恒指攻頂後回落 仍創10年收市新高
1 :
GS(14)@2017-10-08 21:51:59【明報專訊】港股昨日終於升越2015年「大時代」高位，盤中最高見28,626點，雖然午後衝高回落並一度倒跌，但收市仍升78點至28,458點，創近10年收市新高。下周關鍵是內地A股復市後的表現及港股通重啟後「北水」的動向。
ADR跌逾百點 夜期跌89點
由於美國經濟數據不佳，昨晚美股早段下跌，港股ADR（美國上市預託證券）亦普遍回落。截至昨晚10時，ADR港股指數跌逾百點，恒指夜期收市報28,346點，較日間期指跌89點。
昨早恒指裂口高開247點，報28,626點，升穿2015年4月底的盤中高位28,588點，但這已成全日最高位，中午收市時的升幅已收窄至104點，午後更一度倒跌2點，收市回升78點。國指升61點，報11,459點。雖然「北水」繼續放假，但港股成交仍有1029億元。總結全周，A股休市期間僅3個交易日恒指已累升903點或3.28％，國指更累升549點或5.03％。
騰訊再破頂 吉利續成最佳藍籌
騰訊（0700）再破頂，收市升0.7％至352元。友邦（1299）升1.6％，報59.6元。吉利（0175）繼續是表現最好的恒指成分股，昨日再升5.6％至27.35元。眾安（6060）表現突出，其他內險股亦向好，平保（2318）及中人壽（2628）分別升1.1％及0.8％。內房股走勢迥異，恒大（3333）曾創新高，高見31.6元，惟收市倒跌1.8％至30.2元。融創（1918）升2％，報40.8元破頂。
分析：28000點穩 短暫回調後再上
豐盛金融資產管理董事黃國英預料，下周一A股復市後，北水會經港股通沽貨，因為中資金融及汽車股等在這段期間已累積相當大的升幅。但他相信，恒指能企穩28,000點，並在短暫回調後再上。
京華山一研究報主管彭偉新亦稱，雖然昨日出現陰燭，但資金沒流走迹象，預料A股開市後銀行股上升，會帶動H股做好。
來源:
http://www.mpfinance.com/fin/dai ... 6848&issue=20171007
收市閒情：揀拍拖定買樓？
1 :
GS(14)@2017-10-09 03:01:01我係James。細個嘅時候，老竇同我講，「讀書時唔好拍拖，努力讀書就可以出人頭地」。人生果然係由一個再一個謊言堆砌而成！結果書我讀咗，Degree我都讀埋，工我係有呀，都唔錯呀，一個月幾萬蚊，係死唔去，但我咪又係買唔到樓？「喂喂，政府話出首置上車盤呀，仲係市價一半，機會嚟啦！」女朋友阿怡興奮咁講。「傻瓜，林鄭話要同發展商買現成單位，大佬呀，香港得番地產可以賺大錢，平價賣畀你就一定冇可能，政府貴一貴咁接貨，畀發展商提早套現，官商關係咁密切呀？好危險啫。好嘢唔畀你就當然，仲要有貨都唔會畀多你。」可能我太冷靜，由阿怡眉頭眼額，我Feel到佢有啲不滿。「嘩，仲有共享房屋、貨櫃屋……都可以幫到人啩。」呢啲乜屋物屋，或者可以解燃眉之急，不過大家掉轉諗。今時今日2017年，人人用智能手機、未來世界已經係講緊人工智能講AI，但睇吓香港人嘅生活質素，變成點？變成要行番N年前條路，起臨時徙置區呀！「你講起就忟憎，明明就係貨櫃屋，將佢變咗貨櫃，就變成『型格貨櫃屋』。仲有呀，政府仲敢帶頭講『共享』？你連Uber都打壓、GobeeBike都話犯法，你仲同我講共享。」結果我嘅忟憎，好明顯令到阿怡好無癮，「去食飯啦。」食一餐飯，又食咗300銀，我計過呀，一個月拍拖使費用咗我4,000幾銀，一年即係近5萬蚊。最近我睇過一篇文章，計過數，話每年「拍拖使費」入門價都8萬銀，如果拍6年連通脹，折實50萬。50萬，再加埋自己積蓄，100萬首期冇難度！細個老竇教，讀完書先好拍拖；計我話，今時今日家長應該講，「買咗樓先好拍拖」，因為港男買唔到樓，其中一個原因，好可能係因為有女朋友。
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170920/20158705
收市閒情：學習點做Social精
1 :
GS(14)@2017-10-09 04:02:45行走江潮，最忌唔識Social，連如何Hi點樣Bye都唔識？唔使騰，記住呢個字得啦：「騷」。「騷」，做Show也！出得嚟行，當然Say Hi都要Say得浮誇！大家練習一吓：（吸氣！大聲！）「Wei~（拖長、漸細），好耐冇見呀，你呢期點呀……」成句句子重點係個「Wei」，只要重音、長度拿捏得精準，自然順利向各路人馬下馬威！進階嘅「Social精」，更加會配合肢體動作，加深對方印象：兩手食指一前一後擺，指住對方，面帶微笑，至於眼神就更加係精髓：瞇起少少，想像吓挑逗得來帶點挑釁，咁就中晒！後面兩句音調都唔好忽視！「好~耐冇見呀」，重音喺個「好」字，呢句要畀少少感情，交啲啲戲，要有一種彷如隔世嘅感覺。只要前兩句交到戲，去到第三句就可輕描淡寫啲，順利將話題伸延。正所謂「行船爭解纜，Say Hi要講先」，行走Social場合，見到一個識你嘅人，最緊要先發制人！特別係咩情況？就係你完全、根本、100%對你面前呢條友零印象！主導對話內容，你就更易猜度對方，到底係咩頭咩路住喺邊一度。嗱！做戲做全套，做騷都係有道具好，一張勁嘅卡片就少不了。如果本身份工Title唔夠照，唔怕！自己卡片自己作，你諗到咩Title就寫晒落去，咩「港九新界潮汕福建X氏宗親會創會會員」「Mensa十年資深會員」「圍威喂協會總幹事」「XXXX University BSc(Hons) in Waterblowing」……當你寫到張卡片要對摺，咁就Perfect池！識做「騷」，你行走Social場合，真係事半功倍，無往不利（可能係）。不過，呃得一時，呃唔到一世。只係識得吹水做騷畀Jetso又點？最後一個人有冇朋友，睇真誠；成唔成功，睇實力。試問，你幾時見過李嘉誠行出嚟「Wei~（拖長、漸細）」；難道朱克伯格行出嚟，你問佢「Where's your card?」所以，四圍派張「對摺卡片」嘅人，都係環保啲、慳啲啦！
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170927/20165532
收市閒情：得媽媽谷得天下？
1 :
GS(14)@2017-10-15 16:53:34「老公話同班fd上大陸玩，仲要玩到過夜，第二日先番，如果唔畀系咪好過份呢？」、「好鍾意食茄子，但諗唔到點煮？」呢啲咁嘅問題，你放上連登，得到嘅答案，好可能係「我約埋你一齊玩」、「叫你阿媽煮」之類嘅派膠回應。但喺另一個世界，一眾師奶會集思廣益，同你講「你老公就過份」、「千萬不要俾佢去」，教你如何處決你老公，點樣烹調隻茄子，冇錯，因為呢度係Baby Kingdom。手握新世界（017）地產王國嘅「第三代」鄭志剛，最新被爆領軍入股「親子王國」。鄭志剛搞搞吓地產，走去買一個極本土嘅媽媽谷？是咁的，華人社會雖然都係父權為主，但喺香港，師奶嘅威力大家係唔可以忽視。大家知唔知TVB（511）嘅獨大，就係靠師奶奪得！你見過去50年所有劇集，都可以統稱為「師奶劇」，呢類劇特點就多喇：點解個賊行入間屋想偷嘢，會開聲講「好在，間屋冇人呀！」，大佬，做賊做到開聲，儍的嗎？呢類鏡頭你覺得膠，但越膠就越保得住TVB過去50年嘅收視。即係咁，對師奶來講，「我喺廚房煮緊飯，都睇唔到電視，啲劇唔做到廣播劇咁我點追呀？」當TVB要為師奶拍劇拍足50年，你就知香港屋企最終話事人，至少係控制遙控嗰個，係師奶無誤。你見港視（1137）都要向師奶跪低開實體店就知，時代變，但港媽勢力不變。而Baby Kingdom嘅影響力，正正係港媽界嘅權威。權威到點？最極端嘅case，之前有個苦主爸爸在網上訴苦，話自己係讀營養學、藥劑，但老婆唔信自己講嘅嬰兒生理知識，反而信Baby Kingdom衍生嘅「媽媽group」。呢個可能較extreme，但正正反映Baby Kingdom已凝聚咗一班好忠實嘅媽媽fans。最勁係咩，你問吓你媽媽就知，就算小朋友已變大朋友，三張幾四張，媽媽永遠都會覺得自已仔女係小朋友，即係咩？即係佢哋只會繼續喺「媽媽group」討論湊仔經！擁有一個有勢力嘅平台，可能未夠，要有synergy effect，識玩一定要玩一條龍，鄭志剛投資埋DayDayCook，教媽媽煮好西；買埋維多利亞幼稚園，培養貴族學生哥；小朋友大啲啦，K11有搞電競呀；到大個仔要置業，慈母係時候出場了，「買鄭志剛樓吧，我畀首期！」千頌C
http://fb.com/winbigwok本欄逢周三刊出
來源:
http://hk.apple.nextmedia.com/financeestate/art/20171011/20179255
收市閒情：陳帆局長神邏輯
1 :
GS(14)@2017-10-22 17:02:52「年輕人買唔到樓，又想自己有個空間，畀軀體同個靈魂出去遊走一下，就去買車。」運房局局長呀可？陳帆呀可？喂！抬起頭，被高樓價包圍下，局長呀，我都想「軀體同靈魂遊走」，因為香港人陷入絕望。有幾絕望，只要睇吓六合彩帶畀人幾多希望。由細到大，你多少都講過一次「如果我中到六合彩頭獎就好啦。」有幾好？2010年11月前，頭獎獎金保證係500萬元，分分鐘買到三個嘉湖山莊500幾呎單位，今時今日，只係買到1個；就算依家頭獎獎金保證升到800萬，咪買到一個大少少市區有房單位。每買一注六合彩，係買一個致富的希望。但香港被樓市玩死，玩到絕望。由2003年升到2017年，香港後生仔根本係被逼打緊一鋪機，而呢鋪機，係注定俾人屈爆機。你想買樓，Package劉講過，「忘記旅行，向着標竿直跑」，咁你就買到樓。你好努力儲錢，儲到30萬，支標竿飄移去50萬；你跑到去50萬，佢就飄移到100萬。大佬呀，好哋哋一支竿點解會郁，除非有鬼！係有鬼呀，隻鬼叫死窮鬼！然後林鄭都同你講，「我都買唔起樓呀」，咁你仲講咩？唔買樓，咁買車啦，要「真上車」唔係好貴，幾皮嘢夠，但你睇吓車位？今日睇數據，香港領牌車輛數目，由2006起10年升35%至74.6萬架，當中私家車數目增加45%；但泊車位呢，同期增幅只有9.5%。睇埋陳局長講咩，「希望增加公共交通效率、方便及舒適度，減少市民買車的意欲，讓未來私家車增長能理性一些，最後才考慮增加首次登記稅。」我上唔到車，去買車，件事已經好反智，然後你同我講，「我知你想買車，但我想你理性，於是我會諗方法打擊你買車嘅意欲。」咁我明點解車位咁多年會唔夠，就好似當日政府為減少廢物，設計個細口嘅垃圾桶；現時唔想你買車，就唔畀車位你。上車我卡關，到買車，你又閘住我。他日我「軀體同靈魂遊走」死埋，會唔會難逃卡關命運，連骨灰龕都上唔到。千頌C
http://fb.com/winbigwok本欄逢周三刊出
來源:
http://hk.apple.nextmedia.com/financeestate/art/20171018/20186669
收市閒情：Facebook已回不去
1 :
GS(14)@2017-10-29 23:58:45親愛的Facebook：在下入藉FB大大話話都有10年。由當時2007年，叫大家由Xanga轉場去玩FB但俾人白眼嘅年代，去到今時今日，自己整咗個總算有人睇嘅FB Page出嚟。呢十年，睇住你大，同時睇住你壞。曾幾何時，FB仲係好Pure好True嘅年代，我去旅行時，Friend子喪畀Like；FB發現邊個拍拖邊個散咗，大家Offline八。啲人成日話：「網上世界令人關係疏離。」喺嗰個年代，我會反駁，「唔係囉，你識用FB可以令你更了解你嘅生活圈子。」不過，回不去啦！現時個FB係癡線架！你一上FB，就係一堆又一堆重覆嘅片，一模一樣嘅內容。呢個Page出「陳奕迅英式口音超迷人」，另一個Page又出「陳奕迅講英文好好聽」。去到大事大非時，好神奇地，你只會見到同你意見相近嘅Post或者朋友Status；至於同你道不同嘅，Sorry，喺Newsfeed全部Out。你Like咗《蘋果日報》、《100毛》Page咩，佢就Label你係黃絲，你唔好諗住Like埋相反政見嘅Page可以呃到佢，因為……你喺每一個微細舉動，佢都幫你統計，順手做埋人口分類。我明，你係想我哋睇到自己順眼嘅嘢，廢事見到大多唔啱心水嘅意見篤眼篤鼻。不過，結果係點？結果係每一個意見相近嘅人，喺FB圍爐取暖，但到現實世界，咪又係民建聯贏較多席；曾俊華咪又係落選；TVB咪又係咁多人睇。喺FB自我感覺良好，返現實就似去咗平衡宇宙，呢種打擊，真係唔係次次受得住。朱克伯格成日話要Make a better world，但人人眼界片面，分析唔到全局，我睇唔到世界可以點進步。唯一見到進步嘅係，FB盤數越來越靚，搵錢招數越來越多。當日佢靠一眾Page嘅Content吸用戶，今日佢就嘗試用屎橋賺錢，唔畀錢嘅Page就俾人「發配邊疆」，要用戶去另一Newsfeed先睇到，咁叫咩，叫過橋抽板！不過唔好忘記，FB係靠好嘅內容起家。今時今日，好多人已當FB係新聞APP，想返去做返最原始嘅社交平台？回不去了。當FB變成一個只會推廣告嘅平台，只係死路一條，邊有電視台淨係賣廣告？千頌C
http://fb.com/winbigwok本欄逢周三刊出
來源:
https://hk.finance.appledaily.co ... e/20171025/20193963
收市閒情：謹此多謝閱文！
1 :
GS(14)@2017-11-13 03:55:21仲講High tech揩嘢？現時冇Tech先領嘢。騰訊（700）親生仔閱文（772）上市，全世界慌死執輸。炒股年資唔算好長，但呢一浪新股潮，你會發現幾個現象，然後要講句，#多謝閱文。1）正所謂唔賭唔知時運高，唔IPO唔知咁多有錢佬。學老死盧卡股話齋，一隻閱文令朋友身家無所遁形。話說今日一個朋友WhatsApp問，「我抽到兩手呀，應該點做？」呢位人兄，平時根本唔買股票嘅，竟然會抽到兩手，「你咁叻？孖咗好多錢？」「我孖展咗500萬呀！」「嘩！抽10萬股，突然變到50萬Cash去做按金」點知佢應我一句，「我平時除咗錢，我咩都冇。」（堅係真實對白，好寸嘅回應）冇錯，呢個世界真係好多人，腳踏實地將所有錢一蚊一蚊儲起，然後將錢放喺度吽，吽得只剩吓Cash。#多謝閱文，令呢班人有股票市場初體驗，跌入呢個龍潭虎穴。市場人氣旺，個市自然一齊Cheer Up！2）即係咁，傳統智慧話我哋知，先求知，再投資！喂喂閱文咁搶手，大家仲唔係睇好華文閱讀市場？Well，咁諗真係很傻很天真。早兩日同Frd子討論抽閱文問題，朋友話「我都孖展近一球去抽」「啱呀！抽閱文一球已經係入場費。」用球去做單位抽新股，其實真係好很癲，之後更癲嘅事出現啦。朋友仔問我一個問題，「話時話，閱文係做咩？」睇到一副Innocent嘅表情，加上我知佢脾性，我相信佢唔係派緊膠，「你用咗十幾萬錢去抽IPO，你冇好奇心研究佢做咩？」「現時咪問緊你……」咁又係嘅，你啱，於是「你有冇睇過《步步驚心》、《琅琊榜》、《三生三世十里桃花》，咪就係閱文啲網上小說改編」「噢！若曦！我有睇呀有睇呀！劉詩詩呀！我仲睇埋IU版……」#多謝閱文，令班平時連書都唔睇嘅香港人，突然開始留意華文文壇！文人有救啦！3）對一班平時唔係好識Social嘅朋友，以前行出中環同人吹水，好辛苦先諗到個話題，現時唔同啦，一句「你有冇抽閱文呀？」輕鬆打開話框子，到閱文派彩，「你抽唔抽到呀」之後又可以問「你沽咗未呀？」閱文過氣之後，不用怕！仲有雷蛇（1337）、易鑫（2858）……新股齊發，唔怕冇水足，怕就怕你唔夠水抽，#多謝閱文。好啦！一句講晒，當恒指上到29000點；當閱文成功上到蘋果A1；當一堆唔炒股嘅人，盲中中衝入去炒股；當行出街全民講股……嗯，你都咪話唔驚！#多謝閱文，給我重要啟示。
by千頌C@堆填區
http://fb.com/winbigwok
來源:
https://hk.finance.appledaily.co ... e/20171108/20207356
資金追入友邦舜宇 恒指創10年收市新高
1 :
GS(14)@2017-11-19 15:31:59【明報專訊】受惠於內地對外資保險商放寬持股限制的消息刺激，投資者昨日單邊追入友邦保險（1299），加上資金托高iPhone概念股舜宇光學（2382）及瑞聲科技（2018），即使騰訊（0700）昨日尾段回軟，港股最終仍開低收高。大市昨日曾大升137點並見近10年高位，惟後勁不繼，收市仍升61點，收報29,182點，創下自2007年12月初以來收市高位。
全日成交1153億
市場交投保持暢旺，成交高見1153.5億元，港股自11月份以來保持「一日升、一日跌」並反覆向上的格局。昨日下午收市期指只輕微高水，到夜期時段歐美外圍市場普遍回軟下，中段轉炒低水84點，重返29,100點水平，預料後市波動難免。
友邦購證單日成交6.7億
友邦昨日在芸芸大藍籌股中一枝獨秀，特別是在大行摩根士丹利看好不再限於內地5個城市經營下，引發投資者憧憬而追入，全日收市報65.3元，大升6%，成交額打入十大之列，達29.31億元，並且托高恒指141點。在投資者追入正股之餘，不少人轉到窩輪市場，與友邦相關的認購輪囊括20大升幅榜，升幅介乎1.5至11.5倍，引伸波幅達25.43%，遠遠拋離過去30日歷史波幅16.39%。其認購證成交更由上周五佔比1%，大幅抽高至3.5%，成交額達6.67億元，較上周五大增2.49倍。
另投資者亦積極掃入「蘋果概念股」瑞聲科技，該股昨日升5.79%。準藍籌股碧桂園（2007）及舜宇光學亦獲投資者垂青，分別炒高5.7%及5.97%。反之將被剔出局的國泰航空（0293）及昆侖能源（0135）則受壓，分別跌0.97%及3.93%。
分析：恒指慢牛向上 料見30000點
輝立資產管理基金經理陳煜強認為，港股市底仍強，投資者借勢內地開放外資保險進入內地市場為概念，加上科技股炒高配合，呈現「慢牛」向上，推高至30,000點以上已不為奇，純粹在心理上尚有阻力而已。他又說，撇除保險及科技股之外，傳統股如大地產股及環保股仍然落後，因此後市仍然有機會輪流推高向上。
來源:
http://www.mpfinance.com/fin/dai ... 8025&issue=20171114
話你知：買賣競價得出市場共識價收市
1 :
GS(14)@2017-12-03 18:17:40【明報專訊】騰訊控股（0700）昨日在收市競價時段（俗稱U盤），曾在382.6元水平出現多達逾7000個買盤（見圖紅框示），但是最終未有在此價位完成成交，反映了U盤的運作制度。
所謂的U盤，就是買家和賣家在競價時段輸入買賣訂單，而交易系統在收集雙方有關的訂單後，會得出一個可以完成最多交易的價格，即收市價。
競價的作用，就是為了反映市場供求互動的情况下所得出的一個市場共識價格，以昨日的情况，騰訊控股收市價為385元，代表了385元這個價格是市場共識價，可以完成最多交易；382.6元的大量買盤，除非有在競價時段調高至385元，否則就不會成交。據彭博的紀錄，U盤最終有6716宗交易，說不定在382.6元出現的買盤最終因調高出價而成交。
來源:
http://www.mpfinance.com/fin/dai ... 6977&issue=20171202
收市閒情：輸錢關「年輕」咩事
1 :
GS(14)@2017-12-18 04:10:17正所謂睇人GG最開心，醫生以外，呢期財圈比較多人講，就係《股票傳心師》一個月輸三成。「嘩！唔係呀化，咁廢？」「咁燈？改名股票傳燈師啦」。輸錢被人笑，一沉百踩，人之常情。不過，成件事最無辜嘅一定係一班年輕人。一副老前輩Mode嘅阿飛，噚日一篇專欄，劈頭話傳心師輸錢，「反映出年輕一代炒賣的最大毛病，欠缺耐性太心急，大市上上落落之間，組合就受了重創。」疑似長輩嘅經驗之談，袋錢入你袋，作為後輩嘅的當然要聽。今日我仲好好綜合多年來，各前輩嘅教導。其實，教人炒股票，好簡單。你唔買股票，就話點解你唔肯踏出一步；買大價股，就話後生仔，本少就咪保守；到你買細價股，就話你太心急，要學畢菲特價值投資；你做晒功課，買隻二、三線股，就話你揀次貨，有大價唔炒；你捱緊價，問點解唔識止蝕；如果你真係止蝕，你就係冇耐性坐貨；你真心信隻股會升，買正股，話你點解唔學炒衍生工具；你十萬蚊，拎兩萬去炒衍生工具，就叫急功近利，有錢就任性；佢十萬蚊，拎兩萬去炒衍生工具，就有注馬控制唔怕輸；假如你賺錢，你係一鋪半鋪死好命，遲早輸返晒；假如你輸錢，你話唔腳踏實地，冇技術唔好學人炒，抵死！到你真係決定金盆洗手唔炒，就話你經唔起考驗；到你炒股儲到錢，就話：你早幾年炒樓就發埋達啦老前輩話，「年輕人炒股票追求快靚正，要用最短時間去追趕李嘉誠。在起點已經先看終點，而最普遍的第一站，當然是上車置業的首期，於是乎十萬本錢在手，就想二十倍奉還，賺至少二百萬回來。」當然買股票係要「有耐性去修練技術」，至於買細價股、買衍生工具，大家可以睇成好高騖遠。冇錯，好多年輕人係真係想快靚正嘅，原因，正正係因為呢個年代冇舊時咁正。以前10萬蚊，做到首期買到樓，可以快樂過生活；依家10萬蚊，想資本增值最多係炒股做生意，然後呢，你仲要拼命去生存！即係咁，本身有千萬身家，我都識腳踏實地去收息，印印腳唔使做啦；不過，但好多時後生仔，連第一桶金都冇，份糧又猛猛緊，又有咩資格學人講耐性？其實，時代唔同、起跑線唔同，講炒咩都好，根本只有贏錢同輸錢之分。硬要將輸錢原因，扣上「少年你太年輕」罪名，前輩們，點對得住年輕時贏錢嘅自己？
P.S.唔係幫傳心師門開脫輸錢罪命，輸咗就係輸咗。不過，傳心師係咪真係衰急功近利買細價股？其實可以睇吓佢哋過往嘅持股，分別有中海油（883）、長汽（2333）、閱文（772）、中興（763）、平保（2318）、金界（3918）、香港電訊（215）、市值比較細嘅，就係摩比發展（947）。當然，仲有輸得最慘烈嘅，靶已打嘅騰訊牛。千頌C
來源:
https://hk.finance.appledaily.co ... e/20171213/20242764
Next Page