📖 ZKIZ Archives

財經CAREFREE - 順叔 大話東北遊(上) (2012年09月03日)

1 : GS(14)@2012-09-03 09:30:58

http://www.am730.com.hk/article.php?article=119729&d=1834
今期開恆基地產(012)，借呢間在舊樓重建及新界農地兩大土地供應來源的大地主，大話南西東北，就香港房屋規劃政策最近的熱門話題，提供一啲非主流的思考角度。
一個政權通常去到黃昏末日，先會變成跛腳鴨，做乜都被人鬧一餐，特首梁振英掉轉頭，甫開波已經大把人插佢，局長級人馬有人糧都未出過就要辭職落台，管治班子做又好唔做又好、向左走向右走一舉一動最後結果都係萬箭穿心，最新宣佈的「梁十招」，唔使問阿桂，又廣被批評冇料到兼整色整水。
房屋供應涉及長線規劃，大家試嚇走上財政司長曾俊華個人網誌望望，呢位兩朝財爺，由07年當奴年代開始，大時大節每年每季都發出「樓泡警告」，講你知政府有幾關注樓市供求，又話會「採取必要措施」，不過只停留在寫網誌階段，之前5年曾蔭權政府做咗乜嘢，有眼睇，講到要掘地窿鑿岩洞，臨尾先話復建居屋、檢討土地供應，未有新供應出現，已經拍拍屁股走人，當奴「做好呢份工」的「老闆」，究竟係邊個，畫公仔唔使畫出腸。
政府7月中宣佈白表免補地價購買二手居屋的試行計劃，仲有增加青年旅舍的計劃， 8月又宣佈「梁十招」，推出多項當奴拒絕採納的中短期措施，不難理解，梁振英家陣四面楚歌，唯一可以攞嚇彩，仲有幾分「民意」支持的，剩低房屋政策，得就得唔得就……唯有更加肉緊。
房屋政策得閒講兩咀，講得好聽啲，就係「政策成熟一項推出一項」，不過同時予人杯水車薪的感覺，缺乏長遠政策視野，暫時睇，梁振英可能吸取咗當年董伯伯的教訓，97年7月1日就掟出「八萬五」政策，就職當日已經露曬底，結果被人追住打足咁多年，梁振英新班子一開波已經進入跛腳鴨時代，選擇開牌曬冷的時機要更加小心，例如「港人港地」的政策。
「港人港地」呢個政策口號，聽落好順耳，亦配合部分香港人近來拒絕融合的心態，不過亦可能係梁振英最捉蟲的選舉期票。所謂「港人港地」，望文生義咁去瞭解，講緊在賣地條款裡面，加上限制「非港人」購買力的條款，香港的地契，依家一批通常50年，政治上的50年不變，都只係此一時彼一時的權宜之計，半個世紀，經濟週期都唔知幾多個周天(即循環)，在地契上將物業買賣限制訂得太死，萬一樓市大幅回落，想賣又搵唔到「港人」接貨，可能更加捉蟲。
如果將「港人港地」呢個政策，當成限制外國資金投資或炒賣香港物業，壓抑投機性的需求，又唔同講法，甚至唔需要在賣地條款搞咁多嘢，只需要透過行政措施或者稅務條例改變遊戲規則，好多國家都有類似的資本控制(Capital Controls)，內地樓市調控的「限購令」就係例子之一，香港將地產剔除於投資移民投資計劃亦係例子之一，當然啦，如果梁振英推出類似的措施，限制非本地資金進出香港樓市，不難想像，可能又會被唱通街，破壞香港自由經濟的光環。
香港另一個熱門的房屋話題，叫做「劏房」，呢個辭彙出現之前，私人住宅市場的「赤貧」象徵，包括「板間房」，仲有「籠屋」，幾年前梁振英在探訪深水埗居民時，講過籠屋及板間房的存在，是香港房屋政策的「污點」。劏房講緊將一個住宅單位，合法或非法地劏成幾個具獨立廚廁的細單位，即係話，劏房的存在，查實為咗滿足對私隱有更高要求的社會階層，如果籠屋及板間房代表香港房屋政策照顧唔到最草根階層的需要，劏房的出現，即是話今時今日的香港樓市，連中產都開始「赤貧化」，咁就更加係污點中的污點。梁振英提出增加青年旅舍，以及「梁十招」有關「活化」工廈的建議，其實就係針對呢個現象，下回再續。  http://caijingcarefree.blogspot.com/
逢週一至五刊出

---

人在中環 - CK 最佳拍檔 (2012年10月03日)

1 : GS(14)@2012-10-03 23:33:19

http://www.am730.com.hk/article.php?article=123813&d=1855
【am730專欄】 早陣子有間成立不久的公司，找我們做合作夥伴。我跟他們見了兩次面，還未有機會談到合作內容的細節部分，上週我就收到這公司準備結業的消息。公司在開業不久就要「收檔」，原因可以有千百萬個。當中對成本計算出錯，算是頭號大熱。這間公司的結業原因，我雖然永遠無法知道，但我卻主觀地認為，必定跟公司的拍檔不和有關。
這間公司由兩個還未到三十歲的年輕人創立，據他們講，他們本是大學同學，算是「識於微時」。跟青少年時認識的好朋友拍檔做生意，好處是大家會少一分計算，多一分信任。但這個好處同樣是也是壞處。原因是，大家之所以能有互信，基礎主要是來自彼此還未踏足社會前所建立的感情和相處。然而作為一個「負責任」的生意拍檔，對公司及拍檔所需要付出的commitment，往往遠超過在讀書時作為好朋友的水平。以往積累下來的友誼，是否足夠硬淨去應付「拍檔做生意」這個「升呢」的考驗，則是生意能否延續下去的一個關鍵。
第一次跟這兩位合夥人見面，給我的感覺是他們都是smart guy。即使不合夥做生意，他們在事業上也應該能有不錯的成績。然而他倆在跟我見面時，卻不時表現出「爭嘢講」的情況，甚至在字裡行間出現一種「爭話事」的氣氛。這種氣氛也許連他們自己也沒有察覺得到，但我作為一個過來人，明白當這種氣氛連在面對外人時也能滲透出來，這個生意的拍檔關係， 很快就會出大問題。

週三、五刊登

---

財經CAREFREE - 順叔 黑色黃金週(上) (2012年10月03日)

1 : GS(14)@2012-10-03 23:33:38

http://www.am730.com.hk/article.php?article=123731&d=1855
【am730專欄】今期開自由行，同埋幾隻靠自由行食胡的香港上市公司。
10月1日前後一個星期，向來係香港零售業的消費旺季，今年疊埋中秋佳節，內地有長達8日的「黃金週」假期，香港亦有4天「長週末」假期，本來應該旺上加旺，不過，天不時也，人不和也，難以想像，同一天空下，這邊東方之珠廿幾分鐘的煙花璀璨，那邊維港水域永沉數十亡魂，本來已經冇乜喜慶味道的黃金週，更加盡抹黑色。
順叔絕對無意在呢個時候抽邊個水，不過，在追月夜兼國慶日，發生可能係香港開埠以來最嚴重的海上災難，肇事兼被撞沉的船隻，又掛住「港燈」個招牌，望住呢單海上慘劇，好難唔放埋同香港的運數一齊咁睇，愈諗愈唔安樂，冇曬心機。
冇曬心機的，肯定唔單止係財經茄哩啡。就算在慘劇發生前的兩日假期，平時被自由行旅客淹沒的購物旺區，人流竟然唔見得特別多，多間名店門口，並冇出現內地貴客排隊情況，大型商場唔算特別擠迫，甚至有啲冇釐神氣、「冷冷清清」的感覺。
順叔多數避開人流特別多的地方，以上觀察，只係9月30日偶爾路過銅鑼灣的「快拍」感覺，唔作得準。
不過，順叔問開身邊朋友同埋屋企人，好多人都有類似感覺，就係在今次特別長的國慶假期黃金週，被香港拒內抗陸人士稱為「蝗蟲」的內地遊客，竟然好似特別少，相信唔需要等政府公佈10月零售銷售數據，過幾日有關政府，以及商業團體的初步數字及口風，可以印證呢個「冷冷清清」的感覺有幾實在。
內地遊客人流冷冷清清，挨緊貴租的零售商就更加淒悽慘慘慼戚，查實幾個月前的內地「五一」假期，好多人已經講緊黃金週的威力開始甩色，過去幾年靠內地客食胡、保持高速增長的香港零售業，近幾個月已經開始放緩，7月份的零售數據更加接近3年新低，自由行呢個實施接近10年的「生金蛋」政策，威力明顯開始減弱。
將時間回撥到10年前，即係2002年10月1日，香港主權回歸5年，當年特首叫做董建華，政府亦啱啱公佈就基本法23條立法展開公眾諮詢，至於香港經濟已經連續通縮5年，樓價較1997年高位，跌咗超過一半。一個月後，政府將會推出「孫九招」穩定樓市。
兩個月後，廣東省開始因為怪病出現搶購白醋潮，而當時100港紙仲兌到百二蚊人仔，香港講緊結構性財政赤字，港人大量北上消費及工作，唔少人開始擔心會令香港通縮及財赤進一步惡化，斷估乜嘢中港更緊密經貿關係安排(CEPA)同埋自由行的政策，就係在呢個時候醞釀成形。
2003年沙士(SARS)重創香港旅遊業及零售業，7月更有50萬人上街，就催化咗一系列有關河水溝淡井水的政策。
2003年7月28日，第一張在自由行政策下發出的「往來港澳通行證」，在中山發出，從此，內地人必須跟團遊港澳的政策，變成歷史。
最初只有4個廣東城市開通「個人遊」，一簽一行，依家已經開放到全國49個城市，如果唔係香港的反對聲音，仲有實實在在的香港「容量」問題，一簽多行同埋自駕遊等政策都可能已經落實。
不過，就算只係自由行政策，2011年已經為香港帶嚟超過1,800萬內地遊客，佔訪港旅客大約65%比重，過去10年，加加埋埋都有約8,000萬自由行訪港旅客。
所謂十年一夢，睇返2012年今天的香港的政經形勢，同2002年10月的時候，好多嘢都可以形成強烈的對比，甚至隱約見到兩極分化的發展趨勢，例如樓價，如果唔係沙士一役，2002年第4季樓價可能已經跌定，如果當時係谷底的話，依家就好有高處不勝寒的感覺，又例如香港同內地經濟融合的政治形勢，當時主流輿論支持加大力度同內地合作，依家抗拒中港融合的聲音，就算唔係主流，最少都算係最大聲。
下回再續。
http://caijingcarefree.blogspot.com/ 逢週一至五刊出

---

電視風雲 - 王奇雲 一身職業病 (2013年03月04日)

1 : GS(14)@2013-03-04 23:24:18

http://www.am730.com.hk/article.php?article=144689&d=1986
【am730專欄】Carol公司上星期出咗意外，響外景拍攝時有攝影師跌親，好在最後無生命危險，大步檻過，我呢邊睇到新聞都嚇一跳，因為我本人係識得「大灰熊」嘅，係喺嗰間老細跳「騎馬舞」電視台合作過，唔係喺無記，佢個人做嘢好鬼盡責投入，又好好人，所以大家一講起單嘢，都好擔心，好彩吉人天相，咁都算安心少少。
拍攝外景，本身就係一件危險工作，即使唔係拍飛車、爆破同槍戰，現場都往往危機四伏，例如嗰啲好似蟒蛇嘅大小線材，隨時隨地會勾到；又好似啲釘同螺絲，如果執景時遺漏咗，就係危險；仲有，為咗攞好角度拍攝或者做戲，手足要擒高擒低，都會係陷阱，當年Beyond家駒響日本就係咁樣出事，大家應該仲記得，所以開工冇安全工作意識，唔打醒十二分精神，真係好容易出事。
對於我哋班寫稿嘅，表面上無呢亭顯著危險，但係唔代表無事，我環顧周圍班兄弟姊妹，雖則唔算天殘地缺、五勞七傷，但係都有周身病痛，病例包括有：坐骨神經痛、手部關節炎、偏頭痛、頸椎炎、中央肥胖、老花等等。眾所周知，呢啲症狀都同長期對著電腦打字的後果，可以話係慢性病，日積月累開夜寫稿咁形成。Carol身受其苦，但係我唔方便講上面咁多瓣佢中咗邊幾瓣，佢去咗新公司之後，壓力大咗，要求高咗，頭痛都多咗，我心裡面都好唔舒服，我認為，推廣工業安全，除咗製作，創作都要有份，第一步首先要關心下佢哋嘅心理健康，同壓力問題，至講其他漂亮說話！(逢周一至五刊載)

---

電視風雲 - 王奇雲 天生儲紙狂 (2013年03月12日)

1 : GS(14)@2013-03-12 23:27:36

http://www.am730.com.hk/article.php?article=145942&d=1994
【am730專欄】老媽子最近喺儲物櫃，摷咗我儲咗十幾年嗰三個紙皮箱出嚟，因為佢投訴個箱開始腐爛，裡面有小昆蟲走出嚟，老實講，呢三箱嘢，係我入行後嘅手稿，公司嘅電視劇本又有，出面秘撈嘅大陸劇本又有，佢哋係我爬格仔，幾乎每一個字都係親手寫落去，一點一劃，標點符號，所有都有我當時嘅情感喺裡面，更加係我曾經喺呢行捱驢仔嘅血汗證據，雖然講到咁重要，但我始終極之唔願意搞佢哋，相信好多人都同我一樣，覺得佢哋整整齊齊喺個箱裡面，又好地地咁喺儲物櫃疊起咗，久而久之，會眼唔見為乾淨，唔係老媽子勒令我要短期內處理好佢，我都唔會的起心肝喺周末睇睇佢哋。
當然最簡單嘅方法係掉晒佢，但我真係唔捨得，因為唔單止係自己努力嘅證據喎，更加係香港，甚至東南亞電視劇本發展嘅歷史證明，應該珍而重之，留待他日俾自己嘅子孫欣賞，再講，我覺得儲多十幾廿年，可以捐俾香港文化博物館，搞番個電視劇本展，都叫做為咗呢行嘅歷史出番少少力吖。
Carol明白呢堆紙對我嘅重要，佢諗咗一陣，建議我scan咗做pdf file，我同意咁樣完全避過晒潮濕、生蟲、寸金尺土嘅問題，但係手稿喎，變咗電腦檔就唔係原汁原味啦，試諗吓，你去睇達文西文化展，只喺個螢幕度睇pdf檔，你都唔冧啦，所以最後我去買過啲紙箱，再加埋防潮、防蟲包，重新將佢哋包裝好，安全送到我以往租開嘅迷你倉度擺放，臨關上倉門嗰刻，我先發現原來裡面有好多嘢都係我一直唔捨得掉，或者覺得有用但好日唔會用嘅嘢，同樣需要我去處理。

王奇雲  (逢周一至五刊載)

---

人在中環 - CK 同屋企人商量 (2013年03月12日)

1 : GS(14)@2013-03-12 23:27:58

http://www.am730.com.hk/article.php?article=145831&d=1994
【am730專欄】我明白人生許多重要的決定，屋企人的意見都非常重要。但人生之中總有些事情是應該「自己話事」的吧？例如，做邊份工。
公司早陣子請文員，見了好幾個女孩子，HR同事Amy揀了其中兩位。當我們給她們正式offer時，其中一位說要給她時間考慮考慮。要接受一個工作offer，要求一點時間考慮，並不過分。(反正其實很多人，未考慮清楚就應承上班，到頭來又是甩底收場。)問題是她的回覆：「多謝你哋嘅offer，不過我希望你哋俾幾日時間我考慮，因為我爸爸媽媽去咗旅行……」
Amy心知不妙：「你爸爸媽媽去咗旅行，同你take唔take個offer有乜關係？」
女孩子答得很淡定：「冇，佢哋過兩日先落機，我想先同佢哋商量吓，先決定接唔接受你哋嘅offer。」
Amy聽罷，沒有再說太多，只叫女孩子有決定後通知我們。然而掛斷電話之後，便在女孩子的履歷表上打了個大交叉。
這個女孩子，二十六歲了，已不是第一次出來社會做事了。這些事情，以她的年紀，應該有足夠的判斷力，去決定自己是否適合去做決定吧？商業社會是一個要求每個人都能獨立工作的地方，連「做唔做份工」都要徵詢阿爸阿媽意見，這樣的人，怎能請得落手？
「Take唔take個offer，想問吓屋企人意見，我都還可以理解……」Amy嘆氣說：「但係唔使坦白到要話我知囉。醒成咁，點請得落手呀？」周二、五刊登

---

電視風雲 - 王奇雲 不如唔好發 (2013年03月25日)

1 : GS(14)@2013-03-26 01:36:42

http://www.am730.com.hk/article.php?article=147859&d=2005
【am730專欄】3月近尾，新免費電視牌照依然無聲氣，一方面係由於無記司法覆核拖住，另一方面就係傳媒同社會關心重點漸漸去咗「佔領中環」同「2017普選行政長官」，坦白講，呢兩單嘢又真係大啲，之不過新牌同佢哋看似無關卻又有關，都係上面點樣操控香港嘅部署一部分，咪以為娛樂事小，政治事大，之前「藝發局」頒獎俾狂插《低俗喜劇》，就係娛樂不離政治嘅好例子，換句話講，做人有時候真係會「瞓響度都會中槍」，唔到你唔明哲保身。
近期另一單唔多起眼嘅新聞，就係我哋以前嘅名監製夫婦過檔咗Now記之後，終於宣布有劇開嘞！原來係同內地合拍嘅古裝劇《大漢賢后：衛子夫》，詳情和選角未有公開，據說主要係內地演員，先至可以上黃金檔。我睇到段新聞心情有多少唏噓，呢兩位前輩響香港拍過好多成功劇集，今時今日名成利就，竟然都要向北望搞合拍，呢種劇本題材我唔敢話舊同老土，但一定唔叫創新，仲要經過重重審批，睇內地大明星面口，仲要用埋內地人員拍攝，咁究竟對香港嘅電視業有咩嘢幫助？新人又有無機會？一連串嘅問題，令我想佢哋不如留喺無記，反而仲可以培育多啲新人，家陣猛賺人仔，實在浪費咗囉。
當然，人各有志，人望高處，人仔萬歲………(下刪三百字)，我要問，發新牌照嘅目的，乜唔係除咗俾觀眾多啲選擇，仲有個使命就係發展本地創意嘅咩？咁努力去搵上面合拍，咁想要官審批，咁鍾意用大陸演員，咁不如唔好發啦！

王奇雲  (逢周一至五刊載)

---

電視風雲 - 王奇雲 話之你香港人 (2013年03月28日)

1 : GS(14)@2013-03-30 23:23:29

http://www.am730.com.hk/article.php?article=148400&d=2008
【am730專欄】當新免費電視牌照仲未有著落，江湖依然多事，早排就謠傳「魔童」係「泊車仔」，某傳媒大亨幕後揼錢俾佢玩電視，搞到佢要出聲明澄清咁滯，喺自己個專欄義正辭嚴否認，叫人咪亂咁噏。以佢嘅為人，向來千山我獨行，笑罵由人，搞到要親自解畫，事情都幾嚴重，程度可能去到影響發牌，先要走出嚟抗辯嘅啫！
不過最令人覺得騎呢嘅係，「不死鳥」台失驚無神話有意申請免費電視牌，擺到明係要玩埋一份，甚至係做媒，無論政府發唔發牌，佢都可以出聲，明係申請，暗就搞局，係人都睇得出，其心可疑，而且佢同大陸關係比「A記」更緊密，香港人日夜期待下，無可能最後係一個「不死鳥」化身嘅「中央十台」吖？
Carol話呢招好毒，一定背後有高人指點，只要佢一申請，以後有關事無大小都可以插咀，例如：遲發牌佢就話唔急住，叫大家慢慢等下；萬一唔發，佢又可以扮埋受害者，令政府無厚此薄彼嘅嫌疑，諗下諗下，呢個消息都幾凶險，擺明有後著。我再睇埋噚日生果報左丁山，佢話政府又拋出3G電話頻譜出嚟拍賣，明係益庫房收入，暗就俾機會中移動不惜代價投到，擴大市場佔有率，令其他電訊商牙痛咁聲。
兩條看似無關事嘅新聞，一夾之下，我個心都寒一寒，再加埋姓喬嗰個官員，疾言厲色叫我哋預咗2017選特首有預選，我深深感到上面對傳媒同選舉嘅操控，愈嚟愈明顯，更話之你香港人反應，真係好鬼火滾！
(逢周一至五刊載)

---

2 : GS(14)@2013-03-30 23:26:04

http://realforum.zkiz.com/thread.php?tid=50191
活力先生評王維基『實為「肥佬 L」個「泊車仔」』

---

(信報 20/03) 互聯網世代如何滅聲 股海One Piece

1 : GS(14)@2013-05-01 12:53:08

http://figoinstock.blogspot.hk/2013/03/2003.html
拜讀林天悟一文《軟攻港傳媒》（本報3月11日），感覺先是錯愕，但消化幾秒後，還是大笑出來。
若李慧玲所言屬實，北京有意於十八大後，利用銀彈政策收買本地傳媒的話，戰略乃基於中共舊有思維︰掌控主流媒體，民心便可歸順。本地傳媒機構的總市值有數得計，作為傳媒中人，天悟兄擔憂些微維穩費已可將其吞噬，十分合理。
資訊可星火燎原
不過，從八十後局外人的眼光出發，只有年事已高、長期遠離資訊科技洪流的謀事者，才會想出如此廢招。置身互聯網世代，滅聲任務近乎天方夜譚。
「傳媒」兩字的重點，在於「傳播的訊息」本身，而非「媒體」之上。以港台風波為例，假如鄧台長果真有政治任務在身，最終能把港台收服，化成政府的喉舌，後果如何？恐怕其收聽率必定直逼A記電視台！
執筆至此，想起一套舊美國電影Pump Up the Volume，講述一個中學生，於睡房開設非法電台，時而播歌，時而批判社會，弄得滿城風雨，最終與警方進行追逐，壯烈被捕。
若果主角遲生二十年，收場定然不同。Web2.0有了Forum、Blog、YouTube、Justin.TV，全球網民可是觀眾，亦身兼記者及評論員，何以和諧得掉？曾斷言In the future everyone will be famous for fifteen minutes的Andy Warhol，真有遠見。
對此，維穩當局其實有點束手無策。資訊流速之快，不少評論短時間內產生星火燎原之效，無論怎樣建防火牆、刪文、禁言，也杜絕不了。況且，暗地工作的維穩當局，若然過於明目張膽，反成大國笑柄。
「蝴蝶效應」增多
對大小消息長期過敏的金融市場，變得更有「效率」，卻用上「準確度」作為代價！
散戶駐足交流的經紀行，從業員集結吹水的酒樓，將會被網絡討論區及彭博聊天室所淘汰。舊日只能傳至幾對耳朵的流言，到今日可頃刻受到眾多眼球所注視，而形成市場上的巨大推力。
上星期五，即將公布業績的比亞迪（1211），臨收市前被傳密謀配股，籌集40多億元，其股價於15分鐘內，由25.5元急跌至24.25元收市。股壇上的「蝴蝶效應」，在可見未來將逐漸增多。看官可曾想過，投資紅籌國企，與隔山買牛無甚分別？幸好，內地網絡急速擴張下，有價值卻被忽略的資訊唾手可得。掌握上述法門，小投資者要打敗長期依賴主流頻道的基金大戶，並非不可能。
政府假借保護私隱等美名，修改公司查冊制度，無疑進一步封殺消息發布的正規渠道。不過，真相不會就此被掩埋，反而從非主流媒體上伸張。
當有一日，社會流言滿天，卻苦無查證之法時，看官請緊記，此乃今日在上者閹割本土原有優良體制的惡果！

---

經濟人看世界 - 林本利 滙控股份合併後又分拆 (2013年05月03日)

1 : GS(14)@2013-05-11 15:41:35

http://www.am730.com.hk/article.php?article=153065

【am730專欄】上文提到中華煤氣(003)喜愛派紅股，隱藏股價實際升幅。一些公司則喜愛分拆和合併股份，或者批股和回購股份，令股價出現顯著變動。投資者參考過往股價時，必須留意這些轉變，免得被誤導。
滙豐控股(005)在1991年4月時將4股合併為一股，股價由6.2元一股變成24.8元一股。之後滙控受惠於歐洲業務快速增長，股價不斷上升，到1999年6月股價高達300元一股。滙控於是分拆股份，一股拆成3股，股價由300元變成100元左右，方便投資者買賣。
滙控分拆股份後，股價到2007年11月升至150元以上，之後因美國次按問題和金融海嘯，股價大幅回落。到2009年3月2日，滙控宣布業績大倒退和供股集資，12股供5股，供股價是每股28元。滙控宣布供股前，股價是56.95元；宣布賤價供股後，股價自然應聲下挫，每股股價即時變得只值48.44元[(56.95元x12+28元x5)÷17] 。之後被有心人「質低」，在2009年3月9日低見33元一股，由最高位下跌近八成之多。
假設滙控股價是85元一股，17股總值1,445元，當中5股是供股得來，以28元供股價計算，成本是140元。1,445元減去140元，餘下1,305元便是另外12股的價股，每股是108.75元。換言之，只要投資者購入滙控時股價低於108.75元，兼且有供股，即使股價只得85元，依然在股價上沒有損失，兼且收了幾年股息。

作者曾任教理大，現為活道教育中心校監

---