2008-09-24 AppleDaily
金 融海嘯席捲全球，美國華爾街投資銀行全軍覆沒，貝爾斯登最先當殃，賤賣畀摩根大通，雷曼兄弟求救無門，申請破產，美林又俾美國銀行吞併，前日連兩大投行高 盛同大摩都要玩轉型求生，變身做傳統存款銀行。風水輪流轉，美資投行唔掂，仲唔輪到歐資投行發圍，金融界一向係弱肉強食，歐資大行已經開始搶攻投資銀行市 場。
德銀瑞信揼本賣廣告
瑞銀噚日聽朋友講喺CNBC同Now財經台度見到瑞銀個廣告，大sell自己係全球冧巴溫嘅投資銀行，擺明同過氣嘅美資投行爭生意。雖然瑞銀咁吹捧自己，但係佢得唔到自己人撐場，原因根據瑞士《星期日觀察報》最新調查，六成瑞士人對全國最大銀行瑞銀失去信心。
德銀都好揼本，喺英國《金融時報》頭版位度落廣告，話自己無懼風雨，可以幫客度過今次金融海嘯，「Complex challenges demand innovative solutions」。
瑞信亦喺《金融時報》登廣告，話自己「We think outstanding performance」。所以話呢個世界永遠都係一雞死，一雞鳴。
中環在線：大孖沙齊增持郭氏兄弟豪撈新地 李華華
2008-09-24 AppleDaily 上市公司股價係咁插，中央都出手救市啦，香港嘅大孖沙上個禮拜見水浸眼眉，亦紛紛出手自救，新地（016）郭氏兄弟、東亞（023）李國寶、嘉華（173）呂志和同鷹君（041）羅嘉瑞，分別增持自己公司股份。 呂志和頻掃貨 出 招最密嘅，要數呂志和，中秋節補假一過，佢就即時出手，仲係連續4日入市，合共揼咗1400幾萬港銀。不過出手密唔代表出手豪，郭氏兄弟加埋阿媽鄺肖卿， 臨近上周末透過家族信託基金，兩度增持新地，仲係一出就係重手，共涉資近8000萬港銀，係上面提過嘅大孖沙中最豪嘅，所以話呢，兄弟齊心自然好辦事。 郭氏兄弟出手除咗係托股價，換個角度講，可以話係趁低吸納，始終間公司值幾錢，做老闆嘅最清楚。 咁郭氏兄弟喺呢方面可以話係明燈，因為佢哋每次出手，都幾近撈底之時。02年郭氏兄弟買新地，初時越買越跌，但到第二年，佢哋已經贏凸，今次佢哋增持，可 以話係派定心丸畀股東，至於今次佢哋跟唔跟得過呢？自己諗吓喇。大孖沙明燈仲有一個，就係超人李嘉誠，超人出得手，又點會中空寶呢？佢過往多次出手，包括 02年及03年，都分別增持長實（001）及和黃（013）兼有斬獲，不過發生金融海嘯至今，都仲未見超人出手，唔通佢覺得仲未到底？ 大孖沙上周增持情況 大孖沙名單：新地郭氏兄弟增持次數：2共涉資：7921.9萬元大孖沙名單：東亞李國寶增持次數：3共涉資：2116.1萬元大孖沙名單：鷹君羅嘉瑞增持次數：1共涉資：1682.7萬元大孖沙名單：嘉華呂志和增持次數：4共涉資：1421.4萬元資料來源：港交所
中環在線：東方表行主席呻基金施壓
2008-09-26 AppleDaily 東方表行（398）噚日喺中環旗艦店開股東會，主席楊明標冇主持，但都有出席同班老股東打招呼，楊主席對同行宜進利（304）被臨時清盤人接管單嘢好慨嘆，話宜進利「做得太多」。佢係指擴充太快，舉債過高，所以搞到咁，楊主席話佢喺呢行50年，呢啲情況見得太多。 70幾歲的運動健將 至 於東方表行專注做錶，冇掂其他瓣數，董事林慶麟爆話，基金都有畀壓力佢哋，話佢哋冇乜做嘢（指開分店擴充之類）。不過楊主席堅持，公司要審慎理財，「寧願 賺少啲，好過瞓唔着」咁話。其實楊主席唔止瞓得，仲好玩得，今年70幾歲嘅楊主席朝朝先去行山晨運，再去游水，每個禮拜打一次golf，間中又打網球，十 足運動健將。至於生意，佢話好多決定都由阿仔，即係董事總經理楊衍傑自己搞掂，但楊主席就冇話退休，依然日日返工。咁又係，佢咁鍾意錶，淨係勞力士都收藏 咗廿幾隻，返公司對住咁多靚錶仲開心啦！
中環在線：投資遼寧身體好？ 李華華
2008-09-26 AppleDaily 遼寧省噚日嚟香港招商，省長陳政高落足嘴頭叫啲港商北上投資，咁遼寧省有乜優勢呢？佢話：「在遼寧談生意，談到七八成就可以談成，但在南方你談到十二三成仍未能談成！」 噚 日除咗財政司司長曾俊華，唔少大孖沙都有捧場：彤叔鄭裕彤、四叔李兆基大公子李家傑、霍震寰同董建成都有到，陳省長自然落足嘴頭，佢話遼寧省今年首8個月 錄得嘅固定資產投資金額達一萬億人仔，位列全國第3位；而房地產仍保持急速增長，今年首8個月投資增幅達50%。對於有港商指遼寧太凍，所以唔鍾意去咁北 嘅地方投資，陳政高就有唔同睇法。佢話發達國家好似美國、歐洲，都係氣候寒冷嘅地方，贊比亞呢啲非洲國家夠晒熱，但就唔見佢哋發達，最搞笑佢話，天氣凍酒 量會提升，有助身體健康喎！
中環在線：航天股隨神七升空 李華華
2008-09-26 AppleDaily 神七噚晚成功升空，內地航天股預早祝捷，股價噚日全線撻火發射，急升1％至4%。噚日內地9隻航天股中，以航天通信嘅升空速度最快，股價飆升3.81%，收報7.09蚊人仔，其次係航天電器同火箭股份，分別節節上升2.54%同2.45%。 其實，內地航天股呢幾個禮拜已經開始點火升空，不過今個禮拜佢哋嘅升空速度寧舍強勁，越接近升空日子，航天股嘅升幅就越厲害，當中以航天科技升幅最標青，股價今個禮拜累積升咗21.6%，航天動力亦唔輸蝕，股價急升19.5%。 不過講到最失禮，就要數航天信息，呢個禮拜股價累跌1.48%。 飛船未回見好即收 今次神七環繞地球飛3日，究竟內地航天股仲有冇動力維持3日升勢就不得而知，但根據過往神舟飛船升空經驗，飛行期間航天股只係會微升，飛完後一個月仲會回軟降落，炒股都係見好即收為妙。
思捷股價跌董事照加薪 中環在線：潘祖明袋3344萬走人 李華華
2008-09-26 AppleDaily 思 捷（330）上個月尾公佈業績，盈利遜於市場預期，股價第二日應聲急挫近兩成，股價至今累積插水三成六。雖然思捷股價狂瀉不止，但仍然無阻班高層財源滾 滾，根據思捷噚日最新公佈嘅年報，主席兼集團行政總裁高漢思08年度人工急升兩成三，取7266萬港銀，當中以基本薪酬、津貼連實物利益升幅最誇，增加 1.4倍，至1289萬銀，花紅就增加近13%，至4588萬銀。 至於7月尾突然劈炮唔撈，前副主席兼財務總裁潘祖明，08年度人工就勁升近41%，賺咗3344萬銀，當中同樣以基本薪酬、津貼連實物利益嘅升幅最多，急升近75%，收取1053萬銀，花紅就上升三成，至1147萬銀。 接班人呼之欲出 睇 番思捷年報，潘祖明02至08年，合共行使咗3次購股權，行使股數合共120萬股，涉及金額3105萬銀，以噚日思捷51.55蚊收市價計算，呢批股份值 6186萬銀，賬面賺3081萬銀。家吓潘祖明仲揸住395萬股思捷，佔發行總股數0.32%，賬面值2.04億銀。至於思捷幾年前銳意栽培Thomas Grote同Jerome Griffith，話希望二擇其一做思捷接班人嘅，家陣睇嚟勝負已分，接班人呢個位睇怕都係Thomas嘅囊中物。點解華華咁講？因為Thomas 08年人工急升五成，至3412萬銀，相反Jerome就跌咗約13%，只到1116萬銀，同Thomas人工相差成兩倍，兼且今年思捷業績 會，Thomas又有得上台講嘢，睇嚟思捷接班人非君莫屬。 [email protected]
Next Page
ZKIZ Archives @ 2019
|