美國大官演講 左丁山
2008-10-24 AppleDaily
昨 日講起美國財政部副部長David McCormick 訪港，出席午宴演講會，佢講咗啲乜呢？先講呢位仁兄嘅來頭，美國人才甚多，高官與商界高層隨時換位，與香港搵位副局長與政治助理都搞到滿城風雨嘅情況相差 好遠。M先生喺西點軍校畢業，主修機械工程，到過波斯灣服役做工程師，有戰場經驗，後來入讀普林斯頓嘅Woodrow Wilson School of Public and InternationalAffairs，取得博士學位，加入麥肯錫做顧問，創辦電腦軟件公司，在深圳有分支。
M博士加入政府後，做過商務部與白宮幕 僚，舊年七月先至改任財政部副部長，有如此背景，名副其實文武全才，當然係精英一名，但今時今日做美國大官，面子冇以前咁好咯，左丁山見唔到邊位官員參加 午宴聽佢演講！M博士演講技巧非常熟練，說話能力極高，但屬於內容有限，談話並不精彩，因為佢所講關於金融風暴嘅資料一早已全部在《紐約時報》、彭博、 《華爾街日報》報導、分析過晒，了無新意也。M博士最後說明四點：
（一）金融制度須要改革，增加透明度，適當監管與加強風險管理；
（二）美國與中國之宏觀 經濟改革要調整。美國要穩定經濟為先，而中國嘅發展模式，到目前為止，都係注重出口導向，內需不足，形成內外失衡，必須改正，加強內部消費；
（三）國際自 由貿易必須堅持，不能回歸保護主義（按：奧巴馬有此傾向，其貿易改革對中國不利。）
（四）G-20國家要加強合作，全球化體制下，各國互相倚賴，金融風暴 吹襲之下，各國無一倖免，故此監管制度要對稱，要有協調。
在場有中國外交部駐港人員，相信佢哋會注意到M博士嘅談話。M博士答問題時，有人問到：「芝加哥 學派是否已一死不回？」，M博士支吾以對，但又強調美國政府注資銀行只係暫時性，好鼓勵銀行在五年內買回政府注資，恢復百分百私人擁有。當日BBC網站頭 版（早上香港時間）標題話馬克思主義思潮興起，大概有人有感而發，故有此一問。對自由市場派信徒而言，目前係考驗原則嘅時刻。
左傾吃香 左丁山
2008-10-27 AppleDaily
一 場金融海嘯，不知摧毀多少財富與多少人嘅前途、事業，甚至連倫敦、紐約嘅金融中心地位亦都開始動搖。紐約有美國經濟做大靠山，風暴過後，即使滿目瘡痍，仍 然可以慢慢重建，但係倫敦就好倚賴國際資金、國際商業嘅支持，倫敦可以扶助英國，但英國不能幫助倫敦，幾十年來，世界精英往倫敦走，資金往倫敦存放，令倫 敦可與紐約平起平坐，互爭長短，但○八年十月之後，英國大銀行部份國有化，政府加強監管、干預，大量人員失業，傷及元氣，誠恐黃金時代一去不返矣。
各大投 資銀行在金融海嘯之前，已把倫敦精英派遣往香港、杜拜、新加坡，甚至莫斯科、上海，海嘯之後，英國如失去監管制度之靈活性（所謂principle- based，以原則為本），被迫跟隨美國之rule-based（以規則為本）嘅監管方式，倫敦仲有乜競爭性？金融海嘯嚴重衝擊自由市場學派，干預派/新 凱因斯主義者如克魯明．史廸格里茲等走出前台，風騷到極，白高敦施行注資銀行政策，更被視為救市英雄o忝，故此BBC講到馬克思思潮重現，歐洲一片傾左， 美國如奧巴馬當選，民主黨聲威大盛，當然會一腳踢走所有保守派，實施tax and spend之經濟策略，芝加哥大學教授奧巴馬會否就此埋葬芝加哥學派？睇四年啦，如果美國以後四年繁榮興旺嘅話，克魯明．史廸格里茲呢批人就係上帝，白高 敦仍然繼續在英國掌權。
有冇人願意賭一鋪，重注買美國股票，睇好干預政策呢？左丁山係死不悔改嘅市場派，認為干預派呢套類似打類固醇針，吃偉哥嘅刺激政 策，短期可以沖喜，長期就會種下另一場金融地震嘅根源。政府抽稅，增加開支，印銀紙支持銀行，津貼人民買房屋，補貼汽車廠等招式，如果有用嘅話，仲使乜讀 書研究呀，國家央行開動貨幣印刷機就得啦，呢個世界仲會有商業循環有貧窮嘅咩？印五萬億美元去非洲派，非洲即時與貧窮講再見，輕鬆過乜啦，何須鑽研經濟發 展？香港有好多議員信呢套，皆因社會主義思想陰魂不散之故。
擠提基金跌完再跌 左丁山
2008-10-29 AppleDaily
廠 商L成日留在大陸，唔知真係勤力吖或是另有戀情，呢日突然來電：「喂，我到咗中環搵你出嚟飲杯茶，同我講吓市況，我輸到死咯。」於是去咗阿曼尼咖啡，呢度 下午時分，清靜過乜，最啱傾偈，廠商L話佢日忙夜忙，從冇時間炒樓炒股票，知道股市跌都不以為意，因為佢為自己設立嘅退休金基金只係揸住滙豐、恒生，一向 瞓得好安樂，點知最近輪到呢兩隻股大跌，佢為之面青，立即走番落嚟了解情況，首先搵左丁山講股。
真不知從何說起，咁多原因 與新嘅負面因素，點講呀。廠商L話：「返到嚟，見到老婆面青兼面黑，原來佢將啲私己錢加埋前幾年炒樓所得，去年趁股市當旺之時，買咗一間銀行嘅股票基 金，o依家冇咗三分二，佢叫我畀番佢喎！想死咩，我啲滙豐恒生已經跌到低過我買入嘅平均成本價，賬面利潤冇晒咯，內地工廠嘅訂單數量大跌，加埋勞動合同法 逼到埋身，我都周身麻煩，諗住必要時連滙豐、恒生股票都抵押埋畀銀行，攞啲頭寸救急嘅。o依家個市咁唔掂，好唔好索性保留性命於亂世，執咗間廠，一了百 了，以後靠滙豐恒生派息都過得世嘅──不過又聽講話滙豐派息會減半，點算好？」問清楚，廠商L太太冇買到雷曼迷債，揸咗反而可以要求賠償，o依家就輸咗冇 人知。
唔怪得話香港縮窄貧富差距最好嘅方法就係樓市跌、股市跌，有錢人冇咗三分二身家，仲唔貧富拉近？呢個市道玩死人，炒慣嘅一定輸，乜都 唔做，只要擁有基金或者股票嘅，一樣眼白白睇住家財蒸發一大截。照計應該有啲淡友做空單發財o架，奇怪嘅係，左丁山三個月來都冇聽到一位老友沽空恒指或者 買熊證搵到大錢嘅。
上星期五與今個星期一之股市大跌，應與基金被擠提有關，大家買基金，升市時越升越有，冇人會贖回，但到 咗跌市，大家怕執輸，就會爭先恐後咁去贖回，迫使基金洗倉，沽貨套現，於是股市再跌，引發新一輪贖回潮，如此產生一個尋底循環。贖回潮過後，股市會企穩， 不過到時大家又驚經濟蕭條，盈利萎縮，股市只能在低位徘徊，難以回升。
格林斯潘認錯 左丁山
2008-10-30 AppleDaily
金 融海嘯衝擊資本主義制度，制度未倒，但海浪沖死咗右派經濟專家，死剩嘅就隨風左傾，於是左派經濟思潮復興咯。素來比較傾左嘅美國自由派民主黨預料會在大選 中大勝，入主白宮，完全控制參眾兩院，將共和黨殺到片甲不留，變成一九九七年之英國保守黨（即執政多年後，潰不成軍）。奧巴馬與民主黨話晒事之後，大灑金 錢救市救樓派福利，搞甚麼十大基建之類，是所必然，如果呢套政策產生效果，美國經濟起死回生嘅話，美國資深評論員話未來一世代（二十五年），保守右派休想 掌權！
右傾供應派（supply side）專家Arthur Laffer就嘆息，富裕年代已經完結！曾一度被視為聖人之格林斯潘在國會講到口窒窒，承認自己部份錯誤（partially wrong），承認過份相信市場嘅調整機能。格林斯潘一句："Yes, I found a flaw"（瑕疵），《金融時報》因此出咗一篇報導：Greenspan's Flaw Show（按：香港話有科騷一詞，譯自夜總會之floor show）令人忍俊不禁。格林斯潘認錯，鬧埋市場失靈，未必公道。格林斯潘做聯儲局主席做得太耐，以為自己係救世主，負責守護美國經濟，於是每次只要發覺 經濟數據弱一啲，聯儲局就會減息，連續減過十七次，對房屋泡沫衍生工具泡沫與商品泡沫之形成，視若無睹，又唔肯承認股市有泡沫（bubble），只肯講有 氣泡（froth）。
o依家睇番轉頭，格林斯潘只要減少幾次息，讓市場真正有調整機會，後來之海嘯就不至於十分嚴重。猶有甚者，前財長史諾在國會指出： 「現在回看，當年得到兩黨支持的房屋政策確實太急進（支持低下階層置業），本來是一件好事，但力度太強，到現在就要承受苦果。」據《紐約時報》（自由派） 九月三十日報導，一九九二年克林頓銳意推行擴張性房屋政策，大力扶助低下階層置業，房屋部長嫌銀行唔肯借錢畀窮人買樓，就逼房利美房貸美增購按揭，引誘銀 行製造多啲按揭，轉賣圖利，於是一啲無入息無工作人士都可以借到錢買屋，由是種下禍根，追溯源頭，此乃社會主義思想之錯，格林斯潘大開綠燈，加以配合，現 在反罵市場失靈，令人好懷疑格林斯潘太老咯，開始思想失靈。
勿與股票談戀愛 左丁山
2008-11-10 AppleDaily
老 曹久經戰陣，乜嘢未見過，佢成日講畀我哋讀者聽，投資要理性，不要感性，勿與股票談戀愛。但佢嘅好心、苦心，始終未能說服投資者，散戶感性始終蓋過理性， 買入一隻股票，跌咗之後，成日話想溝淡（聽電台股市直擊節目就知道晒），點知在如今市況下，愈溝愈淡，之後就決定與股票談戀愛，不知道或者懶理樹林之大， 樹林內鮮花靚草之多，簡直目不暇給，何苦攬住一棵老樹終老？
散戶如此，見怪不怪，但著名大教授對股票談戀愛，感性至上，就令人驚奇。
前些時在公開場合講雷 曼迷你債，呼籲投資者要理性面對嘅大教授曾淵滄曾被感性散戶喝罵，當時左丁山同情佢，認為曾教授精於以數學為主嘅運籌學，講理性好合乎佢嘅形象身份。但十 一月六日，曾教授在《蘋果》講，佢有兩批八號仔電盈股票，成本價分別係一蚊與十二蚊（五合一之後折算應該係五蚊與六十蚊），電盈股價大跌後，佢自己「死守 不放」，不肯沽出止蝕，今勻又寧可將股票變牆紙，都不會接受私有化建議，即每股攞番四個二，取回揸沙。當然我哋無從估計曾教授嘅電盈每股成本價，唔知佢若 然接受私有化建議下，真正損失有幾多，但曾教授誓死不屈，就證明一旦捲入事件，容易當局者迷，感性與理性難分，分分鐘感性蓋過理性，雖賢者難免。又或者以 曾教授嘅精明思維，長揸電盈，最終會有可觀回報都唔定，不過唔知時間長成點。
花旗集團出報告，話電盈私有化價格（四元二角）有吸引力，里昂證券就話四元二 角都唔錯。建議投資者接受私有化或者將股票趁升勢（sell into strength）賣掉。證券分析師最講數字理性，里昂話賣掉電盈將啲錢買入其他，效果會更好，即係暗示電盈股價將來升幅（即使有嘅話）會跑輸大市。左丁 山從來冇電盈股票，對呢隻股票冇感性，只講理性，幾位以高價買入電盈嘅朋友問點睇，左丁山叫佢哋睇吓花旗里昂嘅分析。
金融海嘯捲金沙 左丁山
2008-11-11 AppleDaily
餐 飲M睇完左丁山嗰篇「忽視欖球賽」，來電補充話：「澳洲對紐西蘭欖球賽，真係帶來好多生意，嗰日場波散場之後，三萬幾個西人湧到銅鑼灣、灣仔買醉，間間酒 吧爆棚，我識得一間酒吧，以前在七人欖球賽時，一日做過十幾萬銀生意，但上個星期日，竟然做咗二十幾萬，啤酒幾乎賣到清倉。仲有一樣，晚上九點幾後，酒吧 開始冇人，原來啲友仔已經去晒駱克道搵人」。駱克道搵甚麼人？餐飲M話賣個關子，叫左丁山自己諗答案。左丁山從來未到過駱克道酒吧飲酒，一時之間，諗唔 出。唯一諗得出嘅，就係國際級嘅欖球大賽在香港舉行，可以吸引大量遊客來港，住番酒店一兩日，而且呢類遊客好有餐飲方面嘅消費力。
旅遊界人士宜與欖球總會 合作爭取呢類球賽在港舉行，起碼冇人反對吖。開賭場就一定有人反對。左丁山一早講過，中國國策係只容許、容忍澳門開賭，其他中國地方一概不准。但中央見到 咁多貪官、大款到澳門賭錢，益晒美國大賭場後，一於嚴禁，將港澳簽證分開，持來港簽證者，不可走過去澳門，而申請到澳門簽證者，從嚴審查。呢招一出，澳門 賭場生意大減，據澳門常客炒金M講，佢最近到澳門賭兩鋪，只見金沙、威尼斯人與永利有啲生意，其餘賭場甚為清靜，唔怪得好多過去澳門嘅廚師回流香港（餐飲 M嘅消息），受高薪引誘過澳門嘅酒店管理及前線人士，隨時失業。祖國封殺及金融海嘯兩項因素令澳門大為失色，o依家Las Vegas Sands（拉斯維加斯金沙）好唔掂，股價大跌四成幾，且傳出賴債（default）傳聞，公司生命視乎銀行是否收遮而定。大股東Sheldon Adelson過往幾年勇於擴充，舉債甚巨，今逢金融海嘯，好可能被巨浪捲走。新加坡前幾年推出興建賭場大計，金沙係中標者之一，正在新加坡大興土木。金 沙如果唔掂，要新加坡政府打救，李顯龍可能幾尷尬吓，唔怪得古人有言，謀事在人，成事在天，金沙一旦賴債，資產遭拍賣嘅話，笑得最甜嘅會係邊個？相信燊哥 會飲番杯啩！
貿易前景淡 左丁山
2008-11-13 AppleDaily
貿 易Y在九龍區工作，不常到中環，呢日居然過海搵班老友飲茶，問佢為何咁得閒呀？貿易Y嘆一口氣：「往年十一月中已經為咗貨物付運，忙到抽筋，事關聖誕補貨 最後時刻，再遲啲就趕唔切聖誕銷售嘞，但今年我得閒時，行家亦得閒，上商會查問吓，佢哋話做出口證嘅數量大減，你話死唔死吖，金融海嘯冚埋嚟，我哋唔係金 融界，一樣葬身怒海。」
聽貿易Y之言，醒起朝早睇報紙，某報有一幅圖片，就係在「疑似貨櫃碼頭內」，四位工人在貨車旁邊攻打四方城，明顯係等嘢做等到發 慌，不如打四圈麻將。船務C在旁，證實此點，佢嘆息話：「再如此下去，我哋啲碼頭航運可以炒一半人。」聽佢哋講，生意真係衰過沙士嗰陣。
沙士之時，大家怕 傳染病，貿易商遊客唔敢嚟香港啫，但外圍經濟唔算曳，仍有訂單到；今年第三季開始，訂單突然走晒，睇吓全世界最大貿易集團利豐都要裁員嘅例子，一葉知秋 啦，你估馮氏兄弟唔講面子嘅咩，尤其是大佬馮國經身兼ICC（國際商會）主席，國際貿易消息至為靈通，唔會無的放矢嘅，一定係睇通○九年全球貿易不景（世 銀亦發表預警），先至同意利豐裁員。如此環境下，特區政府仲會唔會提出興建十號碼頭？
船務C講：「起來做老鼠宿舍呀？」眾人大笑，但又覺得笑唔落，貿易唔 掂，金融唔掂，特區四大經濟支柱失其二，旅遊零售又唔慌好得去邊，加上兩岸不日三通直航，雪上加霜也。講到前景如此低迷，食飯幾乎冇心機，雖則話中央宣佈 以四萬億元人民幣救市，今年第四季先用一千億，但以基建項目為多，益唔到香港幾多。貿易Y話：「救市措施似乎忘記一條，就係撤消奧運期間實施嘅臨時保安措 施，嚴限外國人到中國。現在外國人申請簽證，手續麻煩，每朝八點零就見到百幾二百個老外在華潤大廈排隊申請簽證，中國直情係趕客，好多外籍人士到深圳係驗 貨傾訂單嘅，o依家奧運過後，中央唔記得回復奧運前嘅簽證制度，其實係窒礙救市！」
有消息真好 左丁山
2008-11-14 AppleDaily
買賣股票如要洞悉先機，原來有時要緊密注意領導人嘅行蹤。港股於十一月七日上午曾下跌517點至13273點，但中午傳出滙豐減息消息，又話周末時份中央會推出平準基金救市，於是股市反彈，升到14243點，高低相差970點，早上沽貨者，喊都無謂。
到 咗十一月九日星期日，中央宣佈四萬億元救市，星期五低點沽貨之人更加冇癮。根據星期六（十一月八日）《大公報》與彭博嘅消息，國家財政部長謝旭人於十一月 五日上午十一時（秘魯利馬時間）抵達利馬出席第十五屆亞太經濟合作組織財政部長會議，一抵步就收到通知，即刻返回北京。謝旭人飛咗三十二小時先至去到秘 魯，跟住又要飛三十二個鐘頭返京，即使係鐵人都會攰死，佢未免有啲怨言。乜事咁緊張呀？計吓時間，謝旭人大概在北京時間十一月七日早上落機，然後參加緊急 會議，一個冇財政部長唔得嘅會議。跟住十一月九日就宣佈四萬億元救市計劃。如果我哋一早知道謝旭人喺十一月五日被急召回國，你話會沽貨還是入貨呢？係好消 息還是壞消息呢？其實事前知梗係好過事後知，照計都係會入貨，即使唔入市，都唔會沽貨嘅啫！
我哋成日後知後覺，冇辦法，只 能在十一月十日星期一睇住股市在星期一勁升，但奇怪嘅係，公用股如煤氣、中電、港燈、電盈等全線下滑，其中中華煤氣（0003），跌得最多，唔見咗九毫 六，星期一收市報14.04，跌咗6.4%，問吓市場基金經理，據報係一個海外基金要錢唔要貨，將持有嘅公用股悉數出售所致。既然如此，呢類股份值得留 意。朋友Ｈ持有電盈好耐，成本價二十萬元，如照星期一收市價三元四角計，值回一萬三千六百元，朋友Ｈ問點樣辦？左丁山叫佢先睇周一之《金融時報》Lina Saigol 以及《華爾街日報》Andrew Peaple兩篇分析。Lina話小股東應該拒絕私有化，Andrew就勸小股東與PCCW講拜拜，接受四元二角嘅私有化價錢，因為以呢個價錢嚟 講，P/E（市盈率）係12.4倍，而中移動、聯動、中電信三隻中國同類型股票嘅預期P/E只係10倍。Andrew認為電盈前景不佳，香港經濟陷入困 難，小股東以四元二角賣出，一定虧本，但可以將賣股所得投資於更有前景嘅股票上。《金融時報》與《華爾街日報》兩位作者，一女一男，觀點不同，朋友Ｐ話： 「信邊個？」
出口維艱 左丁山
2008-11-19 AppleDaily
曾 特首到東莞訪問，唐司長到深圳見深圳市長，究竟為乜？當然係表達特區政府關懷香港企業在珠三角地區嘅發展，以示在金融海嘯之下，港府會盡力幫助中小企，另 外一層意思係特區重視兩地合作，政府阿一與阿二齊到內地視察，就係要傳出一個明朗信息。
有唔少企業客戶在內地開廠嘅律師Y呢日在晚飯時間碰到左丁山，傾起 東莞深圳一帶情況，律師Y搖頭嘆息話：「十分曳，我都好擔心，東莞市政府更擔心，舊年佢哋牙擦擦咁講要將產業升級，趕走三來一補、低增值企業。但今年講乜 嘢呀，就係要求港企留低，唔好走，曾特首到東莞，唔多唔少係順應內地請求，幫手向留在東莞嘅企業打氣而已！」有得做，冇話唔想留低嘅啫，有冇訂單，有冇 L/C（信用證）開過嚟吖。律師Y話這正是問題所在：（一）歐美訂單不濟；（二）即使有訂單，對方開唔出L/C，因為歐美銀行可能向買家收緊信貸；（三） 即使有L/C出到，香港/內地銀行未必肯接受開證銀行嘅L/C，因有對手風險（counterparty risk），銀行未必信銀行；（四）即使前面三個關口過埋，港企未必能夠好似以前咁樣可以向銀行取得打包貸款（packing loan或稱pre-export loan），或者攞到，成數都未必有以前咁高。你話由爭取訂單至到成品出口，o依家有幾艱難呢！」
總之金融海嘯之後，一向以為理所當然嘅生意過程，已完全 扭曲晒，不再一樣，唔知幾時先至可以恢復舊時狀況。雖則話歐美買家早已唔願開L/C，強迫珠三角企業放賬（open account），律師Y話經此一役，或者所有生意關係，所有國際貿易持份者，尤其是最重要，不可或缺嘅銀行，必會重新界定角色與風險承受能力。唔諗得太 遠咯，目前只講如何求存。律師Y勸告：「如果你要北上消費玩樂，現在就要認識風險海嘯之後，珠三角百業不景，男盜女娼人數大增，街霸攔途截車搶物，閒過立 秋，我一位老友自高爾夫球場出嚟，揸車返香港，未到深圳已經被飛車撞擊兩次，一次賠三千，一次賠二千人民幣，問你驚唔驚！」賠者，被路霸勒索也，冇現金在 身，喺上面唔好揸車呀。
基建非仙丹 左丁山
2008-11-21 AppleDaily
建 造業工人上街遊行，要求十大基建快啲上馬，以紓緩建築界之失業問題。本港建造業過去十年，的確興旺期短，不景氣長，從業員不論資歷階級，皆受失業威脅。不 過呢次裁員潮，來得太急太快，半年之前，新進建築師Ｌ先至同左丁山講：「搵工好易啫，我行上去鰂魚涌一間大建築師行申請職位嘅話，可以立即返工。」言猶在 耳，呢間大建築師行已經話裁咗七八十人。點解咁急呢，澳門金沙擴建工程停工是其一，杜拜放緩是其二，杜拜最大一間發展公司Emaar已經叫停一啲工程，大 家唔好以為澳門冇得做，可以去杜拜搵工。
國際油價由七月十一日之高峯，每桶一百四十七美元，下滑至近日之五十五美元左右，唔見咗六成三，你估中東會唔受影 響咩。香港推行高地價政策托樓市，政府一再聲言不肯「賤價賣地」，於是勾地困難，地盤開工少，建造業只靠基建開飯，而基建必須不斷諮詢立法會、區議會與市 民，人人有意見，有聲音，啲基建項目想話盡快上馬呀，不妨參考吓西九與啓德項目，淨係諮詢、策劃都搞咗十年啦。大學人士來電，講及各大學擴建迎接二○一二 年四年制，佢話只有三年時間，拼命開工都未必趕得切，但半年至一年前之招標、適逢澳門杜拜好景，物價狂漲，故此工程預算比較高，收齊之後，申請撥款嘞，點 知碰上金融海嘯，建造業工人失業，於是尊貴的議員立即批評，話可以拖一拖，再計過數。
冇話唔得嘅，工程無可避免會拖慢，故此大家心急如焚，唔知趕唔趕得切 在二○一二年暑假完成大部分工程。不過工程開展得到，亦只係惠及建造業、工程界人士啫，畀銀行裁走嘅銀行產品銷售人員，唔通可以立即轉型做地盤工人咩。所 有政府救失業嘅方法，只得一道板斧，就係基建基建再基建，不理效率及浪費社會資源。在以服務業為主嘅紐約、倫敦、香港，基建難以阻止失業率上升，特區政府 唔好給予市民太高期望，以為十大基建係仙丹。
Next Page