink: https://articles.zkiz.com/?id=280468

富事通:暴風和暴民

1 : GS(14)@2012-07-26 15:55:47

http://www.sharpdaily.hk/article ... C%E6%9A%B4%E6%B0%91
有個行將退休嘅政治演員,每逢港鐵(066)出事,就大肆鞭撻。鬧大機構有市場,唔鬧先至反常。原來十號風球之下,港鐵職員即時失去人權同尊嚴,明晒!
天災,冇人想。故事教訓我哋,明知打風,最好盡早返屋企。七月初,我人在花旗國。一場怪風,將中西部到東岸好多地方吹到停電,而且一停幾日。呢次大停電,廿幾年來從未試過,好多家庭都無法及時準備,就算想買後備柴油發電機都買唔到。剛好又熱浪來襲,好多長者同長期病患者,熱到叫救護車,亦有幾十人因此失救。
不過,我好少見到有美國政演借機抽水鬧政府或電力公司。修復電纜進度,大家明白,工程人員在熱浪下戶外工作,已好辛苦。傳媒評論,重點係叫大家記得飲水。鄰居之間,有人將雪櫃入面嘅食物煮晒,然後分畀大家,反正唔食,都會壞。又有人請大家去自己屋企個泳池解暑,亦有商場、酒店,歡迎大家去大堂免費凉冷氣。
剛剛過去的周末,又有奇遇。話說,我要返上海開會,飛機嚴重誤點。地勤早已被包圍。五小時之後,即半夜時份,先有得上機。上機我即刻沉睡。一個鐘後,飛機仲未起飛,原來有乘客拒絕上機。
當機長話唔等,要開機,佢哋又衝閘。點解香港文化越來越劣?你話呢?
李兆富
富事 事通 暴風 暴民
PermaLink: https://articles.zkiz.com/?id=280505

富事通:強迫金五宗罪

1 : GS(14)@2012-07-30 12:04:47

http://www.sharpdaily.hk/article ... 4%E5%AE%97%E7%BD%AA
上星期,讀書會討論Larry Swedroe寫嘅《The Quest for Alpha》,講到各類基金點都唔可能長期幫投機者跑贏大市,好多朋友即刻諗到:「長期儲蓄,反正最終目的都係要大市同步,點解香港人要被強迫金剝削?」
官商勾結!大把客觀證據可以肯定,只有「迫金局」嗰班薪高糧準嘅冗員,同埋迫金公司可以攞盡着數,其他人,都輸畀佢哋。除咗搵笨,強迫金最少有五宗罪:
1,洗腦:迫金局用迫金受害人嘅錢,整咗套《積金小勇士》,向細路洗腦。可惜,政治演員唔覺得呢種迫金共產剝削係洗腦,因為佢哋當年都支持搞迫金。
2,無知:07年迫金局拍咗套宣傳片,話債券係穩中求勝,首歌唱:「淡淡定,淡淡定,有錢剩。」嘿,剩畀邊個呀?乜債券好穩陣咩?
3,縱容屈機:大家如果提取迫金,就會覺得,錢根本唔係你嘅。入紙之後,迫金公司例必三十日先過數,期間,邊日結算,乜嘢價,一律唔會事先交代。迫金局,唔係監察迫金公司㗎咩?
4,欺凌弱小:迫金公司屈機,就當睇唔到,捉小企僱主,就多快好省。迫金局最鍾意發出新聞稿,話拉咗幾多幾多無良僱主。好多小企,都畀迫金局煩過。
5,半自由行?本來一早就有,點解最終唔講就唔存在,一直拖拖吓?
李兆富
富事 事通 強迫 金五 五宗 宗罪
PermaLink: https://articles.zkiz.com/?id=280556

富事通:比強迫金更好的兩個選擇

1 : GS(14)@2012-07-31 10:57:37

http://www.sharpdaily.hk/article ... B%E9%81%B8%E6%93%87
「點解香港人唔可以定期、定額將錢存入銀行,然後就同迫金局講,我已經儲咗錢,唔該唔好滋擾我啦!」簡單講,儲錢冇問題,不過唔想被人屈,得唔得?政府要人儲蓄,定係要香港人焗住畀人迫金先?
「其實,又點解唔可以畀人同退休儲蓄買樓?香港人一直都係買磚頭等退休㗎啦?買樓,至少有得住吖!」假如一個打工仔,被人迫咗十幾年金,如今已經剩低三十零萬,夫婦兩人,六十零萬,粗粗哋都夠買樓。之後,如果每個月迫金供款變成按揭供款,都不知輕鬆幾多。八零後,尤其是前期八零後,早幾年錯失買樓機會,或多或少,同迫金剝削有好大關係。
「政府有責任確保退休儲蓄穩定得來又有回報,點可以畀香港人隨便用定期存款,又或者買樓代替?」填鴨式教育迷信政府嘅人話。我唔會話畀人洗咗腦,不過,香港真係好多人仍然相信,政府搞迫金,係為咗大家嘅退休着想。
定期存款安全,買樓保值,你可以唔贊成。不過,如果連呢兩樣都質疑,又點解會信迫金公司?事實上,迫金越供,港人越窮。不公義嘅制度,不但冇人提出改革;之前,迫金將收入上限提高,竟然得到立法會通過!政治演員監察政府?咪玩啦!
李兆富
富事 事通 強迫 更好 兩個 選擇
PermaLink: https://articles.zkiz.com/?id=280595

富事通:錢去咗邊?

1 : GS(14)@2012-08-02 11:41:22

http://www.sharpdaily.hk/article ... B%E5%92%97%E9%82%8A
「世界各國政府都欠落一屁股債,錢又去晒邊度?」呢個問題,其實好多人都想知。
「銀行家!政客!官僚!」或多或少,呢啲都係既得利益者。不過,條數點計,佢哋都未至於攞得晒。
事實上,首先要搞清楚,乜嘢係錢,乜嘢係債。有心水清嘅讀者就話:「錢,即是債。」聽落有啲玄,不過又係千真萬確。全世界,好少地方好似香港咁,每一張銀紙,後面有百分百兌換保證,其他地方央行,印銀紙出來,只係講個信字。
多數人冇真正賺過錢
講番欠債去咗邊。好多國家,例如日本,原先政府負債唔多。但泡沫爆破之後,銀行要救,央行同政府就用發債同發鈔,撐起銀行資產負債表。簡單講,今日欠落嘅錢,好多時都係要來填氹。
「不過,之前唔係有人賺咗好多錢咩?高位出貨啲人,咪賺晒囉?」高位出貨,只係非常少數人。
好多人,都喺泡沫形成階段,一直持貨。期間可能有投機者,財富效應之下,套咗少少現金,又或者加大槓桿。即係話,絕大多數人,只不過係發咗場夢,冇真正賺過錢;財富從來都冇存在過,破壞咗嘅,係對未來增長嘅預期。所以,泡沫爆破之後,經濟要等一段時間先可以復原。
李兆富
富事 事通 錢去 去咗 咗邊
PermaLink: https://articles.zkiz.com/?id=280660

富事通:對央行有主觀願望

1 : GS(14)@2012-08-03 11:03:14

http://www.sharpdaily.hk/article/fin/20120803/118832
「雖然聯儲局今次冇行動,不過措辭上,比之前更加明確。上次話準備好出手,今次就話將會出手。聲明又話,聯儲局將會密切留意經濟狀況。以前格林斯潘咁講,跟住就有大動作。」聯儲局一連兩日會議,最終得個桔。不過好多投機者,總會選擇見到想見的部份。
坦白講,我都跌眼鏡。本來,我真係以為,今次聯儲局會將銀行額外儲備息率,由0.25%減到零;又或者,至少減到0.1%至0.15%。一來,銀行額外儲備息率會影響流動性。二來,當短息平過額外儲備息率,即係聯儲局「暗啞底」對銀行補貼。三來,近期銀行業同政府關係越來越惡劣;呢場戲要做落去,就要做全套。點知,聯儲局連呢一招都唔出。
至於冇將超低息延長到2014年之後,我反而唔覺得太出奇。聯儲局之前會議紀錄,內部老早有反對聲音。再講,得個講字,有等於無。冇乜實用但又有壓力,不如唔好做,係唔係?
文章出街時,歐洲央行做乜都已成為歷史。依書直說,兩大國貨幣,一隻貶值,對另一隻即構成資金流失壓力。自70年代美元貶值,令世界各國都要跟章。但掉番轉頭,歐央行會唔會令聯儲局做嘢呢?由o依家到九月聯儲局開會,大家都會沉醉主觀願望當中。
李兆富
富事 事通 央行 主觀 願望
PermaLink: https://articles.zkiz.com/?id=280685

富事通:杯麵的故事

1 : GS(14)@2012-08-06 12:03:08

http://www.sharpdaily.hk/article ... 4%E6%95%85%E4%BA%8B
老友每年都會去日本旅行。不過我唔明:「去得咁密,有乜嘢咁好玩?」
「都不知幾多嘢睇!今次我去橫濱新開嘅安藤百福紀念館。你哋班自由市場信徒,應該帶遊學團去參觀啦!抗衡一下國民教育嘛!呢個安藤百福,原名叫吳百福,台灣人,人稱即食麵之父。當年,安藤百福去外國推銷即食麵,點知洋人冇用碗,將個麵放入個杯用滾水沖,安藤靈機一觸,諗到將個包裝整到好似個杯咁,就成為今日嘅杯麵喇!另外,你又知唔知,呢個安藤,為咗做即食麵,去咗十幾個國家試麵。創業嗰陣,佢已經成六十歲,仲要之前曾經試過生意失敗,破過產㗎!」老友一輪嘴唔停咁講。
事實上,戰後日本絕地翻身,全憑呢一群唔怕輸、夠膽博嘅創業家。可惜,自從70、80年代之後,日本政府對財閥傾斜,仲搞到金融業都側埋一邊,結果造成泡沫。創業精神,亦同時消亡。70、80年代嘅日本人,人生目標係做經濟官僚或者財閥高層。
講開又講,漫畫《島耕作》系列,亦反映咗唔少日本嘅經濟現象。泡沫爆破之後,財閥同日本金融業,變做殭屍經濟。
經過廿幾年蕭條,日本又好似有新嘅一代創業家,佢哋嘅信念,就係要做真正地球村人。唔通,日本真係否極泰來?
李兆富
富事 事通 杯麵 麵的 故事
PermaLink: https://articles.zkiz.com/?id=280736

富事通:學校冇教嘅搵食技能

1 : GS(14)@2012-08-07 10:52:07

http://www.sharpdaily.hk/article ... F%E6%8A%80%E8%83%BD
暑假過咗一半,今年班見習生,亦都跟咗我成個幾月。我發覺,佢哋就算一心想做「文職」(80年代用語),都嚴重缺乏一啲基本技能:
一,寫信。先撇開文筆,就算寫好內容畀班後生,要佢哋去將內容企企理理排好,都搞到亂七八糟。尤記得喺學生嘅時候,英文堂除咗學寫信,仲要學埋點解一封信有一定嘅格式。當年,老師就連點接好一封信都教埋:「記住,封信抬頭要外向,內容就包入面,收信人一開,就知封信係唔係自己。」
二,用Spreadsheet。我見到太多後生,甚至乎有好多年經驗嘅會計哥哥姐姐,當Spreadsheet係Word processor咁用。各位大哥大姐,Spreadsheet,係要嚟放一行行、一列列嘅原資料,用來計數。如果想要做Balance Sheets同Statements,唔該學吓點樣用Report。
三,做Presentation。其實唔止學生,就算教授,甚至好多高層,都淨係將一大段字,貼上個PowerPoint。除咗冇誠意,最大問題係,佢哋自己都唔知講乜。美國學生,細細個就學點樣用一張大卡紙,講一件事。香港學生,最弱呢環。
好多後生都唔明點解啲老闆睇埋呢類細眉細眼嘢。但做大事就係從小處做起。好多人都識講,但真係做得到,就係真正嘅搵食技能。
李兆富
富事 事通 學校 冇教 教嘅 嘅搵 搵食 技能
PermaLink: https://articles.zkiz.com/?id=280747

富事通:幸福推銷員

1 : GS(14)@2012-08-08 11:47:42

http://www.sharpdaily.hk/article ... 8%E9%8A%B7%E5%93%A1
早兩日,介紹一位朋友加入我平日去開嗰間Gym做會員。該處「會籍顧問」見有客送到上門,自然非常之健談。講講吓,講咗去份工嗰度。
「下個月,我會去考保險、證券同健身教練。」雖然我睇唔出上述三樣,有何共通之處。不過,我睇得出呢位妹妹,都算係上進嗰種,覺得反正要跑數,就不如搵一門專業。
「其實,反正都係跑數,點解唔諗吓做地產呢?」我問。
老實講,如果要搵一行去跑數,我諗都唔諗,就會揀地產。香港人,十個有九個,都想買樓,問題係有錢定冇錢。所以,成功嘅地產經紀,最大本事,係搵出有錢人喺邊,同埋佢想買乜。
當然,講就易啦。不過,我發覺好多地產代理分行經理,成日叫班後生去街企,真係有用咩?唔通香港真係富貴到,隨街都可以捉到人,「大嗱嗱」攞幾千萬買個單位?
講番推銷。其實,前特首當年都自稱係寂寞的推銷員。香港人對呢一行,有少少誤解,覺得推銷員係下等工。其實,我好鍾意推銷,尤其當我覺得件產品好用,我更加落力去推。
推銷最怕遇着垃圾產品都要死推爛推。跑唔夠數事小,斷人脈代價更大。所以我認為最幸福嘅推銷員,係可以為自己塑造出來嘅產品跑。產品係乜?咪自己囉!
李兆富
富事 事通 幸福 推銷員 推銷
PermaLink: https://articles.zkiz.com/?id=280782

富事通:老闆都未必識嘅技能

1 : GS(14)@2012-08-09 14:18:11

http://www.sharpdaily.hk/article/fin/20120809/120830/%E5%AF%8C%E4%BA%8B%E9%80%9A-%E8%80%81%E9%97%86%E9%83%BD%E6%9C%AA%E5%BF%85%E8%AD%98%E5%98%85%E6%8A%80%E8%83%BD/
早兩日,講學校冇教嘅技能,有讀者話:「Problem Solving(解難)先係下一代最弱的一項。」
絕對正確!傳統教育,操練細路仔不斷重覆同一個方法,去答內容差唔多但本質一樣嘅問題。現實世界,問題並唔會次次一樣,需要嘅結果都唔一樣。
愛恩斯坦講過:「Insanity: doing the same thing over and over again and expecting different results(不斷重覆同樣方法,希望得出唔同嘅結果,係傻嘅)」偏偏,大多數人都以為,呢個世界有「標準答案」。
不懂解難 無法創新
黎老闆智英講過,做生意係不斷解難。創業家解咗一個大難題,好多時係一個生意概念。過程中又有好多小問題要解決。下一代如果唔識解難,結果會影響佢哋嘅創新能力。
究竟點樣解難?難題,其實係好主觀嘅概念。好多人甚至連問題出咗喺邊度都唔清唔楚。多數人習慣搵答案,但係唔熟悉諗問題。搵到問題,大多數人又習慣從記憶中搵最熟悉嘅答案,而唔係最有效嘅答案。換句話講,之前有條橋行得通,以後無論乜嘢問題,都用同一條橋,唔理結果。
商界,充斥好多讀得書嘅叻仔叻女,食老本嘅文化,亦成行成市。
李兆富
富事 事通 老闆 未必 識嘅 技能
PermaLink: https://articles.zkiz.com/?id=280814

富事通:賣衫真係咁好搵?

1 : GS(14)@2012-08-10 10:04:43

http://www.sharpdaily.hk/article ... 1%E5%A5%BD%E6%90%B5
香港天價地舖,幾乎絕大多數係時裝連鎖店。
Fast Fashion,好似Zara、H&M又或者UNIQLO,股價又真係幾厲害。單純睇股價表現,H&M同UNIQLO(母公司Fast Retailing)過去一年,派息加股價,總回報超過3成。但係,佢哋都唔夠Zara勁,一年投機總回報,超過6成。
賣衫真係咁好搵?大家如果睇吓香港嘅時裝零售,完全係另一個故事。最簡單嘅解釋,就係話呢類牌子,衫換款夠快,價錢夠平,薄利多銷,所以比起傳統時裝零售更勁。論銷量,幾個Fast Fashion牌子都算升得快。尤其是過去幾年,呢幾個牌子擴張得真係好快。
不過,近來經濟不景,無論都有啲影響。幾間Fast Fashion牌子,市盈率仍然有24至27倍,絕對配合宏觀經濟環境。睇真啲,原來呢幾間Fast Fashion都有幾個特點:一,超低負債;二,現金流超勁。三;毛利率超高。
唔講大家可能唔知,Fast Fashion毛利近6成!賣實物毛利都有6成,真係暴利。再者,超低負債,甚至手頭有大量現金,意味幾間Fast Fashion,大把條件派息。事實上Fast Fashion派息真係幾穩定。
香港嘅上市公司裏面,又有冇類似嘅概念呢?思捷(330)有冇可能轉型成功呢?
李兆富
富事 事通 賣衫 衫真 真係 係咁 咁好 好搵
PermaLink: https://articles.zkiz.com/?id=280823

富事通:時裝點止賣衫咁簡單

1 : GS(14)@2012-08-13 09:34:24

http://www.sharpdaily.hk/article ... 1%E7%B0%A1%E5%96%AE
香港企業強項就係做事標準化、有效率。但缺點,一樣係標準化、冇創意。
上星期留咗句問題:「思捷(330)有冇可能轉型成功?」似乎冇乜人睇好。畢竟時裝業玩法同以前唔一樣,就算思捷抄人家嗰套,大不了都係做行業入面嘅第四、五、六……即係,死得。
當Zara老闆取代畢菲特,成為世界第三最有錢人,思捷請佢嘅前夥計Jose Manuel Martinez Gutierrez,自然有人聯想思捷有冇可能好似Zara母公司Inditex咁勁。好粗略咁分析,思捷毛利率真係冇其他公司咁靚仔。不過最大問題係銷量方面。簡單講,貨賣唔出,幾有效率都假。
思捷新CEO Jose,未入Inditex之前,出身McKinsey。牌面睇,強項仍係效率同流程。好多人以為零售靈魂係多快好省。其實,時裝都係賣概念:Fashion is a statement, not a style(時裝不單止要潮,更要有內容)。
外國時裝業,就算大眾化到好似Target呢樣百貨公司,都要同世界級設計師搞Crossover。港產服裝公司喺呢方面嚴重輸蝕。畢竟,冇得量化同量度嘅創作,香港人唔在行。唯一例外,可能係黎老闆智英。不過,佢老人家一早轉戰傳媒,用同一套功夫,玩文字潮物,日日搞內容。
李兆富
富事 事通 裝點 止賣 賣衫 衫咁 簡單
PermaLink: https://articles.zkiz.com/?id=280897

富事通:政治演員Cut我線!

1 : GS(14)@2012-08-14 09:47:57

http://www.sharpdaily.hk/article ... t%E6%88%91%E7%B7%9A
政治演員,平時扮親民,又話自己會聆聽市民。我當然唔信啦!不過,暑期見習班後生,未見過世面,好容易被外表欺騙。所以,由上星期開始,我搞咗個宣傳工程,叫暑期見習用Email同Fax,再加電話,逐個逐個去聯絡候選人,問佢哋支唔支持改革「迫金局」:將迫金局董事局,變成最少一半由一人一票直選產生。
結果?政治演員左閃右避,扮收唔到又有,呢頭話收到,嗰頭話唔見咗又有。「最大個鼻」嘅,莫過於某個由大狀組成嘅民主派政黨,佢哋辦事處職員竟然講兩句就Cut線。
唔支持改革「強迫金」咪算囉,填番份問卷,都叫表咗態。民主派,公投都可以支持,迫金局董事局一半由一人一票直選產生,好難為佢哋咩?民主派?嘿!
反而好多獨立候選人,好快覆。亦有唔少人反對,理由係話支持全面廢除強迫金,非常好。至於幾個大黨,個個都話要黨中央開會決定。哦,明白曬!黨,原來即係「擋」。
總之,我會等到今個星期五,班暑期見習亦會不斷作出溫馨提示。各位候選人,如果收到獅子山學會打來跟進強迫金問卷,唔該,唔好Cut線。下星期,我哋會交代今次問卷嘅結果,畀各位選民有個參考。
李兆富
富事 事通 政治 演員 Cut 我線
PermaLink: https://articles.zkiz.com/?id=280932

富事通:三大辦公室靈異事件

1 : GS(14)@2012-08-15 09:30:12

http://www.sharpdaily.hk/article ... 0%E4%BA%8B%E4%BB%B6
好多人,當工作係生命嘅一部份。冇咗份工,就好似冇咗生命一部份。如果你有咁嘅心態,恭喜你,我覺得你份工應該好穩陣。
不過,好多人返工好似遊魂。當一間公司有好多妖魔鬼怪,自然就會多靈異事件。據說,職場活死人,腦海一片空白,但佢哋除咗會搵替身,仲會吸活人靈氣,散發負能量,好得人驚。雖然已經好耐冇打工,但係我對辦公室靈異事件,仍然有少少研究:
一,空穴來風。無端端,正常人會收到風,聽到啲唔應該聽到嘅野。有啲人定力唔夠,就會好似撞邪咁,重覆講一啲佢哋都冇見過嘅野。
二,死線來了。死線,人人都有一條。不過,職場遊魂曾死於非命,故最鍾意將人家的死線,拉到有咁早得咁早。明明有五日時間做嘢,佢就去到星期五下晝五點四十九分,然後叫對家放工前回覆。如果被上司或客仔迫,我都心服口服,但下級同外判商都係咁,我真係唔識解。
三,水鬼升城隍。怨氣大,活人走曬。結果,厲鬼升曬大鬼,繼續散發負能量。
辦公室靈異事件,多到可以寫一部《新民間傳奇》。講到尾,一間公司太多冗員中層,就有遊魂。老闆們,人多唔一定好辦事。決心裁冗,還好員工一個交代啦!
李兆富
2 : Sunny^_^(11601)@2012-08-15 13:07:54

李生到底咩料...

之前無啦啦做左美國人,跟住幾個月後就成日反來香港上電視...

寫呢D野仲有人比錢佢?佢好巴閉???
3 : GS(14)@2012-08-15 13:44:17

2樓提及
李生到底咩料...
之前無啦啦做左美國人,跟住幾個月後就成日反來香港上電視...
寫呢D野仲有人比錢佢?佢好巴閉???


算啦,都是支持外國者
http://zh-yue.wikipedia.org/wiki/%E6%9D%8E%E5%85%86%E5%AF%8C

跳去: 定向, 搵嘢

李兆富(1976年—)係香港政治評論專欄作家,同埋係《蘋果日報》〈蘋果批〉作者之一。佢曾經做過舊時立法會議員夏佳理嘅議員助理,而且喺1999年參加區議會選舉,喺銅鑼灣選區挑戰民主黨嘅謝永齡,但喺落選。後來,佢加入香港右翼自由主義智庫組織「獅子山學會」,成為個會嘅骨幹成員。
4 : GS(14)@2012-08-15 13:45:18

http://www.inmediahk.net/node/96599
富事 事通 三大 辦公室 辦公 靈異 事件
PermaLink: https://articles.zkiz.com/?id=280981

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019