講膠所手記：志祥大屋……鬼至敢租
1 :
GS(14)@2012-07-21 12:31:04http://www.sharpdaily.hk/article/fin/20120720/113921
從前，喺山頂，車唔可以到門口嘅漆咸徑1號（圖），有一間上世紀40年代落成嘅大宅，俾好多、好多、好多樹圍住，論環境，清靜得嚟有啲詭秘，浪漫得嚟又有啲恐怖。20年代嗰陣，大宅嘅前身，仲係一間英文學校……Sorry，呢篇唔係鬼古，其實係頂級豪宅租盤！
呢間大宅嘅主人，係信和置業（083）老闆黃志祥，如果唔係放租，根本冇人知道有間咁嘅古宅。
家陣，呢間7800呎嘅大屋，月租嗌價25萬大元，每呎都只係32蚊，不過，環境幽靜成咁，睇怕只會係鍾意清靜嘅外籍人士至夠膽租囉！
YY
講膠所手記：霸權力場
1 :
GS(14)@2012-07-24 12:46:22http://www.sharpdaily.hk/article/fin/20120724/114834
昨日，天文台又喺傍晚六點鐘、一般打工仔放工嗰陣改掛8號風球，仲準過大家屋企個鬧鐘，YY一向都唔係打風可以即刻放工嘅受惠單位，但就好唔欣賞天文台呢個做法。
既然，隸屬商務及經濟局嘅佢哋已經話掛風球絕對唔係乜嘢經濟考慮，咁下晝兩三點已經「橫風橫雨」，點解唔改掛更高風球呢？點解係要收市先掛？真係好難怪市民大眾對「李氏力場」呢個「傳說」深信不疑。
咁今次「6.8」（6點先掛8號波）同李生有冇關？Well，分身家前幾日搞掂咗，噚日，好似淨係得佢嘅得力助手老趙出嚟幫香港樓市「維穩」，似乎冇乜特別噃。
反而，883中海油爆單千幾億嘅大Deal，呢一次，似乎係「霸權力場」會啱啲囉！
YY
講膠所手記：趁風打劫
1 :
GS(14)@2012-07-25 10:30:19http://www.sharpdaily.hk/article ... 8%E6%89%93%E5%8A%AB
蠱惑嘅韋森特加上戇居嘅天文台，玩謝打工仔！YY打親風都被的士司機打劫，前晚打風YY就被劫200大元！話說YY搭同事順風車出到中環機鐵站，打算再轉的士返家（港島嘅南面），預咗講價，點知架架都飛禽大咬話要三舊水（平時80蚊咋），其中最「賊」嘅話：「頭先個鬼佬去淺水灣六舊半，西環都五舊啦！三舊？唔好玩啦！」真係火都嚟，但竟畀佢扑中兩件疑似遊客嘅物體，吹脹！好彩等多陣就遇到較老實嘅司機，仲畀YY開價，睇嚟，趁風打劫嘅起標指數已大幅跑贏通脹，老闆應該加我哋啲打風返工津貼囉！
YY
講膠所手記：YY的驕傲
1 :
GS(14)@2012-07-26 15:52:43http://www.sharpdaily.hk/article ... 4%E9%A9%95%E5%82%B2
打大風，機場大混亂似乎係梗嘅，咁多次大混亂以來，YY同屋企人睇新聞見到滯留機場飛唔到嘅人狂插地勤人員，我哋都覺得使唔使呀？人哋都有阿媽生嘅，但同時，我哋亦諗，換轉係自己，又會唔會咁有品唔插人？終於YY嘅屋企人喺韋森特帶挈之下有機會經歷機場大混亂，但同時印證，YY家族成員原來堅有品！
話說YY家族有老有嫩咁跟團去歐遊，原定23號夜晚出發，當時機場已超混亂，冇人答到幾點可以起飛，結果大家喺機場呆咗一晚，到24號中午，個導遊話夜晚11點飛，於是大家返屋企飲個靚茶瞓個晏覺，晚上再出發去機場，結果，11點飛只係個願望，佢哋再次滯留機場，期間見得最多係警察，因不斷有人飛唔到插地勤再繼而報警，但YY家人就一句都冇嘈過兼體諒班地勤，最後，25號凌晨終於起飛。
雖然蝕咗好多行程，但係佢哋話乜嘢都要經歷吓先至係人生！係㗎，意外冇人想，互相體諒，世界先至更美好，玩得開心嘅，唔好唔買手信畀YY呀！
YY
講膠所手記：將軍澳大低水
1 :
GS(14)@2012-07-27 11:21:36http://www.sharpdaily.hk/article ... 7%E4%BD%8E%E6%B0%B4
YY每日聽地產版手足報料，都離不開居屋、細價樓破頂再破頂……嗰啲癲價，已經到達令YY不能置信嘅地步，點解？連偏軟地區嘅居屋都可以賣到六千幾蚊呎嘅，但竟然，又有人接喎!
無錯，對啲居屋業主嚟講，係一件喜訊，但對嗰啲未上到車嘅人嚟講，只係再加深佢哋嘅痛苦。以前，買居屋係起步，但o依家你份糧連居屋樓價都追唔到，就算夠俾首期，睇怕都唔使食飯。
居屋爆癲價，不能不多謝梁振英，條友明明話急大家所急，等大家快啲安居樂業，但其實成件事反效果，by the way，將軍澳原住民莫探員話，佢嗰頭啲私樓，都只係五千幾蚊呎，但佢哋明明有「港島東區雙核心」地理優勢，拍埋啲居屋度，大低水到爆，唔知峻瀅發展商超人有無力場將呢區樓價扯番高呢？
YY
2 :
Sunny^_^(11601)@2012-07-27 11:35:38為左賣峻瀅,力場全部力量都集中係日出康城.所以今次打風先可以打到朝早,仲整親李氏皇宮.
講膠所手記：嘔番出嚟又點吖！
1 :
GS(14)@2012-08-01 10:04:16http://www.sharpdaily.hk/article/fin/20120801/117717
洗黑錢、操控Libor、違規賣嘢，坊間話，近排獅子銀行是非一籮籮，但係其實諗深一層，近呢幾年，佢哋嘅是非其實冇乜點樣停過，其中，應該係以2010年嗰陣上演嘅「主席爭霸戰」比較經典，所以，到咗今時今日，大家所見到嘅，並唔係一大堆是非，而係「爆鑊」。
前日，獅子行中期放榜，話要喪撇賬156億港銀，仲講明唔止呢個數添，兩件權力核心范智廉同埋歐智華，一個話現役管理層唔使為咗呢單嘢而上身，另一個就話，集團成個董事局都好支持佢，到咗噚日，外國傳媒即刻就爆料，話上手嘅紀勤同埋葛林，夾夾埋埋可能要嘔番700萬英鎊出嚟「贖罪」。
講真，嘔番出嚟又點吖？錯到咁都只不過係嘔番啲花紅出嚟就了事，難道仲想同大家講佢哋呢啲叫做優良企業管治嗎？呢隻重傷嘅獅子，都係算把啦！
YY
講膠所手記：裁員潮又殺到
1 :
GS(14)@2012-08-02 11:40:49http://www.sharpdaily.hk/article ... 8%E6%AE%BA%E5%88%B0
承龍兄昨話喺吉之島家品部買嘢畀錢要排好耐隊，YY絕對同意，因幾周前YY喺呢間吉之島亦有同樣經驗，而且案發時間亦係非假日嘅非繁忙時段。
點解會咁？生意難做，人手慳得就慳，唔止吉之島，好多百貨公司同食肆都鍾意請啲新移民做Part-time，雖然不至於雞同鴨講，但就因為溝通有問題，將你嘅幫襯流程拉長。
再留心啲，近排食肆連夥計都慢慢減少，唔止藍領就業市場麻麻，連中環金融精英界別都有裁員潮暗湧，有探子同《爽報》財經仝人講，某法資大行近排每日都有人執包袱，呢招「一日一件」幾好㗎，因唔使一大堆人捧住紙皮箱落樓俾傳媒拍照，大家又唔可以話佢哋大規模裁員，單嘢已喺中環揚晒，其他同行都只可望天打卦，求其返得一日得一日囉！
YY
（逢周二至五刊出 ）
講膠所手記：做多啲準備工夫
1 :
GS(14)@2012-08-03 11:04:00http://www.sharpdaily.hk/article/fin/20120803/118836
昨日又係首富李嘉誠半年一度發表「國情咨文」嘅大日子，例牌成個記者會俾嗰件以為自己好靚嘅MC小姐揀中發問嘅記者，盡量問唔關業績嘅問題，照例李生話唔答但又話中有話（如昨多番強調佢係100%跟規矩投地暗寸人哋），但YY想分享係行家怪行！硬係有行家好親切咁稱李生做「誠哥」，有個仲勁，問到亂晒籠後話：「我見到你好緊張嘛！」搞乜呀？YY唔係憎人富貴，專業財經記者去做採訪，應該做多啲準備工夫，問啲有深度嘅問題好過啦！
YY
講膠所手記：幼稚
1 :
GS(14)@2012-08-07 10:54:30http://www.sharpdaily.hk/article/fin/20120807/120075
不認不認還需認，「劏房王」陳茂波局長俾傳媒連環踢爆兼俾佢發埋爛渣推個老婆一力承擔後，卒之，前晚深夜11點59分，鬼鬼祟祟出份聲明，話1994年佢仲係景捷董事嗰陣，公司買入大角嘴物業嘅時候，佢係知道有劏房存在嘅，至於之前點解話「唔知情」，因為，大家係講緊物業嘅「現況」。
佢係咪大話精，大家心中有數；YY想分享嘅係，點解今時今日仲有啲人幫老細度埋啲屎坑橋。以為凌晨時份出份嘢，傳媒就出唔切？咪咁低能啦！就算印緊都可以停機改版㗎！陳局長呢啲行為，就等於嗰啲周身屎嘅上市公司，為避傳媒，揀埋啲山旮旯地方開股東會，仲要晨咁早博冇傳媒咁神心去，Sorry囉，點都有啲有Heart嘅記者會去採訪，又點都留番個頭條位畀佢哋，所以，陳局長，以後咪咁幼稚喇！
YY
講膠所：神仙難救
1 :
GS(14)@2012-08-08 11:48:42http://www.sharpdaily.hk/article ... 9%E9%9B%A3%E6%95%91
昨日，思捷（330）公佈話搵到一件前Zara極高層Jose MMG（縮寫）做CEO，下晝大鑼大鼓開埋記招，「好消息」突如其來，思捷正股同相關Call輪齊齊怒升，正股一度爆過38%，有隻輪仲喪升咗12倍！
或者大家會話YY盲塞，但YY仍然堅持，呢隻股都係唔掂！先講啲衫，就算新CEO曉飛，ESPRIT俾一大堆中價品牌夾攻咗咁多年，要雄風再現，好難，再講公司舊年先賺得嗰七千幾萬，但就出成2888萬港紙年薪（未計其他花紅）禮聘阿Jose，會唔會有啲過份呀？
坊間點睇呢單嘢？零售股嘅分析員同傳媒話前景經已明朗，但都有堅正常嘅分析，例如滙豐證券就話仍然要評估新舊CEO交接會有過渡期同埋公司嘅轉型計劃。都係嗰句，呢間公司，神仙都難救，算吧啦！
YY
Next Page