收市閒情：銀行Sales的辛酸
1 :
GS(14)@2017-05-13 01:29:43我係H銀行小員工，好聽啲，就係「我打銀行工嘅。」說穿了，咪又係Sales一個。不過，做Sale屎做到，我要食埋自己Sell嗰嚿屎，呢啖氣我真係啃唔落。你話有咩理由，有個Plan（以下統稱S Plan）唔賣得，全世界就自己畀錢，真金白銀買番個Plan當交數？我份人就好均真嘅，食得鹹魚抵得渴，每季跑基金數，幾千萬，咪跑囉，我又唔係跑唔到！幾百萬Annual premium（全年保費）嘅保險？都得！其實，銀行啲客真係好有錢的。不過，S Plan真係搞唔掂！先講呢個Plan點來，話說我間行，就同「B保險公司」簽長約，如果某個Plan一年跑夠數，呢間保險公司就會畀番近9,000萬我間行。大嗱嗱9,000萬，佢梗係死捽爛捽捽到我連去捐血嘅資格都冇。個問題係，呢個Plan一年3,000萬保障，一年大嗱嗱要畀幾皮嘢！問世間？有幾多客會畀幾皮嘢一年銀行，去買一個無錢收番嘅保險，白畀的！仲有，要記住，係冇保險Agent跟你的！
Fine，Sell屎係作為Sales份糧包嘅，但Sell屎都要時間。「大佬呀，人哋『B保險』賣咗個Plan咁多年，都唔係賣到咁多張，你要數都要畀時間我呀老細。」然而，世界是殘酷，老細嘅世界係更殘酷，佢要你今日交，豈能等到聽朝。你上司受氣，唔通唔發洩喺你身上？結果上司A為求交數兼施壓，佢畀咗一皮嘢出來，自己買番張單，今季Target！Done！同事B為求唔畀老細煩，佢畀咗幾千蚊出來，今季Target！Done！同事C唔想俾人炒，佢畀咗幾千蚊出來，今季Target！Done！至於我，「全世界都自己買，你買唔買呀？」結果我都忍着淚，同幾千蚊說Goodbye！天呀！我係完咗今季個Target，但我冇咗個旅行呀！幾千蚊，去到個台灣喇！即係咁，S Plan係一簽就一年，而我哋以上畀嘅錢，就只係畀兩個月。兩個月之後？傻豬嚟嘅，緊係Cut單保平安喇！點Cut？Cut咗Auto pay咪得！不過，B保險仍會不停出信追你。又話說，同「B保險」合約期，今年只係第二年，「同事自己的Target自己食」情況，今季我食到？下季呢？下季你要搵「朋友」食，再下季呢？又要搵「朋友」……如是者無限出賣朋友，朋友就不斷收到追保險費嘅信。就算有咁多朋友俾我出賣，都冇咁多個幾千蚊去買保險喇。我想問，我每季都嘔咁多血出去，有人可以輸血畀我嗎？我係邊間行？你自己估啦……完
by千頌C@堆填區
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170510/20016244
收市閒情：譚仔最值錢係乜？
1 :
GS(14)@2017-05-18 01:09:36丸龜：當你睇到呢封信嘅時候，你已經係一子之母，成為「譚仔」嘅媽媽。即係咁，「譚仔」我就食咗好多年，雖稱唔上超級擁躉，但總算係資深食客，多少都有資格講兩句意見。丸龜落場，你新人事新作風，話要將「譚仔」重塑品牌、重新定位，係明嘅。不過你買得「譚仔」，都係貪佢夠受後生仔歡迎，如果你想佢繼續做強做大，以下一點，係千萬萬萬億萬不能改變，就係「勿演畜牲美線實小勒凍拎死」！如果你見到呢串字，大喝一句「何ですか？」然後以為我講粗口，咁樣，即是你哋做唔足Research，唔明「譚仔」核心價值！「譚仔」最重要嘅，唔係米線，唔係湯底，係啲阿姐！仲要係有鄉音嘅阿姐！食得多咗，對得耐咗，每個行入去食米線嘅人，都已經識得翻譯「勿演」做墨丸、「畜牲」做竹笙，「凍拎死」係凍檸水……諸如此類。一路都覺得「譚仔」好勁，勁就勁在，佢唔單止做到湯底standardization，係連阿姐嘅Style、以至口音都做到standardization！久而久之，「譚仔口音」已經變咗做品牌一部份。如果行入「譚仔」，我聽唔到譚仔腔，而係講得一口純正廣東話嘅阿姐，你話似咩樣？咪就係好似你行入澳牛，個夥記好誠懇、好Sincere同你講一句「唔該」一樣，一樣咁離譜！更重要係，你要知道「譚仔」41間舖，年做6.9億銀生意，一年賺9,600幾萬銀，即係每收100就賺14蚊，「譚仔」明副其實係發鈔機！要知道，翠華（1314）生意做得多過「譚仔」，但一年只係賺7,000幾萬，但市值都成17億，25倍PE。你收購「譚仔」先用10億銀，即係10倍PE就買到發鈔機，係真係好抵好抵！而呢部「印鈔機」之所以印到鈔，係由一班Style異常地一致嘅阿姐一齊建立（阿姐鄉里喺同一間公司，員工流失率相對低，相信係「譚仔」異常高效率原因之一）香港能夠容納兩個幾乎一樣嘅譚仔品牌，係因為譚仔有佢獨有嘅基因，獨有陣除。所以，丸龜呀丸龜，千萬咪直線地以為，要令品牌進一步年輕化，就趕走班姐姐，然後搵班後生仔扮日本人，等你行入大門就大叫「21314！」咁就吸到新客。你咁做，會將「譚仔」推向絕路……唔會唔會，反而係「三哥」，佢要多謝你，令佢終於可以成就一統「譚仔」天下嘅霸業。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170517/20023501
收市競價擬納小型股 第三季初實施 股價勢更波動
1 :
GS(14)@2017-05-27 08:53:18【本報訊】港交所（388）昨公佈，擬在今年第三季初，將收市競價交易時段證券名單加入恒生綜合小型股指數成份股，計劃仍待證券及期貨事務監察委員會批准。有市場人士指，有關建議將令小型股股價面臨更大波動。記者：黃尹華
自去年7月起，港交所已實施收市競價交易時段第一階段，涵蓋恒生綜合大型股指數及恒生綜合中型股指數所有成份股、有相應A股的H股，以及所有交易所買賣基金（ETF）。港交所指，經檢討後決定按計劃推出第二階段，即在現時收市競價交易證券名單加入約150隻恒生綜合小型股指數成份股，包括近日股價大幅波動的IGG（799）、酷派集團（2369）等，收市競價證券名單總數增加至約680隻。
6月推新板創業板諮詢
所謂收市競價交易時段，是指每個交易日在原本4時收市後的延長10分鐘交易。投資者可在4時01分至06分輸入競價盤，並可取消或更改，價格限制是收市參考價上下5%之內；之後在4時06至08分輸入的競價盤則不可取消，價格限制進一步至最低沽盤價與最高買盤價之間。在4時08至10分輸入的競價盤，系統會自動配對最多成交的買賣盤，隨時收市。投資者學會主席譚紹興表示，近期越來越多基金和大戶利用收市競價交易來操控股價，以昨日騰訊（700）和港交所為例，在競價時段分別由跌轉升，和由升轉跌，走勢與正常交易時段相反。上述屬於三、四線的小型股被納入收市競價後，「股價舞上舞落會更加嚴重，呢啲股全日交易可能都只有一、兩億，在競價時段用一、兩千萬已經可以扭轉之前走勢」。另外，港交所行政總裁李小加昨日在公開活動表示，將於6月推出新板及創業板諮詢，較早前公佈的5月底推遲，是希望可與上市架構諮詢結果同時推出，正與證監會討論。李小加又指，穆迪下調中國評級對債券通的推出並無影響，評級調整或會造成債券價格波動，但價格有上落才會吸引投資者投資。內地端午節小長假前，市場氣氛轉謹慎，港股昨日成交縮至656.5億元，恒指全日反覆，收市升8點，收報25639點，連升6個交易日，一周累升465點。國企指數昨日則收報10579點，只微升8點。
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170527/20035171
收市閒情：盜亦有道撼Batman
1 :
GS(14)@2017-06-10 12:54:05江湖上正邪各路，陰謀不斷；往往為奪經搶劍，不擇手段，爾虞我詐。正當阿里、順豐為爭奪《九陰真經2017－大數據》一戰，以獎門人方式打和落幕之時。香港一邊廂，正展開一場「空軍大戰」，史稱「圍剿Batman」。一切都要數到上個月初，瑞聲（2018）堂堂藍籌新貴，股價平步青雲，又點會估到有一日走出一個Batman唐唐，大叫「你呃人！」喂藍籌呀，Blue Blood呀，你話我篤數？「你你你先呃人呀，我告你，各位『股來』，大家唔好信『虛假市場情情情侶』」眼見瑞聲嚇到當堂口窒窒，Batman滿意地笑了，「Oh！真的嗎？」然後揮一揮斗篷，不帶走一片雲彩，你以為啦。事隔半月，瑞聲已由110蚊水平，跌到去90蚊邊，戰況係慘烈，屍橫係遍野，但正謂一仗功成萬骨枯，戰場開始有聰明錢走入去，踐踏着骸骨搵食，而90蚊似乎跌定了，至於Batman亦認為時機成熟了：再出報告，仲要係詳細版！「瑞聲呀瑞聲唔好怪我不仁，我事前已出咗Preview版作警告，點知你又以為我冇料到，要怪就怪自己唔識趣，喺我出詳細版之前停牌咪冇咁傷囉。」結果呢？就是杰了。瑞聲再狠插到得返81蚊之後落閘但唔放狗，停牌吹雞完場。事隔半月，場外圍觀嘅戰友都屏息靜氣，食住花生等好戲。大家都知瑞聲一定反擊，但到底都估唔到佢使出江湖上最毒嘅一招，叫「以毒攻毒」。即係咁，你話有咩光環勁得過，畀一個出名毒舌嘅人讚呀？「Batman，我閱股無數，出名殺股於無形，但肯定瑞聲係好嘢，你插佢係因為你唔識嘢！行開啦，不入流！」有世界級Hacker組織背景嘅匿名分析，今日竟然擺出一幅盜亦有道嘅姿態，做瑞聲架兩，最勁嗰句係，「我嗰時同行家都夾埋想沽空瑞聲呀，但發現條數係堅勁！你唔知咩？Sorry呀，總之你睇跌到40蚊，我就睇升到110蚊。」。說時遲那時快，瑞聲出公告開記招，搵埋「行政總裁外婆兄弟的兒子」出來澄清，黑白兩道，同時夾擊，「Batman呀，聽日復牌仲唔挾死你。」一間瑞聲，掀起江湖一片腥風血雨。大家或者以為今次Batman棋差一着，但唔好忘記，Batman份沽空報告只係「Part1」。欲知後事如何，且看下回分解，難為正邪定分界。千頌C
http://www.fb.com/winbigwok本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170607/20046726
收市閒情：沽空機構改名藝術
1 :
GS(14)@2017-06-16 01:33:13上回講到Batman（葛咸城研究）同瑞聲（2018）大鬥法，結果殺出程咬金，匿名分析行出嚟做架兩，結果係，任Batman再唧埋用剩嘅牙膏，條街都唔會有反應。Batman打亞洲市場出師就失利，更加因為報告太Hea輸埋聲譽。其實沽空機構一向都標榜自己係正義之師，點知？你睇佢哋點改名就明。渾水研究 Muddy Waters Research：不用懷疑，係真係取三十六計入面嘅第20個計策「渾水摸魚」，歸類入混戰計。表面意思係喺渾濁嘅水中撈魚，其實係比喻趁敵方內部混亂嘅機會去攞着數。香櫞研究 Citron Research：香櫞其實係類似檸檬嘅果實，因為香櫞聞起嚟好香，但食落口又酸又苦，所以創辦人Andrew Left就用呢個名，去寸啲金玉其外，敗絮其中嘅公司。不過，Citron喺2012年狙擊恒大（3333），點知反被告誤導市場，結果依家Andrew真係has left HK already，禁玩港股5年。葛咸城研究 Gotham City Research：每一個罪惡城市，都需要一個Batman！呢間沽空機構，覺得大家都係欺詐企業受害者，而呢個罪惡多得有如葛咸城嘅股票市場，就係需要一個蝙蝠俠，用佢嘅智慧去揭發罪犯。格勞克斯 Glaucus Research：Glaucus喺希臘神話入邊，本來只係一個普通嘅漁夫，但因為食咗長生不老草藥，令佢唔單止生咗魚鰭同魚尾，仲有預知能力。於是就長年喺海上，為迷惘嘅凡人指點迷津。去到股市呢個大魚缸，就成功喺茫茫股海中成功搵到造假企業。烽光研究 Blazing Research：最近搞到科通（400）雞毛鴨血嘅烽火研究，話想成為市場「漆黑中的烽火」，揭穿造假企業嘅真面目。當然，中國古有「烽火戲諸候」，周幽王點烽火為氹愛妃褒姒；但呢間沽空機構聲稱自己冇私心，事先沽空股份純粹希望有資金維持機構運作。鍾馗研究：來到中資沽空機構代表，改名同樣有晒喻意。「鍾馗」係中國神話傳說入邊，專捉惡鬼嘅天師。本來沽空機構嘅出現，的確可以令市場有警惕，Batman又好、天神觀音玉王大帝都好，多少可令公司知道有人贒實佢哋，咪太過份。不過由Batman玩嘅牙膏出Report，到連神枱級沽空機構渾水，都一改風格，先出預告再喺論壇上講兩句當Report，順手講埋「我個frd想沽空邊間」。消費自己嘅聲譽去搵真銀，長此下去，市場再分唔到沽空消息真假，全部同行一拍兩散唔使玩。最後股市呢個鱷魚潭，正義之師少了，反而多咗一班「搞」新聞嘅古惑仔。
千頌C
http://www.fb.com/winbigwok本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170614/20055036
收市閒情：香港最大鑊的問題
1 :
GS(14)@2017-07-01 10:18:43李嘉誠噚日去汕大出席畢業禮，新聞稿發相，見到超人帶住小小超李澤楷，四圍行逛，一齊吹吓水，樂也融融咁款。喂！超人有啟示！大家都知，李澤鉅嘅作風係同你計到盡，賺錢，佢就叻！所以超人將長和系交棒畀小超，「Victor會頂替我（長和系）的位置，我好放心。」好啦，講到教育，一般唔係一門賺錢生意，好多時更加要蝕錢。至於講到「肯使錢」呢方面，小小超李澤楷明顯更加擅長。大家都知，超人一向重視教育，所以相信汕大校董會名譽主席呢個位，應該好快會落入小小超手上。超人用人、以至做生意，眼光從來獨到。單講十年前，你同我仲討論緊「你係咪同台先？同台先可以免費Send SMS」時，佢已經投資Facebook，之後當然金蛋隻隻出、Spotify、Airbnb、甚至係DeepMind……。Deepmind？咩來？食得㗎？唔好笑，應該好多人唔知。呢兩日Facebook有人出Post，就話有內地客落香港旅行，去食嘢冇Cash，伙計即時就話，「你仲唔係食霸王餐」！冇錯，當你笑人哋冇錢開飯，人哋笑你食飯要用錢，「我們內地現在都不用現金！」冇計，小店推「一番賞」呢，你又話涉「非法獎券」；Uber又被所謂「創新及科技局」狙擊；連政府嘅美食車，都係制肘重重生意難做。超人喺汕大演辭入面講，「因循的併發症是不思不想和無感無知，在人工智能世代中肯定過不了關。」或者超人言者無心，但我睇到嘅係，正正係香港?家最大鑊嘅問題係，你對住一班仲用緊Internet Explorer嘅人，同佢講咩係I.T、咩係A.I。「我明年90歲啦，一生志在千里，也知似水流年」，同大部份人講「似水流年」，第一時間諗嘅，多數唔係《牡丹亭》（自己Google係咩），而係會唱出嚟：「不可以留住昨天」。千頌C
http://www.fb.com/winbigwok本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170628/20070974
收市競價本月下旬准沽空
1 :
GS(14)@2017-07-06 23:42:59【本報訊】收市競價時段將容許沽空！港交所（388）於去年7月24日重推收市競價，至今快一年，昨收市後發公告指，將於本月24日實行收市競價時段第二階段，包括容許沽空及納入恒生綜合小型股指數成份股。港交所通告指，當日起將容許在收市競價時段輸入賣空盤，其限價不可低於「收市競價時段參考價」，惟指定指數套戥賣空、股票期貨對沖賣空及期權對沖賣空的價格除外。其它現有適用於競價限價盤的價格限制，例如兩個階段價格限制，亦將適用於在收市競價交易時段內輸入的賣空盤。
國策力挺 內險股炒上
大市方面，國務院發佈《關於加快發展商業養老保險的若干意見》促進商業養老保險資金參與股票、債券等投資，平保（2318）借勢炒上，股價升近3.7%，創逾兩年高位，連同錄約2%升幅的國壽（2628），合共貢獻恒指41點。多隻內險股昨亦一同落鑊，中國太保（2601）及中國財險（2328）均升2.7%；新華（1336）揚5.6%，中國太平（966）則彈2.5%。恒指受內險股帶動，早段一度跌190點，至25199點後倒升，埋單升132點或0.5%，收報25521點，平保及國壽已貢獻三成升幅；H指稍跑贏，收報10380點，升74點或0.7%。全日主板成交為843億元，沽空佔10.2%。A股方面，滬綜指升穿三千二關口，收報3207點，與深成指齊升0.8%，並齊創近三個月高位。獨立股評人黃志陽稱，內險企業上半年平均保費增長明顯，加上整個板塊市盈率相對較低，看好其短中線表現，長線來看，業績穩定的平保為「不二之選」，短線則可買入國壽及新華，目標價分別為26元及46元。
來源:
http://hk.apple.nextmedia.com/financeestate/art/20170706/20080336
收市閒情：騰訊被插Timing剛好
1 :
GS(14)@2017-07-07 02:39:25「中國人，是需要管的。」喂！《人民網》好睇得起成龍呀，噚日抄橋：「中國人打機，是需要管的。」更精心炮製兩篇超長文，洋洋數千字，逆思潮將「電競」降返呢做「打機」，將各位讀書時嘅議論文寫兩次，說明沉迷打《王者榮耀》的禍害；結果，禍害果然深，騰訊（700）即深潛！先唔講《人民網》見解有幾獨到，但發呢篇文章時間啱啱好！大家記唔記得，條街一早傳「七一前要維隱」、「歌舞昇平賀回歸」。時也命也，6月底就發生「粉塵大爆炸」，炸到細價股老散屍橫遍野；如果官媒同時唱淡股王，哼！「全民七一哭喪㷫回歸」就有份。That's why《人民網》今日先出文插騰訊，係Right timing，亦係跟足劇本安排。講完時間，就要講部署。話說6月22日，有傳杭州13歲學生因為被阿爸沒收電話，機都冇得打，於是由四樓跳下。事後一醒就話：爸爸，我要登入賬號。呢個小朋友係唔生性，但衰仔事件唔知點解，係去到6月26日先廣為報道，到27日更有老師發文，喪插隻Game係「黑網吧」。值得一提，當日騰訊股價上到288.4元。正如范仲淹曾喺《岳陽樓記》講過，為官者應「先天下之憂而憂」。現時市場資金，早就深明呢個大道理，一早就喺5月底、6月頭沽定先！沽空金額大激增，5月23日更高達17.82億元，係一年以來高位；至於6月6日，沽空佔騰訊成交比例達33%，亦係逾一年新高。當然，杭州小朋友出事、老師篇文瘋傳係意料之外；但意外之中，多多少少亦可以有啲位，係意料之內。舉個例，內地公關玩法，最叻就係「暗黑公關」，喺對家出事時煽風點火，狂叫傳媒友好「一齊寫死佢」，插佢一刀，得咗！「一款遊戲成為全民性、現象級，足見其魅力；又被稱為『毒藥』、『農藥』，可見其後果。」大陸連打機都管你，唔係第一次。早喺2000年，中國政府一刀切地全面禁止電子遊戲機的生產、銷售、進口，當時所有輿論都係話，打機「擾亂社會治安」、「影響學習成績」、係「電子海洛英」，所有Playstation、Xbox全部冇得正式入口。直至2015年中，遊戲機全國解禁。當然解禁啦，當時騰訊已經獨大啦，理得你係任天堂定微軟，入來爭吧！對中國來講，所謂「毒藥」、「農藥」，只要係國產貨，就冇問題了；《王者榮耀》係「鴉片」又好，係「海洛英」都好，只要有人賺夠錢，最後都會被定性做益智遊戲。當一篇冇基本因素支持嘅評論文章，就可以令一隻股王唔見1,000億市值，官媒，始終都係莊家中嘅王者。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170705/20079000
收市閒情：財仔與港媽噩夢
1 :
GS(14)@2017-08-02 05:56:08「菲傭或准京、滬打工，月薪萬五蚊」，大陸出到用高薪搶人呢招，有幾多好嘅工人姐姐肯喺香港打工？冇？咁咪出多啲錢囉……出到萬五銀仲要包伙食？劏咗啲港媽隻車咩！不過，菲傭唔落香港打工，另外兩個最受影響嘅Party，應該係財仔同收數佬！以下真實經歷，係由靚仔過彭于晏嘅R先生提供：屋企電話響起，發生咗咁嘅對答。佬:喂？XXX呀？（佢未拎起聽筒好細聲）Ｒ:喂？咩話？（未瞓醒但好禮貌）佬:唔該，搵你姐姐吖。（佢都好禮貌）Ｒ:嗯，又係追數嗰啲？（我未瞓醒嘅聲）佬:嗯，你有冇姐姐ID？你Fax入境處炒魷嗰張嘢畀我啦。Ｒ︰得。想問聲你係邊間？我mark低，因為你已經係第11間。佬︰（大笑）仲未破到我以前紀錄Ｒ︰你最高紀錄姐姐借咗幾多間？佬︰13間。Ｒ︰我都望我姐姐破到紀錄嘅。話時話，你哋追唔追得番？佬︰追得返，七成啦。Ｒ︰另外嗰三成用嚟搵人搞佢？佬︰（大笑）類似啦，但嗰三成可以同稅局claim番。Ｒ︰得嘅咩？佬︰（大笑）得㗎！冇錯，菲傭姐姐可算係財仔一大客源！靄華押業（1319）2012年嘅招股書，外傭嘅典當貸款額已超過1,600萬銀，佔當年典當貸款額三成。R個Case同時反映到一件事，就係菲傭走數機會高，高到點？高到財仔要收好貴息！第一信用（8215）2016年年報顯示，來自外傭貸款淨息差係公司所有業務中最高，有成47.15%！話說，R先生嘅姐姐真係破到紀錄，埋單走咗15間財仔，銀碼方面……只係3萬幾蚊，最大嗰筆萬幾蚊，最細筆數800蚊。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170802/20109365
收市閒情：係借股民上位嗰個
1 :
GS(14)@2017-08-18 07:52:20「係咪借個囡上位嗰個」機場保安因為一句客觀意見，就咁俾人炒咗。當然，HMV（8078）方面，就大義凜然咁講：「咁佢係唔啱呀嘛，我投訴啫，冇叫佢炒喎！」係嘅，你有你投訴，佢有佢炒人，你哋冇做錯喎～（#曲曲曲曲曲）正如股票呢樣嘢，莊家佢有佢玩財技，散戶佢有佢輸錢。投資價格可升可跌，投資者可損失全部本金呀嘛，明喎！所以就算我哋開返HMV個file，見到花晒，老散輸到血肉模糊，都唔關公司事架～（#曲again）
HMV前身就係大名鼎鼎嘅中國3D數碼，出名係咩？出名財技了得，喺2011年到2015年間，上演六次合股、四次送紅股。嗰幾年隻股有理無理又炒一鑊，《3D玉蒲團》上又炒一轉，無幾耐又合又送；《一路向西》上畫前又升一輪，然後股價就真係一路向西……如是者，「#中國3D數碼是長期吸水的真妖股」變成炒股界常識！當然，好多人相信改名轉運，所以中國3D數碼上年頭買咗HMV就索性改名做HMV了。近一年keep住有新聞，同呢個合作嗰個合作，收購呢樣賣走嗰樣，一副搞大生意大茶飯格！不過，說到底，HMV本身都「係借股民上位嗰個」，業務瓣數再多再勁再3D玩埋4D立體AR全方位Halogram都好，我相信，HMV一啲都冇忘過老祖宗本業！話說，上年底，公司一送一紅股Yeah！
By千頌C（借個欄上位嗰個，我認呀！咁我係呀嘛！怕咩講）
http://fb.com/winbigwok千頌C
來源:
http://hk.apple.nextmedia.com/financeestate/art/20170818/20124637
Next Page