| ||||||
| 有 位海外讀者劉廣勤來電郵指斥左丁山「肉酸」？左丁山竟然夠膽話中大校友支持陳茂波做校董？佢自己係中大校友，就對陳茂波「冇乜好感」嘞。呢位劉廣勤讀者 話：「你問劉世鏞就知我係乜誰？」於是打電話問劉世鏞（中大校友評議會主席）：「劉廣勤係邊一位？」劉世鏞果然答得爽快：「以前係會計師樓拍檔，中大同年 畢業，對佢不願置評，你問佢嘅親戚馬金福啦！」馬金福亦是會計師，現從事投資業務，佢收到左丁山電話，問明來意之後，打個哈哈，然後話：「費事講太多咯， 我係中大校友，我支持陳茂波o架！」 可以話畀呢位海外讀者劉廣勤知，左丁山並非肉酸肉麻，自己所接觸嘅校友，與劉廣勤先生同輩份嘅，幾乎壓倒性支持陳茂波，你唔信嘅話，不如飛返嚟香港周圍問吓。 關 於陳茂波選中大校董之事，就此打住，以後盡量不再寫，以免悶親其他讀者，不過《蘋果》李八方時時誤中副車，以為「中大校友關注組」就係校友會，只作單方面 報導，從不問吓中大校友評議會與中大校友會聯會嘅意見，故此久唔久就忍唔住代佢哋出聲而已。在香港，搞關注組容乜易，三五七人已經可以搞一個關注組，究竟 有何代表性，好似從來冇人質疑，此皆因有啲記者甚為simple and naive也。 《壹週刊》於一九九○年三月十五日創刊發行第一 期，以許冠文為封面，轉眼間已創刊二十年，昨晚在尖東南洋中心舉行創刊二十週年聯歡晚宴，左丁山應邀參加，新人已多不認得，創刊之日嘅管理層及編輯部「老 嘢」，相信剩番一個肥佬黎，有人話最老資格嘅僱員就係「瓊姐」，當初壹仔做清潔阿嬸兼負責買下午茶菠蘿包，瓊姐做事整日笑口噬噬，不覺辛苦，甚得同事好 感，但萬萬估唔到佢會一做二十年，由華蘭路到長沙灣到將軍澳，見過不知多少位總編輯咯。一九九○年一月一日《壹週刊》搬入華蘭路辦公室，由買影印機，買廁 紙、香梘液至到安裝電話，由一月一日開始，兩個半月後就出版第一期，現在回想起來，速度之快，不可思議，此皆肥佬黎鞭策之功力也。 | ||||||
| ||||||
| 老 牌記者P以前係英文報紙記者、編輯，後來又做過大企業公共事務，多時不見，以為佢已經退出江湖，點知佢突然來電（左丁山手機號碼又係二十年不變），約去 FCC食飯。FCC乃英文人嘅地頭，好耐冇幫襯過咯，上到去二樓，咦，人客少啲喎，比起以前日日客滿情況，差好遠，與啲貴價餐廳冇得比。上星期三打電話到 IFC之高級食店國金軒、利苑、龍景軒訂本星期一嘅位，想話請傅會長吃午飯，以為提早四天訂位，得喇啩，點知全部食檸檬，可見IFC幾咁生意暢旺而左丁山 係幾咁背。諗真吓，香港經濟復甦，高價高檔餐廳做到笑逐顏開，惟是傳媒記者薪水低，加薪少，外國記者咪又一樣，FCC專做呢類人生意，無怪中午時分，大堂 餐廳嘅生意稀疏。中國海外（688）老總孔慶平與傳媒吃春茗，爆出一句：「記者人工低，咁搏命做乜？」成為虎年金句，雖然孔總講完，滿臉通紅，急急解畫 （現場記者講嘅），但此話已傳誦一時。 香港記者人工低，搵命博，非自今日始，若非一九九○年《壹週刊》誕生，後來嘅加薪幅度仲會低好多。但 記者P呢，老早已係上層編輯，搵到銀，素來準時嘅佢，此日竟然遲大到，問佢點解，佢話揸車到中環，塞車非常嚴重。點解要揸車呀，搭地鐵就算啦，記者P話： 「我住在渣甸山。」左丁山聽到，幾乎噴茶，邊度會有記者住在豪宅地段渣甸山如斯巴閉？ 記者P話：「你有所不知，二十幾年 前，總編輯R某日得閒無事，車我去周圍睇樓，去到渣甸山，有幾個銀主盤出售，老總R立即買咗一間，我返屋企與老婆商量後，傾盡儲蓄買咗兩間，每間千幾呎， 二百幾萬一間，早已供甩晒，依家值幾多錢，你估嘞，人一世，物一世，我就想住在渣甸山嘞，好多老友叫我賣樓套現，搬去元朗印印腳，但揸住咁多現金做乜，自 己住好過！」原來如此，唉，同樣係廿幾年前，地產W叫左丁山買九肚山house，二千四呎賣二百四十萬，但左丁山唔捨得賣晒啲股票，猶豫三個月，卒之碰上 股災，變成一無所有，與記者P比較真係同人唔同命。記者P又講，「我係住在豪宅地段嘅豪宅，但我嘅荷包就唔豪，逼住自己繼續動腦筋搵銀，老得冇咁快會長命 啲呀！」旨哉斯言，住得好，人都精神啲，我哋普通人，揸住太多現金，唔投資就驚蝕底，投資就驚碰上雷曼，隨時搞到自己血壓高！ | ||||||
2010-03-14 AD
| ||||||
| 南 華班主羅傑承用五十萬港元買入之馬「軍事行動」（Military Move）竟然贏得今年之紐西蘭打吡，但以一千萬港元買入之「羅馬」，本來想話贏香港打吡嘅，但來港後表現普通到極，根本攞唔夠分，冇資格參加今日香港打 吡大賽。可見造物弄人，贏打吡要講運，唔係講錢就得，否則最貴嗰匹馬就贏打吡，賽馬就變成金錢遊戲。 今日香港打吡大賽，叫做「梅賽德斯香港 打吡大賽2010」，邊隻馬可以贏呢？科技Ｋ每年此日在馬場包廳請客兼送領呔，商界人士雲集，左丁山亦會出席。科技Ｋ隻馬「先見之明」曾經爆冷贏過打吡， 力壓大熱門「百看不厭」，佢話做馬主能夠有馬參加打吡，已經開心到飛起，贏喎，更加高興到癲，那敢奢望再贏一次？所以佢十分知足，每年請大家睇打吡，高興 吓就算。十四匹參賽馬，邊隻最有機會呢？告東尼佔三隻，方嘉柏佔四隻，蔡約翰佔三隻，約翰摩亞佔兩隻，已經係十二隻，應是此四大馬房嘅世界，剩番嗰兩隻就 係胡森嘅。 馬主之中，莎莎郭最威，個人有兩隻馬（締造美麗與美麗傳奇）。記憶之中，似乎未有其他馬主如此巴閉，但莎莎郭可唔可以捧盃呢？一 號「締造美麗」本內定由蘇銘倫策騎，但蘇銘倫在杜拜被罰停賽，告東尼立即搵世界冠軍戴圖理來港客串，已充分顯示馬主與馬房之必勝決心，只係驚呢隻馬夠唔夠 長力跑二千米而已。對手就有韋達推庄畀柏寶騎嘅3號馬「勇敢小子」，此馬已經六戰六勝，再贏就破晒香港紀錄，一季之內贏足七場；韋達選騎6號「極品絲 綢」，會唔會揀錯馬呀？如果尊重佢嘅選擇，就應該揀6號，專家Ｅ就話5號「至勇威龍」由大賽騎師巫斯義上陣，有計，佢認為呢匹可以贏。於是正路貼士就係1 、3、 6 、5四隻再加多隻4號「君子一言」，會唔會咁正路呢？打吡賽亦是爆冷溫床，日前在中建大廈睇到一位紳士行過，記得佢就係郭彰國，佢隻「聖利」咪爆過九十九 倍大冷門，贏過打吡囉。今日邊隻馬有資格爆冷？要臨場睇吓沙圈動態。 | ||||||
| ||||||
| 到太古廣場吃午 飯，碰到衍生工具專家證券E，只見佢笑容滿面，唔似淨係食得開心咁簡單噃。傾多兩句，證券E話銀行是日放工前會宣佈花紅發放詳情，佢既緊張，又有期望，而 所謂緊張，係分三個月吖，六個月吖，還是十二個月花紅而已。二○○九年股市自三月九日陷最低潮後，迅速反彈，衍生工具（主要係窩輪）成交大增，啲大銀行收 入如豬籠入水，做窩輪最大嗰幾間，收入以億美元計，純利有幾多，佢哋先至知道，如以「豐厚」嚟形容，一定冇錯嘅嘞，故此證券E坐定粒六等收銀。 但 金融海嘯之後，未必一定可以即時收齊現金花紅噃。據左丁山得知，銀行為咗留住人才，亦為咗應付監管當局關注，派花紅會以股代現金，以可先換債券代現金，分 期發放，如果即時辭職，就當自動放棄，除非提早幾個月通知，但要轉工嘅話，要對方（新公司）等幾個月，攞嚟講啫，人哋要即時用人，點會有耐性等你幾個月先 至過檔。呢種派花紅招數，就係阻止員工跳槽嘅方法。 衍生工具如此好景，唔怪得滙豐最近加緊宣傳，聽講渣打銀行正在準備加入，硬闖窩輪世界， 睇嚟必有一番劇鬥。一間本來做得唔錯嘅歐資銀行最近好似較為低調，市場人士話呢間銀行為祖家監管規條所困，遲遲未能派花紅，於是條生產線立即放慢手腳，做 嘢冇以前咁落力喎。做證券生意就是如此，冇花紅，冇佣金而只係收一份人工嘅話，必定搵唔到有料到及有鬥志之人加盟。 做證券與做產品 Sales並無不同，大家都係志在推銷產品啫，一個推銷窩輪，一個推銷雪櫃或廣告，並無分別，只不過前者賺多好多錢而已。老友記安森在成為好成功嘅美股經 紀之前，就曾經推銷過計算機、打字機、電訊機，無論賣乜產品，最緊要嘅就係賣得越多，收入越多！斷不可以做又三十六，唔做又三十六。奇怪嘅係，香港仍然有 唔少公司堅持Sales「無佣金制」，令人不解。 | ||||||
2010-03-19 AD
| ||||||
| 福布斯發表二○ 一○年度世界富豪榜，墨西哥電訊大亨Carlos Slim Helu & Family以五百三十億美元身家，排列第一，第二是蓋茨，第三是巴菲特，第四是印度Ambani，第五是印度Mittal，香港上榜富豪有李嘉誠（第十 四，二百一十億美元），李兆基（第二十二，一百八十五億美元）、新地郭家（第二十八，一百七十億美元），鄭裕彤（第一百○六，六十八億美元）等等。 墨 西哥呢位富豪斯利姆，早有美國報章詳細介紹，此君是黎巴嫩移民後裔，在墨西哥幾乎獨霸電訊行業，為人節儉，只戴膠手錶，唔買私人飛機，唔要遊艇，坐一架平 治房車坐咗好多年都唔捨得換，亦唔住豪宅，只係喜歡雪茄（用得幾多錢吖）與收藏藝術品（另類投資啫，不算消費），成世人唔用電腦，正是發達有個相，最識賺 錢，唔鍾意使錢，反而身家幾億美元嗰啲，又話買私人飛機，又話買一隻百呎遊艇。 香港人排第十四嘅李嘉誠，當然係香港首富，亞洲首富啦：台灣 首富郭台銘有身家55億美元，內地首富宗慶後有身家70億美元，與李嘉誠相差甚遠。究竟福布斯點樣排名嘅呢？一個最簡單方法係從上市公司公開年報中搵到大 股東持股量，乘以股價。但福布斯同時亦向一眾富豪發信，請收信人自願性申報私人財產資料，例如名畫、古董、珠寶、遊艇、私人飛機等等，福布斯會同佢計埋身 家。據講有人自願申報，但亦有人不願提供（聽講李嘉誠便屬此類），故此福布斯之補充辦法，限於手頭資料唔齊全，好難講話準繩嘅。 富豪排名榜 係遊戲啫，真正富豪好少會自動現身，數晒家底畀外人知道嘅，因是之故，福布斯之一年一度富豪排行榜可以講係有參考作用，但難以完全服眾，銀行家可能知得更 清楚。好多年前，賓架H借錢畀南洋富豪T，攞足磚頭及資產抵押品，但後來睇富豪榜，富豪Ｔ竟係某國首富，亞洲十大富豪之一，不禁大吃一驚。富豪T嘅財務狀 況賓架H完全知道晒，所以先至要攞咁多抵押品，佢明知富豪T嘅資產減負債之後，隨時會係資不抵債，但啲富豪榜編輯邊知咁多嘢吖，計死數就將富豪T列入為某 地上榜富豪，笑死啲賓架。 | ||||||
| ||||||
| 上市公司泰豐國 際（七二四）買入山頂豪宅倚巒一個單位四千六百五十平方呎，呎價六萬零二百一十五元，創亞洲洋房紀錄，威唔威呀？大股東或者覺得威嘅，但小股東就不知道威 水何在咯，消息公佈後，泰豐股價急跌，市值蒸發五億幾，足證市場覺得呢隻股不務正業，一於沽之哉。 香港最唔缺乏嘅就係住宅、舖位炒家，地產 版不時報道白頭X、舖王Y、P叔、玩具C等等著名炒家嘅活動，就算在馬場，都有一隻馬叫做「摸皇之星」，跑咗四次，次次輸多個馬位，跟住退役。記得一位老 友見到呢個馬名，摸不着頭腦，問「摸皇之星」究竟係甚麼意思。左丁山猜測到係炒樓摸貨或「摩貨」嘅意思，但唔敢確定，後來睇到馬主就係一位地產版名人，先 至敢講清楚。「摸貨」賺錢，大概係香港人發財絕技，一九九七年之時，律師T曾經一日之內，為藍田某住宅同一單位做轉名契約七次，係佢自己一個空前絕後紀 錄，現在炒風日熾，但仍難以同九七金融風暴發生之前比較，只不過豪宅價格不斷攀越高峯而已。 個人炒家，或非上市公司炒樓，與人無尤，但上市 公司大嗱嗱拎兩億八千萬元買樓，數碼佔去公司○八年底嘅股東權益六成幾，點睇都係重大交易，點解唔使開股東大會討論呢？難以明白。 炒樓係中 國人之特長。中國內地人民富起來後，有辦法的一批學炒樓學得最快，即使溫家寶總理不斷出口術話要遏制房價，房價仍然不斷上升，央視名嘴白岩松於是話：「是 不是總理說了不算，總經理說了才算？」總經理就是房產公司嘅總經理，佢一拍板話去馬買地買樓，立即行動起來，那管總理說了甚麼。香港同樣亦可以 講：CE（特首）說了不算、CEO（行政總裁）說了才算，香港大公司嘅CEO見到特首CE，一定客客氣氣，但買地起樓係由CEO話事嘅，CE說完新界還有 好多四千元一呎嘅住宅，新界樓盤立即唔止呢個價錢。其實總理好，CE也好，最後還是說話算數的，假如CE下狠招，向短期摸貨炒樓人士徵收增值稅兼利得稅， 與短期（一年）炒家分享利潤，必可壓抑炒風。 | ||||||
2010-03-26 AD
| ||||||
| 業主R請吃晚 飯，搞搞新意思，唔去佢熟悉嘅中環名店或者一啲環頭環尾嘅街坊「鑊氣」食肆，而係叫我哋去西九龍一級豪宅凱旋門嘅會所Sky Club。成班老友都未去過，有新奇感覺，究竟點去呀？業主R秘書非常細心，傳來電郵，教我哋搭東涌線地鐵到達九龍站後，用邊個出口入圓方廣場，經過邊間 舖頭轉右上樓梯……每行一步都有指示，真係只有女秘書先至會咁心思縝密。賓架S話自己從中環揸車去，叫秘書下載地圖，點知圓方廣場停車場入口實在難搵，第 一次揸車入停車場嘅話，多數搵到頭暈，要兜兩個圈先至搵到，結果遲晒到，我哋開咗飯佢先至入到嚟。 我哋一班人第一次到凱旋門，先上六十二 樓，轉『車立』落六十樓，就係Sky Club，賓架W話：「如劉姥姥入大觀園，大開眼界。」業主R帶我哋在六十二樓空中花園行一個圈，睇勻九龍全景以及維多利亞港全貌，可惜呢日適值空氣污染 指標突破500，海港上空一片迷濛，景觀唔清楚。向東南一方，係睇放煙花最佳地點，向正南又可看到IFC於一月一日放煙火，一覽無遺。來此一遊，唔須要再 去其他高樓睇香港夜景咯，站在中銀大廈七十二樓，都睇唔到咁靚景致。此晚有一彎勾月，掛在朦朧天空，如有愁緒，可云：「『思君如滿月，夜夜減清輝。』但在 秋高氣爽之日，滿月之時，大可在此舉杯邀明月，對影成三人。」 基金F由樓下lobby一直觀察至會所嘅洗手間，結論：係「新地確係有眼光， 捨得落本錢，用料靚到極，設計又好，在此靚地盤興建此一超級豪宅。」業主R話佢買樓之時，睇完君臨天下又睇凱旋門，反覆睇過四次，覺得凱旋門係高一個呢， 所以落鎚買咗一個單位。西九豪宅之中，天璽望海景以向西為主，睇夕陽無限好就一流，其他欠奉，難與凱旋門相比。業主R話：「我隱約覺得凱旋門業主以大陸 人、台灣人為多，佔五成以上，佢哋唔租出去o架，收埋等升值！」呎價雖貴，租金頂多得三厘回報，買就買唔起嘞，搵個細單位租嚟住，過吓住超級豪宅心癮，享 受吓Sky Club，好多人可以負擔。 | ||||||
2010-03-27 AD
| ||||||
| 到凱旋門Sky Club吃晚飯，欣賞樓外景色，不覺肚餓，大概係「秀色可餐」啩，會所美則美矣，食客寥寥，如獨立經營，唔知點樣可以維皮，現在當然係由住宅單位嘅管理費 嚟津貼會所啦。仲有一樣可惜嘅，就係會所餸菜就係會所餸菜，味道鑊氣與住宅呎價毫不相稱，與平民屋邨食肆相比，並無優勝之處。 在豪宅會所食 飯，傾偈自不然慢慢由「假的真不了」轉移到樓市興衰。基金Ｆ話樓市一般移動緩慢，大部份人後知後覺，樓價低時不敢買樓，樓價高時先至追入，政府突然批准夾 屋、居屋「晒冷」，貨尾一次過賣清，更證明樓宇需求甚大。左丁山問：「是否有泡沫呢？」基金Ｆ話：「冇、冇冇。我夠膽講，樓市嘅牛市只係啱啱開始，仲有排 玩。但豪宅樓價平均好難超過二萬元一呎，超過咗就難有租金回報率支持。譬如西九龍豪宅，平均租金約係三十零蚊一呎，頂多五十蚊一呎，如樓價每呎二萬元，租 金每呎五十元，回報率係三厘，與美國國庫十年期債券嘅孳息率3.66厘比較，低水66點子。」賓架Ｗ和應：「照我所知，每月租金超過十二萬元嘅豪宅，搵租 客甚為不易，將租金調低至七萬元左右，外籍租客就多好多。」即係話，二千四百呎住宅，呎租五十就難租好多，呎租三十嘅話，租出甚為容易。賓架Ｓ話外國基 金、銀行確有不少僱員搬來香港，但全世界嘅大公司都要削減僱員海外租金津貼，海外僱員如果要攞每月租金津貼超過一萬美元嘅，未必得到批准。 吃 過晚飯，再欣賞樓外景色，讚嘆一番之後，盡歡而散，冇人介意會所之食物失色。不過落到樓下，平台一定冇的士，要行落圓方搵的士站，左丁山在圓方外截到一架 車，司機竟然唔識路去八號幹線，轉轉吓就去咗窩打老道塞燈，左丁山為之氣結。塞燈之時，左丁山想起基金Ｆ老早講過，買樓要買西九龍，政府在此區投下幾百億 元基建項目，冇理由唔陪政府玩嘅啫！係嘅，佢啱晒，於是又想起Henry George之「土地稅」，呢位十九世紀經濟學家係有遠見噃。 | ||||||
| ||||||
| 法國老總Ｂ話巴 黎一百年不變，市內好少新樓盤，即使有，都貴到買唔起。據左丁山睇過好多報導，巴黎市有租金管制，嚴格保護古蹟文物條例，故此二手樓市場係賣家世界，舊租 客住落，點都唔願搬走，年青一代想住在巴黎呀，除非繼承遺產啦。最新Knight Frank豪宅價格調查報告，2009年貴重物業市價平均下跌5.5%，上海豪宅勁升52%，而前五名城市就係摩納哥（4300-5900美元一呎），倫 敦（3600-4400美元），巴黎（2400-3300美元），香港（2000-2500美元），羅馬（1800-2500美元），上海排第十三 （500-700美元），如果睇好上海有朝一日可與倫敦、巴黎、香港並列，上海豪宅可以繼續升完又升，升多六至七倍就差唔多了。 在資本主義 社會，地產市道升升跌跌，循環不息，香港嘅大趨勢係樓價永遠反覆向上，供二十年樓一定發過租二十年樓。九○至九七樓價升足七年，九八至二○○三年跌足六 年，○四至○九又升足六年，至今上升勢頭未減，上升之時，總有人大聲抗議，上街示威話買唔到樓；九○至九七之時我哋見過唔少抗議樓價升嘅場面，到咗樓價大 跌嘞，又有人上街示威，大罵政府隊冧市，呢班人係業主階層，九八至○三年就有好多啦。現在升到咁上下，輪番到無殼蝸牛大聲疾呼咯喎。特區政府高官要聽邊一 派嘅聲音好？以事論事，九八至○三年時，樓價大跌，燒炭、破產之事，無日無之，似乎樓價下滑帶來之禍害大過樓價上升帶來之不便，買咗樓而破產，係唔係慘過 因買唔到樓而仍然住在公屋或出租私樓呢？左丁山唔敢講，只係希望啲甚麼短炒王、摩貨王、釘王唔好以炒樓賺錢為樂，推波助瀾，推高樓價，令社會怨氣加深啫， 你哋咁叻，炒股票期貨啦，炒樓損害民生o架。 如果問政府，高官見到九八至○三年之狀況，猶有餘悸，再印證07年美國房地產市道爆煲所帶來災 難性後果，一定唔敢用政策推低樓市，出吓口術就無妨，頂多加快興建公屋而已，復建居屋唔使諗。 | ||||||
2010-04-01 AD
| ||||||
| 好耐以前在馬場 有一名靚女之中嘅靚女陪老公拉頭馬，左丁山旁邊有一位女士睇住電視，有感而嘆：「男人使乜靚仔吖。」講得好大聲，周圍馬迷都笑起嚟。 上星期 某天晚上睇英文電視，好似係Hallmark，唔記得清楚咯，因為成晚揸住遙控係咁㩒，有時唔知轉咗去邊一個電台。一位心理學教授搵數男數女做實驗，叫佢 哋遮住頭髮互望對方，揀心儀伴侶，之後唔遮住頭髮，再揀一次，原來大家都認為「高分」嘅男女，非常搶手，但呢個實驗較難明白。再做一個實驗，將三張俊男相 片放大，在街邊訪問美女，叫美女根據相貌吸引力評分，譬如A男得八分，B男得六分，C男得四分。跟住在相片加上資料，講明年薪職位，再去請其他美女評分， 嘩，即刻現形，A男原來只有年薪二萬三千美元，評分立即大降，C男有年薪二十三萬美元，即時被美女視為好有吸引力，呢，男人有錢就英俊o架嘞，靚女陪富豪 拉頭馬之事，已可證明，不過電視台引述之實驗，更加確證呢一點而已。 中國古代有一個故事，就係鄒忌諷齊王納諫，出自《戰國策》，故事前一半 係咁嘅： 鄒忌修八尺有餘，形貌昳麗，朝服衣冠窺鏡，謂其妻曰：「我孰與城北徐公美？」其妻曰：「君美甚，徐公何能及公也！」城北徐公，齊國 之美麗者也。忌不自信，而復問其妾曰：「吾孰與徐公美？」妾曰：「徐公何能及君也！」旦日，客從外來，與坐談，問之客曰：「吾與徐公孰美？」客曰：「徐公 不若君之美也！」 明日，徐公來。孰視之，自以為不如，窺鏡而自視，又弗如遠甚。暮，寢而思之曰：「吾妻之美我者，私我也；妾之美我者，畏我 也；客之美我者，欲有求於我也。」 嗱，妻子愛老公，故此話鄒忌靚過徐公，妾侍怕鄒忌，話佢靚過徐公，客有求於鄒忌，擦鞋話佢靚過徐公。現代 美女愛銀紙，故此無論老少，總之係富豪級數嘅，在靚女眼中，一定靚過周潤發，有款過畢比特。男人又如何呢？CNN網站有一篇文章，出自加州大學（三藩市分 校）一位女心理學教授手筆，佢研究男人腦袋，指出男人天性係鍾意望靚女，即使與老婆食緊飯，眼睛亦會跟住餐廳內之性感女郎流轉，女教授勸天下太太：「唔好 嬲，let a guy be a guy！」 | ||||||