2009-07-26 AppleDaily
| ||||||
| 雷 曼迷債和解，有人歡喜有人愁，愁嘅自不然係「專業投資者」與雷曼ELN持有人。睇報紙，何謂專業投資者，似乎唔係幾清楚，在銀行擁有投資組合八百萬元就係 投資者？大姐明幾乎喊苦喊忽，可能就因為佢擁資超過八百萬元之故。既然唔多明白，不如問吓人，隨手打電話畀賓架Ｌ，問佢何謂專業投資者，賓架Ｌ話：「當然 唔係有八百萬元就叫做專業投資者，根據證券及期貨條例係第三部（專業投資者Professional Investors）（Cap. 571D），客戶買入迷你債券之時，要與分銷銀行共同簽署一分文件，按照操守準則第15.3及15.4段（Code of Conduct），確認係專業投資者，先至算係。 假如你左丁山在我銀行嘅投資組合加埋有八百萬或以上，但從未簽過呢份文件確認自己係專業投資者，咁你就算 唔係嘅嘞！」聽落好似又幾複雜，左丁山在銀行有投資戶口，但唔記得有冇簽過呢類文件喎，賓架Ｌ話：「咁你咪同你間銀行核對清楚囉，唔難o架。」咦，自己雖 然完全與雷曼迷債、ELN或甚麼產品無關，為咗確證自己係唔係專業投資者，去仄吓都好。賓架Ｌ派定心丸，「雷曼迷債事主未簽過確認文件就唔會係專業投資 者，仍然有資格得到賠償。」買咗ELN又點辦？真係難搞啲。 ELN（Equity Linked Notes股票掛鈎票據）純係炒作投機並非投資，風險大過買迷債，因迷債有抵押資產，ELN只能信雷曼，等於與發行人對賭。 二○○五年至二○○七年之時， 買ELN者無不笑逐顏開，收利息十幾至三十幾個巴仙。收呢啲利息相等於sell put（出售認沽證），風險係股票下跌嘅話，發行人有權put你（即係要你收股票，唔收息），股票大升之時，sell put一定賺，股市下跌時sell put就只能猛咁收股票，本來有錢頂住就冇所謂啦，冇得埋怨，最弊嘅就係雷曼破咗產，所以與雷曼做對手嘅ELN，渣都冇。而且雷曼ELN最低投資額係五十 萬元，用私人配售（private placement）方式銷售，免受證監會核准，故此買入雷曼ELN嘅，係難與雷曼迷債事主比較嘅。 | ||||||
| ||||||
| 公關C諗清楚之後，勸老闆唔好為o靚模寫真動肝火，以免益人。公關C諗起，有人如果去廣管局TELA投訴乜、投訴物，引起《蘋果》李八方注意，寫番一大段，咁就發達咯，宣傳聲勢完全唔同，好似最近咪有咁嘅個案囉。 二 十一世紀各大媒體，互相炒作，互聯網、報紙、電子媒介你追我趕之下，好容易免費為他人造勢。美國費城有一位三十三歲媽媽，在家寫網誌，開咗一個網址，叫做 Classymommy.com，介紹佢嘅購物、用物心得，例如嬰兒用品，微波爐食譜，任天堂遊戲等等，估唔到大受歡迎，每個月有六萬名訪客，引起消費品 生產商、銷售商注意，每個月都爭住送新產品畀呢位媽咪用，希望佢在網誌介紹。呢位媽咪會在網上評論講明：邊啲貨品係自己買嘅，邊啲係公司送上門嘅，但佢嘅 規矩係，網站內提及嘅產品都係好嘢，一啲產品佢用過之後，發覺唔掂嘅，一概不會在網誌提佢，咁就大家都明白啦，呢位媽咪願意品題嘅貨品，好可能大受歡迎。 美 國啲公司現在於Twitter、 Facebook及博客網誌贊助不同產品與訊息，引起聯邦貿易委員會注意，正研究如何管制互聯網上之「超級商業主 義」（hypercommercialism），制定規則及指引，但網上發展，日日千里，恐怕到指引出台之日，情況又唔同晒！ 左 丁山平日好唔得閒，好少睇網誌，最近聽記者小G講，久唔久睇吓討論區，以了解民情（網民也），但睇咗成個月，發覺一啲筆名（作討論用）經常出現，似是同一 人，心諗人哋真係得閒，可以由朝到晚參加網絡討論嘅？唔怪得美國一啲大公司，根據美國報紙報道，在公關部陸續成立「網上監控組」，參與網上討論，向博客放 料，找尋一些所謂網上influencers，反過嚟影響呢啲「影響者」。咁搞法，網上訊息虛擬又得，真實又得，網民討論意見當然可以虛擬，總之假假真 真，有假有真，真假未必容易分得清楚。未來最受大公司重視嘅意見就係網上受歡迎嘅博客，在Twitter有大量追隨者（followers）嘅人士，而唔 係報刊評論員。 | ||||||
| ||||||
| 賓 架S即將退休，預備去歐洲美國旅行一輪，返嚟之後就玩吓股票，打多啲波（高爾夫），如有人約埋就去吓馬場咁話。問佢會唔會做義工，賓架S話唔想有「承 諾」（commitment）纏身，因為一旦應承咗做義工，就不可中途而廢，亦唔想一曝十寒，做一日唔做一日，煩親人哋，故此要睇定啲先，退休後兩年先至 再諗。兩年後，大概要旅行嘅地方都去過晒咯，唔想再遠行，發覺留在香港老家最好，但日日留在家中，恐防會悶得發慌，到時就有做義工嘅動力嘞。至於會唔會尋 求第二春呀？效法退休高官下海呢？ 賓架S話：「搵苦嚟辛咩，我做過三間銀行，做阿二阿三好受氣，退休後轉去幫昔日客戶（銀行家轉工轉行多數如此）做財務總 監，仲更加受氣！」此日賓架S請左丁山到銀行家會所吃飯，左丁山好耐以前曾經係會員，被銀行界淘汰出局後，自然已經唔係，賓架S好快亦唔會係咯，佢嘅會籍 係銀行嘅，會籍跟位唔跟人，佢離開銀行，自不然亦會失去會員資格，由其他同事頂上，以後要有老友請先至可以到置地廣場告羅士打大廈頂樓食飯。 左丁山問佢可 唔可以要求做榮譽會員，賓架S大笑：「面係人家畀，架係自己丟，人哋自動選我做榮譽會員，就話有面啫，自己出到聲問就認真唔識do咯，我哋做銀行成日要講 合規（compliance），否則會俾金管局將軍，我退休之後，亦一定會所有動作都合規嘅！」人要知所進退，不可對權位戀戀不捨，走咗仍然想攞着數，攞 在位時嘅perks，好易清譽不保，畀人在背後講閒話，你估好好聽乎。前國家副總理吳儀退休後最有型有款，公開講明自己會「裸退」。 左丁山唔多明白「裸 退」係甚麼名詞、動詞，但多少明白吳儀係講一退就全退，不理世事。聽其言觀其行，吳儀果然係「裸退」，聽學術界人士講有海內外大學想頒授甚麼榮譽畀吳儀， 或請佢教書，佢都一一拒絕，絕不留下尾巴，亦不在公開場合露面。十八年前吳儀係北京市副市長之時，左丁山在北京與佢見過一次面，一齊在必薩餅店食 pizza，當時真係估唔到佢係如此厲害人物。 | ||||||
| ||||||
| 披 圖最近行運沒法擋，佢隻馬「正本仁心」在國際賽馬日出場，同場有隻名氣馬「齊歡唱」孭起半個彩池，披圖來電講明話隻馬已經醫番好，一於搏殺，唔怕「齊歡 唱」，只怕「齊歡唱」唔夠熱，一於買自己隻馬ＷＰ（獨贏、位置）兼做膽食全餐。左丁山乃冇運之人，聽咗一半就話「齊歡唱」氣勢如虹，不能放棄，不如買呢兩 隻馬單Ｑ兼孖膽可以慳本。唉吔吔，「正本仁心」果然以7.5倍左右勝出，「齊歡唱」熱到一點幾倍就唔知跑咗去邊，左丁山啲單Ｑ付諸流水，孖膽斷埋，為之眼 濕濕，披圖就乜都中齊，大獲全勝；左丁山拍住個馬主，人地咁有信心，自己都唔肯跟，係要拖隻頂頭大熱門，抵輸死啦。 好彩，正如馬主Ｇ話齋， 炒股炒匯賭馬二十幾年，至今仍然在馬場行走，在商界做老闆，秘方只有一條，就係大大聲、細細注，拉勻輸得起，凡係大大聲、大大注，或者細細聲、大大注者， 始終會係「獵狗終須山上喪」。聽講一位評馬人從一無所有，窮過蒙正，至今天揸波子出入，令人矚目，唔駛羨慕嘅。 披圖介紹認識一位裁縫Ｅ，估 唔到呢位裁縫Ｅ對住美國人講英文，似足美國北佬，對英國客人講英文，近似BBC口音，跟住日本客行入嚟，佢又講到東京人咁款，問佢喺邊度讀書學返嚟，裁縫 Ｅ話：「我地邊度有讀過書呀，十零歲就在尖沙咀上海幫裁縫學師，月薪十五蚊咋，因為見得英美日客人多，咪學曉佢地口音囉，我去過美國、日本二十幾年o架， 唔係話過去打工，而係帶埋布料、樣本過去上門或在酒店同客人度身，返香港縫製，再寄西裝過去，唔係點搵到食呀！」唔怪得，佢呢啲四十後零舍搏殺，充滿獅子 山下嘅精神，今天之八十後唔會學嘅嘞。 咦，香港乜都貴，醒起律師Ｃ叫左丁山去上海度身做衫，平靚正兼夾快，三日交貨喎，計埋飛機票都平過香 港，香港裁縫點同上海人爭？裁縫Ｅ笑呵呵：「怕乜呀，我地啲行家返鄉下，在上海搵鄉里開舖，鄉里做台前，佢地做幕後，一齊搵食啫。」現在越來越少青年人入 行，裁縫後繼乏人，裁縫Ｅ話：「我可能係最後一代尖沙咀上海幫裁縫咯，印度幫裁縫先至有氣勢。」咁又係，阿Sam可以走入白宮同克林頓度身做西裝嘅，進取 程度無人能及，上海裁縫都自嘆不如。 | ||||||
| ||||||
| 吳 宇森認真巴閉，已預定獲頒二○一○年威尼斯影展之終身成就金獅獎，係第一位華人得此獎，繼高錕教授之後，再有一位可以稱為香港人嘅大導演為香港增光。睇吓 威尼斯影展之終身成就獎得主，過去就有英瑪褒曼、差利卓別靈、黑澤明、安東尼奧尼、費里尼、史提芬史匹堡、活地阿倫、奇連伊士活等等，即使唔等於係電影界 嘅諾貝爾獎，亦係國際電影界之「名人堂」（Hall of Fame），出身香港片場場記之吳宇森，跟張徹學師而成為世界電影名人，又係另外一個獅子山下經典故事。 香港過往有一段電影輝煌史，但如今 已江河日下。此日見到一位戲院高層，佢話o依家入戲院嘅觀眾日少，一年票房頂多十一億元，放映荷里活影片要遷就美國首映時間，放映港產片要遷就內地上映時 間，香港不得作主，總之人哋放映嘞，香港先至可以上場。當然，相比之下，內地市場大好多，人人望住，香港電影以內地票房為主，本港票房只係搭單而已。 情 況如此，香港會唔會再度出產一位新吳宇森呢？冇人敢講，相形之下，將來大家可能要去香港電影資料館先至可以領略到香港電影之威水史。電影資料館位於西灣河 鯉景道，地庫有免費停車場，搭地鐵在西灣河地鐵站落車，由Ａ出口步行前往，約莫五分鐘。小記者Ｇ住在西灣河，久唔久就去參觀，一次陪阿媽去睇林黛衣物展， 見到一個蜜絲佛陀粉盒，先知道化妝品牌子之中，有呢個品牌。前幾日睇報紙講美國八大瀕臨滅種嘅名牌，竟有「蜜絲佛陀」在，記者Ｇ話：「哦，原來當年林黛係 用大名牌化妝品！」 我哋以為電影資料館如果他日搬去西九文化館，擔保客似雲來，成為香港旅遊一大景點，請民政局康文署認真考慮之。即使位於 西灣河，《時代》雜誌仍然推選香港電影資料館為亞洲旅遊必到景點，推許電影資料館收藏豐富，保存舊電影技術一流，旅遊發展局快啲借力打力，宣傳推廣啦。十 二月二十五日起有任劍輝紀念展，二○一○年一月十六日開始有「張愛玲與電影」，至三月七日止，任劍輝迷與張愛玲迷要早啲去排隊！ | ||||||
| ||||||
| 聖 誕前夕之十二月二十四日，幾乎人人講下晝放假，吃過午飯便回家去也，打牌有之，人約黃昏後有之，中午十二時後，邊度仲有心機開工吖，故此股市只開半日，大 家識做。偏偏左丁山呢類自僱人士想輕鬆吓都唔得，呢日仲忙過平時，想寫稿都冇時間，到晚上七時先至執好公文袋，閂門熄燈，淒涼也。 中午有約 到新開兩個零月嘅Upper House，當然係坐地鐵去啦。飯腳一來電：「坐巴士在銅鑼灣塞到死！」飯腳二來電：「揸車過海行唔郁。」飯腳三來電：「等埋我一齊坐的士去金鐘。」咪攪 我，坐地鐵快夾妥，好快就由置地廣場去到太古廣場。太古管商場幾有辦法，識搞聖誕氣氛，好多遊客在此影相，入到萬豪，半打人一齊擁入『車立』，個個拖男帶 女講普通話，內地人真識嘆，來港過聖誕好過在上海或北京吖嗎！自萬豪四樓行出大門，轉個彎，就入到新酒店Upper House大堂，自大堂搭電梯上到另一層，坐『車立』上四十九樓就係新餐廳Cafe Gray啦，聽講廚師係瑞士人，在紐約開Cafe Gray闖出名堂，故此受太古之邀，在香港開業，呢間餐廳賣fusion概念，午餐頭盤可以係意大利菜湯或沙律，主菜係牛仔肉或法式醬鵝或清蒸石斑，連甜 品賣三百五十元，算係咁啦。此店勝在有宏大海景，窗旁座位可以直望西九龍至尖東，景就冇得彈嘞，只是細微觀察下，啲茶壺、麪包刀木柄已經擦花晒，保養工夫 一般啫噃，聽講開業以來，呢間餐廳日滿夜滿，生意好到不得了，一百個座位無一閒置喎，左丁山一行人搵到個離開窗口二十呎嘅枱，已算夠運。 嚟 到太古廣場，不知何謂金融海嘯，不知何謂收入低微，商場店內人頭湧湧，食肆擠滿人，有位遊人來電：「乜鄭維健博士都要坐Grappa's嘅高櫈呀！」又咁 眼利嘅，咁都畀佢睇見！鄭博士素來冇架子，為人隨和，唔會自抬身價，坐高櫈有乜所謂吖，香港有錢人同內地有錢人比較一下，就知道香港啲富豪係平易近人得 多。行行吓商場，幾乎畀左一包Gucci，右一袋Bally，再來一袋Burberry打中，見到內地阿嬸而唔自動閃開，抵打啦，急忙逃回寫字樓爬格仔。 | ||||||
| ||||||
| 豪 宅創下天價之後，第一次有官地拍賣，事先好多人表示樂觀，以為地產商餓地，大埔白石角D與D2兩款地皮面臨吐露港，海景永無阻擋，理應可以拍得高價。一向 估地價甚為準確嘅第一太平陳超國估每幅地可以賣六十二億，萊坊陳致馨最勇，估六十四億八千七百萬，最悲觀嘅宏基陳昌傑估五十億四千五百萬。結果呢？一幅賣 得五十二點五億，一幅賣五十一點五億，平均呎價七千二百一十四元，只係比市場預期下限好少少，唔怪得恒生指數立即止升倒跌。《蘋果》財經版喺十二月二十八 日報導「大埔豪宅紛反價封盤」，呢勻業主撞板咯，復盤後，大埔豪宅價會升定跌呀？ 邊個買入「大埔地王」呀？原來又係與信和集團有關人士，計 埋之前嘅A、B、C地盤，信和可以在白石角興建一個新嘅豪宅區，與康樂園、鹿茵山莊抗衡。信和大股東黃志祥講建築費要顧及環保及地基，每呎建築費要兩千 幾，加上地價，已近呎價一萬，加上利息及利潤，白石角豪宅話要賣一萬五千元一呎，邊個會買呢？唔會係中文大學及教育學院啲教授，佢地大部份人都供唔起一千 五百萬元嘅住宅單位，相信買家會係換樓客，以賣掉古舊豪宅（如康樂園）而買臨海豪宅嘅廠家為主。白石角全面發展後，交通方便過康樂園好多，揸車去大學站， 去沙田馬會以至出荃灣，去西九及機場，由五分鐘至三十分鐘可達，到中環四季酒店都係廿零分鐘啫。 三兩年後嘅萬五元一呎豪宅，貴唔貴？以新界 樓嚟講就係貴，以中半山、西半山豪價今日價錢比較，大致相同，唔怪得陳超國話發展商其實對後市有保留，十分謹慎，唔敢輕易舉手，亦唔肯追價。發展商既然唔 敢睇好，大家唔好咁心雄嘞，唔好望樓價不斷上升令自己發達，總之買樓自住，能負擔得起，長期慢慢升值，住得安樂，已經好好，將房屋視為炒賣工具，必令社會 不安、驚動領導人干預，卒之會吃到苦果o架。 | ||||||
| ||||||
| 二 ○一○年今日開始，以前循老例定下一啲新年願望清單，例如（一）今年減肥三十磅，（二）今年增加收入一成，（三）今年閱讀二十本書等等等。其實年年都做唔 到，睇番以前的wish list，而今只覺得好笑，舊年唔再寫低咯，隨遇而安便是，世間事邊度預測得咁多，如果一九九九年一月一日就預估股市會反彈五成，或者股市會在九九年三月 九日見底嘅話，嗰個就係神仙啦。故此一月一日會有乜嘢節目？你鍾意做乜就做乜，左丁山今天一定在沙田馬場，睇吓莎莎郭少明之兩匹同場馬「漂亮第一」（告東 尼馬房）與「美麗傳奇」（方嘉柏馬房）是否可以贏到蔡神仙之銀行馬「披星戴月」。 測馬難求準確，測市涉及太多本地及國際因素，更加難測，如 印度經濟學家Arvind Subramanian在《金融時報》引述凱因斯嘅名言：" The inevitable never happens. It is the unexpected always."（無可避免之事永不發生，意想不到之事經常出現。）又如金融海嘯之後聲名大噪嘅Taleb先生講黑天鵝，白天鵝就話常見啫，黑天鵝永遠突 如其來，點可以預見呀。英女皇曾召見英國經濟學家，問佢地點解預測唔到海嘯，一眾學者無言以對！ 講咁多唔係話「前景預測」冇用，只係話每個 人嘅預測代表咗個人嘅學識、視野、識見、偏見、成見、局限等等，人人不同，詮釋每個專家之預測，千祈唔好照單全收，睇表面言論，最好問埋、知道埋不同人士 之不同預測係基於甚麼理論、甚麼學說、甚麼經驗以及甚麼假設。講番經濟，○八年九月後，世界各國政府全部成為凱因斯信徒，以赤字財政、量化寬鬆嚟救市托 市，○九年果然止跌回升，證明凱因斯學說有短期作用。但佛利民亦話畀我地聽咁嘅政策最終是會導致通脹，故此債券利息已經上升嘞，二○一○年持有股票嘅風險 細過持有債券，想食息者可以考慮換馬，賣債券，買中電、港燈！ | ||||||
| ||||||
| 建 造W係建造業的具領導地位人物，佢與大公司總裁建造H，再加埋建造T一齊在世貿中心會所請食飯，正所謂無事不登三寶殿，為乜呀？建造W話佢哋素來低調，只 做不說，況且平時行家各有各忙，互相競爭投標，為搶生意及追工程而忙個不休，邊度會有時間搵左丁山之流坐埋吃飯吖。不過現在係二十一世紀喇噃，好多不同聲 音日日在媒體出現，好似代替咗佢哋發言咁，如果佢哋再唔出聲，好容易俾人誤會一啲活躍專業人士嘅聲音就代表咗佢哋，故此都試吓粉墨登場，與媒體朋友會面。 編 輯L問佢哋，市場消息話十大基建上馬，建造業會出現嚴重人手不足情況，實情如何？建造H答話，建築工人要登記註冊，名單上有二十九萬人，但實際上開工嘅大 約有十一萬人。咦，失業率咪好嚴重？建造H講：「又唔係嘅，其實過往十年，全港公共工程、私人工程嘅合約價值由千零億元跌至五百幾億元一年，好多工人已經 流失咗，譬如轉行做的士，老嘅或索性退休，明年開始有大工程展開嘅話，可能有轉行工人回流，故此暫時我哋唔驚有工人短缺。」 建 造W補充，建築工人比較年紀大，中位數年齡係四十幾歲，過五十歲者十分普遍，佢擔心呢行後繼無人，建造業訓練局已開班訓練急需工人，譬如炮王訓練班，反應 非常好，有幾百人參加，但又係四十歲左右嘅，真正年青人，即八十後，對加入建造業嘅興趣比較低。無他者，呢行係勞動工作，戶外勞動多，唔肯捱之人，好難做 落去。我哋問：係唔係人工低，無晉升機會呢？三位仁兄都話一至萬二銀一個月唔難搵啫，炮王起碼有日薪過千，未來幾年應該不愁，但之後十年呢？建造W話： 「冇人敢預測嘅啫，我哋已經好過新加坡好多o架嘞，譬如高鐵上馬後又有其他工程接上嘅話，呢行會有五六年好景嘅！」講起高鐵就十分敏感，有人問及公盟方 案，建造W與建造H都話佢哋同意工程師學會嘅報告，認為公盟方案低估造價，低估收地之困難，低估環評報告帶來之延長時間與成本，如果再傾兩三年嘅話，成本 必定更高，好唔實際。簡單啲講，佢哋建造界一致認為高鐵應該及早興建，不應再拖，佢哋嘅公司未必投到標，但對整個建造業關係重大喎。 | ||||||
| ||||||
| 每 年都有大學生自殺，原因不外乎學業壓力、失戀等，一啲八十後上街反高鐵，一啲八十後一時睇唔開，一死了之。呢兩類人嘅生活哲學，實在相差甚大。新年新聞有 一宗港大尖子自縊身亡，閱之令人悲痛。屯門名校女生，係會考六A尖子，入港大讀商學法律雙主修，難得到極。據《蘋果》報導，呢位女生來自單親家庭，自幼與 母親相依為命，住在屋邨，由母親辛苦培育，以後下半生都靠呢位叻女，點知愛女竟因為一位科大男友提出分手，想唔開而自殺。叻女呀，叻女，難道你心中只有一 位男友，而完全不把母親放在心中？阿媽當年被爸爸拋棄，佢鼓起勇氣，將你養育成才，呢份親情難道不及一位男生對你之浮雲愛情？ 曾在紐約教移 民學生英文嘅主婦L睇完新聞，對左丁山慨嘆：「身為兩女之母，我好為呢位叻女阿媽傷心。現代男女學生求學時期拍拖，普通到極，分手實屬平常，點解要死呢。 我哋讀中學之時，中文先生就係道德倫理老師，教古文就會提到『身體髮膚，受諸父母，不敢毀傷。』又講：『父母在，不遠遊，遊必有方。』在二十一世紀，呢啲 道理係幾老套，但其實係教我哋孝順啫，識得諗，就唔會自、自殘、索K以至自殺咯！」 主婦L在紐約生活多年，教過不少移民學生，見過不少悲 慘移民故事（如不少因為移民而導致家變、情變、生意失敗等等），住得耐，思想反而回歸《論語》、《孟子》，面對香港八十後之自殺新聞，完全不能理解。前些 時有一位年青法醫官（女）自殺，然後聽到兩個酒店職員自殺，據說全因工作壓力太大之故，其實可以轉職、轉行o架，呢三位八十後難道在家中，在公司，無人輔 導，無人申訴？有不少學生讀書好有天份，加上父母催谷，成為尖子並不稀奇，但不可不知者，就係尖子如果太過一帆風順，由幼稚園低班至大學都考第一，未經歷 過失敗嘅話，一旦碰上挫折就容易抑鬱，睇唔開，產生極端行為。父母不妨故意安排一啲「挫折」畀家中尖子，等佢習慣吓。 | ||||||