| ||||||
| 教 育局強硬要求教科書出版商於今年九月開始嘅學期（一○/一一）將教科書嘅課本與教材分拆出售，理由係減低課本售價，有益家長。書商抗辯話事出倉卒，要求分 期實施，起碼延至一二/一三學年才開始，教育局唔肯，同時亦講咗自下學年開始，學校不准接受書商贈送教材，若果要，就學校出錢買，但教育局唔會撥款畀學校 買教材。學校有冇錢買呢？張文光議員係教育界功能組別議員，最懂得學校與教師情況，佢話學校唔會有餘錢，教育局最好「專款專用」，撥錢畀學校買教材。教育 局又係唔肯啫，一啲校長話，教材冇乜大用嘅，老師可以針對自己學生需要，編寫教材，仲實用得多。但有一位曾與張文光競選議員席位嘅何漢權就曾經在電視台抨 擊此乃校長思維，校長乜都叫老師做，老師一日有四十八小時，有三頭六臂乎？ 你話信邊個？左丁山當然信張文光與何漢權呢兩位 教育界人士，佢兩位為咗選民利益（教師利益）先至大聲疾呼嘅啫。分拆教材，家長買書可以慳番幾多，暫時唔知，但一啲巨型辦學團體真係醒目，識得偷步，在一 月底已經發出招標書，邀請書局投標，供應該辦學團體屬下小學進行二○一○/一一、二○一一/一二兩年學生課本、作業及補充教材之投標。一位書局老闆收到標 書，檢視供應課本條款，睇到第4.7條，大叫慘也。據佢講，第4.7條係教師用書，寫明：「依據屬校在指定日期前，承辦商須自費提供足夠的教師用書及光碟 給學校使用（或按教育局不時發出的最新指引執行）」，老闆話，此條款厲害之處在於（甲）指定日期前，即係邊一日？如教育局正式發出通告，話明二○一○年七 月十五日以後學校不准收取免費教材嘅話，學校將指定日期訂為七月十四日，怎辦？（乙）自費提供，即係贈送；（丙）足夠的教師用書及光碟，即係任學校索取。 書局老闆嘆一聲：「目前情況完全未明朗，我哋點樣落標呀？辦學團體店大欺客，趁教育局未正式定案，乘機要求書局送教材啫！」哦，唔怪得教育局話學校有錢買 教材，個個辦學團體要求「自費提供教師用書」嘅話，直情唔使用錢啦。呢個辦學團體果然經驗豐富，老謀深算。 | ||||||
| ||||||
| 記 者G跑慣地產新聞，過年前已收到不少請柬，請佢參加地產界春茗，令佢應接不暇，佢捉住一位相熟嘅地產代理董事L問：「牛年好好景，故此虎年大排筵席噃。可 記得舊年你哋一係老早聲明唔擺春茗，又或者臨時取消春茗嘅？」董事L答：「牛年點同呢，鼠年有金融海嘯，牛年年初大家都好驚，又怕畀人批評我哋大花筒，咪 要扮低調，以示共度時艱囉。今年唔得喇，勒都勒唔住，佣金收入大爆燈，一月賣個滿堂紅，二月、三月繼續氣勢如虹，你話公司唔大擺春茗呀，啲代理唔肯過你， 我哋真係好好景，唔講得笑！」代理咁好生意，一要多謝內地同胞，二要多謝跨國公司湧嚟香港開分公司或地區總部，第三至到多謝本港闊佬多，買樓買到上癮，有 位老友記為咗感冒要隔離自己，唔住酒店，索性買多一層樓，以備感冒時獨自居住，以免傳染家人。我哋當初笑佢銀紙識得咬佢，唔用就會身痕呢，o依家佢又笑到 四萬咁口嘞：「哈哈哈，買咗一層感冒樓，升晒值嘞，以後一世睇醫生都唔使再籌錢！」 有錢就識得搵錢，身無長物者永遠上唔到樓。地產分析師顏 偉洪話利率低至近乎零，買樓絕對合乎理性。佢所言有理，但正如左丁山以前引述另一位分析師講過，各國政府人為地㩒低利率，扭曲晒資源分配，資本分配，為社 會不穩定，為貧富懸殊埋下深層炸彈。零息一定鼓勵炒風，催谷泡沫之形成，打擊儲蓄意欲並且令普通打工仔冇心機正常工作。據賓架界耳語，金管局總裁陳德霖一 上任就注意到呢個問題，但因為聯繫滙率不准郁動，香港不可能脫離美國低利率政策，陳總可以做嘅唔多，只能在行政上抑制吓豪宅炒風而已。 左丁山心為之危，主張盡早退市加息，公共財政政策唔係只識得救市，只識得托住股市與地產嘅啫，加息係一個最好嘅調控/平衡方法，阻止泡沫，明益退休及儲蓄人士，久唔久就派糖，小恩小惠於事無補，派得多就被認為理所當然，唔派會俾人鬧，非長久之計也。 | ||||||
| ||||||
| 多年不見嘅餐飲C突然來電，話佢自北京回港過年，年初九先至返京，約左丁山到福臨門飲茶。十幾年未見，幾乎唔記得佢嘅樣子，走上福記二樓周圍望之際，聽見有人嗌住，原來係餐飲C相認，幾乎想話來一個熊抱，不過男女授受不親，公眾場合來一個這麼樣的動作，驚俾人誤會噃。 餐飲C當年自美國回港搵工，得靚女賓架W介紹相識，當時自己仲有些少牙力，不比今天要睇人面色，於是推介佢入一間酒店工作，酒店立即派佢上京，不料一去十幾年，今時至再見面，好彩左丁山手機號碼二十年不變啫。 餐飲C細說京城工作，原來佢已從酒店餐廳喼頓，成為幾間北京食肆嘅老闆，有鳥倦知還之意，想在西九龍豪宅買屋，回港一展拳腳，吼機會再開辦餐廳。嘩，西九豪宅喎，左丁山可望不可即，餐飲C在北京大概搵到真銀，後生果然可畏，自愧不如。 點 解要返香港，唔留在北京，去上海，或者回美國與父母團聚呀？餐飲C話：「睇來睇去，以香港最好，本港有活力，有法治，有效率，一到赤鱲角機場，人就精神 晒，知道everything works，我決定以香港為家o架嘞。」美國城市對佢嚟講，已太過沉靜，上海太過紛亂。好，左丁山歡迎佢回歸，但餐飲C加多一句：「香港年青人要闖天下， 住在香港太舒服咯，最好北上尋找機會掘第一桶金！」 次日到陸羽飲茶，餐廳羅帶來一位意大利朋友P，朋友P在港二十年，未夠四十歲，已經搵 夠，現在只係做吓餐飲顧問，打吓風流工。問佢點解搵到錢仲唔返鄉下，朋友P話：「講笑咩，意大利經濟三十年來未好過，人民平均月薪係一千二百五十歐羅，好 窮，我一早醒目來港闖天下，已經俾香港縱壞咗，上星期我返意大利北部滑雪，住在米蘭兩日，夜晚走在街上，好驚俾人搶劫，呢種不安全感覺，我在香港從來都 冇，但返到祖國，個人就開始驚驚哋，香港治安好好，有法治，公共交通方便到極，直情係我眼中世界上最好嘅城市，點解要返鄉下呀！」咦，佢嘅想法與餐飲C完 全相同，曾特首可以搵佢為香港賣廣告！ | ||||||
| ||||||
| 去 年十月，特首發表施政報告後，出席三台聯播嘅烽煙節目，一位女士在電話中話自己係醫生，會嫁一位律師，但兩人無力負擔一層港島市區嘅住宅單位，當時特首回 答話：「新界仲有好多四千元一呎嘅單位。」新入行嘅專業人士的確好難一開始買樓就買入港島區單位，閒閒地七八千至一萬蚊一呎，好難出得起嘅，除非父母代交 首期及交易費用啦。 言猶在耳，元朗區新樓盤開價五千二百蚊一呎，已經唔係四千元一呎咁筍價咯噃。記得九一年間，中半山帝景園開盤，就係呢個 價錢咁上下，當時人人話幾貴，殊不知今天元朗區樓盤已經係呢個價。今日星期四適逢財政司司長曾俊華出席三台聯播節目講一○一一預算案。如果有聽眾打電話問 曾財爺：「邊度有四千蚊一呎嘅新樓呀？」財政司唔知會提供乜嘢答案呢？ 前日吃開年午飯，由天真許主持，席上有地產代理權威S在，問權威S點解新樓越賣越貴，S先生話：「銀行水浸。銀行願意以HIBOR為基準，提供按揭貸款，目前供樓利率可低至一厘。而收租回報率可以有兩至三厘，制唔制得過呀？要鬧樓市有泡沫，首先要鬧低利率政策。」 正 因為呢個政策冇得鬧，人人惟有按遊戲規則辦事，即係在銀行水浸之時，乘機大炒特炒，或者借到供款能力上限嚟買樓，S先生話銀行按揭部收到上司指令，要加大 按揭生意指標，為咗交數，一位銀行職員何止請地產代理吃飯呀，更熱心到陪同地產代理去睇樓，幫埋手游說買家入市，拍心口話：「銀行估價一定到位。」最絕 嘅，就係有一間銀行職員直接向地產代理公司老闆呻：「你位代理嘅嘴頭唔得噃，冇法子說服個客入市嘅，我幫埋口佢都講唔掂個客。」收到如此電話，老闆為之愕 然，估唔到銀行為咗做成單按揭，仲猴急過佢位靠佣金為生嘅夥計！既然銀行大放水喉，有錢交首期嘅，唔買樓自住會覺得好蝕底，純炒就更開心，因為炒樓資金直 情接近零成本吖嘛！曾司長面對如此局面，有何辦法？睇吓今朝佢會點講？ | ||||||
| ||||||
| 馬 會宣佈網上直播球賽，呢啲球賽並附設即場投注，一啲人視之為增長賭風，講到大一大。其實，以左丁山睇，報紙體育版最助長賭風，報告足球賽果嘅標題竟然會係 「曼聯唔益人」、「正氣阿仙奴」、「巴塞輸死熱門客」呢類，仲唔係以賭波角度嚟報導/評論足球賽事？體育版嘅賠率簡簡單單就得啦，點解要好似賽馬五程績咁 寫到花多眼亂呀？不過這年頭，報紙素來只懂鬧人，不懂、不肯檢討自己，但讀者唔係蠢人，你估睇唔到嘅咩。 睇網上直播而賭波，相信係少數人所為，而賭波賭到一啲三四線賽事、南美賽事，簡直搵自己笨，非精明人士所為，如果要賭，落注英超、西甲、意甲已經夠晒啦，晚晚下注之人，或者一再下注三大洲球賽之人，輸錢機會好大，長賭必輸，乃不易之理。 香 港人多有理智，賭錢唔會笨，病態賭徒只係極之小撮，如果要以偏概全，大張旗鼓咁話香港賭風熾熱，請以數字數據說服我。香港從來都唔開賭場，以後都唔會，只 有賽馬與足球可以投注，香港特區政府何來助長賭風呢？即使係賭馬與賭波，亦無人從中得到金錢利潤，盈餘由馬會呢個非牟利機構分配，每年派十億元作慈善用 途，與澳門、新加坡、拉斯維加斯之私人公司經營賭場，可以上市賺大錢嘅情況完全不同。 有人話「以壓抑賭風作為容許馬會壟斷經營的藉口，根本 就是徹頭徹尾的偽善」。左丁山素來主張市場競爭，自由開放，但在香港來講，足球博彩如何引入競爭？世界上有好多賭博娛樂公司如金沙、永利、美高梅、澳博、 William Hill等等相信都極希望開設賭波，但呢啲全部係以牟利為目的嘅私人公司，香港社會如何能夠容許佢哋在香港開業，賺大錢入自己荷包？政治上完全不可能。講 政治、講經濟，除理論之外，要兼顧現實，否則就係書生空議論。要引入足智彩競爭，不是不可，但大前提係上述一類公司必須放棄牟利，要將盈餘撥作慈善捐獻。 假如書生搵到，或者勸服呢類公司肯制─投資一大筆而不望利潤回報─先至可以講引入競爭。上課講書講競爭可以有好多假設，在現實環境，更加要講得實實在在， 咪空口講白話。 | ||||||
2010-03-03 AD
| ||||||
| 上 到陸羽飲茶，見到餐廳羅帶來一位外籍朋友，身高一米八，重大約二百磅，大隻中年漢也。問佢做邊行，中年漢話：「我係廚師T，專做地中海菜，今次返嚟香港， 在餐廳羅間餐廳客串三個星期，做示範菜式。」咦，律師W、糧油M聽到，立即話約好日子一齊去試吓，左丁山就問多幾句：「你做過乜嘢餐廳呀？邊度人呀？有乜 心得呀？」 廚師T一一道來，阿媽係德國人，阿爸係希臘人，自細移民澳洲，在雪梨長大學做廚師，藝成後離開澳洲，已有十五年，以前在香港文華 東方做廚，去過杜拜五星酒店，未返香港前，在斐濟群島五星渡假酒店做咗三年，似乎經驗幾豐富喎。想起希臘與德國最近因還債一事鬧晒交，希臘副總理指納粹軍 侵略希臘，血債至今未完全清償，德國人聽咗就氣頂，指德國大力津貼希臘加入歐盟，為何反口不認？廚師T話：「我現在係澳洲人，阿媽同阿爸又離咗婚，我一於 唔理呢啲政治事件！」不過政治會理到佢頭上呢，廚師T在斐濟嘆世界，工作優遊，本來幾好，但二○○六年斐濟發生政變，二○○九年四月進入緊急狀態，限制人 民旅遊，實施新聞管制，天堂當堂變成混局，廚師T惟有趕快結束當地生活，離開斐濟。廚師T話：「我都算大隻紮實o架啦，但當地人個個看似奧尼爾，小腿粗過 我嘅大髀，神高神大，行行吓街就好似俾棵大樹擋住，見到佢哋就驚。政變之後，治安好曳，街上成日有打架事件，真係不宜久留，走為上着！」有料之西人廚師去 到邊度都不愁工作，廚師T話做廚房非常辛苦，懶人最好離開，做西餐一定要依足架式，每樣菜式詳列食譜與配料成份，每一次照做，跟到十足十。 點解一啲菜式嘅 味道時好時劣呢？ 廚師T話：「好多廚師以為自己做一款菜式百幾二百次，瞇埋眼都識啦，於是偷懶唔睇食譜，唔睇成份資料，憑記憶去做，往往就因此掛一漏萬， 冇法子保持同一味道，同一水平。我唔准下屬單憑記憶o架，佢哋做一味菜做咗一千次我都要佢哋睇住啲資料嚟做，所以唔少手下發夢都鬧我！」 | ||||||
| ||||||
| 滙 控宣佈○九年全年業績，只賺58.34億美元，增長2%，未免令人失望。賺五十八億，係市場預期下限，好彩有一間摩根史丹利估滙控利潤係37.16億美 元，滙控仲可以安慰吓自己啫。翻查各大證券行嘅預測，大和證券真巴閉，預測利潤係57.97億美元，直情算係命中紅心。呢位大和分析員好似有個水晶球，或 者對滙控盤生意瞭如指掌，否則點會估到咁中o架。相形之下，最牛嗰位瑞銀分析員預測利潤係117.21億美元，與實際數字相差百分之一百，佢點樣計數嘅 呢！真係服咗佢。德意志估66.49億，瑞信估67.6億，算係不過不失，已經及格。 滙控利潤，毫無驚喜，股息當然唔會增加，散戶投資者唯 有耐心啲，睇吓紀勤所講之長期策略是否有效，紀勤話滙控努力增加存款，似乎與目前低利率環境作對，但係利率已經低到無可再低，唯一移動方向就係向上升，假 如伯南克加息嘅話，滙豐因為存款多，會首先得益，但幾時加息呢？大家都唔知，紀勤之言就係貼士，假如美國加息，滙豐最有利，加息之時，會有人追揸滙豐。如 果現時利率維持不變呢？滙控股價已經反映晒，欲升無力。好彩滙控嘅孳息率仍然唔錯，雖然只係三厘幾，買滙豐一手，勝於擺同樣銀碼嘅錢（約三萬四千港元）喺 滙豐儲蓄戶口！ 不過有一位資深投資者/炒家A就叫左丁山睇定啲，唔好增持滙控，要等到佢下一次宣佈業績時，表現出穩定增長 先至追都未遲。佢有一套特別觀察方法：「嗱，滙控啲蘇格蘭大班素來低調、節儉，以前沈弼興建天比高為大班住宅，未免太揚，就發生咗佳寧事件，撥備甚巨；浦 偉士接班後，以節儉苦幹出名，在佢領導下，滙控遷冊順利，中方諒解，政治手腕一流，為滙控創製黃金時期；到咗龐約翰呢位鍾意威風嘅先生上場，收購美國 Household，埋下禍根至今未曾消腫。現在葛霖當政，主席在倫敦，行政總裁紀勤來港，做雙頭馬車，呢對配搭在○七年二月已經發出次按預警，但之後仍 然在北美輸到喊，好令人失望。紀勤來港上班之日，竟然有大隊滙豐職員在總行夾道歡迎，滙豐從來都冇咁樣突出個人o架！所以我有滙控股票，但有疑慮，要等紀 勤證明咗佢真係有料先！」 | ||||||
| ||||||
| 美 國話要改革金融制度，奧巴馬政府嘅老人顧問沃爾克聲言要（一）分拆銀行工商業及投資銀行業務，（二）不准銀行做坐盤交易（proprietary trading），（三）不准銀行擁有及經營對冲基金或私募基金，呢啲建議受華爾街堅決反對。上述三項之中，第一條係還原Glass-Steagall Act，此法案於1933年實施，1999年廢除，於是商業銀行與投資銀行可以融合為一，JP摩根大通轉型最快，o依家點樣可以分拆呀，直情攞摩根大通條 命；第三條嘅影響比較細，銀行可以勉強接受，但第二條就厲害嘞，唔畀銀行做坐盤交易，即係叫銀行只做蝕本或微利生意啫。滙豐恒生剛宣佈業績，滙豐賺 58.3億美元，稅前利潤係70.79億美元，比○八年下跌24%。在七十餘億美元之中，「環球銀行及資本市場」（即投資銀行及交易業務）賺104.81 億，增長201%，「個人理財」蝕20.65億，私人銀行賺11.08億，商業銀行賺42.75億，其他業務蝕67.2億。睇吓啦，你話若果滙控冇咗投資 銀行及坐盤交易嘅話，就會錄得稅前虧損34.02億美元，股價會散晒，對恒指影響重大。滙豐如此，恒生又如何？○九年恒生業績倒退6.2%，賺 132.21億港元，但財資業務賺33.93億元，上升48.9%，可見坐盤交易與投資幾好賺。 華爾街啲大行如高盛、大摩等係交易專家，叫 佢哋放棄財資業務，勢係假，必然誓死反對奧巴馬。碰啱美國最高法院月前以言論自由為根據，以五票對四票，准許美國私人企業出錢賣政治廣告，美國商會立刻鼓 掌稱快，民主黨與工會大駡判決無理。企業既可賣政治廣告，奧巴馬如強行要求銀行自廢武功，放棄財資業務，今年嘅國會中期選舉，共和黨肯定得到大量廣告支 持。 一場金融海嘯帶來後患無窮，美國債台高築就係一個心腹大患。美國經濟學家有何計謀呢？天真許傳來訊息， （www.financialsense.com）三位著名經濟學家Krugman，Mankiw與Rogoff都贊成以通脹為手段，每年6%通脹嘅話， 就可以催谷經濟創造就業，磨損購買力（即係話，持有美國債券者，會蝕清光購買力）。呢條橋都幾毒，如何應付好呢？天真許話最好買黃金拋售美債！ | ||||||
| ||||||
| 二 月二十七日本欄寫「勿買利物浦」，有幾位讀者來郵話左丁山唔識嘢，賓尼迪斯同杜格利殊有乜關係呀？於是細讀原文，唉吔，原來內有「自賓尼迪斯接杜格利殊 手，出任利物浦領隊後，一直衰到o依家！」一句唉吔，大鑊，賓尼迪斯與杜格利殊相隔十三年，何來有關係，翻查原來手稿，應係「Souness（桑尼士）接 杜格利殊手」，事實上，當晚稅務K亦係咁講。但點解印咗出嚟，桑尼士會變成賓尼迪斯呢？難以明白，唯有向利物浦球迷及讀者鞠躬講鎖你、鎖你。亦向稅務K講 聲對唔住，因有人鬧佢枉為利物浦擁躉也。 利物浦之無力挑戰曼聯、車路士與阿仙奴，原因有一疋布咁長，稅務K講咗成十幾分鐘，無謂再在此寫一千字了，利物浦球迷應知之甚詳。 講 及美國三大經濟學家認為美國用通脹方法解決巨大負債問題，每年通脹六厘就夠晒數，而且要連續數年。呢三位經濟學者，克魯明、Mankiw、Rogoff都 係鹹水學派，克魯明在普林斯頓，其他兩位在哈佛，按淡水學派經濟學家嘅講法，狂印銀紙、催谷貨幣供應，一定會製造通脹，現在聯儲局主席伯南克有個外號，叫 做「直升機伯」，因為伯南克曾講過，打擊通縮最容易，坐直升機丟銀紙落街就得，佢目前就係咁樣做緊啦！ 天真許話對付通脹要買黃金，賣債券。 目前三十年美國國庫債券嘅孳息率係4.56%，若通脹升至6%，債券價格必然大跌，美國政府就可以施施然回購，搵晒長期持有債券人笨，大炒家索羅斯最近猛 話黃金有泡沫，遲早爆煲，但佢嘅Soros Fund Management LLC （管理資產二百五十億美元）在○九年第四季就增持咗SPDR黃金信託達152%，呢個SPDR係世界上最大嘅黃金ETF。喂，一面唱黃金有泡沫，一面大舉 入市，為咗乜？顯然索羅斯認為黃金爆破之前，佢仲有機會炒金賺一大筆啦。除咗索羅斯，對冲基金之王保爾森（John Paulson）已持有SPDR三千一百五十萬股，相等於九十五噸黃金，滙控環球資產管理之「絕對回報基金」經理Charles Morris預測金價將於五年內上升到五千美元一安士，故此該基金嘅資產有11%係黃金！ （編按：桑尼士錯改為賓尼迪斯乃編者之誤，謹此致歉。） | ||||||
2010-03-10 AD
| ||||||
| 一 位中國學生，自耶魯畢業後回國創業致富，月前捐了888萬美元給耶魯大學，給一些內地井底蛙網民大罵為漢奸、賣國。其實美國的大學素來向校友籌款，每位畢 業生不論身處何方，如曾向學校報告了居住地址，每年一定收到母校的募捐信件，至於捐款若干，那是多多益善，少少無拘，發達了的校友，動輒捐贈巨款，以報母 校培育之恩，例如胡應湘就捐過一億美元（合和股票）畀普林斯頓大學。中國大陸學生素來崇洋，對哈佛耶魯尤其達至幾乎跪拜的程度，網民對這些名校的中國畢業 生又崇拜又妒忌，故此該校友捐出巨款給耶魯而不是捐給北大清華，十分令人憤怒。何必呢，北大清華復旦有咁多威水校友，身家何止千百億，佢地點解唔捐巨款畀 母校呀？《蘋果》在三月七日報導，一位一百歲阿婆逝世，竟然遺下七百萬美元，全數捐畀母校Lake Forest College，佢喺一九三一年畢業，之後做秘書四十三年，寂寂無聞，相信學校都唔記得咗佢，但佢就心懷母校，立遺囑捐晒身家。 世間上咁多 慈善機構，為何呢位婆婆Grace Groner唔捐，只捐畀母校，此乃美國人的精神特色，有每年捐款一百幾十美元畀母校之習慣，而其他國家好少有呢個風氣嘅，想來歐洲亞洲啲大學大部份係公 立嘅，由納稅人供養，所以好少向校友勸捐嘅動作，久而久之，校友覺得母校冇錢，就應該向政府伸大手板，而唔係叫校友捐錢。有好多人畢業多年，斗零唔肯捐畀 母校，但就喜歡不時阿吱阿咗，以罵母校政策為樂，動機不明。 香港嘅大學經費並不算多，八間教資會撥款嘅院校，每年總經費加埋都只係等於一間 耶魯大學嘅總支出，故此本地人捐錢畀本地大學，實在有其需要，今年曾財爺唔再孤寒，肯撥出十億元作配對基金，供全港大學申請，啲大學不敢遲緩，立即發動捐 款。中貿林在三月四日出席母校教職員及校友春茗，眼見幾位校友響應捐款，未散席已由書院院長宣佈捐到六百萬元，全由幾位校友兼書院校董捐出。呢啲錢當然係 作書院獎學金基金之用，班九十後學生最為得益！捐錢典範之一就係馮老闆，佢將自己所持報章（上市公司）之股份，捐出一半畀母校，聽日母校香港大學頒授畀佢 一個榮譽社會科學博士學位，值得恭喜！ | ||||||