七月十四 細路咪亂講 2015年08月13日
1 :
GS(14)@2015-08-16 13:47:32http://www.am730.com.hk/article-277110
每逢農曆七月十四，大家都會格外慎言，特別喺郊外真係唔敢亂講嘢，有咩風吹草動，一般同朋友打個眼色，心照唔再提，之但係童言無忌，點揞得住細路仔把口？趁龍婆又嚟之前，幫大家熱一熱身，以下都係一啲父母親友喺網絡分享細路仔講過嘅恐怖說話，係唔係佢哋幻想力太豐富？留番俾大家諗。
文：77合作社
我想幫你剝皮
有日我仲瞓緊覺，俾我4歲嘅女搞醒咗，佢用一個好誠懇嘅眼神望住我話「我想幫你剝皮。」其實我上星期曬傷咗，呢一兩日個身開始甩皮，唔知係咪咁呢？不過，當刻聽到都覺得好恐怖，可能係我半夢半醒，都唔知係唔係真……
有個血浪湧埋嚟
有次我個姨甥坐喺梳化，個表情好古怪，佢媽咪問佢做咩？佢話：「我幻想緊有個血浪湧埋嚟。」後來先至知，佢哋之前去咗科學館參觀實驗展覽，入面有好多裝住紅色液體嘅巨型玻璃瓶，我諗我姨甥太深刻。
見到海賊王路飛？
有日我喺個女面前換衫，點知佢望住我笑，我問佢笑咩？佢話「個男人好搞笑」，我問咩男人，佢指住我身後嘅衣櫃話「個男人有條長到好似蛇嘅頸。」我轉身望根本乜都無，我唔敢去翻查間屋嘅歷史，怕有咩發生過，不過好彩囡囡唔驚。
見到海賊王路飛？
有日我喺個女面前換衫，點知佢望住我笑，我問佢笑咩？佢話「個男人好搞笑」，我問咩男人，佢指住我身後嘅衣櫃話「個男人有條長到好似蛇嘅頸。」我轉身望根本乜都無，我唔敢去翻查間屋嘅歷史，怕有咩發生過，不過好彩囡囡唔驚。
再見，爹哋
有一晚我幫我2歲嘅囝囝冚被，佢話：「再見，爹哋。」我話唔係，應該話早抖，佢話：「我知，不過今晚係再見。」自此，我經常去睇佢瞓覺，確保佢安好。
畫個十字
我個女以前會同我講，每晚都有個男人入佢間房，喺佢額頭上面畫個十字，我一直以為佢發夢，點知有日奶奶寄咗幾張家庭照俾我哋，阿女突然指住相入面已經過身16年前嘅老爺話：「佢咪係每晚嚟我房嗰個人囉。」同老公傾開先至知，原來佢細個時，老爺都係會喺佢額頭畫個十字。
Sister
我個女嘅學校有百年歷史，健體室下面有個地牢，有次見到個女仔望住下面叫：「掟上嚟俾我吖！」我問佢同邊個講嘢，佢話：「下面嗰個男人囉。」我望落去根本無人，之後我問其他細路有無見過呢個男人，啲細路話：「有，不過sister話唔好同佢講嘢。」佢哋講嘅sister係修女，但係呢間學校40年都無修女喺度任職過……
媽咪唔使擔心
有次我個仔攬住我，用一把好甜、好溫柔嘅聲音同我講：「媽咪，你唔好擔心，我永遠都唔會謀殺你。」
恐怖嘅男人
個仔3歲嘅時候，會同我講爺爺嫲嫲間房有一個恐怖嘅男人，有一日，我唔知黐起邊條筋，竟然問起佢個男人係咩樣，結果我個仔好平淡咁答：「噢，佢無面㗎噃。」
魔鬼
我個女2、3歲時幻想有一對朋友叫「豆豆」同「迪迪」，仲會成日分享佢哋嘅事俾我聽，有一日，阿女玩緊玩具電話，佢突然收線，木無表情咁用一個冷漠嘅語氣同我講：「魔鬼要嚟喇。」我俾佢嚇親，好彩後來發現嗰個叫「魔鬼」嘅虛構朋友好似幾好，只係個名改得唔好聽啫。