📖 ZKIZ Archives

80後買樓記(六) : 揸的士都唔好做銀行? Home Blogger

我轉左行做保險公司份工，就好似肥佬老闆跟班咁，同佢出去見客之後將簽好文件送比核保辦理。有時肥佬會用家居保及旅遊保同新客打開話題，傾下車保更可了解客戶財政狀況，原來想快手了解面前客人，都有咁多學問。先講一D佢感興趣既話題，再搵出自己可以係邊方面幫到佢，從而令客戶知道同你做朋友係有好處既。肥佬心情好時都會教下我野，我明白老板教我野唔係必然，因學到既野只屬於係自己，第時辭左工都可帶走的。把握機會從工作中學習，係令我事業轉好，人工增加而買到樓既重要元素。

保險公司既經理除左sell單，請人拓寬「下線」係重要工作之一。請一個新人，仲好過佢自己出去跑數。Well，肥佬自己好懶，平均一日都見唔夠兩個客。但係佢叻在識搵人幫佢跑，招募下屬。佢鐘意搵銀行做開既人加入，一黎佢地識賣保險，二黎銀行呢幾年同員工「不斷加壓」，搵人由銀行出走到保險公司，唔係易事。

是的! 又係michelle。肥老闆不時係bank收卡片，及後跟進約銀行sales出黎飲野。今次搵埋我一齊見旨在showoff佢有幾掂。Michelle係一個二十有幾既斯文長髮少女，眼細細而勝在皮膚夠白淨。個日我地係佢分行附近既starbuck見佢，成下晝四點michelle趕到黎，放低袋就二話不說走去買三文治食，坐低吞左啖水後先一路啃野一路同我地講佢未食晏。肥佬一貫作風，問多過講，問下佢好咩搞成咁。Michelle話佢已經「N5」，即係nil for 5 days，連續五日冇數交!! 因為5日交唔到數好大鑊! 今日上晝七點幾已經要同分行經理去面聖(見大老闆)，最慘既係尋晚call客call到九點幾先返到屋企，訓得幾個鐘又要返工。真係就黎神經失常!

最慘係剛入行既新仔，為左一萬幾千既人工捱到咁盡，當然做幾個月之後就失蹤。所以你見而家成日請新人，成日銀行職員做錯野，成日換客戶經理。」Michelle話:「我做左銀行幾年，唔上唔落，轉行又要重頭黎過，咪仲要係度捱。」一路講一路食埋最後啖包。

佢話最傷既係今朝面完聖，同成班sales加埋分經(分行經理)開會。經理摔數問Michelle呢個禮拜有信心「做幾多」? 佢低頭唔答，之後細細聲答左十萬。經理就話:「十萬?你唔使旨意! 三十萬啦!」唉咁講不如唔好問，一味被人逼佢跑數。」

肥佬話呢份工冇人逼佢做。Michelle話當然可以辭職。不過佢經驗為求佢遞信後仍然專心跑數，一家會威脅佢如果唔到數會寫花佢走人時攞封reference letter，等佢係第間bank應徵時過唔到reference check，等於踢佢出銀行界。 Michelle眼濕濕咁話: 「我到數又使鬼遞信咩…而家 真係唔上唔落。唉，拖都唔使拍，而家分行唔到數，星期日要攪埋「理財日」。老細不斷問有冇人做volunteer，我都唔知咩q野人，仲可以笑笑口係whatsapp like呢件事之後舉手要星期日返工!」 

肥佬就同佢講:「鬼咩，而家係香港銀行，客戶經理要一腳踢銷售基金、保險、外幣、股票掛勾產品加埋按揭。我都知而家有人行入分行，櫃面職員已經對人虎視眈眈! 因為佢一日無番兩個銷售推介比sales，「放飯」都未有資格。客戶經理sell唔到你野又要向分行高層交代! 既然你做到咁無癮，不如過黎幫我手啦!」

欲知後事如何，請看下回分解。

醫療保險邊個賺大錢? 80後買樓記(七) Home Blogger

上回講到銀行sales Michelle約見肥佬同我飲野。一輪做銀行之苦水後肥佬先同意michelle講既苦況，再出一招「口是心非」，想招michelle入行做保險既佢竟然同michelle講「做銀行唔錯」!

肥佬:「我知道金管局都有留意銀行摔數既情況，及作出萬一市況下行需要面對事情的預備。市況大跌必會引致極多投訴，尤其當老人家知自己係銀行存既錢冇左，肯定搵埋仔女黎嘈。我係金管局入面有朋友，知道由2013年起，銀行會嚴密監管有冇上層迫下尋跑數既情況，同埋下屬有冇夾硬比一d客人唔想要既產品。」再講:「係咁既情況下，我認為銀行陽奉陰違既作為依然會有，始終賣產品有咁多錢賺，冇理由唔做。」

「不過佢地會包裝得靚d囉，估佢地5年後，即係2013年，又會話咩更新銷售程序，提供更貼身服務比客戶，又咩更專業理財咁咁…講到底，咪又係想加長銷售程序，錄哂音咁唔比個客係市況下行反口，但所用多左既時間，即成本，咪一方面食個客水深d搵返，另一方面搾壓個同事攞返。」肥佬叫michelle放心，再做銀行只會sell少左野更輕鬆，恭喜哂佢，不過paper work同客人錄音方面做多左。

肥佬呢招以退為進果然有效!!

Michelle話:「sell少左野!!! 咪冇錢分比員工!?」

肥佬即刻一副不以為然既樣話:「咁就一定架啦。」

Michelle講:「我sell野就係為左想賺錢，而家冇錢分仲做黎做咩?」唉，又一個無知少女中左肥佬奸計。

Michelle成為我同事後，由於我迷上佢細細既眼，成日借機問下佢野。就算關係未能「更進一步」，我都學到唔少人壽保險既知識。人壽同我撈開既雜險係不同的，最大不同在於雜險一般冇儲蓄成份，鍾意幾時cut就幾時。保障範圍好生活化，例如家居保我都係入行先知唔保滲水的，要爆水喉仲要意外先保。旅遊保亦因太多人去完旅行後走去報失手提電腦，而致條文有所修改，唔保手提電話、電腦。不過及後發生埃及撞車事件，我先知原來旅遊保係幾咁有用。都係一百幾十蚊。

咁唔好彩係外國遇到意外，你可能要負上外地高昂既醫療費用。醫得掂還好，最慘你要送返香港再醫，你訓係度坐飛機吊住鹽水入境係好貴的! 旅遊保可以比你claim返，你返到香港，仲可以有幾十日「被包」既醫療保障，我可以咁講，旅遊保係一陪一千既保險，賠得仲快過你係澳門等圍骰! 更是保險公司想「比個好印象」你既常用方法。

「係保險公司做左成年有多，我想係自己事業上有所突破，下章抓緊機遇，全力出擊!

有錢買樓 無錢開飯 林本利

單親媽媽更要買樓(答) Home Blogger

晉身小富，非結婚不可?

諗樣之前講過，如果庸才想借力打力，晉身小富，非結婚不可。但係我地唔可以將單親家庭遺棄，究竟有咩解救呢? 記唔記得諗樣提過樓奴故事? 當中單親媽媽一手帶大四個子女都可以，堅持絕對在持家或理財均適用。

主角小玲不能夠原封不動，因為單親人仕最大慘情係老年未必有所依，亦唔可以期望小朋友養你。可以佢係被逼要理財，盡早為人生下半場準備。

咁究竟退休需要幾錢呢? 駛唔駛搵個理財顧問同你計呢? 最簡單咁諗係你50歲退休(或冇得撈)，磨到八十五歲先死，如果你用五千蚊個月，條數會咁計: $5000*12*(85-50) = 2.10million。咁睇落好樂觀，有讀者係呢幾年升市係間樓都執左「百幾二百個」，但係醒目既你當然知道2.10mil係唔夠架啦!

通賬、唔知幾時死、唔知幾時病係令你不能信賴退休計劃既原因。點解你後生個陣唔會諗死同病既問題呢? 一黎發生機率少、二黎係你仲有睇落無窮無盡既payroll income(人工)。上面因素一留比個天決定，因素二係我地可以做野補充既地方，令你退休出糧有著落。回應上段問題，如果想退休後每月有今時五千蚊購買力既錢洗，50歲既兄台要有5.60mil先夠，仲要唔好病準時死(85歲，已假設手上資金肯定有2%p.a.回報)

又係年金計劃??

坊間有唔少年金計劃提供，供款十年八載後提供十至廿年既月入。計劃好處係監管你為退休儲錢，可惜係回報同埋提供收入方法未必如意。例如由六十歲開始提供入息，冇人能肯定該參與者八十歲就離世，特別係現金醫學昌明既年代「吊命過世」一點不難。有計劃提供月入至九十九歲，但月入太少，歸於計劃回報不吸引。筆者認為用聯名戶口買入國債，望3%年息回報，老公過身可由老婆攞錢最為簡潔恰當，債券到期自有本金歸還留比仔女，簡單易明。可惜香港債市不活躍，買國債要手握百萬港元cash至有得傾。如果想分散風險買幾條唔同地方既bond，你要有三至四百萬金額準備投資。債券派息多不會同通賬掛勾，要準備開頭幾年收十幾萬年息同先夠多去「貶到水尾」。

但係五十幾歲還哂兒女債仲要有四五百萬淨? 有幾多人得大家心知肚明。種種原因加埋產生現象，就係你見到街邊執紙皮既阿婆好多都係「有樓係手」既! 仲有就係「建設派」既廣東海鮮團成日爆滿! 點解? 你試想你都唔知自己幾時死，老左又冇人請，梗係唔敢洗咁多仲要開拓income啦。執幾張紙皮頂多一日得一日! 普遍退休人仕都有此想法，而除左早前提及買債外，買樓點可以幫到退休呢?

最好就係生小朋友之前手握兩間樓，因小朋友確實打亂你儲錢部署及洗費大增。一路湊大個小朋友之餘叫租客一路供滿你間屋。第時間屋收番黎既租係會同通賬上升，咁就可以自製通賬掛勾投資囉! 係資本社會要累積資本之餘，早去令資本出現係另一要訣，請結婚唔好咁大洗，三十歲適當去運用十萬蚊，到五十歲可享十倍回報。至於本篇主角小玲獨力承家，確實要比人更出力。諗樣建議先換出天水圍居屋再另覓居所。下篇「二百萬以下樓盤選擇」再談辦法。

你開始計劃儲錢結婚買樓了嗎?(答) Home Blogger

共同理財既一步

如果一對有志向既戀人，希望早著先機，係結婚之前就踏出共同理財既一步，應該有咩地方要注意呢?

未儲到錢既戀人，又決定開始共同理財的話，可到銀行開個理財戶口。兩年內諗住結婚的話，你只宜存錢咩都唔好做。若未諗住短期結婚既可以月供股票，雖月供傭金計埋要1%(比平時0.125%-0.25%貴)，但在此淡市(成交不足500億)買貨擺兩年衰極有個譜，不願冒風險或其中一方未有買賣股票經驗者不宜入貨。冇咩諗到可以供盈富基金或內銀H股。

下一個問題係每人要夾幾多落個戶口呢? 如果冇儲錢習慣請由人工三成逐漸加上去，三成都儲唔到睇黎你要每人月入5-6萬先可以唔使儲咁多。在此諗樣建議年青人，就算搵到幾錢都應該養成儲錢習慣，一時因人工大增而自我膨脹猛fing錢好多人都試過，通常以負上更多卡數告終。本身仲有卡數係身既要問自己係咪中左marketing人既計，買埋成堆無謂野。

討論家用問題

成家要男女都要有所犧牲，連錢都唔肯開始commit去儲實在困難。當然有人屋企傳統係儲係自己戶口度，冇問題! 係另一家銀行開個單名戶口分開儲比埋internet banking 密碼大家知就可以。再而進之後討論家用問題，係單親家庭或女權當道成長既男子真係冇比家用既概念，佢未必係扮哂野唔比錢，而實需時間去解決。睇到呢度你可能覺得使唔使咁煩? 諗樣認為財務問題係結婚前要一步步解決，總好過米已成炊後才恍然大悟去面對。

朗尼同女友夾埋都儲左七十幾萬，算叫唔錯。牛池灣既麗晶花園、新麗花園可搵到符合budget既選擇。但留意資金睇落較緊絀，買完2.4mil價值既樓比完洗費如印花稅、傭金、些少裝修費後所餘無幾。想收租而budget又向下行一格係本樣介紹過既翠屏花園，或荃德花園可以係個好選擇。

令浮薪被承認

至於上會方面，女友要比過去六個月糧單最好有埋稅單先可令浮薪被承認，若資料不足只會用底薪計算。朗尼自己當然叫到partner出autopay比自己就最好，如果唔係工資證明書，每月乖乖地將出糧支票入哂去同一戶口都有幫助。睇你地兩個人工加埋，如出面無重大負債都可以上到會。假設佢地買2.3mil既樓借七成，分25年還就當加埋壓力測試都係月供八千幾蚊，應該無問題。所以入好D票同埋女友六個月proof最重要，開個file有系統地儲起佢吧! 用statement，唔好再用銀行薄仔啦，會唔記得打薄!

「 聯權共有」 及「 分權共有」

當然未結婚咩野都唔可以諗得咁idle。買樓時唔好用長命契，用分權共有去共同擁有呢間樓，有咩事都可以賣走自己一半權益「走人」。

買樓既幾分鐘，係台下十年功(答) Home Blogger

答:

第一係你供緊層樓收既息應該好平，借一百萬收2%年息分30年還都要四千幾，而家每月還$3200既你，年息口應該貼近1%。相信你先改善自己既理財諗法，再用自住樓套60萬出黎，至少都可多退休層樓收租。

再細心諗你會問新套60萬會唔會同之前還緊既咁低息? 一般唔會。不過舊債會唔變，新套60萬會好似另一條loan咁，收2-3%年息。套到60期原因係3.10mil*50%-絡欠1.0mil 約等於60萬。仲有請叫銀行同你間樓「估盡D」，去到3.20mil唔難。

三個月前購入156萬，叫價185萬?

根據你講朋友三個月前買入156萬翠華花園，現叫價185，升幅達20%。你睇佢可以好高興，但同時應問自己套舊錢出黎係想「炒樓」定係「儲多間樓傍身」?諗樣認為如你買樓只為不斷追逐資產價格方面上升，咁等同將注碼押係大細一樣，贏面只係一半。之前諗樣個案既故事都係買樓求收租，收租求還本 ; 係SSD，樓市風高浪急之時，此為上策。

當然明白人都係有鋪癮「炒野」!而家買入半年內賣出要徵15%額外印花稅，一年內10%。自2010年11月推出後炒家收斂，入親貨都預左守兩年。你朋友而家係叫價，留意不要為叫價大驚小怪，再細心諗佢就算沽左只係賺20%升幅入面既5%。你又會問5%對我黎講都好多錢，咁你就要細心問下朋友點解會入到件「筍貨」，仲咁快搵到個肯比市價高10%租而一次比哂一年既租客呢?相信本身人脈同經驗幫手促成此事，你「鞋都未著」就衝入去未必有相同效果。筆者諗係咪agent運用「人咁你就會咁」既推斷式銷售技巧，係淡市攞多單生意。

炒樓都要學，仲要高中低班咁學上去。執到筍貨通常係agent熟客，勤力睇樓或唔怕煩自己貼街招之人。真係有筍野通常好快(隔晚)就比人買左，你係agent都唔會搵個左諗右諗唔幫襯開既客買。另一方面即係個客要買爽手先買得成，睇一次樓再返頭已經比人買左，所以客人有番咁上下睇樓經驗先可以。姑且不談論你朋友，就見外面有人成日執到筍盤，其實買樓既幾分鐘，係台下十年功的!

點解最好係港島區?

你談及想買港島區，係因為想收租近定係覺得會升呢? 請參考「諗樣文章2012年上半成樓市round-up」及「一路向西」論樓市，你就知本樣覺得未來新界樓會跑贏港島民房的「根」與「據」。除非你心儀既係港島山頂豪宅就作別話。你套左60萬出黎，可以做三成首期買間沙田河畔花園，一般沙田大屋苑都幾好租。

如你而家先搞套錢再去買樓已失租樓比大學生既旺季，補些少錢用2.6mil間買好運中心或沙田中心，幾時都咁好租的。當然佢地成三十年樓齡係一問題，如想樓齡輕些少而又符合budget既，只有元朗一些新落成而唔近市中心既兩房單位了。再唔係疊茵庭 係其一選擇。

買樓收租過埋下半世?(答) Home Blogger

答: 
大家實在需於五十或更前考慮退休儲備問題，因五十過後銀行對你借錢已冇咁手鬆，仲有就係自己得番幾年野做，都唔想去買入較大額資產。係讀者個案，過住十年樓價上升為佢帶來賺錢套現機會，可增添自己計劃退休時的籌碼。

可用將軍澳單位加按至樓價五成，套出$4.40mil*50%-1.0mil = 1.2mil。由讀者提供欠款及月供數字，新都城應尚餘約13年還款期。如套現後讀者不增年期，則要月供$16000，對夫婦兩人月入$36000來說太多了。把年期調至最盡而又有可以批到既25年，則月供$9300，超出讀者自己月入的一半，一個人負擔不來。建議新都城其實不用聯名轉單名，只需同老公一齊去銀行辦加按即可。套現金額亦可由1.2mil減少至借六十萬，分20年每月還$8000即可。

套出的六十萬，諗樣選擇會到元朗疊翠峰或兆康疊恩庭買個兩房收租，貪樓齡新可以遲下自住。用六十萬做七成上會分20年還每月都係七千。呢幾年先租比人，搵人幫你供下樓。交左三成首期上會減低變成負資產風險。借左2.0mil的七成即1.6mil分20年還每月都係$7000蚊。而家應該租到7000多些少，你還既按揭有本金$4700係「袋入自己袋」既。至於點解住係將軍澳要走去元朗買樓呢? 筆者認為論升值能力、退休後既居住環境都係元朗好過將軍澳，除非你搬入西貢。

當然你可以堅持將新都城轉比自己，要比幾千蚊印花稅加幾千律師費，按揭都係要重新做過。之後老公就清哂債然後一個人可去借九成上會，而咁樣你只需係新都城按二至三十萬出黎即可。到時將軍澳每月還六千幾而新樓都係九千蚊，唔使拉埋阿仔都可以上到會。但係借七成出黎買新樓可獲較易審批，又唔駛比按揭證券公司捉你租出報稱自住樓。既然兩人用聯名買哂兩買樓都可以上到會，只不過第二買多數只批到借七成，咁既情況筆者建議兩間都用聯名。

當然你又會諗埋阿仔。阿仔爭既卡數還清未? 正面信貸資料庫好似會keep你七年record。如果佢只係爭而冇破產，佢還清舊數應可在批按揭有轉機。年青人加人工好快，你應該留意下新特首有咩政策益到阿仔，到時萬一阿仔到結婚時人工仲未變佢都可幫自己「搵到間屋住」。上文計過你自己可以應付供樓，而你加阿仔做擔保人可以，但間樓加名就千祈唔好! 因阿仔既portfolio十分似梁特首打哂鼓要幫既一批年輕人，你可以等下有冇野可申請。以你而家近退休都唔多cash手，實在需要有間樓收下租食過世，如你將新樓比左佢住真係令難度增加。阿仔如第時結婚要你幫手可以再在新都城套十幾萬比佢吧，又或同住在新都城三房都可係暫時選擇。

十年後阿仔都應該成家立室。如果你現時每月都仲有錢淨，請快手還清新都城既按揭。到時你搬入元朗住兩房，新都城租到$14000蚊應該夠你用黎還元朗月供$7000按揭，淨低既錢可幫補支出。此僅為其一意見，希望大家可多發表。

80後買樓記(八): 超市營運賺大錢? Home Blogger

上回講到我係保險公司做左成年，上司肥佬不斷游說我做agent跑數，我眼見幾個agent女同事大熱天時出街見客，辛苦唔緊要，問題係做哂身邊既親朋戚友保險後就冇單返，令我冇信心入行。有一日去深水涉行黃金商場，見到隔離有間超級市場大減價，咪走入去睇下有咩抵。

此超級市場唔同我地平時行開既百佳惠康，佢冇鐵籠大車，冇強勁冷氣，亦都冇生猛海鮮係個魚缸游來游去。佢係間深水涉平民超市，集中賣生活必需品如米、油、消化餅杯麵等等。間格四正，通道被一箱箱半開箱貨品所佔領。最緊要係個價錢，就連我呢種好日唔行百佳既人(因為買親野都係SEVEN)，都知佢應該比出面超市平D。心諗你賣咁平仲有咩錢賺? 係咪賣假野? 但係見到一群師奶係我面前奮力搶貨既現象，佢唔似係做呃人生意。呃得人一次，再冇下單生意做，何況係精打細算既師奶們!?

我知呢排係香港開左不少新超市如759阿信屋、佳寶、華潤萬家咁，當然同惠康百佳兩大巨頭係規模上有一定距離。但759我眼見越開越多，係香港有成200間，仲話要Keep住每個月開新一鋪，究竟佢地幾間超市點樣係兩大超市下仲搵到空間生存呢??

我企係間平民超市入面又冇幫襯，自己有人黎同我打招呼。對頭一望係個四十幾歲既阿叔，問我:「呢度好少後生仔入黎架喎，又冇雪榚零食賣，阿生你入黎搵咩?」我好天真，諗都唔諗就答佢:「我諗緊點解呢盤生意有得做」佢作出左個我從未遇過既行為，就係請我坐低。」Wao! 我行咁耐超市都未係入面坐低過，佢請我坐係兩箱汽水上面同我講:「見你咁後生都識貨走入黎，我就同你講我呢盤生意係點做!」同其他老氣橫秋既阿伯一樣，佢既”PRESENTATION”一開始都係由問我野開始，話:「你入過百佳未先?」我心諗:「妖中伏! 呢條友一定勁長氣。」

就係黎緊既一個鐘，我個屎忽被堅硬既氣水罐頂住，頂到我大細邊。香港你所見貨品，原來大部份供應商都同兩大超勁熟既，或者咁講仲好，就係兩大超係供應商唔得罪得既客。因佢地同供應商攞貨既量極大，有時供應商更要比錢搵佢地幫手上架，如果將佢件貨放係櫃底真係唔得掂。久而久之供應商被人反操縱，出貨價被壓低唔在講，更大鑊既係佢地唔比用同樣或相近價格出貨比其他超市(人)，咁做係因為兩大超要係來貨價格上就得到平價之優勢。係咁情況下，一支髮膠既價錢，基本上由供應商加兩大超傾好就可以確定，佢地今日將支野加十蚊，只要其他超市或商鋪將舊貨去盡，新賣之髮膠就要跟佢地訂下之價錢。

當然唔可以加得太離譜，如果同一髮膠係韓國賣五十而香港賣一百，不難想像有人會大手係韓國買入，再係香港八十賣出，扣回當中所用運費及兌匯損失，仍有利可圖。用呢個招式去同兩人超抗衡既有佳寶，或759都係部份相似。係對話中有一句令我覺興趣同個長氣阿佰傾落去，佢話一間超市，每月都賺三十萬，黎緊會買鋪開店黎減省「鋪加」。想睇下呢個阿伯有咩Q令佢盤超市生意咁賺錢? Bookmark homebloggerhk下回分解。

80後買樓記(九): 月賺四十萬之生意 Home Blogger

上回講到係深水涉平民超市偶遇阿叔，同佢講開現時香港超市業被兩大超壟斷之問題，令香港不少細超市相繼結業。咁究竟平民超市唔向外地入貨，點樣就地於香港搵食呢? 阿叔話賣野都要靠network，佢手上展示出一大疊不同超市分行經理之卡片，同我講:「我反而會同兩大超入貨，但係會趁平買。而我入既貨品都係師奶買開既，例如杯麵消化餅咁，因師奶對價錢上些微的變動極敏感，尤其於我呢一區。」

我問佢:「見你既貨都係平一個幾毫，點賺四十萬一個月咁多?」阿叔話:「用百份比計，其實都有8%。」好似呢pack消化餅咁，大超賣開$10蚊，我知道佢區區唔同價，例如將軍澳mark$9.3，我於是就打去個間超市同經理傾，問佢$9.1得唔得?」「你咪睇少呢幾毫，其實都2%，我一買就十萬，即係用wholesale價，永遠平過你散賣。」我呆左一呆:「買十萬蚊消化餅!? 真係呢世仔冇諗過。」阿叔又黎:「所以我鋪頭冇魚同凍內賣，有時靠咁薄cut真係唔可以轉死貨，因為要唔少錢轉黎轉去先做得到!」咁我出招打蛇隨棍上:「咁你風咩方法去減低風險先?」

其實信用卡唔只係火燎森既朋友，仲同阿叔好(friend底)。正所謂「水能載舟亦能覆舟」，你識用佢，人同物件一樣，都可以有好壞效果。原來阿叔買貨係用哂信用卡既，幾十萬咁碌，比錢唔係counter而係房同經理一碌五六張。然後再用大量積分搵百佳coupon或cash rebate，變相將所賺margin拉多1%。信用卡有一個月數期，佢有齊唔同找數日既卡咁咪可以變相有30日數期，買貨唔使COD囉。

真係一個平淡而十分驚喜既下午，學左一D未曾涉足過既野。阿叔話:「見你咁後生，打咩工?」我同佢講:「係保險公司做跟單。」阿叔話:「我剛好請左人想買勞工保。」well，為左可以再蛇出黎同阿叔學下野，唯有應承幫佢跟啦，幫襯買番兩個杯麵，返到公司同老細講我有個朋友問勞工保。老闆不以為然，比左資料我然後call個客傾左幾句。之後又比一疊文件我，我歡喜地過去又搵阿叔。

我今次去佢間鋪真係比心機留意人流，究竟條數點計可以一個月賺四十萬呢? 係咪吹水? 欲知後事如何，請看下回分解。

80後買樓記(十):港版大富翁。賺錢變輕鬆 Home Blogger

上回講到係深水涉超市巧遇阿叔，佢口痕咁同我分享開超市賺錢秘技，信用卡點樣用得叻之法，同埋係香港兩大超之下點樣虎口偷生月賺四十萬。我揸住老闆比我份勞工保資料，阿叔又拉我講:「你睇下我個收銀幾耐做一個客?」我話都要成一分鐘。阿叔話:「我每日就係要keep住個收銀有人排隊，拉上補下平均一個客買百幾蚊野，即係一個鐘做近一萬蚊生意，一日開門16個鐘就16萬，一個月營業額近500萬。我買貨比出面客平成10-15%，計埋信用卡積分又扣返出糧一間鋪有40萬落袋! 而家我最大問題，就係個鋪加(租)。」

我問佢而家鋪租幾多?「而家五萬幾一個月，不過佢見我做起左會加我租，我用之前幾年賺到既錢趁「低」買左對面街間鋪，班熟客唔會流失。不過都用左一大舊錢。」當我一路填勞保文件，我問佢:「而家百佳唔係專睇住你d細超市打架咩?你做旺左呢度咪又比人趕左去第度?」阿叔話:「係架，所以今次我叻左同有資本買鋪，如果做旺對面條街就有鋪面升值利益，我對面街買左個鋪都係只租比人，我自己反而租佢隔黎個鋪。」

我心諗又要買又要係隔離租鋪真係煩死人，連阿叔都話:「我見呢排又買又租，都比左好多經紀傭，計埋都成一百個! 所以我要搵你呢D後生仔幫手。」再續:「開鋪前一定要觀察人流，我知係對面開超市一樣做得起! 耐何我冇咁多錢所以我搵左個朋友，叫佢打本而我又過貨比佢，有錢一齊搵!」我心諗咁都得!?? 阿叔懶有寶咁沉聲講:「其實出面好多零售都係咁做，自己冇錢食哂成條街咪搵人幫手，一黎自己可以搵多個人幫手出貨，二黎客人好中意左睇右睇，你比兩間鋪佢大包圍咁咪九成都食到個客! 而最緊要既係一條街有兩間超市，好易做旺條街，咪好似你玩大富翁咁三間屋同色咪收貴d租law! 其實一早教左你! 原來間鋪升值先至係佢搵錢主菜!」

再者，我「有」兩間鋪後買貨量都多左，即可同班要跑數既超市經理壓低來貨價。

我聽完阿叔講左一輪，真係好迷茫，原本佢同我present佢係一個超市佬，再變做收租佬，最尾先發現原來佢鋪大茶飯係炒鋪! 唉香港果然百業傾斜，最尾點都要靠地產食糊，阿叔都係! 我一副諗樣，而阿叔好似睇出我心思咁話:「你而家做跑街，倒不如跟我世侄做地產啦，有你著數。」

人就係咁! 當初肥佬萬般言語勸我入去做保險agent我都唔肯，而家竟然因阿叔一句無厘頭亦冇實質意思既「有你著數」我就將自己既買樓夢想交左比阿叔!」欲知後事如何，請看下回分解。