中環在線：蓋茨色誘股神學電腦 李華華
2008-09-29 AppleDaily
股 神畢菲特親自授權出嘅自傳，今日香港會同美國同步推出，但本書部份內容就喺英國《金融時報》偷步登咗少少，上周末佢哋就出咗段股神同蓋茨初遇時嘅趣事。話 說喺91年7月某個星期五，畢菲特一早跟隨朋友去蓋茨屋企做探訪，初時兩位富豪對呢次見面都冇乜興趣，蓋茨甚至同佢阿媽講，「我唔識啲只係識投資同買股票 嘅人」。不過蓋茨媽堅持，阿仔先至現身。兩個猛人一見面，講嘅唔係天氣呢啲客套說話，而係即刻入正題，股神問蓋茨：「IBM將會越做越好，會唔會成為微軟 嘅競爭對手？」蓋茨嘅回應都好直接，叫股神買兩隻股票，一隻英特爾，一隻就係微軟。兩人就係咁開始話題，仲傾到雞啄唔斷o忝。最後蓋茨游說股神買電腦，股 神就話個腦轉一轉，就計到自己要交幾多稅，使乜用電腦。蓋茨於是用到色誘一招，話搵個最靚女嘅員工，上門教股神用電腦，總之過程唔痛苦兼好愉快，之不過股 神竟然唔受，照樣拒絕。
中環在線：微軟高層近億獎金 李華華
2008-09-29 AppleDaily
金 融海嘯蹂躪下，花旗華爾街瀰漫一片愁雲慘霧，唔少打工仔都擔心裁員、cut花紅，但愁雲背後，微軟高層仍然享受緊加州陽光，穩袋可觀薪酬，預計明年可得 近億美金獎金。據美國《西雅圖時報》報道，微軟上個禮拜四提交新修訂嘅高層獎金激勵計劃，一眾高層包括CEO巴爾默最多可以獲分相當於公司09年度營運收 入嘅0.35%作為獎金。根據微軟最新預測，公司09年度嘅營運收入將介乎263億至269億美金，按此計算，微軟高層最多可以攞到9415萬美金獎金。
不過，呢個激勵計劃設有獎金上限，每名高層每年最多只可以分到2000萬銀，而微軟嘅薪酬委員會亦會根據公司業績表現，決定係咪減少甚至取消獎金。所以微 軟高層唔係話蹺埋雙手白獎金，公司業績差隨時一個仙都冇。
中環在線：王雷雷脫離契媽自立 李華華
2008-09-29 AppleDaily
周凱旋契仔、TOM在線前首席執行官兼董事王雷雷月初劈炮，為「實踐個人抱負，再創事業另一高峯」。當時，內地傳媒就流傳佢會過檔空中網，呢個傳言終於成真，王雷雷正式入主納斯達克上市、中國最大海外上市無線增值業務運營商。脫離契媽保護罩，自力更生。
入主空中網
據 空中網上周六公佈呢個人事任命，王雷雷下個月13號返工，接替同日離職嘅周雲帆。空中網係周雲帆離開搜狐後創立，主要針對手機用戶，開發流動網絡軟件，又 提供內容及應用服務。華華唔知周雲帆因乜唔再理自己檔生意，但報道話空中網睇中王雷雷喺TOM在線嘅營運經驗。除咗坐咗CEO個位，王雷雷仲透過私人公司 Right Advance Management，喺周雲帆手上買入1.835億股空中網股份，交易完成後，王雷雷合共持有空中網2.479億普通股，佔17.4%股權，係第一大股 東。
中環在線：梁錦松叫執平貨郭樹清便宜莫貪 李華華
2008-09-29 AppleDaily
上 個禮拜同老婆伏明霞返四川考察嘅前財爺梁錦松，周末以黑石（Blackstone）大中華區董事長身份去咗天津，出席2008天津夏季達沃斯論壇。梁錦松 話，對於包括中投（中國投資有限責任公司）在內嘅全世界主權財富基金嚟講，o依家係百年一遇嘅投資機會，因為好多國外資產，價錢比較低，而且仲有可能繼續 跌，所以應該投資喺有戰略意義嘅資產上。
長揸投資好時機
佢話到明唔係叫大家去摸底，只係如果作為長揸嘅資產，咁o依家係一個 投資好時機，對中國嚟講亦係一個好機會。問題係，梁錦松究竟信唔信得過？事關中投投資黑石損手嗰次，梁錦松被千夫所指。問到中投投資黑石損手，佢有冇從中 吸取教訓，梁錦松話：「我不是中投的參謀，但是中投我有好多朋友。」佢仲話，中投係國家成立嘅一個對外投資公司，作為一個長期投資者，資金量好大，佢唔可 能好似散戶咁日日計算蝕咗幾多，因為你都唔可能每日喺股市買進賣出。呢一邊，梁錦松話家陣係執平貨時機，另一邊國務院國資委主任李榮融亦呼籲國企趁經濟危 機收購歐美企業。佢喺江西江銅集團考察時話，家陣歐美經濟不景氣，加上人民幣升值，國企應大量走出去收購歐美的優秀企業。不過買嘢還買嘢，最重要係防範法 律風險，何況之前啲國企「走出去」配置全球資源，一直都面對西方跨國公司巨大壓力，仲要面對唔發達國家嘅法制唔健全同政局動盪嘅風險。
收購歐美企業涉風險
有 人伺機入市撈貨，亦有人話便宜莫貪，建行（939）董事長郭樹清就話：「（海外的）資產不知道質量如何，如果看着便宜就去買了，但買了之後還要進一步減 值，那就不便宜了。」大企業併購投資唔係講兒戲，去馬之前就梗係計清楚先啦！李華華
[email protected]
中環在線：買保險送Benz 李華華
2008-09-30 AppleDaily
保 險經紀爭客一向激烈，早排AIA（友邦保險）俾阿媽AIG（美國國際集團）拖累，搞到一班客仔喺門口排晒長龍要退保，其他保險公司見到咁嘅情況，梗係即時 把握時機，趁機吸納呢班準客仔。不過唔少人已經對保險公司失晒信心，就算一街都係拎住保單冇地落腳嘅客仔（唔少仲係大客o忝），都唔係咁易捉得住佢哋。 AXA（國衞保險）就諗到送Benz搶客，佢哋搞咗個大抽獎，分12個禮拜，個個禮拜送出一部高清液晶體電視，終極大獎仲係平治C系列名車。
每年保費 5000蚊以上就可以參加抽獎。以前買保險，送小禮物好似筆呀、杯呀就見得多啫，再唔係就送多份純壽險之類嘅平價保險，但買保險送Benz，雖然話係大抽 獎，過去咁多年都真係冇乜見過，今次開咗呢個頭，遲啲大抽獎會唔會送層樓過你呢呵！
中環在線：畢菲特「衍生工具如性伴」 李華華
2008-09-30 AppleDaily
股 神自傳《The Snowball:Warren Buffett and the Business of Life（雪球：畢菲特與人生經營）》噚日港、美同步推出，華華第一時間搶購拜讀，發現股神一生涉足唔少投資產品，但對衍生工具就好有戒心。佢老人家幽默 抵死咁話：「衍生工具好比性愛（Derivatives are like sex）。」問題唔係你同邊個瞓，而係同你瞓嗰個，仲同邊啲人瞓。估唔到平時木口木面嘅畢菲特，講起嘢嚟會咁啜核。點解咁講？原來98年美國大型對冲基金 長期資本管理（LTCM）出事，畢菲特一度夥拍高盛救亡，結果唔使多講，但當時佢就批評LTCM涉足嘅衍生工具關係錯綜複雜。當年有多間金融機構出手救 LTCM，家陣雷曼兄弟就冇咁好彩，要申請破產保護，香港散戶買咗由衍生工具包裝成嘅雷曼迷你債券，搞到損手爛腳，佢哋聽到股神咁形容衍生工具，睇怕都笑 唔出。美國次按爆煲，唔少投資者聞按揭投資產品色變，但股神膽識過人，認為家陣係尋寶大好時機，充份體現佢「在別人恐懼時我貪婪，在別人貪婪時我恐懼」嘅 投資策略。不過佢唔係冇戒心o架，喺自傳度話明投資前要做足準備，一般投資者就無謂掂咁話。
教投資者買ETF
畢菲特仲向投資 者推介追蹤指數基金（ETF），一來管理費低，二來避免喺唔啱時間做咗錯誤嘅投資決定。如果長線睇好美國市場，不妨吸納有質素嘅股票。佢仲語重心長話，要 趁年輕及早投資，慶幸自己開始得早，將雪球滾大，再遲十年，一切都唔同晒。想買股神本自傳唔難，華華噚日去幾間書局八過，首批入貨量得30至50本，價錢 由204蚊到315蚊不等，不過下晝未到放工，本書已賣得七七八八，所以有買趁手。好似中環間三聯，第一批貨入咗30本，下晝兩點幾已賣剩一本；國金間 Dymocks就入咗50幾本，下晝好快賣剩約10本。
股神大使另有任務？
股神入股比亞廸（1211），噚日開記招，除咗有 代表畢菲特出席嘅「股神大使」Sokol，仲有兩位深圳市政府代表，分別係市長科技顧問劉應力同副秘書長高國輝。見到兩位領導咁支持，自然令人聯想單刁有 深圳政府祝福，甚至係政府一手促成。不過Sokol同記者講：「深圳市政府應該係同你哋同一日知。」咁又係，股神揀股從來都係睇有冇價值，邊使畀面政府 啫。
訪港交所莫非探路
講開Sokol，佢噚日唔止出席比亞廸記招，仲去埋港交所（388）同主席夏佳理say hi。據港交所新聞稿話，兩人就全球經濟、金融市場發展同內地投資商機交流意見。而Sokol就話中國市場活力充沛（同美國比又的確係囉），好開心可以參 與，而香港提供好多呢方面嘅機會。Sokol去得港交所，照計唔會空手而回，應該係幫股神買貨搜集資料，咁此行有冇攞到啓示呢？李華華
[email protected]
中環在線：新股搞推介財圈老鼠呃飯食 李華華
2008-10-02 AppleDaily
市 況差，搞到新股上市活動幾乎絕迹，不過近排仍然有一兩隻新股唔怕冇人吼照招股。新股翻生，最高興除咗係啲i-banker，仲有一眾財經公關。講開招股活 動，華華就諗起所謂嘅財圈老鼠。話說新股招股，例必會搞上市前推介會，等啲上市公司管理層可以接觸吓啲基金經理，推銷吓自己嘅公司。搵得芬佬嚟捧場，點可 以失禮，喺大酒店搞個午宴食吓魚翅、鮑魚唔少得，而呢個正係金融老鼠最活躍嘅時候。財經公關都想搵大行出席，雖然好多都係by invitation，但推介會嘅資料流出去一啲都唔出奇，有啲豆膶咁細嘅基金公司收到料，不請自來。如果佢哋真係嚟捧場又冇所謂，最麻煩係佢哋當嚟食晏 兼聯誼。據講呢啲金融老鼠唔少都有互相聯繫，而且幾猖狂，自己友覇埋一圍嚟坐。你知五六星酒店一圍酒席分分鐘五六千蚊，啲公關朋友都唔知點向個客交代，但 為咗唔想搞大件事，好多公關都息事寧人。
五星級酒店有黑名單
不過，如果遇到一啲好搶手嘅新股，要請嘅基金經理太多，連真正嘅 基金經理都可能唔夠位招呼時，啲公關朋友就會要求酒店方面幫手「趕客」。唔講唔知，原來四季酒店同麗嘉酒店已經有張財圈老鼠嘅黑名單，啲waiter見到 呢啲財圈老鼠都會出手，以「私人宴會」為由，唔畀佢哋入場。對於公關嚟講，呢啲先至係五星級服務。李華華
[email protected]
中環在線：民生爭貴客請打波 李華華
2008-10-02 AppleDaily
國慶黃金周除咗係去玩嘅黃金假期，亦係好多行業做生意嘅黃金日子，大陸各大銀行亦唔放過呢個大好時機。
黃金周自駕遊全包
近 年銀行爭客對象，主要針對富貴客戶。《重慶晨報》報道，民生銀行重慶分行喺上個禮拜成立高爾夫俱樂部，入會嘅多數係身家過百萬嘅貴客，據講有過百人報名。 佢哋免費入會後，就可以到全國一啲高爾夫球場免費打波。聽講呢個係重慶首個由銀行搞嘅高爾夫球俱樂部，而民生銀行喺全國各地分行都有成立呢個俱樂部，好似 廈門分行早喺上年7月就已經成立，仲搞埋一年一度全國巡迴賽。其他銀行梗唔會蹺埋手，有銀行為富貴客戶喺黃金周組織自駕遊，費用由銀行全包；亦有銀行做埋 搞手，請內地知名歌手開演唱會招待客戶，門票幾百銀至過千蚊人仔都有，但富貴客戶當然唔使錢啦。
中環在線：貝爾斯登華人高層劈炮 李華華
2008-10-03 AppleDaily
華 爾街金融機構經歷海嘯之後，一班專才雞飛狗走，高層大執位，轉工轉行嘅都有，貝爾斯登嘅華人前副董事長唐偉（Donald Tang），隨貝爾斯登被摩根大通接手，亦過檔摩通做董事總經理。不過，《華爾街日報》噚日得到摩通喺香港嘅發言人證實，唐偉已辭職，佢將離開投資銀行 界，自立門戶搞私募基金。一個華人喺華爾街闖出名堂，做到美國前第五大投資銀行貝爾斯登副董事長，當然猛料。唐偉仲得到貝爾斯登主席凱恩（James Cayne）提拔上位，上年10月，中信證券同貝爾斯登簽咗互換10億美元股權嘅協議，打算喺香港成立合營公司，若然成事，將會係內地首間踏足華爾街嘅證 券企業，呢單嘢就係由唐偉牽頭傾嘅。之不過，交易未成事已經刮海嘯，單嘢就不了了之。《華爾街日報》報道，唐偉近幾個月向身邊朋友提過，想自己搞間私募基 金，兼且會做埋顧問同銷售投資產品，至於有邊啲人做股東？報道只係話嚟自各國企業，開張日期都未定。
中環在線：海域化工翻身唔預葉劍波 李華華
2008-10-03 AppleDaily
經 歷過財困、清盤同被拯救嘅海域化工（2882），終於喺今日復牌。海化噚晚刊發通告，罷免葉劍波同林建平執行董事職務，波哥時代正式終結。公司新主席係黃 英豪，一眾股東靠晒你啦！喺今次拯救事件中盡心盡力嘅執行董事許浩明同華華講，見到海化復牌，真係有種守得雲開見月明嘅感覺。自06年7月起停牌就一直為 海化前途奔波嘅許浩明坦言，為咗間公司，呢段期間佢可以話係一星期返足7日工，努力做好協調嘅角色。佢話：「又要同清盤人合作，又要管理公司營運，又要同 監管當局交流，又要搵白武士，真係好忙。」喺華華記憶中，海化都算係少有可以成功拯救嘅例子。許浩明話佢會繼續留喺公司，下一步係搞番好海化，但具體情況 要遲啲先講。佢仲語重心長咁話，唔係咁多事都咁如意嘅。
蓋茨閃電減持
講開又講，想當年（04年）隻海化都真係幾風光，連全球前首富、即微軟大股東蓋茨都喺04年8月初買過海化約5.38%股份，但由於佢閃電咁將持股減至5%以下，所以唔知道佢老哥仲有冇揸住。唔知呢件事會唔會令蓋茨對港股產生戒心呢？
Next Page