中環在線： 《福布斯》女富豪張茵撐股價最落力 李華華
2008-08-20 AppleDaily
前女首富張茵再度出擊增持玖龍紙業（2689）。據噚日港交所（388）資料，玖紙主席張茵喺今個月15號以每股平均價4.316元，增持110.5萬股玖紙，涉及金額476.9萬銀，持股量由72.03%增至72.08%。增持當日，玖紙跌咗三個巴仙。
全 球熊市，玖紙股價每況愈下，今年3月公佈中期業績差過市場預期，股價當日急跌四成，張茵惟有不斷出手增持撐玖紙。計埋今次，張茵今年已經第13次增持玖 紙，總共花咗1.86億銀。不過，股價撐唔起，玖紙噚日收報4.01蚊，年初至今累跌八成。你話張茵見到點會唔眼寃，雖然係咁，家吓佢持有嘅玖紙價值仍然 高達125億銀。
楊惠妍一次過豪擲3億
講起女首富，除咗張茵出手，《福布斯》亞洲女首富、碧桂園（2007）大股東楊惠妍今 年亦曾經出手增持碧桂園，雖然只係出過一次手，但做得亞洲女首富，出手就梗唔會「陰啲陰啲」，4月21號豪擲3億銀買入5000萬股碧桂園，增持1次嘅資 金已經多過張茵近四成。不過，碧桂園亦都唔係幾生性，增持至今股價再跌四成，但佢持有嘅碧桂園市值仍達343億銀。女富豪榜仲包括SOHO中國（410） 張欣同華寶國際（336）朱林瑤，雖然公司股價年初至今分別跌54%同23%，但佢哋冇增持公司股權。雖然股價跌，但兩人嘅身家仍然過百億，佢哋持有嘅公 司股份市值分別達124億同116億銀。有錢啫，唔一定要拎嚟撐股價嘛！
女富豪增持情況
富豪：張茵玖龍紙業公司次數：13涉 及金額：1.86億元昨收報(年初至今變幅)：4.01元（-79.7%）持股市值：125億元富豪：楊惠妍碧桂園公司次數：1涉及金額：3.00億元昨 收報(年初至今變幅)：3.58元（-60.3%）持股市值：343億元富豪：張欣SOHO中國公司次數：0涉及金額：0億元昨收報(年初至今變 幅)：3.74元（-53.5%）持股市值：124億元富豪：朱林瑤華寶國際公司次數：0涉及金額：0億元昨收報(年初至今變幅)：6.00元 （-23.1%）持股市值：116億元資料來源：港交所電郵：
[email protected]
中環在線：魯掌櫃救墮崖蒙能 李華華
2008-08-21 AppleDaily
蒙 古能源（276）早幾日慘遭洗倉，股價喺禮拜一插水28%，市值一日間蒸發82億銀，第二日蒙能股價仍然未止瀉，一度再跌24%，好在收市跌幅收窄，不過 市值仍然唔見24億銀。市場當時盛傳，股東之一彤叔鄭裕彤call好友入市撐蒙能，令股價唔再跌得咁甘。華華都周圍打探究竟彤叔call咗邊個 friend入市，咁幫得手，結果噚日開估。蒙能發通告，話主席魯連城增持股權，哦，原來彤叔嘅friend即係佢嘅掌櫃魯主席！
市值反彈64億銀
魯 連城以每股平均價2.946蚊，掃咗435.9萬股蒙能，佔蒙能已發行股本0.072巴仙，涉及金額1284萬銀。話晒彤叔係蒙能股東之一，揸住 8.21%蒙能，早幾日蒙能急瀉近四成，彤叔賬面唔見8.7億銀，彤叔幾百億身家，當然係小數目，但蒙能咁樣被人洗倉，冇「飛士」，更要搵人做吓嘢，貴為 彤叔掌櫃嘅魯連城，當然要即刻出手撐蒙能。魯連城親自出手，蒙能股價當堂醒晒，最高急升逾四成，收報4.16蚊，升34%，公司市值即時反彈64億，去到 252億銀，彤叔賬面即時只蝕3.5億。魯連城拎千三萬出嚟，就令彤叔蝕少5億幾，魯連城不愧為彤叔掌櫃，唔到你唔服。
中環在線：美聯太子女呻生意少咗
2008-08-21 AppleDaily
美 聯物業（1200）主席黃建業個千金黃靜怡（Angela），放棄咗國際會計師樓份工，今年3月正式加入美聯集團做執董後，可謂創意無限，經常搞搞新意思 為公司造勢。噚日美聯就搞咗個傳媒聯誼飯局，主席黃建業冇蒲頭，但上任幾個月嘅Angela，就百忙之中露一露面。城中熱話離唔開北京奧運，原來唔少北京 嘅商舖店主，為咗減少城內塞車同空氣污染情況，阻礙賽事進行，所以暫時停業。
Angela得知後講笑話：「唔怪之得集團近排喺北京嘅生意少咗。」識得玩自 嘲，有大將風範，連睇奧運都不忘生意，夠勤力。黃建業90年代曾經移居加拿大，聽Angela講，當年6歲喺加拿大已經跟住父母四圍睇樓巡舖。虎父無犬 女，大把機會大展拳腳。
中環在線：賣舖炒股供仔留學師奶炒燶股證監畀冠軍 李華華
2008-08-21 AppleDaily
華 華今日想同大家講一個故事，主角係駱淑賓。話說駱女士細仔獲英國肯特大學（University of Kent）收咗讀law，但駱女士唔夠錢，手上最值錢就係經營咗30年嘅小食店，佢將間小食店賣咗都只係夠供個仔喺英國讀一年書。咁啱佢聽朋友講，中鋁 （2600）可能成為藍籌，所以把心一橫，拎賣咗小食店筆錢炒番轉，結果中鋁由入貨價24蚊跌到得12蚊。
先輸中鋁再蝕細價股
佢 再聽朋友講，沽咗一半轉買東力實業（978）同麗盛集團（1004）等細價股，點知蝕得仲甘。結果阿仔去唔到英國，只係能夠留番喺香港讀書。呢個係真人真 事，但情節就有啲加減。呢個故事其實係嚟自散戶駱淑賓，佢早前參加咗證監會嘅「你我的投資故事」比賽，攞冠軍，有獎狀兼5000蚊現金。故事裏面嘅駱女士 要賣小食店，現實世界據聞就冇呢一節。至於買股故事，佢話的確攞30萬積蓄嚟炒，家陣仲坐緊艇，但已置諸腦後。佢仲同華華講，手頭仲有啲喺4蚊時入嘅滙豐 （005），幾多就唔知，但肯特大學的確收咗佢個仔，而佢個仔家陣又真係要留番喺香港讀書。華華問佢，阿仔去唔成英國，有冇怨媽咪，佢話冇。梗係，家陣阿 仔喺港大讀法律，就一啲都唔輸蝕。駱女士話，錢財身外物，「炒股輸錢唔緊要，最緊要唔好輸埋親情、友情同條命。」
誤信窩輪升得快
除 咗駱女士，攞到優異獎嘅李順意，亦係以「損手」故事攞獎，不過佢唔係炒正股，而係炒窩輪。腹大便便嘅李順意話，覺得炒輪可以令財富增值快啲，舊年牛市佢真 係賺到兩三倍，但個市一牛皮，正股升，隻輪照跌，最後由賺30萬變倒蝕40萬。電郵：
[email protected]
中環在線：小小超借老竇錢本利還清 李華華
2008-08-22 AppleDaily
噚 日係超人旗下長和系派發成績表嘅日子，無獨有偶，細仔小小超李澤楷檔8號仔亦揀同日公佈業績。不過，小小超噚日冇蒲頭，有口痕友話可能費事應付記者提問佢 嘅感情問題。大家關心李澤楷嘅感情事，相反小小超就非常關心香港前景，佢最近接受「英國廣播公司」（BBC）訪問時就話，香港貧富懸殊係全世界最嚴重嘅， 擔心會影響香港競爭力同埋影響社會穩定。佢仲話，低收入同成本高昂，已經成為廣大市民創業嘅絆腳石，令港人失去向上爬嘅機會，受害會係成個社會。
香港要珍惜眼前優勢
此 外，香港回歸祖國都唔短時間，家仍然保住金融中心呢個角色，佢希望香港可以珍惜眼前優勢，例如保持透明度高嘅政府，同埋繼續享有新聞自由，唔好只係當自 己係中國其中一個城市，如果唔係就可能優勢盡失，遲早俾深圳或上海取代。據報道講，喺訪問時，小小超個公關不厭其煩咁向記者解釋，當年小小超向老竇借咗4 億美金買STAR TV後，早已連本帶利還清。即係話小小超已自立門戶成為超級富豪，對外界經常將佢嘅發迹，同老竇李嘉誠掛鈎，似乎仍然耿耿於懷。
中環在線：萬科高層獎勵縮水
2008-08-25 AppleDaily
大 企業為激勵士氣，最實際莫過於畀獎金送股票，06年中，內地上市嘅內房股萬科，喺股東大會上通過股權激勵計劃。據《中國證券報》報道，萬科高層將收到06 年嘅獎勵股票，但價錢縮水超過七成，原因係萬科近半年股價急瀉，同舊年高位比，跌咗72%。據上個禮拜六萬科嘅公告，董事長王石同總裁郁亮分別有約522 萬股及366萬股萬科，以上個禮拜收報6.87蚊人仔計，分別價值3586萬同2514萬人仔。
同舊年24.69蚊高位比，大嗱嗱蒸發9302萬同 6522萬人仔，肉都赤埋。不過，06年股權獎勵有着落都算好，07年睇怕凍過水，因為呢個計劃要每年純利增長超過15%，公司平均股價更要高過舊年，家 陣市況咁，要萬科今年股價跑贏舊年，睇怕機會唔大。
京奧概念股分出贏輸家 中環在線：李寧一點成名股價升 李華華
2008-08-25 AppleDaily
北京奧運噚日閉幕，今屆全球有200幾個國家同地區進行報道同轉播，規模係悉尼奧運嘅4倍、雅典奧運嘅3倍。咁多人睇，最高興當然係贊助商，係時候睇吓邊個係大贏家。
最 大贏家梗係李寧公司（2331）。奧運開幕禮重頭戲，由體操王子李寧手持聖火，凌空繞場一周點主火炬塔，將開幕禮推向高潮，李寧一時之間俾全球12億觀眾 認識。李寧股價亦由奧運開幕前（8號）嘅17.62蚊，升到上個禮拜四（21號）18.6蚊，升5.6%，相對同期恒生指數跌6.8%，遠遠跑贏大市。
聯想5億做頂級贊助商
另 一隻概念股聯想（992），係京奧全球合作夥伴中唯一嘅中國企業，直接啲講即係頂級贊助商。新華網報道，頂級贊助商每家至少要畀6500萬美金（即係超過 5億港銀）先有資格做，加埋推廣產品同宣傳嘅開支，條數要再多幾倍甚至十倍以上。至於宣傳實效係點，仲要拭目以待。至於中行（3988）、中移動 （941）等做合作夥伴，入場費都要近3億人仔；海爾電器（1169）母公司海爾集團同青島啤酒（168）就做贊助商，起步價1.3億人仔。使咗咁多錢， 都係想建立國際形象，但宣傳效用始終好難量化，有上市公司嘅收入直接受惠。服裝製造商申洲國際（2313），上半年喺大陸運動服業務收入就急增1.7倍至 9.53億銀。主席馬建榮話，國家籃球隊喺京奧表現佳，對青少年有相當影響，相信奧運後繼續有利運動服市場。神州數碼（861）總經理劉宇清話，奧運前部 份電訊同銀行客戶為確保電腦系統安全運行，加強軟件服務需求，所以令收入多咗。電郵：
[email protected]
出價5億美金入股被拒 中環在線：誰是股神中國新歡？ 李華華
2008-08-26 AppleDaily
股神畢菲特入股被拒，相信唔少投資者都會打過突，你知獲得股神垂青入股嘅公司，就好似俾金手指篤中，會吸引投資者爭相入股，刺激公司股價，試問邊間公司會拒絕股神入股。
市傳中信銀行獲垂青
上 個禮拜五，畢菲特接受美國CNBC電視台訪問，佢透露：「早前出價5億美元購買一隻中國股票，但遭到拒絕。」邊家公司咁寸，難得有股神垂青竟然扮大牌？股 神唔肯講睇中邊隻股票或者行業，只係好肯定話：「這是一宗非常好的交易，在環境合適的時候，你會看到我們會在那裏大量投資。」不過佢亦有提到，家陣中國限 制外資入股大陸公司，要投資都唔係咁容易。究竟股神睇中邊隻中國股票，唔少投資者都好有興趣知，噚日市場就傳出可能係中信銀行（998），刺激股價一度急 升近5%，但後尾股價回軟，升幅收窄至約3%。華華好懷疑股神會唔會睇中中信銀行，相比起其他內地銀行好似招行（3968）、交行（3328）、建行 （939）或工行（1398），中信銀行無論管理、實力同前景都差一截，同股神嘅價值投資法唔多啱。
外資情有獨鍾銀行股
點解 傳嘅都係銀行股呢？據內地中財網報道，股神有可能留意銀行股，因為好多外資對內地銀行都情有獨鍾，唔少國內銀行都有外資入股，連size較細嘅華夏銀行都 俾德銀睇上，成為第二大股東，持有13.7%股權。淨睇獅子行都揸住逾44%交行，就知外資幾鍾意大陸銀行股啦！睇番股神上次買入中國股票係03年，當時 佢以5億美金入股中石油（857），舊年中趁高位沽售獲利達35億美金。電郵：
[email protected]
中環在線：龔方雄鬥李超人 李華華
2008-08-26 AppleDaily
摩 根大通首席中國經濟學家龔方雄上個禮拜二發表報告，話中央正考慮一個2000億至4000億銀嘅刺激經濟方案。消息一出，上海股市第二日即時反彈超過 7%，帶挈恒指升2%。不過，美林隨即發表報告轟炸「救市傳聞實無根據」、「大陸外滙儲備不可能用於救市」，兩大外資行罕有互片。
高僧上身 罪過罪過
咁 都唔止，超人李嘉誠亦加入戰圈，上個禮拜四長和業績會，俾記者問到大陸救市方案，佢好唔客氣咁話：「如果有人利用呢啲消息賺錢，就真係罪過！罪過！」又 話：「股市要由經濟反映出嚟先至正常，靠政府救市係不切實際。」龔方雄或者摩通係咪罪過，華華係常人唔係超人，唔敢亂講，但大陸新浪財經網就特登闢出專 版，深入分析呢單救市傳聞。呢場口水戰，越演越劇烈，加入戰圈嘅仲有國務院參事任玉嶺，佢向人民網話，「中國政府考慮這項措施（指千億救市）不無可能（即 係有可能）。」
市場由質疑變相信
《南方日報》亦話內地官方經濟智囊正齊集北戴河，商議最新經濟政策，《中國經濟觀察報》仲話 從多方求證，上頭的確考慮緊擴張性財政政策方案，目的係適當緩一緩緊縮政策，防止經濟下滑。報道仲有方案嘅金額，話係大約3700億銀，其中包括2200 億銀新增支出同1500億減稅計劃o忝。市場由質疑到開始認為呢個救市方案非空穴來風，究竟龔方雄預言會唔會成真，抑或超人繼續高僧上身，鬧人罪過？就要 下回分解嘞！
中環在線：大陸買樓送菜田 李華華
2008-08-27 AppleDaily
內地樓市滯滯哋，發展商度橋促銷，出錢之餘亦用好多腦汁，送車送裝修都係碎料，送埋驢仔同菜田呢啲先叫創意。《人民日報》報道，珠海市有個盤竟諗到「買房子、贈菜地」，做咗嗰度嘅業主，就有機會得到一塊菜地，可租種30年，最大賣點係安心食自己種嘅菜，唔怕食到毒菜。
發展商技窮抽獎送驢
瀋 陽市瀋北新區就有個盤搞大抽獎，獎品唔係名車，而係一隻驢，發展商自嘲係「黔驢技窮」喎。得獎業主養隻「15樓嘅驢驢」，睇怕都哭笑不得。濟南一個樓盤嘅 發展商想多啲人奧運期間買樓，指中國隊每攞一面金牌，佢哋就推出萬銀優惠。深圳南山區一個樓盤就畀買家「3個月試購，無條件退定」，即係業主先落5萬人仔 定，3個月內唔理樓價跌定有乜原因，都可以要求退定唔買。不過，最實際應該係「零月供」呢招，有個盤只要買家畀首期，之後一年嘅供款本息都由發展商畀，業 主頭一年真正係「零月供」，你話幾爽呢！
Next Page