魚樂無窮：恐慌紓緩的關鍵
1 :
GS(14)@2017-07-01 09:32:55細價股繼續洗倉，不過市場氣氛明顯喘穩，一來風眼股跌幅由八九成紓緩至四五成，十號風球變番三號風球，二來試過第一日嘅腥風血雨場面，股民有晒經驗，三來暫未見有相關股份停牌，部份人嘅態度已由沽貨或避之則吉，改為尋找搵食機會。經過傳媒大肆報道後，相信戰友對打撈暴跌股都有番一定概念，例如在殼價墊底下，市值要揀細唔揀大，另外選主板棄創板，一來主板殼價高啲，二來在新例勢必推行下，創板上流力大大下降，遲早變殭屍板。不過，嫌煩都要補多句，過山車股有隨時停牌風險，入得場要有total loss心理準備，記住，出得嚟行預咗要還。大市方面，科網股再來震倉，比亞迪電子（285）一度喪插兩成，埋單跌幅收窄至一成，少啲定力都唔掂。都係嗰句，你信科網股未死，每次調整都係吸納良機，我自己就一注獨贏騰訊（700），冇蟹貨動力足兼且遇襲（沽空機構報告）風險低，市場上可謂絕無僅有。有畏高症嗎？分注吸納吧！賣多個廣告，周日投資導航會刊出我的第三季推介，風高浪急下其實依然有好股的，唔好錯過呀！
唐牛
http://www.fb.com/tongcow88本欄逢周二、四刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170629/20072142
魚樂無窮：新股喪爆騎呢事
1 :
GS(14)@2017-07-05 03:41:02新股市場近期接連爆出騎呢事件，提供吃不完的花生。最誇張嘅當然要數運興泰（8362），公司指由於公開發售超購20倍，屬「非常大幅超購」，竟將配售部份全數撥予散戶，原本一股難求，變成一褲都係，結果上市一如預期喪跌，以為熱炒頂張頭槌飛，以昨日收市價0.145元計，賬面埋單唔見六十幾萬，頂頭槌頂到頭破血流。由北海集團（701）分拆出來嘅中漆集團（1932），原於上月底掛牌，但臨門一腳被母公司第二股東莊士中國（298）阻撓，後者以估值及人事問題為由，直指分拆並不公平。北海早前舉行股東會，其中配售及回購股份決議案竟有28%股東反對，莊士中國被指嫌疑最大，雙方牙齒印似乎越來越深。另一由路勁（1098）分拆上市的勁投國際（3682），則因未能與聯席全球協調人訂立定價協議。路勁未能釋放價值，包銷商冇咗單生意，散戶冇咗個投資機會，是為三輸。近期新股多籮籮，當中恒誠（994）值得望多兩眼，一來屬少有環保概念嘅建築股，進攻力強，二來市值僅5億銀，主板殼股有價下，防守力高。唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170704/20077788
魚樂無窮：炒股要跟紅頂白
1 :
GS(14)@2017-07-06 23:43:47曾經大膽預測，在資金憧憬兩大股王滙控（005）及騰訊（700）中期業績靚仔下，恒指可以炒到去8月中，可惜7月第一個星期都未過，就俾官方《人民網》嚴斥騰訊事件打殘，恒指轉眼失守多條移動平均線。手上最賺錢的手遊《王者榮耀》被點名批評，係咪意味騰訊神話已經玩完，現階段當然好難下定論，但股價沉寂一輪卻是在所難免。點解咁講？情況好似學生唔聽話，老師最初只會口頭警告，但如果頑皮情況冇改善，施以懲罰卻是在所難免。你係騰訊嘅話，阿爺作出溫馨提示，梗係乖乖就範啦，唔係條護城河冇咗點算呀？故此，騰訊中期業績應該冇問題，但下半年表現或多或少會放慢，資金炒預期下，股價自然難以突破。兩頭馬車少咗一個動力，另一隻又點睇？滙控（005）今轉走勢明顯較大市為強，突破70蚊後一直無回頭，除憧憬績佳外，回購計劃亦是重中之重。唔信？你睇長實地產（1113）疑似進入blackout period後，冇回購盤托住即刻腳軟就會明白。滙控夠唔夠力抵銷騰訊弱勢，冇人知道，但炒股要跟紅頂白，短線揸滙控棄騰訊，肯定有你着數！
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170706/20080011
魚樂無窮：亢奮時代炒股法
1 :
GS(14)@2017-08-04 06:11:52恒指過去8日升足7日，與2015年大時代高位相距不足千點，破關指日可待。匯控（005）除息前稍回氣，由阿仔恒生（011）接力炒上；騰訊（700）創新高後倒跌，瑞聲（2018）則受惠蘋果佳績抽高；炒業績輪到長和系，其中長和（001）搶高3%，我較睇好嘅長實地產（1113），好快會急起直追。講完一大輪市況，重點係乜？就係資金明顯流輪炒，更蔓延至二三線股身上，同時恒指跌唔落，異常亢奮。面對如此市況，我嘅炒股freestyle係死坐爛坐，直至一日贏錢贏到麻木，先至考慮收手。記住，贏谷輸縮乃穿梭股海的硬道理，難得大時代重臨，梗係有咁盡去咁盡啦，唔通等到死氣沉沉先搵食咩？成交連續兩日過千億，喚醒了沉睡已久的中港券商股，當中又以耀才證券（1428）最吸引。一來客戶人數夠多夠廣，收佣金收孖展息肯定多過人，二來首季盈利已增長五成，旺市重臨只會更勁，三來賣盤消息不絕，又多一個炒作誘因。昨日第一棍大成交炒起，突破2.6元重大阻力，但現價只及大時代的一半，值博率有幾高，你都識得計啦！唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170803/20110346
魚樂無窮：三大因素締升浪
1 :
GS(14)@2017-09-17 12:32:46金仔不停搞局，最新有傳星期六會發射洲際彈道導彈，但恒指埋單僅跌212點。我一向不信升跌市比例，所以逾千隻股份下跌，我唔會放在心內。相反，十大升幅榜冇兩成入唔到榜，在在反映細價股回勇，同一時間，蘋果概念股及深港通新貴喪炒，亦證明資金依然活躍，繼續維持9月指數唔郁、大股要唞唞、細價股發威嘅預測。老牌紅籌股中旅（308）業績後大成交破位，兼創逾一年新高，點解咁叻豬？三大利好因素逐個數。第一，業績對辦。中期純利3.7億銀，增長39%，四大業務客運三瓣（旅遊景區、旅行社、酒店）有增長，客運亦在高位徘徊，中期息增加五成至3仙，淨現金達27億銀，相當於市值兩成，健康到暈。第二，優化資產。管理層指正研究將旗下內地景區分拆在A股上市，同時又考慮出售旺角中旅社現址商舖，預計作價超過10億元，紅磡貨倉則擬改建為酒店或服務式公寓，三劍齊發，釋放價值無極限。第三，大行唱好，繼美銀美林調高目標價後，最新花旗更上調評級至買入，目標價睇3蚊，強大買盤明顯係基金所為，似乎要達標唔係難事。
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170905/20143378
魚樂無窮：大灣區坐貨之選
1 :
GS(14)@2017-09-17 17:33:47千呼萬喚iPhone X終於登場，手機設備股走勢卻南轅北轍，龍頭舜宇（2382）及瑞聲（2018）造好，前者更創新高，高偉電子（1415）、丘鈦科技（1478）卻跌到一仆一碌。從最簡單嘅角度出發，face ID成為全城焦點，鏡頭規格越來越高，舜宇作為行業龍頭，肯定最受惠，所以表現更勝正宗蘋果概念股瑞聲，再配合最新出貨量數字超靚，實在難以估頂，有貨者繼續坐定定吧。市況似弱還強，弱僅限於指數表現，28000阻力極大，我認為要破關，必要靠騰訊（700）不可，強就見批股炒上現象不絕，最新有聯眾（6899）及信利（732），想搵股炒不妨睇實通告。珠江船務（560）逆市破頂，創近兩年新高，集團主打港口航運物流及水路高速客運，活躍於粵港澳區域，完美食正大灣區條水，新近附屬中標港珠澳橋口岸穿梭巴士服務唯一營辦商，為期10年，配合大灣區發展，肯定又係肥肉一大件。睇基本因素，珠江船務現價市盈率7.4倍，股息率4.6厘，市賬率0.9倍，平靚正也，有埋大灣區概念，絕對係中線坐貨之選！
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170914/20152692
魚樂無窮：千祈咪咁快破頂
1 :
GS(14)@2017-10-09 02:52:51上星期提過，股王騰訊（700）將輪證客震得七七八八後破位，好大機會成為大市攻頂的領頭羊，話口未完，騰訊昨日創出346元新高，恒指亦見逾兩年高位。騰訊放榜後高追嘅蟹貨已一掃而空，再次進入任舞狀態，亦印證了「唔怕你調整，最怕你唔敢買」嘅說法。大市下一個目標係乜？問十個散戶，九個半都答你係大時代高位28588點，雖然只得數百點距離，但要破位又唔係咁易，始終心理作用大於一切。正如你在街上見到解款員，雖然佢唔會開槍射你，但你都會怕走火而避開。指數一樣，即使大環境利好因素多，但升到阻力區心理壓力亦會加大，假若獲利盤及蟹貨一湧而出，隨時又壓番落嚟。不過，可以預期指數破頂後，會有新一批股民入場搵食，屆時市況火上加油，話唔定又係見頂之時，所以呢一刻你問我，我希望個股繼續炒，指數千祈咪破頂。係咪好矛盾？冇錯，炒股從來都係一件矛盾的事。廣告一則︰蘋果財經fb直播節目《蘋果短炒王》昨日正式登場，唐牛逢星期一早上九點半準時同你吹水，快啲like蘋果ATM及唐牛fb專頁，齊齊吹到個市上天啦！唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170919/20157252
魚樂無窮：一單交易掀升浪
1 :
GS(14)@2017-10-09 03:12:22南旋控股（1982）上周四發通告，收購大股東王庭聰旗下經營針織鞋面及針織鞋業務保麗信，消息一出，南旋曾炒高15%見1.97元，創上市新高，收市仍升逾6%。一單5.5億銀嘅注資，點解迴響咁大？一切要從交易結構說起。是次交易分成兩部份，第一部份涉資3.44億銀，將發行2億股支付，每股作價1.72元，第二部份約2億銀，則以現金交收。交易完成後，王庭聰持股將由72.29%增至74.73%，予人的感覺是借注資增持股權至接近上限75%，加上1.72元屬上市高位，大股東依然肯接貨，明顯十分看好公司前景。王庭聰保證保麗信全年純利不少於6,600萬銀，否則會以差額嘅8.3倍作出補償，即相當於交易市盈率。事實上，南旋主打針織衫，客戶包括Uniqlo、Tommy Hilfiger等，今次收購可望帶來協同效應，減低業績嘅季節性因素之餘，營運設施可更善用。南旋現價市盈率11倍，收購直接降低估值，股息率超過三厘，兼進入無蟹貨區，待股價挨近1.72元上車，贏面甚高。唐牛
fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20171003/20171404
魚樂無窮：最怕唔知點解贏
1 :
GS(14)@2017-10-09 03:39:13投資教育中心上月進行《零售投資者調查》，有兩個結果相當有趣。第一，九成受訪者表示，投資前有做功課了解相關產品，但當中四分之三稱投資決定會受朋友及家人的意見影響，情況就好似你去到茶餐廳，明明睇清楚乾炒牛河係抵食，準備落單之際，你朋友介紹你食咖喱雞飯，結果你就跟風點咖喱雞飯，不過好衰唔衰，原來你唔食得辣，對雞又敏感，食飯又會嘔，結果係點唔使多講。最大鑊唔係一次半次，而係四次有三次會轉軚，原因只得一個，就係你準備根本唔足夠，導致立場不堅定。盲聽冧巴入市乃投資大忌，公司做乜都唔知，更遑論幾時止賺止蝕，記住，勝敗乃兵家常事，但知道點解贏點解輸，才有進步空間，齋聽消息贏錢，遲早出事。第二，近半受訪者希望每年投資回報有一至兩成，32%更希望可贏超過兩成，平均計目標價回報率17%。根據彭博數據，2007年至今，恒指年度化回報6.7%，但已涵蓋了三個大浪，即2007年港股直通車、2009年環球QE及2015年大時代。要每年兩位數字回報，必須有避過跌浪的本領，點樣先做到？由今天開始畀心機做功課吧。
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170928/20166728
魚樂無窮：施政報告概念股
1 :
GS(14)@2017-10-15 18:21:53林鄭首份施政報告出籠，樓市政策似乎雷聲大雨點小，港人首置上車盤最初只得1,000個，加上未提農地轉換計劃，早前熱炒的地產股應聲下跌。係咪代表施政報告零炒作亮點？政府研究重啟工廈活化計劃，提供誘因鼓勵業主活化工廈措施，其實絕對利好持有工廈的上市公司，聰明錢亦相中開達集團（180），帶動股價逆市創兩年高。開達屬老牌玩具股，兼持有開達大廈作投資收租，最新數據顯示，該位於九龍灣嘅工廈，賬面值達16億銀，相當於公司市值近兩倍，價值一旦釋放，對股價刺激作用不敢想像。公司近年業績報告，每次均提到要活化投資物業，與今次施政報告理念不謀而合，公司更主動提交文件予政府，希望令物業升呢之餘，同時可谷高租金收入。還有兩點要留意，第一，開達大廈曾於2013年傳出以25億元放售，最終公司否認，多年後價值只會有增無減，每股NAV1.9元，似乎未反映現實；第二，大股東丁午壽9月兩度以約0.8元增持股份，翻查資料，丁午壽曾於2015年增持股份，兩個月後股價搶高四成，今次會否歷史重演，要由時間驗證。唐牛
http://fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20171012/20180043
Next Page