海洋公園狂歡玩到閂門嘉穎拖陳凱琳嗒糖返家
1 :
GS(14)@2015-10-19 07:33:48【甜蜜拖手】■鄭嘉穎和陳凱琳趁昨日凌晨街上冇人，即手拖手取車，甜到爆！攝影：梁繼光
【爆相爆片】【海洋公園→天后→大坑】現年46歲的鄭嘉穎與24歲的陳凱琳（Grace）承認發展「父女戀」，為迎合女友，嘉穎投其所好冧女。前晚有讀者爆料，指嘉穎跟女友及Grace細佬等一班年輕人去海洋公園，嘉穎陪玩越礦飛車、探鬼屋兼食糖水。至昨凌晨2時許，一對小情侶返回嘉穎屋企。
鄭嘉穎和陳凱琳今年4月孖住出發到荷蘭拍攝劇集《殭》時撻着，有指Grace不時等嘉穎收工，二人又經常離隊，其後Grace被影到去男方家過夜斷正，關係正式公開。相戀近半年，有傳Grace父母不接受嘉穎年紀大，而嘉穎過去三個月都要返內地掘金，與女友分隔兩地。加上靚女多人追，Grace先後與洪永城和陳展鵬傳緋聞，幸一切無礙「穎琳戀」繼續相愛。
【排隊陪玩】■嘉穎前晚陪女友陳凱琳到海洋公園玩，不怕人多齊排隊玩越礦飛車。讀者提供圖片
【越礦飛車】■陳凱琳與嘉穎同坐一卡車，陳凱琳興奮拍手。讀者提供圖片
【上車掃背】■嘉穎輕掃女友玉背，為她開車門顯風度。DV圖片
興奮陪玩越礦飛車
最近嘉穎和Grace難得一齊不用開工，可以盡情享受拍拖生活。前晚讀者呂小姐透過本報爆相爆片，指見到嘉穎與Grace一齊去海洋公園玩，同行還有五、六位年輕人，呂小姐稱在等玩越礦飛車期間，見到嘉穎與Grace着住黑色情侶裝一齊排隊，雖然現場有好多人，但嘉穎都冇避嫌，有講有笑，望落嘉穎似乎後生了20年！片段中見Grace和嘉穎同坐一卡車廂，出發時Grace興奮拍手，有現場市民好奇問：「係咪拍緊戲呀？」據悉他們之後還夜探鬼屋，Grace玩得好盡興，玩到樂園閂門才捨得離開。直至晚上11時許，鄭嘉穎、Grace與同行友人離開，原來Grace弟弟及其女友、Grace好姊妹賴慰玲亦有同行。乘扶手電梯時，鄭嘉穎刻意與Grace隔幾個身位，直至行到停車場後，一班人分開坐上兩部車。Grace與弟弟及弟弟女友同坐上嘉穎的寶馬跑車，當Grace準備上車時，嘉穎即掃一掃女友面珠，又輕撫她的背脊，之後嘉穎再幫她閂車門，Grace全程笑笑口。一行人揸車到天后甜姨姨甜品店食糖水，他們坐在樓上靠窗位置，不過嘉穎似乎怕被人認到，全程拗住條腰坐，等窗外的人見不到他。未知是否同行友人比較後生，估計全部都是Grace的朋友，嘉穎明顯難搭嘴，無聊一個人落樓下連煲兩支煙，企在街上傾電話。
【甜品滋潤】■嘆甜品時，嘉穎坐近窗口，但經常彎腰似乎怕人認到。
【落樓煲煙】■嘉穎與一班年輕人話題不多，無聊獨自落樓連煲兩支煙。
【載返鄭家】■嘉穎駕車載陳凱琳返自己屋企，之後未見陳凱琳落樓。
【陳弟拖女】■陳凱琳的孿生弟弟拖女友入糖水店。
嘉穎：鬼屋好新奇
食足兩小時，嘉穎和Grace先送友人上的士及另一架私家車，嘉穎同Grace本來在人多的時候都表現得好小心，嘉穎不時周圍望。見凌晨2時多，終於放下戒心，嘉穎和Grace拖手去取車，嘉穎幫Grace開車門，盡顯風度。兩人一齊返回嘉穎的大坑寓所，記者等了一會仍未見Grace離開，應該是在嘉穎屋企過夜。回復年輕心境的嘉穎似乎已尋回「初戀」感覺，昨日在電話中難掩甜蜜之情，他笑說：「我由中學到而家都好耐冇去呢啲地方玩，我喺海洋公園廣告見到羅蘭姐，就好有興趣去睇吓。呢排放假，所以咪盡情玩吓囉，同女友等一班人一齊去，可惜見唔到羅蘭姐，但睇鬼屋都好新奇、好開心、幾得意吖。」採訪：徐錦池、鍾國仁攝影：梁繼光
來源:
http://hk.apple.nextmedia.com/entertainment/art/20151018/19337651