📖 ZKIZ Archives

去年年中，內地A股擺脫多年悶局，在中央政府政策全面推動下爆升，上綜指數由2,000點水平上升一倍多，升至4,000多點。

至於港股，去年九月，亦一度突破一○年十一月24,988點的高位，升至25,362點。之後出現佔領運動，恒指在23,000至24,000點水平徘徊，到今年二月才再出現突破。近月資金流入香港，恒指在一個月內上升3,000多點，就連低沉已久的滙控，也出現「大笨象會跳舞」的現象。每次股市起動，傳媒總會找股評人評論後市去向。筆者不是股評人，但由於認識不少傳媒朋友，也成為追訪對象。例如去年9月，當恒指升上25,000點時，《壹週刊》記者便找筆者及幾位投資界人士訪問，並要求推介一隻股票。當時恒指處於高位，實在難以推介股票，但見到內地A股股價仍低於本地H股，便建議購入南方A50（2822），該股份至今已上升接近一倍（連同股息）。到去年十二月，上綜指數升上3,000點，記者又追訪，今次筆者則建議買入恒生H股ETF（2828），該股份至今已升超過三成（連同股息），足夠跑贏大市。到今年一月，筆者在另一財經週刊建議換馬華夏滬深300（3188），覺得南方A50以內地金融股為主，未來升幅會放緩，應考慮分散投資至其他行業，亦準備迎接「深港通」。過去數月，滬深300亦能跑贏南方A50。其實股票投資可以很簡單，購入約十隻自己熟悉的股票，再加一些追蹤大市的ETF，適當時候換馬，要跑贏大市並不困難。過去五十年，若剔除九七年，恒指每隔大約七年（六至八年）一大旺，對上三次高位分別是九四、○○及○七年。若歷史重演，去年至今年恒指將步入另一次大升市。這又難怪《壹週刊》要加強財經內容，找筆者開班和大家分享投資經驗。

林本利

前香港理工大學會計及金融學院副教授，二十多年投資經驗，強調中長線、價值投資法，個人投資的回報，平均每年接近兩成，熟悉本地及內地電訊、能源及交通市場發展。http://www.livingword.edu.hk

「插花嚟嚟去去都係咁，好多前輩經營咗網店好耐，但都只得幾百個like。」三十三歲的何漫碧（Becky）一三年八月開設網上花店Hahahaflorist，主打以六、七種鮮花組成的花球，短短半年已月賺兩萬。去年三月，她膽粗粗辭去飲食記者職位，於太子花墟附近租下一個連露台單位，開業教班，盈利立刻由兩萬倍升至四萬，其中一個賣點是以真玫瑰砌成一朵比頭更大的玫瑰花，吸引不少OL爭相報名。旺季賣花束花球，淡季開班，月賺四萬元。Becky頻呼好彩才有今天的成績，但其實每行一步，背後都下了不少苦功。

大玫瑰班每位學員索價近一千八百元，臨近母親節，仍供不應求。上週三晚上，八個學員在Hahahaflorist位於太子的課室內，仔細修剪花瓣，再如做勞作般，一片片貼上紙托。學員清一色為女士，除了OL外，還有化妝師，及一個專程由澳門來的插花師。她不諱言是來支持Becky，而Becky亦不介意有行家來偷師，她解釋：「YouTube都有教整大朵玫瑰花嘅步驟，但整得靚就唔容易，我試過好多次。插花係藝術，其他人抄唔到。」

上位靠包裝

學員大多衝着Becky的「名號」而來，皆因她甚懂得利用facebook的專頁，將自己和生意融為一體。「如果like完之後唔睇，幾多like都無用。要成功，你要好似一個偶像咁，有一批忠心嘅粉絲，佢哋會不停留言或介紹俾朋友。所以要同佢哋做朋友，同佢哋分享好多嘢，令佢哋好似認識我一樣。」Becky指設立專頁初期，只擺放花球相片。冷冰冰的相片，反應冷淡。之後她改變策略，大部分相都有花有人，部分是她自己，或身穿婚紗的客戶，或來上堂的學員等，減輕硬銷賣廣告的感覺，加強親切感。另外，她亦將自己的私生活「大公開」，由與媽媽飲茶，到去旅行等，都會與網民分享，無非為拉近距離。這個策略成功令Becky儲下一班忠實粉絲，一開新班，就成為頭批學員，省卻不少宣傳費。另外，過去的情人節，有花商指訂單會少三至五成，但全因粉絲們的老公、男友都識做訂花，所以Hahahaflorist的訂單不減，反比上年升了一倍。Becky不時在facebook向粉絲們賣口乖：「Hahahaflorist你哋有份起o架，這裡嘅一點一滴都係大家慢慢地建立起來嘅。」

賺錢靠走位

Becky最初主打每人收費千八元的花球、花樽班，但發現學員反應開始冷淡。「最初推出一個鐘就爆滿，但開得多好快悶，後來過了一天仍只有八成滿。」雖然生意額都不錯，但Becky預見反應只會愈發冷淡，立即度橋變陣。當時，她在YouTube見到教大玫瑰的片段，認為甚有噱頭，便開始自學，並於二月正式開班。「而家啲人最緊要影到靚相，可以在社交分享拿like，好多人為此而來。」Becky指大玫瑰班一開即爆，客人Kayley更表示：「我試過好幾次報名，想做一朵俾媽媽，但每月只開幾班，好難先報到。」 Becky現時每個月開設七班大玫瑰班，及四班花球班，以前者毛利最高。當日開班前，記者跟Becky去花墟拿早已預訂的玫瑰花，發現成本只需四千多元。以一班八人計，收入達一萬四千元。即單是大玫瑰花班，每個月已有七萬元毛利。故記者懷疑Becky一個月不只有四萬元純利，她表示不是每班都全滿。而其他插花班用的花，種類較多，成本較高，扣除花材後每班只賺幾千元。為了保持新鮮感，Becky亦曾找化妝師合作，開設頭花班，迎合一班喜歡私影的粉絲。

轉行靠自學

學員眼中的花藝師Becky，原本是一名飲食記者，畢業於新聞系，與插花風馬牛不相及。「媽媽喺中環開花店，而家已經冇做。自細接觸得多花，便試吓喺屋企插花及紮花球。」Becky指坊間插花班的導師，都有不少「沙紙」做招徠，而她只是上過一些業餘插花班。「插花係藝術，好個人化，唔需要咁多沙紙。」不過，Becky曾為學習包花的技巧，在city'super花店門前站了一整天觀摩，她表示：「自己包得唔夠靚，去睇人包又唔使俾錢，不過要企一日都幾辛苦。」Hahahaflorist沒有網站，靠facebook專頁營運。為了在眾多網上花店突圍而出，Becky亦在網上自學如何管理其專頁，「在Yahoo! search吓就會搵到好多網站教人，唔使去上堂。」Becky指，原來facebook專頁的發帖，不是每一個like了該專頁的人都會看到，而是根據上一個post的回響，而決定下一個post送出予粉絲的數目。「所以我唔會亂發post，post咗之後，亦會留言和粉絲對話。」Becky亦按網上教授的策略，選在最多人用facebook的時段，即午飯、放工與晚上十一時發帖。五月一號晚上公布本月開班的時間表最為重要，她先於當天下午貼出新產品——花花蛋糕，吸引紛絲的注意，以增加接下來開班帖的曝光率。

一人公司遇樽頸

Becky成功將自己包裝成為Hahahaflorist的代言人，千方百計拉近與粉絲的距離，但亦令她們抗拒其他插花師，以致Becky遲遲未能請人，至今都是「一腳踢」，有時太忙甚至要推訂單。曾經有集團有意請Becky為旗下的酒店、餐廳擺花，不過因為只有她及一個兼職員工，未有能力為該集團提供穩定的服務而告吹。大生意「啃唔落」，Becky就想辦法開拓另一條路線，就是以Hahahaflorist的品牌，推出其他產品。最近，她就與麥當勞叔叔之家合作做義賣，之前又與歌星周柏豪等合作，「呢啲合作其實錢賺得唔多，準備時間仲好長，不過同品牌或者明星合作，可以令人對Hahahaflorist更加有信心，亦做到brand building效果。」Becky目標是做到讓人想起Hahahaflorist不是聯想到花鋪，而是一個有藝術感覺的品牌，接下來可以推出例如杯、枱墊等家品，做不用持續投放時間的生意。成功轉行的Becky笑對記者說：「傳媒已死，你都快啲轉行啦！」

大玫瑰做法

營業資料（4/15）營業額$108,000租金$12,000人工$6,000#花材$50,000盈利$40,000#一名兼職

開業資料（8/14）裝修$100,000租金$36,000^傢具$30,000總投資$166,000^兩按一上

港股大時代，迎接牛市，全民皆股。單是四月，恒指已累升超過三千六百點！踏入五月，「五窮六絕」已被拋諸腦後。恒指高位徘徊，但人人都話升勢未完，一眾心思思的散戶想入市，無非都是想要一個「冧巴」。今期，本刊開設一個擂台陣，找來城中十位人氣最高的股評人「互揪」，點評大市，再加一人推介一隻心水股。三個月後，再來一個結算，贏家輸家，毋須牙擦擦，到時自有分曉。擂台規則

所有推介股票，以本週四開市價計算，三個月後即八月六日（星期四）埋單計數。預測恒指升幅最準確、推介股票升幅最多者勝出。

陸叔（陳永陸）裕陸控股創辦人

正所謂「五窮六絕七翻身」，估呢幾個月走勢有啲難度喎。而家個市係資金主導，但啲錢到唔到位、點樣到都未知，又難評估。公募基金未落嚟已經炒起晒個市，我睇五月應該有個調整，五月中後期資金會到，六、七月應該會升上去。我睇恒指高位會升到30,000點啦，調整期間跌到26,000點就好入市。而家好多股票都升晒，要搵隻追落後都難，唯有揀啲調整緊嘅股票。我嘅策略係最早升嘅股票，會最早調整，所以睇好中交建（1800）。「一帶一路」概念一出，所有鐵路股炒起一輪，中交建$10起步，最高上過$17，而家跌番一半，加上佢會分拆旗下的中交疏浚上市，應該七月成事，所以當佢調整到$13.5就要吸納，三個月有機會重上$17。

青姐（胡孟青）獨立股評人

嚟緊呢季，32,000點實破o架啦，頂係要嚟破嘅！當年科網股泡沫爆破，納斯達克由高位跌落嚟，好多人都話有生之年都見唔番個高位，咁近排都過咗5,000點啦。而家周圍都QE，就係因為錢太多，銀行利息太低，所以啲資金要泊晒落股市。而家個市都搵緊新嘅催化劑，下一個應該係深港通。政改唔得，深廣通都一定得，人哋都出晒口術！我年頭推介過萬達商業（3699），而家都行咗啦。嚟緊梗係推萬洲國際（288）啦。而家好多板塊都行晒，佢有$700幾億市值，夠大隻。個市一路炒概念，良莠不齊都升晒上嚟，係未輪到佢。隻股而家仲潛緊水，起碼上番去招股價$6.2。食品股從來未炒過，佢大市值，多大行睇，夠穩陣，中國人一定要食豬肉o架啦，一定係佢﹗

郭Sir（郭思治）耀才證券市務總監

今年為止每一個月恒指都係升，累積升幅已經唔少，而且上個禮拜起港股成交金額回落咗，即係話個市向上推升動力唔夠。我認為個市而家都升快咗，五月份需要調整一下。中央取態都係想個市穩定咁升，所以會定時出啲政策，加上近期外圍因素唔太好，個市都係走向整固為主，預料未來三個月都係28,000到29,000窄幅徘徊。我建議大家留意吓港交所（388），因為等深港通開咗，港股成交就唔止而家一、兩千億咁少，港交所絕對係直接受惠。如果個價去到$280左右，可以買一注，要睇吓成交金額，如果港股成交金額有突破，可以上到去三、四千億，港交所個價上到去$350都有可能。

天才經紀（梁杰文）宏高證券投資經紀

五月都係上落格局，成交咁多，恒指應該可以保持高位，唔會大跌。三個月後恒指升到咩位，要視乎有無深港通，因為呢個係股市最大支持。如果有，恒指會升到上30,000點，如果唔得，我就擔心股市會跌番去25,000點。你都知中、港經濟好一般，香港旅客少咗，拖累其他行業都差，依家係靠阿爺放水撐住個股市。個股我睇好港交所（388），都係搏深港通會開通。港交所嘅盈利好簡單，成交額多佢就賺得多，一蚊生意就有一蚊盈利。而家佢乜都唔使做，每日就有一千五百億成交，幾好賺。我睇佢會升到$388，哈，講吓笑，$350至$400啦。

渾水獨立股評人

大市我唔識睇，唔係扮嘢，係小弟才疏學淺，淨係識炒細價股，唔好意思。我睇好民生珠寶（1466），因為佢係由民生國際（938）分拆出嚟，自從上市之後未有大炒過，非常細粒，市值只有4億銀，而且非常貨源歸邊，主席鄭松興揸住超過60%，好有賣殼概念。佢現價$1.46，目標價$3！

Alex（黃國英）豐盛金融資產管理董事

三個月後走勢，要視乎有冇大陸佬喺度，而家齋吹有好多錢會到之嘛，其實港股通個額度用咗好少，又話要俾時間公募基金成立，多多藉口，之後唔可以再靠吹，要真係有錢到啦。短期個市係驚o架，因為外圍插到乜咁，美債又大插，即係啲人準備加息，其實外圍氣氛唔好，只係香港唔理照炒。三個月後，正路大陸佬啲錢會到嘅，所以我睇恒指會高過○七年高位，即係32,000點。要買梗係買騰訊（700）同中移動（941），因為大陸最欠缺呢啲大型科網股同電訊股，只此一家就係香港，啲公募基金一定會買。我睇騰訊可以升到$200，中移動可以升到$130。兩隻要揀一隻？黐線o架？呢個時勢仲玩一注獨贏？食家興板塊輪流炒呀，我買嘅股票數目，都要比以前多一倍呀！你買得一隻，淨係唔升你嗰隻點算呀？得一注錢你就唔好賭啦。

股壇師奶殺手（鄧聲興）君陽證券董事兼行政總裁

預料嚟緊呢三個月，恒指都會上試30,000點，不過阻力就會比較大，未必咁容易突破住，因為恒指累積升幅都唔少。而家香港同內地股市都幾緊密，如果內地股市係咁上，H股差價就會大，資金又會落番嚟炒H股，今年「五窮六絕」未必應驗到。我睇好中資證券股份，主要國家政策要發展資本市場，同埋寬鬆政策，都對股市有利。內地人炒港股，多數都會去番內地行開戶，對佢哋業務上都會有幫助，我自己會推介國泰君安（1788），本身上年業績都靚，今年開戶量大增，預料業績以倍計上升，三個月內上望$15。

小炒王（梁心欣）獨立股評人

四月減完存款準備金率，五月應該會減息，因為上次個模式都係咁，所以呢幾日重債股都受惠，紙業股、內房都升好多。八月我估個市會升穿○七年高位，即係高過32,000點，因為到時深港通應該出咗。如果內地投資者獲批買創仔（創業板）咁就升得更勁，你知唔知今年以嚟，內地創業板已經升咗90%，只係四個月喎！短線我睇個市會好chok，因為啲錢未到，而家都係炒大股多。但我就睇好中遠國際（517），搏佢做船業合併，之前航運股爆升佢都唔升，有得追落後，再加上佢有$61億現金喺手，一隻現金牛跌極都唔驚。現價可以買啦，目標倍升到$10，我之前冇介紹過佢o架，秘密武器！

沈大師（沈振盈）訊匯證券行政總裁

我就唔信五窮六絕，過去十年出現的命中率少過一半。五月會有一個中期調整，因為之前升得多、升得急，加上希臘債務問題個個月都要傾；美國加息雖然維持不變，但今個月八號出嘅就業數據係一個關鍵，有機會借勢調整。內地監管機構又叫人冷靜、量力而為，唔好將慢牛變快牛，以A股之前升得咁急，有機會要調整。以技術走勢嚟講，我睇三個月後，恒指高位可以見34,000點，低位就27,600點。我睇好人保（1339），好簡單：第一業績好；第二估值偏低；第三累積升幅係行業中最少，目標價大約$7。

Matthew（郭家耀）中國銀盛財富管理首席策略師

我對後市睇法仍然樂觀，個市喺上個月都升咗唔少，短線有整固係正常現象，但喺內地政策背景之下，以目前嘅通脹水平，人行有足夠嘅空間再放水，而且中央都強調增長係首要經濟任務，所以嚟緊降息降準機會都相當高。喺央行鼓勵投資者之下，加上資金持續流入港股，呢一季恒指都會睇好，我預料七月尾恒指可以企穩30,000點。如果手上無太多貨，又睇好恒指前景，指數ETF都係一個唔錯嘅選擇。深港通好大機會喺呢季公布，A、H差價題材仲會有得炒，但係相對估值合理而又受惠到放水，我建議要留意吓啲內房板塊，中央針對房地產嘅政策放寬咗，好似限購、首套房貸咁。碧桂園（2007）自從中國平安入股之後，對佢發展都相當有利，同埋佢嘅物業銷售量一直都做得好好，相信未來業績都會反映到呢啲因素出嚟，股價呢排都升咗唔少，但係我相信繼續破頂機會都幾高，七月尾可以上望$6。