2009-05-24 AppleDaily
| ||||||
| 任 總離任，雖然係喧傳已久之事，仍然引來極大篇幅報道，可見任總之新聞價值甚大。五月十九日中午飯過後，聽到市場消息，話政府會在下午收市後宣佈任總離職， 於是大家密切留意，四點過後。有消息嘞，任總真係鐵定十月一日拜拜，但邊位繼任呀？冇講，於是大家又有猜測，唔通唔係特首辦主任陳德霖？仲有邊個可以做呢 個位呀？賓架Ｋ打電話嚟叫左丁山猜吓。於是胡亂諗咗一輪，講四個人畀賓架Ｋ度吓：第一位係葉澍堃，一九八八年副金融司，上任財經事務及庫務局局長，一九七 三年港大畢業，未夠六十歲。賓架Ｋ話：「唔似，葉局長個個星期日在馬場董事廂房宴客，唔知幾風騷輕鬆，又做埋米芝蓮美食大使，享受美食過癮到極，點會重新 捱苦呀？」第二位係馬時亨！賓架Ｋ話：「賓架馬想做官嘅話，就唔會辭去局長唔做啦，唔似，佢o依家鍾意做教會Happy Man。」第三位係許老爺？賓架Ｋ話：「更加荒謬，許老爺連一人之下萬人之上嘅政務司司長都唔追求，做乜要妨礙佢半個徒弟陳德霖嘅前途。」係噃，此番話甚 有邏輯。 咁講法，有冇官場之外嘅人選呀？譬如鄭海泉、梁錦松、柯清輝，或者啲經濟學、財務學大教授例如王于漸、鄭國漢、廖柏偉、楊瑞輝、陳 玉樹等等？賓架Ｋ話美國有傳統去搵大學教授做聯儲局主席，但香港從未如此做過，相信保守嘅曾特首與溫總理唔會贊成，至於搵商業銀行大班，又恐怕有利益衝突 之嫌，畀議員一個藉口嚟攻擊官商勾結，本來梁錦松係外滙高手，做過財政司，係金管局總裁十分適合人選，最弊佢做財政司時被逼辭職，仍有陰影呢。 學 啲simple and naive嘅人講，環球公開招聘呀？點可以呀，英倫銀行、聯儲局、日本央行、歐洲央行、星加坡金管局何曾試過環球招聘咁重要嘅職位？金管局總裁一定需要中 央信任，特首OK先至得，點會搵外援？一啲人講公開，講透明度，講到上晒腦，根本不理會現實情況，係政治不成熟一類，辯論都嫌嘥氣。佢哋齊聲講公開招聘， 如果突然搵到一個李小加咁嘅人物，相信到時某些議員又會鬧北京隻手伸得太長！ | ||||||
2009-05-25 AppleDaily
| ||||||
| 找 人代替任志剛為金管局總裁，按法例規定，本是財政司司長之事，佢有全權委任，決定任期與薪酬。但香港特區政府係弱勢政府，畀啲無厘頭議員講兩講，財政司司 長竟然成立咗一個委員會畀意見，自招麻煩矣。冇委員會猶自可，有咗之後，議員就有藉口追問：你哋見過幾多個候選人，唔該公開，點解唔公開招聘？總之畀晒機 會啲天真搗蛋派議員跟進，兩位曾先生會周身唔得閒。 老實講，你估星加坡金管局會公開環球招聘總裁乎？李光耀先生唔信任嘅人，休想有希望。凡係大機構招聘， 即使在報紙賣晒廣告，從來都係形式，有頭有面有料之人，除非突然間儍咗，絕對唔會主動自動寫求職信嘅，梗係獵頭公司打電話上門游說，先至夠塵啦。劉健儀劉 江華等人話要向「寫咗百幾封求職信仍未找到職位」的人交代，實在令人發笑，呢類人士即使值得同情，亦冇理由有資格做金管局總裁嘅啫。大機構搵到獵頭公司， 其實已係心中有人，搵獵頭族代勞做場戲而已，又或者叫獵頭族搵十幾個人嚟揀吓，你估真係自動寫信應徵就得呀？ 曾司長搵咗馮國經、張建東、龐約翰三人為顧 問，又搵唐裕年（Martin Tang）畀意見，唔知有甚麼標準，龐約翰要滙豐收購Houshold International，搞到滙豐業績一鑊泡，已失去了頭上光環，此人無眼光，彰彰明甚。 馮國經有世界視野，幾乎識勻財經界叻人。唐裕年呢，唐炳源先 生之孫，唐驥千先生之子，不肯繼承祖業（南海紗廠），成為香港獵頭界名人，退休前係Spencer Stuart主席，Victor與Martin在上世紀八十年代與梁家鏘（Chris）合組Techno-Ventures，從事創業投資活動，早有淵 源，佢哋應該識得揀人嘅，有資格有資歷做金管局總裁呢個位嘅「候選人」，如果佢哋唔識，好打有限。佢哋嘅最大挑戰，就係搵一位比陳德霖更適合嘅人出嚟，相 信唔會搵到。 | ||||||
2009-05-26 AppleDaily
| ||||||
| 原 來政府早已在去年底成立一個三人遴選小組，再加一名義務顧問，向財政司司長曾俊華提供意見，如何搵人接替金管局任總。 弱勢政府即是弱勢政府，本來外匯基金 條例已賦予財政司司長充份權力去委任金管局專員（總裁），而外滙基金諮詢委員會係財政司司長嘅當然對口單位，何解曾司長要另行成立一個三人小組呢？ 合乎常 理嘅推測就係曾司長唔敢一個人孭晒飛，要搵啲獨立權威人士畀意見，壯下膽以預備定火藥來應付議員嘅攻擊。但是如此一來，議員有更多口實嚟砌政府，隨便舉幾 個問題： （一）三人小組有何權限？ （二）如何組成？ （三）為乜係馮國經張建東龐約翰三位，而唔係李業廣、劉遵義加浦偉士或者係利國偉，史美倫加祁連活諸如 此類？ （四）馮張龐三位先生與唐裕年提供了甚麼候選人名字？ （五）有何遴選準則？ 一言以蔽之，就係自招麻煩。 其實曾司長可以私人守秘式諮詢晒上述或更多元 老及資深人士，最後選一位（曾特首當然一路知道過程，並且同意）交畀中央摸摸底，OK之後就自己宣佈，而且要在宣佈任總離任之日同時宣佈，咁就充份顯示行 政主導，讓國際金融界知道十月一日邊位入主金管局，免除一切無謂猜測。至於有人反對咯喎，佢哋既無法律根據，亦無實際依據（其他國家例子），咪由得佢哋講 啦。o依家就麻煩嘞，遲遲先至公開一個不應存在之三人遴選小組，又要隔一輪先至宣佈接任人選，基本上已自貶香港作為國際金融中心形象，而且最弊嘅係，反對 派鬧得更加熱烈，唔會熄火。 特區政府有時強為公關而做公關，為spin而spin，就好似玩澳洲boomerang（回飛轉），擲得唔好，飛回來扑自己個 頭！橫睇掂睇，想搵一個人可以比較容易得到王岐山同意，得曾特首曾司長信任，銀行金融界可以認受，十月一號返工就即刻做嘢，唔使過一段實習/學習、體驗期 嘅，香港只有陳德霖一位，之不過，用三人小組方法揀選，置外滙基金諮詢委員會於不顧，對新人（即使唔係陳德霖）不甚公道，可惜也。 | ||||||
| ||||||
| 財 政司司長曾俊華講及金管局專員遴選小組有一位義務顧問唐裕年（Martin Tang）。馬丁去年十月自Spencer Stuart退休，享受生活，若非政府叫到，佢點都唔會將時間為他人獵頭，香港有唔少國際獵頭公司，其中三間經常接到政府及大公司生意，專獵頂級人頭嘅， 有Russell Reynolds，Spencer Stuart，與Korn Ferry ，分別由唐裕年，Raymond Tang（姓鄧）與Andrew Tsui（徐）三位率領，前兩位都算獵頭界大阿哥，尤其是Raymond。兩人退休後，好難搵人代替。Ray哥做呢行好耐好耐，馬田只係半途出家，中年轉 型，故此呢行之中Ray哥可說係本港獵頭教父。 以前在獵頭界亦有名氣嘅張志剛現在做咗「一國兩制研究中心總裁」，寫咗篇文批評金管局總裁任 命搞獵頭騷，實屬多餘，左丁山同意之。好彩唐裕年係義務嘅啫，否則金管局總裁年薪九百萬，可以收佣金二百至三百萬元，肥過肥豬仔。聽講啲大獵頭公司最近工 作繁忙，頻頻出動，到政府或半政府機構做pitching，爭取新合約。點解喺呢個時候忙呢？原來好多合約工在九月或十月到期，現在就要搵定獵頭公司去搵 人，遲啲放暑假就難搞啲咯。 以前同張志剛傾過，最近亦碰到一位獵頭老手，傾起一啲高級職位，例如CEO，未必次次都係最叻 嘅候選人得到職位嘅；譬如董事會對幾位合心水之人，爭持不下，往往大家達成妥協，就係聘請一位爭議性最少，各董事都可以接受嘅人物，而唔係最適合帶領公司 向前嘅叻人。 獵頭Ｋ話：「我試過撞板兩次，入咗袋嘅佣金都跌番出嚟，就係因為我冇注意到董事會內之政治與董事之面子，我強烈推薦嘅人最後被否決咗。我現在 都開始信吓命，一啲唔應該登其大寶嘅人物可以憑種種不同因素或一連串的巧合事件，成為CEO。」 在商界打滾得耐，累積一定經驗之後，就唔再會天真，此乃成 長過程，至於信唔信命，好難講。到賽馬車會吃飯，主人家設計師Ｆ話收到一封虛擬電郵，用英文寫嘅，十分抵死，作者不詳，內容主要嘅大意譯做廣東話就係： 「阿爸識按摩，結婚三日遇貴人，摩頭摩身摩到財神，幾十億銀紙令阿媽心震，叫阿爸好好服侍另一個女人，我一出世就有司機保鑣陪我hea，全家生活幸福好過 癮，好過癮！」設計Ｆ話：「你估係邊啲人發放嘅呢？」 | ||||||
2009-05-28 AppleDaily
| ||||||
| 滙 豐銀行減息趕客，十萬元存款，一年得利息一元，買個菠蘿包都買唔到，要嚟做乜？利息減到咁低，一來係因為全球央行放水印銀紙，逼降利率，二來係熱錢湧來香 港泊碼頭，水浸銀行，滙豐當然係冇法子水來土掩先至趕客啦，如此情況繼續下去，容乜易出現負利率，我哋放錢入銀行仲先畀手續費？利息咁低，苦了退休人士， 揸住退休金，譬如五百萬元，一年收到幾多息？ 以一年定期存款計，即使有1.2%，都係得六萬銀。五千蚊一個月，點夠維持退休前生活水平？買滙豐股票啦，驚 住跌一半，冇以前咁穩如鐵塔咯噃；不如買REIT，年息有十厘以上（2778冠君最高時曾有廿幾巴仙），但投資專家警告，買地產信託投資基金可升可跌，有 本金收回之風險，退休人士未免有啲擔心。六十歲退休，揸住五百萬元退休，生活到九十歲，以目前之息率，咪話唔驚驚哋。 相形之下，公僕退休最幸福，一位月收 政府支票三萬元之公僕，由六十歲到九十歲，收足三十年，即一千零八十萬，安安穩穩生活無憂。折算現金，月收三萬，一年三十六萬，以一年定期存款一點二厘 計，相等於擁有本金三千萬元，恨死私人公司職員。譬如陳方安生、曾特首呢啲最高級公務員，曾有報紙報導，佢哋除咗收了一大筆現款之外，還可每月得長俸九萬 元，以上述利率折算，佢哋等於另有一筆九千萬元退休基金收息，一位月收一萬嘅退休基層公僕，等於擁有一筆一千萬元基金。 公僕嘅長俸長食長有，直至過身，正 斗到極，正因如此，特區政府之長俸負債（pension liability）究竟有幾多，實在難以估計。美國GM（通用汽車）就因為要長期支付大量長俸畀退休工人，故此每架汽車之固定成本極高，難與日本汽車競 爭，經濟不景一來，就陷入破產邊緣。以前啲精算師計錯晒數，極度低估人均壽命，搞到啲長俸制危機四伏，美國有不少公司畀長俸拖垮。香港現時生育率甚低，人 口老化，特區政府之長俸，能無隱憂？ | ||||||
| ||||||
| 裝 修公司老闆L與老公邀左丁山吃飯，適逢任總裁日日見報，談話點都要講到任總。問老闆L：「你又係讀統計嘅啫，喺港大見過任總未？」老闆L話：「梗係見過 啦，任總讀書好叻o架，一畢業就做tutor，我上過佢嘅tutorial。」上世紀六十年代七十年代之間，要考試成績好好嘅畢業生先至可以畀大學垂青， 聘為導師，導師多數繼續讀碩士、博士，日後成為教授。任總攞一級榮譽嘅噃，梗係讀書勤力肯上課之人，與佢啲師弟馬時亨、葉澍堃等唔多使上堂而又可以及格嘅 醒目仔完全唔同。不過更醒嘅就係，任先生後來唔去讀博士而進入官場，卒之名成利就，一年薪水勝於講座教授做五年。 問老闆 L：「你嘅同班同學有邊個係今日嘅名人呀？」老闆L話：「最出名嘅就係Linus啦，唔睇亞視都會識得佢，另一位就係Alice，我哋每年都要向佢報稅、 交稅，好怕佢打電話嚟問我嘅收入有幾多！」啊，做得稅務局長呢個位，數口梗係要精，而且斤斤計較，斗零也不含糊。老闆L話：「成班同學與Alice食 飯，Alice一定要計盡每人一份，如果係我找數，每份一百零三元五角嘅話，佢一定畀足一百零三元五角或索性一百零四元，我話費事濕碎，費事找，每人收一 百算嘞，Alice一定唔肯，將荷包倒轉，都要搵個五毫子出嚟。如果由佢埋單呢，我哋就可以每人畀佢一百蚊就OK。」如此數目分明，乃做官自保之道，可以 做到安全退休。以前有一位內地商人來港，要搵左丁山搭綫，搵一啲商貿高官與佢食飯拉攏關係，佢拍晒心口話：「晚晚食鮑翅飲靚酒又點話，我請晒。」左丁山叫 佢攞啲錢返廣州請黨委書記食飯好過，香港唔興呢套，高官避嫌，佢竟然話左丁山冇人脈關係，請唔郁啲高官，冇料到。既然大家有咁大文化差異，以後咪冇來往 囉。 行街C就唔同，最近上廣州與有力人士打關係，請吃午飯，一餐就食咗九千元人民幣，食餐晏，使唔使咁豪呀？行街C話冇辦法，上面係如此作風，唔肯使錢就唔好去見大人，你估喺香港做生意，一世人可以唔使見高官一面嘅咩。 | ||||||
2009-05-20 AppleDaily
| ||||||
| 歐 冠盃決賽，巴塞隆拿勝曼聯二比零，相信曼聯球迷失望，車仔、利物浦、阿仙奴等球迷則會暗自高興。賽前各方矚目，以為係一場世紀大戰，一定好睇過車仔對巴 塞，殊不知除咗開賽初段十分鐘，曼聯係威係勢，㩒住巴塞嚟打之外，維迪與雲達沙雙失誤，畀伊度奧射入一球，曼聯即刻散晒，全場睇住巴塞表演，恩尼斯達與沙 維統治中場，曼聯中場線之安達臣與卡域克去咗邊呀？ 根本差咗兩皮，一味喺西班牙中場雙煞後面食塵，踢空氣，於是巴塞控制皮球，揮灑自如，搞到曼聯朗尼喺前 面冇波踢，行行企企。美斯與Ｃ朗決戰，會決定下屆足球先生誰屬，經此一役，美斯肯定贏梗，佢視Evra如無物（或全隊曼聯後防如無物），仲首次在歐冠盃對 住英超球隊射入一球，表現勝過Ｃ朗多多聲，與佢爭足球先生名銜者，只有恩尼斯達一人。點解曼聯不堪巴塞一擊，車仔就幾乎贏咗巴塞？ 若非挪威球證誤判，車仔 老早贏咗波啦！但車仔對住曼聯就冇贏波把握噃，莫非格食格，左丁山諗到兩個理由。 第一，準決賽採主客兩場制，車路士可以採取保守打法，穩守突擊，而決賽係 一場分勝負，曼聯自視甚高，唔肯將十個球員留守中後場，留番一個前鋒在前面等機會，一與巴塞鬥攻，中場有空間畀安尼斯達活動，對手就死梗。 第二，車路士班 球星願意聽教練講，專注防守，戰術運用十分成功，而前鋒杜奧巴身高腳長，一人在前已可威脅巴塞一對中堅，但曼聯前鋒之中無論朗尼、泰維斯，與貝比托夫都缺 乏此條件，打突擊戰術比較難。曼聯平時贏波要靠組織，快上快落，壓住對方嚟打，碰到巴塞就寸步難行咯。巴塞證明係世上最強球會，最難得一樣就係所有球會球 衣都有一個贊助價錢，例如曼聯賣畀AIG，合約總值五千六百萬鎊，車路士有三星等等，但巴塞件球衣印上UNICEF（聯合國兒童基金會），完全免費，旨在 幫UNICEF宣傳，呢筆宣傳費起碼值六千萬鎊啦！故此巴塞可以稱之為世上最慈善的球隊，受人擁戴並非意外！ | ||||||
2009-05-31 AppleDaily
| ||||||
| 有 錢多到使唔晒，做乜最好？如果有十幾二十億元美金，已夠買齊豪華大宅別墅幾間，五十呎起碼嘅遊艇一至兩艘，波子法拉利勞斯萊斯平治等各幾架，私人飛機、直 昇機有齊，仲有乜嘢好買呀，一年用一百萬美元買衣服新鞋，買到悶啦，不如買隊球隊玩吓，橫掂有錢有到唔使做，成日去球場睇波，請埋商業夥伴坐董事包廂，幾 威呀，有助手下做生意，一舉兩得o忝。 自從俄羅斯油王阿巴莫域治買咗車路士，聲威大振之後，好多人跟住學嘢，但美國財團分別買入曼聯與利物浦，當生意做， 用LBO（槓桿收購）形式，令球隊負債太多，其實內有隱憂。然後阿拉伯油王自他信手上買入曼城，現在又有阿聯酋商人買入樸茨茅夫，唔通買球隊真係咁好玩？ 人人想做阿巴莫域治，雖然有名無利，總之夠晒爽。但係吼機會買大球會就有名啫，買入樸茨茅夫呢啲球會，點樣將佢轉型呀？譬如冰島銀行家買入韋斯咸之後，自 己銀行唔掂，累人累己o忝。上星期消息話中國商人黃健華（唔知係唔係陽明山莊嗰位？）組織財團，買入NBA克里夫蘭騎士隊之15%股權。 究竟為乜呀？想極 唔明，騎士隊位於一個小市場，隊內最有價值嘅資產就係勒邦占士，但騎士隊恐怕攞唔到NBA冠軍噃，就快成為free agent，可以吊高嚟賣，東岸球隊虎視眈眈，假如佢真係離開，騎士就冇厘價值。換言之，黃健華等必須幫助騎士留住占士，仲要增加一兩位上佳綠葉嚟支撐占 士至得，你估話咁易咩。中國財團走出去收購公司，總係蝕本居多，平保買富通蝕一千億元就係經典例子，中國投資買黑石（百士通），國家開發銀行買巴克萊，已 蝕到肉痛。中國人到美國買球會，有機會嘅話，不如注資華人聚居地嘅球會，例如金州勇士隊，洛杉磯快艇隊等，何解要買俄亥俄州之克里夫蘭騎士？有傳言話以後 騎士想換入姚明，扶助占士，係又好呀，但姚明體能有疑，打到季後賽劇戰之時往往會受傷缺陣，點幫球會奪標呢？ | ||||||
| ||||||
| 雷 曼迷債事件未完，驚聞摩根史丹利精明債券可能會出事。啱啱呢日飯局有賓架Ｙ在，問佢大摩精債事件會否係雷曼迷債翻版，賓架Ｙ話：「好難講，雷曼破咗產，冇 得追，所以禍及銷售銀行，但大摩仍然生勾勾噃，有美國政府做股東，點會破產呀？ 如果精債出事，追大摩可也。大摩精債銷售量在香港應該少過迷債，我哋銀行嘅 份額更係微不足道，但大摩精債在全亞洲嘅發行額就好大，相信大摩唔會容易應承賠償。目前大家仍然靠估啫，最傷腦筋嘅會係金管局與證監會，有排搞，最開心嘅 當然係啲律師行，又有生意上門嘞。」 雷曼破產清盤，已有十個月，未聞有甚麼突破，因為雷曼太大嘞，全球有八十間分公司，分佈於十幾個國家地區，而資產（未 爆前）有六千三百億美元，其中有三分一列入英國分公司賬簿內。咁多公司，咁大數目，淨係睇數都睇死核數師，何況一處鄉村一例，用甚麼標準條例嚟分配資產入 賬呀？ 美國方面嘅清盤人入稟聯邦法庭，申請批准一個「環球破產統籌方案」，如獲批准，就希望其他地區清盤人共同簽署，統一辦事程序，香港、新加坡、德國、 澳洲據講已經同意咗，但英國就話「咪搞，我哋唔制」，一於唔肯簽，英國清盤人就係PWC（港稱羅兵咸），指美國提出嘅global protocol係不必要，不顧個別地區情況而且繁複得難以接受。雷曼清盤，起碼要搞三五七年，當事人與銷售銀行如不能達成協議，鬥長命可也，如果一個唔 好彩，迷債與精債（其實係結構性投資工具）都買埋，咁就杰撻撻，命運等同買咗通用汽車、佳士拿汽車嘅股票。講起嚟，買到真債（真嘅公司債券）如通用汽車、 佳士拿汽車所發行嘅，下場亦相當悲慘，俾美國政府㩒住打，為美國汽車工會（UAW）作犧牲品。GM係百年老店，美國工業象徵噃，竟會落得破產下場，其債券 一文不值，拉埋好多退休金陪葬，美國聯儲局、證監會何嘗會為投資者着想，只係講你死你事而已。 | ||||||
| ||||||
| 股 市狂升，一片好景，睇淡沽空或買入熊證者，無不輸到面青，令左丁山想起淡友天真許。股市咁暢旺，好多人話與實質經濟背馳，但全世界央行一齊大搞特搞量化寬 鬆，印銀紙，減息至幾乎等於零，令全世界銀行水浸，於是大量熱錢湧入股市，炒個不亦樂乎。呢啲錢點解唔湧入實質經濟體系呢？原因可能係大家都對前景仍然缺 乏信心，唔敢放膽投資，啲錢不如走去股市短炒一轉好過。 股市升，交投旺，無怪此日見到分析師在鏞記四樓開房吃午飯，正是莫待無花空折枝也， 左丁山剛好赴約，坐在房外散座，亦戥佢哋高興。吃過午飯，走落大道中，碰到穿着成套整齊西裝嘅行銷Ａ，咦，佢平時在上海多過在香港嘅噃，做乜在中環出現。 行銷Ａ即刻遞上新名片，一望，心中打突，佢幾時做咗「乾收銀」（consultant），此乃MD（踎墩）代名詞也。果然，行銷Ａ好坦白咁講：「經濟不 景，跨國公司大裁員，大老闆宣佈退休，走咗先，總部派女強人接任，立即炒晒我哋幾個senior，起用幾個佢嘅年輕人，為公司慳番好多皮費。你知啦，我哋 五六個人，人人七位數字年薪o架，公司仲唔乘機縮皮咩。我有好多位老友在其他不同大公司都遭遇同樣命運。現在我哋呢類人有一個新名詞，叫做 corporate refugee（企業難民）。難民就要等待企業收留，現在住響難民營，咪利用自己多年經驗與工作專長，做吓『乾收銀』先囉！」 唉 吔，同類事件，左丁山在九八年九九年都見過，估唔到十年後歷史重演，想起嗰年，有朋友四十幾歲，年薪過百萬，兒子剛好中學畢業，要到美國留學，誰知朋友被 裁，一時之間唔知點算，最後惟有賣樓食住穀種過寒冬。呢十年來中產階級飽受折磨，益發令人覺得儲糧之重要，好景時要有啲憂患意識至得。與行銷Ａ拜拜後，心 情不舒暢，返到公司，收到香港電影資料館寄來之《通訊》48期，內有一篇〈空餘不了情：訪林黛故居〉，據知，林黛1964年10月17日（30歲）自殺 後，其故居衣物四十餘年來大部份原封不動，其子龍宗瀚於2007年父親龍繩勳逝世後，主動接觸電影資料館，借出大量遺物，經資料館整理後，八月舉行公開展 覽，欲知當年一代影后之香水、粉盒、胭脂、玉鐲等等眾多遺物是何樣子，不可錯過展覽會。 | ||||||