中環在線：美聯太子女呻生意少咗
2008-08-21 AppleDaily
美 聯物業（1200）主席黃建業個千金黃靜怡（Angela），放棄咗國際會計師樓份工，今年3月正式加入美聯集團做執董後，可謂創意無限，經常搞搞新意思 為公司造勢。噚日美聯就搞咗個傳媒聯誼飯局，主席黃建業冇蒲頭，但上任幾個月嘅Angela，就百忙之中露一露面。城中熱話離唔開北京奧運，原來唔少北京 嘅商舖店主，為咗減少城內塞車同空氣污染情況，阻礙賽事進行，所以暫時停業。
Angela得知後講笑話：「唔怪之得集團近排喺北京嘅生意少咗。」識得玩自 嘲，有大將風範，連睇奧運都不忘生意，夠勤力。黃建業90年代曾經移居加拿大，聽Angela講，當年6歲喺加拿大已經跟住父母四圍睇樓巡舖。虎父無犬 女，大把機會大展拳腳。