| ||||||
| 老 總C出席「社群盃」賽馬與左丁山講起，由六月中至九月中，從香港去溫哥華嘅國泰航機，班班都話爆晒，佢為之冇符。國泰咁好生意？唔怪得國泰內部通訊話營運 漸有起色，綠芽初現。不過再問深啲，原來老總C係有「獎項」機票，要卜機位梗係有啲困難，於是一位老友記同老總C講：「你肯畀full fare（全費）就有機位嘅嘞！呢啲係有錢就可以解決嘅問題？」鬼唔知咩，大家都知阿媽係女人，最好就係有錢買張頭等機票。 賽馬後一日，在 大道中碰到馬主K醫生，佢與老友記每早在陸羽飲茶，十點零就返醫務所，風雨不改，立即趨前恭喜佢前一日在大雨滂沱中拉頭馬，贏得漂亮。馬主K話：「我其實 趕得好緊要，星期日要參加心臟學會會議，中間走出嚟趕去馬場，啱啱趕得切，睇到隻馬以第一名過終點，影完頭馬相又要立即離開，趕返去開會。」香港啲醫生真 係好忙，平時要睇症或做手術，開大會要揀在星期日，犧牲埋假期o忝。 六月廿八日之賽馬結果有啲神奇，十一場頭馬之中，排二、五、九、十檔嘅 馬贏咗九場，二、五、六、九、十號嘅馬贏咗八場，與「心」或心臟醫生有關嘅頭馬有「心歡笑」、「無敵神駒」、「兄弟齊心」、「雄心馬主」四匹，跑第三有一 隻「同心同德」，跑第四有「開心歡笑」、「靚得開心」。早知如此，搵紫微楊師傅預早算一算號碼，豈非必勝？當然係開玩笑啫，紫微楊都想算到「八逢九紫」幾 時會再贏！ 與醫生K拜拜之後，返回公司，睇到《蘋果》轉來電郵，來自一位歐洲銀行嘅聯營證券公司嘅Portfolio Manager「尼路臣」，尼路臣回應〈國泰航空第一〉，佢話第一都冇用啦，機票咁貴！佢在七月飛紐約，坐商務艙，問過價錢，國泰直航要九萬六以上、轉機 要六萬，但日航只需四萬，差好遠喎，一比之下，點可以訂國泰航班呀？呢啲左丁山唔識答，或者尼路臣君可以比較吓一隻十八倍P/E嘅銀行股與一隻P/E九倍 銀行股嘅分別，如非有把炮，點敢收咁貴。至於國泰有何把炮，基金經理一定有研究過好多人。又有一封電郵，來自比蒂小姐，嘲笑左丁山寫得騎呢，以後請比蒂繼 續指點一二。 | ||||||
| ||||||
| 睇 《金融時報》報導，日本有兩間銀行商討合併，就係Shinsei Bank與Aozora Bank，前者係日本泡沫時期之Nippon Credit Bank（日本信貸銀行），後者以前係Long Term Credit Bank of Japan（日本遠期信貸銀行），泡沫爆破後，日本冇一間銀行能夠獨善其身，紛紛重組合併，改變名稱，產生咗不少「字母湯」銀行，例如MUFG、 SMBC、Mizuho等等，令外人摸不着頭腦，好難記得二十年前稱雄世界嘅第一勸業銀行、日本工業銀行、東京銀行、三菱銀行、三井銀行、三和銀行等等究 竟併入咗邊一個「字母湯」，呢啲銀行嘅世界性品牌聲譽已一筆勾銷，新名字嘅世界認受性要重新花錢花時間嚟大力推廣，諗落其實幾笨吓。呢方面都係美國人醒目 啲，例如美國銀行已不是二十年前嘅美國銀行，已成為好幾間銀行嘅大拼盤，但沿用美國銀行品牌，慳水慳力之至，又例如JP摩根大通，亦係幾間大銀行嘅合併組 成，一於唔用新招牌，仍舊採用JP摩根大通，世界上有邊個唔識？ 問肥仔Ｋ，究竟Shinsei與Aozora究竟係乜，佢 話一間日文叫做「新生銀行」，有舊銀行重生之意，故名「新生」，另一間就叫做「青空銀行」，日文冇「藍」字，只有「青」，亦唔用「天」字，只用「空」字， 日文「青空」就係中文「藍天」咁嘅意思。左丁山聽咗，幾乎噴飯。銀行叫做「青空」，用廣東話讀，認真唔掂，一間銀行又清又空，搵乜生意呀？若左丁山是存戶 或借款，都唔想搵一間「清空」銀行啦。如果名為「藍天銀行」，反而有啲意思。肥仔Ｋ就話：「你唔識日文，日本人唔識廣東話，『青空銀行』使乜理會啲廣東諧 音吖。」睇真啲《金融時報》報導，「新生銀行」並非火鳳凰重生，仍然虧損甚巨，至於「青空銀行」，真係「清空」噃，虧損嚴重，故此呢兩間銀行嘅美國大股 東，兩間私募基金動用美國講求實際嘅智慧，自願將呢兩間蝕本銀行合併重組，不過以左丁山愚見，合併後不如另外改個一個好意頭嘅名字嘞。例如百幾年前 Hongkong and Shanghai Banking Corporation在上海取用「滙豐」之名，你話幾好！o依家有一間EFG Bank，本來冇中文名嘅，最近採用新名字「盈豐銀行」，有諗頭噃。 | ||||||
| ||||||
| 雷 曼迷債事件仍未完結，近日各報紙紛紛引述消息人士講及十六家銀行聯名上書證監會，提出以迷債原來價格的六成（即六成回購方案）收回，六十五歲以上的投資者 可得到七成回購。此外，又有消息人士說，證監會不會接納銀行提出之方案，銀行自言有風險其實係混淆視聽。咁多消息人士，睇與聽都令人頭昏眼花。睇報紙睇得 多嘅明眼人，自然知道係銀行與證監會各自放風，在媒體展開一場公關戰啦。 證監會嘅公關阿頭係Fanny Fung，前《英文虎報》及《南華早報》總編輯，手下有好多人，放風自然得心應手，個別銀行嘅公關遠遠有所不及。銀行公會方面，自發生雷曼事件後，就請咗 Citigate做公關顧問，主理人係游淑儀，曾任《明報》財經版高層十幾二十年，幫過曾先生競選特首，傳媒經驗唔會少得過Fanny Fung，兩位女士大戰，可說旗鼓相當。但最近又有消息人士的消息人士傳出，證監會行政總裁韋奕禮以證監會公帑，請多一位公關顧問，名叫Sandra Mak，係以前中華電力嘅公共事務大員，呢位Sandra女士專門向韋奕禮私人教路如何應付立法會，如何走位爭取民意支持喎。香港最多女強人，雷曼迷債風 波，沒完沒了，銀行自動求和，提出六成至七成回購，據講已係諗過度過之後嘅扯白旗方案。點知韋奕禮有心要做人民英雄，堅持要銀行跪低認錯，十成回購。 咁嘅 強硬立場，除咗間接向任志剛打一鞭之外，就係直接立威，為將來「金融監管改革」爭取更大發言權。現在英美歐都講緊金融監管大改革，香港遲早要講埋一份，以 示向國際睇齊，將來如何發展尚屬未知數，但如果本港證監會在韋奕禮堅持下爭取聲勢，或會有多啲話事權o架。至於在成為人民英雄過程中誰人得益，誰人受苦， 唔計得咁多咯，古有名言，一將功成萬骨枯吖嘛。照現時途徑發展，律師最高興，韋奕禮會不惜與銀行硬碰硬，打官司打到上終審庭！至於雷曼迷債投資者幾時收到 銀紙落袋，睇吓韋奕禮與銀行博弈要搞幾耐先啦。 | ||||||
| ||||||
| 遇 上一位出版商人Ｃ，睇吓名片，公司名字好熟，好熟。諗咗一輪，就知道好似係傳媒名宿，現樹仁大學新聞系系主任梁天偉嘅老朋友范止安嘅公司。梁總係「壹仔」 總編輯嗰陣，經常與范止安，卜少夫兩位前輩在渣甸坊老正興有飯局，有幾次益埋左丁山，故此自己亦認識呢兩位老人家，對佢哋嘅驚人酒量留下深刻印象。范卜兩 老已歸道山，范先生經營書局、出版社，莫非出版Ｃ就係佢之傳人？以此詢問，出版Ｃ話：「我已接棒二十幾年，范先生正是家父。」哦，原來如此，世界真細小。 想話畀梁總聽，後得知佢已經參加黃軒利大狀領隊之法國美食團，成班老友去咗巴黎嘆世界一番，咁就留番第日至講。 問出版Ｃ：「你哋公司有出版 教科書o架，生意好唔好？」出版Ｃ話：「王小二過年啦。我哋曾出版A Level經濟學教科書，林本利教授執筆，本來好好賣，算係我哋嘅產品之星，但高考有二萬人選讀經濟學，我哋本書賣幾多本？唔夠二千呀，但已係市場佔有率 冠軍！現在網上流行上載下載，筆記周圍飛，加埋二手書搶爛市，你話點做好？我就決定慳番印刷費，唔再出呢本『暢銷書』！」 咁又係頭痛嘅，市 場咁細，何來賺頭？出版Ｃ話佢班行家一致認為香港嘅教科書，綜合水平極高，國際上有聲譽，勝於鄰近地區，譬如新加坡教科書有政府包攬晒，大陸亦然，台灣教 科書有價格管制，每本二百台幣，將貨就價情況甚為普遍，故此台灣與內地嘅書局，充斥每科補充教材、補充練習，賣到成行成市，而呢類書就係冇價格管制嘅，於 是有錢學生就可以買多幾套回家惡補，清貧子弟未免吃虧不少。 香港一本教科書包含課本（學生用）、教師手冊（教師專用）以及 教材（教師用，包括參考資料、輔導讀本、測驗題目及答案，CD等）三大件，三位一體，不可分割，因教師如無教師手冊及教材，會叫苦連天。但現在時興講分 拆，學生只買課本，價錢會便宜啲；其餘兩項誰人購買？冇人知，如冇人買，出版Ｃ話佢哋嘅研發印刷成本收唔番，怎麼辦？據報紙引述一位資助小學校長會主席張 志鴻講：「教師用書對老師很有參考價值，但學校沒能力買……」張校長認為在合理價格下，應由政府以實報實銷形式資助學校購買。至於教育局係唔係咁樣諗，天 曉得。 | ||||||
2009-07-10 AppleDaily
| ||||||
| 小 六升中派位，自然係有人歡喜有人愁，家長求子女入名校，學校求小六生申請入學，各有各焦急。名校學位永遠供不應求，乃普遍真理，可按下不表，其他學校呢？ 幾杰o架，去年小六升中尚有七萬餘人，今年得六萬八千人，少咗三千八百幾人，以每班三十五人計，大約係一百一十幾班學生，香港大約有四百六十間中學，唔計 英中及著名中中（皇帝女唔憂嫁），假設還有三百間中學，平均每校損失零點四班，影響算輕微。但係呢，學生流失多數集中於band 3學校，你話呢類學校唔驚殺校呀？校長與教師都會面青呀？ 近三年參與派位人數逐年下跌。07年有77255，08年有71846，09年有67963，充 份反映出○一至○三年之香港生育率下滑，此趨勢去到○五年似已見底，當年嘅出生人數有57124人，06年有65195，07年有70394。以後四年， 中學收生仲要繼續捱，要到2013年中一學生先至會回復到2008年水平。故此邊緣中學還要奮鬥下去，否則今明兩年殺校，冇仇報！對學生人數發愁嘅，不止 中小學，教科書出版商亦遲早唔掂，每年中一賣少幾千本書，一啲都唔好玩。 近兩年出生率回升，似係可喜現象，但一位產科醫生W話：「全憑內地產婦來港生子 啫，每年本港出世嬰兒數目多咗，但有幾多係內地母親，嬰兒有幾多會留在香港讀書，無從統計，所以唔好以為將來小學生人數一定回升。」又係噃，產科醫生好多 工作唔停得手，日夜忙個不休，私家醫院笑逐顏開，其實係靠內地產婦。醫生W話深水埗寶血醫院轉型後，產婦大量增加，「生意」興旺到極，追上其他私家醫院。 著名嘅更加厲害啦，立法會議員W係大富人家，親自打電話去名院（最著名私家醫院）預訂頭等房為媳婦產孫早作準備，有錢議員又點呀，照樣食檸檬，唔怪得最近 政府話撥出四幅地做醫院，好多人吼到實，預料一旦落實嘅話，就會有人籌組投資集團（investment syndicates）與醫生或醫療公司合作競投。 | ||||||
| ||||||
| 雷 曼迷債，如何收科，至今未知。報紙有不同消息，不同報道，因為香港有新聞自由，記者編輯各有線路，各有消息來源，正是百花齊放，報導出來，明益讀者。 但證 監會行政總裁在立法會講，證監會與銀行談判之事，屬於機密，不可洩漏。根據法例，洩密者可最高坐監兩年兼罰款一百萬。 嘩，嚇親。記者Ｇ問左丁山：「咁講， 邊個放風畀報紙？咁敢膽？」鬼知咩，記者天職就係不可透露消息來源，呢樣唔可以問人嘅，只能按常理推測。《明報》七月十日詳細報導證監會之賠償方案，「消 息人士」講得幾深入，大家睇落去，「消息人士」似係銀行界還是證監會人士呢？試睇《明報》記者之筆觸：「據悉，證監會認為新方案較『中銀方案』可取……但 有熟悉監管要求的人士指出」，你話邊一邊嘅人會「熟悉監管要求」呀？ 報界追求新聞，搜獵消息人士，世界皆然，美國記者尤其是高手，或者係與政府官員甚至商 界有默契，乜嘢白宮及財政部密料都可以引用「不願透露姓名人士」，和盤托出，而從來不受起訴，不見美國監管會引用甚麼「機密」洩秘條例威脅傳媒。我哋希望 韋奕禮唔好追查《明報》嘅消息來源呀！據報新加坡已解決雷曼迷債問題，新加坡之銀行朋友來電郵告知詳情可在新加坡金管局網站搵到，報告書超過一百頁 （www.mas.gov.sg）。新加坡賓架指出：調查報告有四點，值得注意： （一）銀行和解嘅基礎係「without admission of liability」（不承認責任）； （二）每間銀行之和解內容各有不同； （三）新加坡金管局指出之錯失不等於銀行須向個別投資者負責； （四）投資者須要 盡一些責任來閱讀及了解、明白買入了甚麼產品。十家新加坡金融機構受罰，半年至兩年內不准銷售結構性產品，26%個案獲百分百賠償。 事實上，香港亦已有個 別和解事件，共七千一百七十九宗，但係點解香港之雷曼迷債風潮，總係糾纏不休呢？證監會與銀行點解未傾得掂？又似乎冇人記得金管局在和解過程中有甚麼角色 咯喎。人哋似大人談判達成共識，我哋似細路哥玩泥沙，透過報紙嗌交，再拖落去，會貽笑國際。 | ||||||
| ||||||
| 記 者Ｇ出席一個投資講座，講者講到東亞銀行人民幣債券可以考慮，兩年期，年利率兩厘八，人民幣有升值可能，好過做港元存款。點知有台下聽眾嗌：「買唔到 呀！」記者Ｇ奇怪，東亞人民幣債券好賣成咁？散戶會買唔到？後來再聽，先至知道散戶在東亞分行排隊好耐，覺得太花時間，一走了之，是故買唔到。記者Ｇ知道 有一位朋友平時鍾意人民幣存款，於是打電話問朋友：「你有冇買入東亞人仔債券呀？」朋友答：「本來想買嘅，排隊一輪先至見到理財顧問，佢講解一輪，跟住話 要錄音，但最後講：東亞唔會擔保人債，本金可以全部蝕晒，問我是否可以承受風險？ 我好自然咁答：「唔可以。於是佢話我最好唔買！唉吔，搞咗四十幾分鐘，結 果竟然係咁！」睇資深財經記者任美貞在《南華早報》專欄（七月十一日）寫同樣故事，講佢在又一城下午一時四十五分行入東亞銀行分行，想話買五萬元人民幣東 亞債券，點知要到二點四十五分先至完成一切談話─錄音─批准 ─買賣嘅手續。自己當然有利息收，有數得計，而銀行分行賺到幾多佣金？任美貞計過，就係七十五大元。花咗最少三位職員嘅工作時間，起碼兩小時工時啦。 任美 貞慨嘆人民幣債券甚為簡單，又唔係結構性產品，為乜搞到銷售咁複雜？睇完先至明白東亞銀行一啲分行點解要平日延長工作時間至晚上七時，星期六下午亦開門營 業，因為賣一張人民幣債券（最少一萬元人民幣）係要唔少時間嘅，據東亞副行政總裁李民斌講，每單交易平均需要三十五分鐘左右，依足金管局與證監會最新嘅金 融產品銷售程序，評估投資者可承受之投資風險……文革時代好似有一句流行語，就係「矯枉必須過正」，目前香港正是如此。以買（散戶）賣（銀行）雙方之時間 機會成本計，理財產品之交易成本十分昂貴，一定會對產品銷售有所障礙，直至買方費事買，賣方費事賣為止。特區政府希望今年推出官府債券，推動香港債券市 場，如果用現時嘅方法去排隊買官債，唔使預我一份。 | ||||||
| ||||||
| 因為有補習天王官司新聞，先知道補習天王可以月入一百萬元，追得上一啲專科醫生，但醫生多數係會考尖子，補習天王只係D級學生加大學三級榮譽，能夠賺咁多錢，實在係收入與讀書成績不相稱。當然，商場富豪級人馬使乜大學畢業吖，但補習算係教師之另類，教師唔係要靠讀書嘅咩？ 點 解收入咁高？原來天王可與補習學校六四分賬，補習月費四百元，扣除10%行政費，餘下三百六十元之六成即係二百一十六元，有五千名學生，便可以月入一百零 八萬元。點解有咁多學生，拜科技所賜啦，靠影音上課吖嘛！諗諗吓，諗到呢啲賺錢辦法嘅，實在係一流頭腦企業家，睇準本地教育提供之商機，抵佢哋發達。 每 個月交補習費四百元，學生一學年支出三千六百至四千元，家長願意畀，好似冇人去過消委會投訴過補習費太貴噃，而且四百元只係補一科英文啫喎，補齊中英數理 化嘅話，條數咪好襟計？可以係千幾二千蚊一個月嘅噃！足證香港家長但求子女會考成績好，升上大學，用錢一於冇計。但矛盾嘅係，做乜每年消委會都出個報告， 話教科書太貴？買齊一學年嘅書，由二千幾到三千幾，平均三百蚊一個月好未？與補習費相比，算係乜錢，啲家長點會投訴呀！或說有人畀唔起噃？哈，書簿津貼費 正係為咗幫助基層家長嘅。有錢送子女去畀補習天王們補習兩三科嘅，千祈唔好申請書簿津貼。此外，家長送子女學鋼琴、學小提琴、學長笛、學芭蕾、學劍擊、學 跆拳道、學網球，每個月又要幾多錢？最好有個調查機構做一次研究，睇吓一位學生之每月總支出係幾多，百分比分配如何？ 做齊 課餘之補習與學習，有錢仔女咪好着數？讀書成績一定好過清貧兒童啦。表面睇，的確如此，是故教育界時興講甚麼divide，例如digital divide（數碼鴻溝），但我哋睇吓每年之會考高考尖子訪問，發覺基層子弟不在少數，事實係：事在人為，如果教科書質素好，淨係勤力去讀教科書都可以考 試得到幾科A嘅，有錢學生唔會有壓倒性優勢！ | ||||||
2009-07-22 AppleDaily
| ||||||
| 上 次寫「矯枉必須過正」，讀者Eric來電郵云：「矯枉必須過正」為毛澤東名言，全句為「矯枉必須過正，不過正不能矯枉，多少過火的政治政策都因此最高指示 而起」。多謝Eric提醒。 收到電郵之日，剛好與一位網站主管吃飯，佢嘆息話雷曼迷債出事之前，佢哋網站吸引到不少投資產品廣告，而現在就幾乎一個都冇， 原因係 （一）證監會大力收緊產品審批； （二）基金公司即使得到批准，唔敢賣廣告，驚住俾人抽秤有誤導。 主管好同意「矯枉必須過正」之說，但長此以往，香港 國際金融中心之名，或要讓位咯，香港素來採用英式監管之Principle-based（原則為本），以後不如用美國嘅規則為本（Rule- based）。既然冇咗好多廣告收入，網站主管好驚要裁員。此日下午得知陳德霖做金管局總裁，譚志源做特首辦主任。批評家黎定得指陳德霖做過特首辦，可能 損害金管局獨立性，而受政治壓力。呢位英國紳士係任志剛老友，簡直攞嚟講。法律上，金管局總裁受命於財政司司長，黎定得做過金管局高層，佢知得清楚，歷任 財政司/司長有冇向任志剛施壓呀？任何人做金管局總裁，都有可能受到財政司司長壓力，法例係英國人以前寫下嘅，與特區政府無關，你估如果你搵黎定得接佢老 友個位，佢又可以頂得住財政司司長嘅壓力咩！ 如果財政司司長真係使用權力嘅話。又有人講到譚志源做特首辦主任年紀太輕，笑話也。四十五歲嘞，仲話年紀太 輕？ 呢個年紀，貝理雅、克林頓已經係政壇強人，任志剛已是金管局總裁，袁天凡已經做完港交所總裁，現任英國外交大臣文禮彬今年只得四十四歲咋。批評譚志源 做特首辦主任，應該從佢嘅工作能力着手，而唔係笑佢太年輕。至於佢掂唔掂，六個月後先至評估啦。本欄以廣東話為文，曾有人批評。一位讀者麥來函，就話廣東 話有時比普通話更文雅。讀者麥指北方人講「下午」，廣府人講「晏晝」，蓋日已上三竿，乃云時晏，卜晝卜夜，比「下午」有古意得多啦。廣府人自然喜歡廣府 話，香港人以廣府人為多，在芸芸專欄中，有一兩個廣東話專欄，或有生存空間啩。 | ||||||
2009-07-25 AppleDaily
| ||||||
| 雷 曼迷債方案經各報章連番披露後，證監會卒與金管局聯同宣佈與十六家分銷銀行達成協議（詳情見七月二十三日各報全版廣告及證監會網頁），是日左丁山打咗幾個 電話，知道銀行家、監管界以至政府人士覺得暫時可以鬆一口氣，靜待雷曼事主反應，至於有幾多人會接受基本上六至七成嘅回購（以本金計），當然難以預料，但 有關人士話比較審慎樂觀喎。 報紙披露東亞李國寶統籌銀行認同中銀之六成至七成方案，與證監會集體談判，佔功勞最大。其實東亞在十六家分銷行之中，所佔份額 不外億零，與中銀香港相差甚遠，即使百分之一百全賠，對東亞盈利並無大影響，但正如本欄於六月十六日所料：「寶哥哥一為神功，二為弟子，佢份人一定唔怕槍 打出頭鳥，別人或者不敢，佢就有膽識主動向證監會及金管局表達業界意見嘅。」根據後來之形勢發展，相信寶哥哥大力發功後，和解方案先至逐漸成為銀行界共 識，至於點解談判會在上兩個星期有快速進展，消息人士話，與韋奕禮放咗假有關。 經此一役，卒大功告成，寶哥哥在本港銀行界之地位本來已經無人挑戰，但北京 會另眼相看！證監會韋奕禮與金管局蔡耀君開記者招待會宣佈和解方案之時，左丁山正坐的士上山頂祝賀張信剛教授獲頒法國Ordre des Palmes Academiques，自己唔識法文，唔知中譯名字為何。 坐在的士內，開着iPhone聽電台，一路聽住啲最新雷曼新聞消息。現在科技進步得緊 要，iPhone橫掃全球，有其理由，因為一部電話竟可提供無數創意，有六萬五千個以上嘅「應用」（application），任君選擇，着實驚人。新城 電台就係最新一個iTunes玩意，可從iTunes直接下載新城電台，下載後，一按icon，就可選擇三個所屬電台，讓iPhone變成收音機，而且音 色甚佳，全無一般收音機之「沙沙聲」，邊聽AM 1044都收得好清楚，唔到你唔服。醫生莊又教左丁山下載Wattpad讓iPhone成為一本電子書，佢自己嘅iPod就透過Wattpad下載晒所有 珍奧斯汀嘅小說。一部電話具備如此多功能，真係「離開家門不可沒有它」！ | ||||||