| ||||||
| 基金Ｋ請吃晚飯，叫我哋去尖沙嘴樂道一間海鮮酒家，基金Ｋ本是中環客，何解叫晒我哋過海吃飯？基金Ｋ話佢不時到文化中心聽音樂，入場前搵到呢間海鮮酒家吃飯，嚟過幾次，覺得唔錯，故此輪到佢做東時就選咗呢個地方。 食 落，啲海鮮叫做唔錯，大家冇乜苛求。去文化中心參加音樂會，最麻煩一回事就係自地鐵站行過去，不甚方便，如在樂道吃飯，行去文化中心真係有排行，尤其是近 來近住YMCA嘅隧道入口封咗o忝。設計道路通行嘅，不知是何部門，總之將文化中心變成一個孤島，對傷殘人士絕不友善！ 是晚知道香港失業率 創三十八個月新高，但本港樓市甚為暢旺，我哋請基金Ｋ與分析Ｆ解釋，基金Ｋ堅持睇淡，恒指挑戰萬六點，只係熊市反彈，之後仲有得跌。分析Ｆ對新蒲崗新樓盤 嘅暢銷，嘖嘖稱奇，更估唔到平均售價會達到七千五百元（一平方呎）。該樓盤附近一帶，是甚麼龍蛇混雜環境，分析Ｆ話不便多講，自己去行一轉便知，佢嘅解釋 就係利率太低，低息供樓效果開始發揮威力，加上新盤供應量太少，故此樓價看好，而大型屋邨嘅租金亦看漲，主要原因係豪宅租金下滑，受減薪或裁員影響嘅外資 行員工要搬離豪宅，搬去大屋邨也。正是大屋搬細屋，大屋租金跌，細屋租金升。 財務Ｒ就話佢啲朋友嘅豪宅最近頻頻流失租戶， 一位畀開十幾萬月租嘅美國人已搬去梅窩，搵唔到人續租，嗰啲月租三、四十萬元嘅大單位，更加冇人上門睇樓。以前有大把花紅，月租四十萬元，邊算係錢呀？o 依家呢？諗吓都係罪過。地產Ａ就話不如搬去元朗啦，住在西鐵站上面，坐車返中環國金二期都只係半個鐘頭啫，租金便宜好多好多噃，最多咪自國金二期寫字樓放 工後，唔去蘭桂坊！其實o依家都冇乜錢去蒲嘞，香港人需要返璞歸真，埋首苦幹，暫別銷金窩。或者大家已經付諸行動咯，呢間海鮮酒家得幾枱客，馬路對面嘅茶 餐廳就人氣旺盛，見唔到有吉位，而周街都係的士，左丁山見狀，覺得都係早啲返屋企好過。 | ||||||
2009-05-01 AppleDaily
| ||||||
| 英 國經濟不景，政府喊窮，首相白高敦為咗救急兼挽救自己嘅政治生命，推出一份龐大赤字預算，畀《經濟學人》批評為一份dishonest-budget。我 哋隔岸觀火，見到英國要向年入十五萬英鎊嘅高收入大士（英國有三十五萬個）徵收百分之五十嘅入息稅，一位年入三十五萬嘅銀行家或基金經理要支付十六萬鎊稅 款及國民保健保險費。一啲基金經理計吓條數，話不如遷往瑞士或亞洲好過，管基金使乜一定要留在倫敦啫。 嗱，香港要鞏固金融中心地位，有機會 嘞，特區政府夠膽識嘅，就立刻派人去倫敦「招商」，以低稅率引誘一啲對冲基金搬嚟香港，以香港為基地，行遲一步，新加坡會搶晒先機都似。白高敦明知倫敦倚 賴The City得好緊要，o依家搬起石頭趕客，提高稅率，直情係畀隻牌香港上，新加坡就隨時截糊。 世姪H自紐約回港開 設亞洲總部，經營私募基金，卒之正式開幕嘞，上星期某日在太子行天台嘅高價餐廳SEVVA開設酒會，招待來賓。呢間SEVVA聞名已久，今次得世姪H邀 請，都係第一次上去太子行二十五樓（天台）啫。餐廳分室內室外兩部份，室外鋪設地板，玻璃欄杆，東望皇后像廣場，北望遮打街與海旁，果然十分吸引，室外係 酒吧區，全場滿座，坐滿人。世姪H在室外北區設酒會，十分擠擁，出席者大多係三十幾四十歲一輩，全部講英文，左丁山收咗十幾二十張名片，逐一傾幾句，知道 呢班朋友全部係留學生，自澳洲、美國、加拿大、英國等地回來，職業上就多數係投資銀行、私募基金、證券行、會計師行僱員，想落中環新進精英之中，本地大學 生係少數，唔怪得年幾前聽到路邊社消息話，唐司長向大學校長表示關切，希望多啲本地畢業生能夠打入國際金融機構圈子。後來卒之碰到兩三位講廣東話嘅新朋 友，乃Invest Hong Kong官員。 原來世姪H間公司傳出消息來港設立分公司之後，「投資香港」立即派人上門拜訪，在紐約傾過幾次，世姪H話估唔到香港特區政府咁進取，提供甚 多資料，對佢哋間公司幫忙甚大，今次香港office正式開幕，自然請埋「投資香港」嘅人員賀一賀啦。 | ||||||
| ||||||
| 自 從國務院宣佈批准上海建設金融中心及航運中心後，本地不斷有報導講及上海威脅。左丁山呢類市場派就認為市場動向決定一切，要驚都冇得驚，如果上海受市場追 捧嘅話，香港有乜辦法可以阻擋之？左派干預派經濟學家認為憑政府之力，上海就可以成為乜乜中心，但右派市場派就覺得政府（即使係強大之中國政府）唔可以單 憑「發改委」紙上作業，就可以令一個大城市成為乜乜中心嘅，除非…… 真正國際金融中心要有「必需及充份條件」，必需條件包括市政與衞生城市 建設、交通運輸通訊及優越地理位置等等，一一俱備。世界上有齊呢啲條件嘅城市多到數唔晒，上海唔會差得去邊。跟住就要講市民素質嘞，包括文化、教育、守 法、傳統等等，世界上亦有好多城市在這方面冇得彈，例如維也納、蘇黎世就在呢方面領先。 充份條件方面，上海就一時之間，唔見得有噃，就係新 聞自由資訊自由、外匯自由兌換、法治──在中國嚟講，就係法大於黨，中共中央政治局唔可以指揮或影響上海法庭判案，例如外國銀行與上海市政府打官司，上海 法院可以獨立判案。呢三點係上海成為國際金融中心之最大障礙。經濟學教授話中國在五年至十年內會開放外匯，開放資本市場，左丁山信住先，但新聞與資訊自由 呢？香港所有報紙可以在上海自由出售呢？或者互聯網可以真正無禁區呢？上海幾時會做得到，冇人敢預測。至於法治囉喎，黨永遠大於法，否則如何中央控制呀？ 中國係一黨專政國家，黨中央一定要牢牢控制黨政軍及新聞陣地。 上海一定係中國金融中心，香港冇得爭，假如中央要支持上海，陰乾香港，可以命 令所有國企民企只准在上海上市，令香港股市萎縮，但即使如此，上海還是做不了國際金融中心，正一利己損人而達不到目的，難道中央真係想香港一沉不起乎？香 港目前在金融各方面都做得好好，唔係好似一啲民粹派議員、評論員眼中咁不堪聞問，只要特區政府唔好急劇左轉，香港冇嘢好驚。 | ||||||
2009-05-03 AppleDaily
| ||||||
| 馬 場之內，碰到一位稀客，就係新聞Ｖ。新聞Ｖ原來係參加社交活動啫，佢份人一本正經，絕少投注，入馬場唔會染上賭風，馬會向政府申請增加五日賽馬及大約二十 次（唔知有冇記錯）轉播海外賽馬，馬迷視若等閒，但立即遭到一啲usual suspects嘅反對，究竟呢類反對派代表幾多名市民，無可稽考，如果民政事務局話佢哋代表民意，唔敢答允馬會之請嘅話，不如所有馬經版記者，馬經印刷 廠員工，報販等等以及熱心馬迷一齊向民政事務局表達意見，睇吓邊一方面嘅人數多一啲。 如果淨係睇天水圍萬人空巷申請馬會兼職嘅情況，張建宗局長應該支持 啦。閒話少說，新聞Ｖ百毒不侵，即使全年跑馬無休，佢都唔會成為馬迷，佢嘅興趣係新聞與英文，因為佢一畢業就入《華爾街日報》，一舉成名後，就到劍橋大學 讀碩士，返嚟做報館高職，其餘不必一一細數。o依家佢到浸會大學搞財經新聞碩士課程，係理想人選也。近日特區政府宣佈發行政府債券，上限一千億元，大概以 一二百億元試吓水溫先。特區政府完全冇發債需要嘅，呢次正是為發債而發債，要建立及發展本港債券市場喎。 發兩百億債，如果年期係三至五年，利率二厘嘅話， 以目前環境，大把人要，問題係：政府收咗兩百億，用嚟做乜？據講係設立債券基金，交畀金管局投資。於是一啲評論員立即計數，話金管局過去六年嘅平均回報率 係六點八厘，政府付出兩厘，收六點八，即係有息差四厘八，豈非一年可以賺入九億六（以兩百億元計），咁容易賺錢就好咯。新聞Ｖ嘅財經碩士班如果能夠向學生 （在職編輯記者）灌輸正確財經知識，如何分析政府發債，等佢哋唔好咁純情，咁就真係功德無量。以新聞Ｖ嘅背景，佢有辦法做得到嘅！新聞Ｖ又通知，佢會喺五 月十六日推出一本新書，叫做《瘋讀社論、狂學英語》有余若薇、鄧永鏘寫序推薦，睇落係一本惡補、強補英語雞精書，今時今日，有市場瞄頭o架。 | ||||||
| ||||||
| 雷 曼破產已有一段時間，保爾森救AIG而不救雷曼，係一個極大錯誤，o依家愈嚟愈多人認同呢個觀點。一位教授話，假如雷曼係一間貨倉，雷曼股東向AIG買火 險，理所當然，如果雷曼貨倉失火，保爾森唔開水喉去滅火，反而去救賣火險嘅AIG，通唔通呀？救熄火災，AIG可以賠少啲，雷曼貨倉燒通頂，片瓦不 全，AIG就會賠火險賠到失魂，向AIG買咗雷曼火險嘅，就靜靜雞收賠償，呢班人就係海內外大銀行，最收得多嘅係高盛，保爾森之舊東家也（用金庸大師最近 用語，就係舊主人）。教授話咁多非雷曼股東買咗雷曼火險，最合乎佢哋經濟利益嘅就係讓雷曼貨倉失火（偵探片之男人殺妻或女人殺夫之動機往往係一份壽險）。 雷 曼已死，無謂多講，關於保爾森之陰謀論，水洗唔清。香港因雷曼破產而蒙受損失者，當然嘈到拆天，要求銷售機構賠償，消委會要幫助迷你債苦主控告銀行，暫且 按下不表。美國o依家又有人告官喎，係一位律師o忝。呢位律師六十八歲，五年前退休，同太太買咗四萬美元雷曼債券，點解會買？因為退休人士講求穩陣投資， 買債券要買啲高信貸評級嘅，佢哋睇到三大信貸評級公司都畀雷曼起碼A級，於是放心買入雷曼債券，點知會血本無歸o架。呢位加州律師Ron Grassi於是最近入稟控告標準普爾、穆迪以及Fitch三大評級公司，控告佢哋瀆職（negligence）、詐騙（fraud）及欺騙 （deceit）三大罪狀。 呢位律師呢次係一劍直插世界金融心臟。喺債券市場，最重要嘅基石就係信貸評級（credit rating），而上述三家公司就壟斷晒全世界所有評級工作，畀雷曼債券A級或以上，全世界投資者不論大小（包括政府及對冲基金在內）信以為真，銷售雷曼 嘅證券行及銀行亦信以為真。一位銀行職員曾對左丁山講過：「前年有客人問雷曼穩唔穩陣，我話雷曼嘅評級比我哋銀行更高，唔驚會執笠，嚡，點知道雷曼竟然會 死咗，連累埋我哋。」卒之有美國人控告三大評級公司嘞，官司有排打，結果難測，但會影響深遠，動搖債券市場根基。 | ||||||
| ||||||
| 一 年一度，大賓架Y請吃午飯，左丁山與幾位報館老總級人物在座。記得去年金融海嘯發生前，賓架Y請吃午飯，講及信貸市場（credit market）與股市有脫鈎現象。當時信貸緊縮，銀行不願放水，但股市就有反彈趨勢，無視銀根緊絀。記得賓架Y當時大惑不解，認為：「我哋銀行唔放款，啲 經紀點會有錢去炒呀。」 呢個道理好簡單啫，但偏偏就係無人理會。後來發生金融海嘯，股市崩圍，炒家悔之已晚。今年環境唔同咯噃，市面銀根充裕，銀行水浸， 銀行結餘近千八億，六個月利率低至零點八五厘，故此股市大幅反彈，理由充足，賓架Y認為隱憂就係經濟不景氣持續，大量空置貨櫃在碼頭，新界一帶堆積如山， 佢仲聽到有業內人士講，希望政府批准暫用舊啟德機場作為貨櫃場。但係如此一來，有礙觀瞻噃，畀外國記者到啟德影到一張貨櫃堆積相片，指香港出口極度疲弱， 咁就有傷特區面子啦，正是衰退得來畀人知好過畀人見也。 大家問題集中於（一）政府發債，（二）與上海、星加坡競爭為金融中心。賓架Y經驗豐富，係投資高 手，佢話自己都唔明白政府發債有何作用，對拓展債券市場幫助不大，而且債券之孳息曲線（yield curve）可能會與現時金管局之交易票據yield curve有差異，令市場無所適從。與外地競爭方面，賓架Y就話佢最近去上海訪問參觀過，對方野心甚大，阿爺信上海多過信香港，香港不可不防；此外，星加 坡處理雷曼迷債方面，有李老爺出聲：受誤導或六十歲以上不懂投資嘅人士，一概可與銀行商討賠償，但不是全賠，而其他人士不能輸打贏要。 於是乎星加坡已靜靜 地解決了雷曼迷債問題，反而香港特區政府進退失據，議員將事件政治化，已在國際金融機構心目中扣分；此外，上訴庭判私有化失敗而遲遲不發判詞，令國際機構 （到目前為止）得到一個印象就係部份香港法官講感情感性與酌情權，不全部依照法律條文辦事。法官判詞將備受法律界金融界矚目，好多國際大行會吼到實，如果 不能服眾（法律界與金融界），香港形象又要扣分。 | ||||||
| ||||||
| 天 真許又叫做波浪許，每次叫親去「賀菊」食日本菜，梗係有消息相告。呢日佢又打電話嚟，叫左丁山到「賀菊」入佢間「房」，有好嘢講喎。一坐低，波浪許就話： 「有貨出貨嘞，股市快要調整。」唔係啩，此日股市升升跌跌，在一萬七千點關口爭持，有人睇萬八萬九點，高盛又將滙豐目標價由四十一元調升至八十四元，表面 睇落大市好穩陣啫。 波浪許講到明：「No喇，靜靜雞話畀你聽，你寫出嚟我都唔怕畀人鬧，啲甚麼大行一陣睇滙豐跌落二十五蚊，一陣又話八十四 蚊，間間大行都隨時轉軚嘅，有乜公信力呀。嗱，日本在二○○一年三月十九日宣佈量化寬鬆（quantitative easing ），日經指數由一萬二千零點起步，喺一個月內反彈19%，之後直跌48%，直至二○○三年四月跌到低點7608先至展開反彈，但升完又跌，到今日都係九千 二、九千三點咋。港股升到o依家，頭肩頂走勢十分明顯，跌嘞、跌嘞。」 左丁山唔識睇波浪分析，只知道波浪許多年來憑此搵食，有佢嘅根據。講 到基本分析，自己就識少少嘅，我哋呢啲自由市場派，死不信政府干預會掂，人總要靠自己，不可輸打贏要賴天賴地賴政府唔識監管。以市場觀點睇，全世界向左 轉，政府有形之手伸得長，無孔不入，美國政府完全忽視小股東利益，擺明車馬踐踏小股東與有抵押債券持有人（睇《華爾街日報》四月十二日之佳士拿沒頂記，不 寒而慄，美國監管機構對政府強搶股東資產，為咗救工會利益，完全扮盲公），此外，美國英國等大國紛紛向公司、高薪人士打主意，狂加稅，狂發債券集資嚟刺激 經濟，遲早必然引起通脹，引起另一次衰退，到時就係滯脹，全世界經濟皆受拖累，股市又有一劫。不過咁，左丁山功力有限，搞唔清跌──升──跌──升──大 跌嘅循環時間表，故此不敢輕舉妄動，一於持盈保泰。 波浪許就話o依家就要行動，沽貨放假，一於照一句老話sell in May辦事。食食吓，證券許食完華商會一餐，趕來「賀菊」傾吓偈，佢素來作風謹慎，聽見波浪許咁講，問一句：「究竟你睇幾多點？」波浪許話：「一年內見九 千二百點。」證券許話：「我點都唔信，同你賭餐飯都得。」哦，有飯食咯，無論兩位老許邊個贏，左丁山聽者有份，一年內是但有一位老許請食一餐勁嘅。 | ||||||
2009-05-18 AppleDaily
| ||||||
| 摩 根大通中國區總裁李小加盛傳會成為周文耀接班人，成為下任港交所行政總裁。英文報紙稱李小加（Charles Li）為一位well-respected banker，賓架K聽見，幾乎吓一聲，講一句，respected by whom?如此評語，令左丁山急急講一句：「願聞其詳。」但賓架K話：「費事你寫出嚟，唔講咯。」唔講呀？已引起左丁山之好奇心，返到寫字樓立即打幾個電 話探問一番，公關S回報：「有行家講，李小加巴閉過咭片蘇。」左丁山話：「講清楚啲吖。」 公關S話：「副局長以咭片代替入息收入申報，雖然係特權，但蘇副 局長成日見報，入境處一定識得佢，美國英國啲高官都成日利用自己個名辦私事嘅啦。李小加先生就冇乜人識噃，有一次我哋行家辦酒會，賓客排隊入場，公關小姐 要仄名單，問李先生貴姓名，李先生嘅答覆令公關小姐好難做，都係唔講嘞，總之人人都supposedly要認得李先生個樣子。」 原來李小加只在海歸派有 名，本地銀行界識得佢嘅人唔算多，有幸識得呢位未來港交所行政總裁嘅，普遍講法係行政經驗不足，管理經驗缺如，說話能力高明，聽者要識得咀嚼、消化，識得 選擇！一位賓架話，投資銀行家做交易所總裁有前科，就係前美林及前紐約交易所總裁John Thain，此君在高盛由trader（交易員）做起，升至財務總監（CFO），營運總監（COO），管理高盛全球營運，見慣大機構大場面，轉行做紐約交 易所總裁，自然適合。李小加先生呢？在美林及摩根大通只係做過IPO、中國業務，做刁就有經驗，營運與管理就與佢無關。 以後由佢管理交易所，是否只懂管大 刁（deal），日常事務管理方面如何？我哋唔識答。有港交所董事嘅消息，話選聘委員會只提交一個名字畀董事會揀！就係李小加，唔揀佢，就冇o架嘞，如此 做法比較罕見，難道環球招聘之下，只係得一位李小加先生畀獵頭公司睇中？現總裁周文耀係多面手，文武全才，由李小加代替佢之後（唔知道仲有冇古仔講 呢？），相信夏佳理主席要花多啲時間睇埋港交所日常事務至得。 | ||||||
| ||||||
| 地 產L好多年前係大L拍檔，做過上市公司主席，相信二十幾年前嘅財經記者會識得佢，後來佢與大L拆伙，自己到珠三角發展地產，卓然成家，而佢家在愛都，做過 好多年愛都業主委員會主席，自然相識滿香江。 近年地產L返璞歸真，專心捐贈教育項目，好似船務C咁，進入鍾普洋所講之人生第三階段。此日地產L嫁女，在會 展中心新翼大堂擺酒，廣宴親朋；在新翼大堂設宴，擺六七十圍酒，都似空空洞洞，冇乜睇頭，不過呢晚有成一百二十圍，場面盛大，主人家要逐圍敬酒嘅話，恐怕 會腳軟，後來知道，主人家在台上向各位賓客敬酒，不再周圍行，醒目也。 話雖如此，地產L還是與愛女及快婿向親戚、同學敬酒一番，以示禮貌。與左丁山同坐一 枱嘅，有兩位中環大賓架，皆是地產L好友，剛好兩人同樣各有兩位千金，讀完書已在社會辦事。左丁山對賓架C及賓架W兩位夫人講：「今晚係你哋偷師好時機， 睇吓人哋點樣處理大場面，你哋要各辦兩次婚禮噃！」賓架C夫人睇住新娘長大，世姪女嫁出門，本已有感觸，聽左丁山一提佢嘅愛女，竟然立即面紅，左丁山一 見，連忙轉變話題。好多媽咪愛女情切，女兒冇拖拍，為女兒擔心，女兒嫁了，又萬分不捨，心情矛盾之極！ 許冠文未嫁女之前，就同左丁山講過佢有「女兒焦慮 症」，現在梗係講起個女就笑啦。新娘係律師，曾到倫敦讀法律碩士，呢晚佢邀請埋一班年青朋友出席婚禮，有好幾位律師與年青賓架，多數係倫敦留學生。這時 候，做律師還好，做賓架就要講際遇咯，佢哋講起工作，就講到restructuing，team changes等術語，講到白啲，就係可能被裁啦，無論出身甚麼名校，做開衍生工具與結構性產品嘅，少不免都要面對呢個問題，睇吓呢班年輕人，望吓賓架C 與賓架W兩位銀行界成功人物，就諗起呂大樂講香港戰後第一代與第四代之別，新一代賓架，唔易有咁好前途咯。 | ||||||
| ||||||
| 《紐 約時報》名揚世界，被視為美國最佳報紙，歷年獲得普列茲獎無數。不過呢張報紙嘅財政管理認真水皮，搞到周轉不靈，o依家備受財政壓力，周圍撲水。點解堂堂 大報搞成咁，睇落係「近親繁殖」管理之故。大股東Sulzberger控制董事會，控制B股股權89%，家庭信託條文寫得好緊，外人無法玩「分而治之」嘅 把戲嚟引誘部份成員作反。你估家族之中，一定代有才人出咩，記得瑞典就有一個大傳媒集團，o依家已去到第六代，仍然生機勃勃，不過此乃異數，並非常態。 《紐約時報》蠢在股價高企時，花掉二十億美元回購股份，以低價賣掉時代廣場嘅舊總部，用五億美元買入現在嘅大廈，但又以二億二千五百五十萬美元求售新大 樓，此外又曾以高價買入《波士頓環球報》及波士頓紅襪棒球隊，近月賤價求售球隊，仍然搵唔到買家。識得做報紙，未必識得做買賣，《紐約時報》竟然學人玩財 技，卒之輸到貼地，導致「野蠻人壓境」（barbarians at the gate）境地，兩位大亨Carlos Slim（墨西哥首富）與David Geffen（荷李活唱片及電影大亨）分別表示有興趣收購《紐約時報》，令蘇斯貝格家族大感不安，聲言絕不出售，喺佢哋眼中，Slim與Geffen都係 滿身銅臭之庸俗資本家。 Geffen先生原來係出身寒微，讀書不多，赤手空拳打天下之輩。發大達之後，捐咗兩億美元畀UCLA醫學院，唔知算唔算係 「贖罪」？ 佢出道不久，去咗紐約一間著名藝人代理人公司William Morris工作，做信差房（Mailroom）阿頭，呢份工原來需要大學學位資格，Geffen亂噏話自己係UCLA畢業生。公司寫信去大學求 證，UCLA嘅覆函嚟到之後，當然首先由信差房收信，Geffen膽敢用蒸氣開咗信封，取出原函，擺一封偽冒嘅入去，咁就過咗骨，咁就有份工做落 去，and the rest is history，一路向上爬，成為唱片界大老闆，與史匹堡及Katzenberg合組Dream Works製作及發行電影。 Geffen今年六十六歲，已是億萬巨富，買起《紐約時報》，隨時有銀。呢位出身Brooklyn嘅波蘭俄羅斯混血兒窮小子， 偽冒學歷竟成巨富，如果真的成為知識分子報紙老闆，是否夠諷刺？ | ||||||