📖 ZKIZ Archives

萬南 二五中環 鷹君財技高 咪接火棒

1 : GS(14)@2013-05-11 15:54:19

http://www.metrohk.com.hk/index.php?cmd=detail&id=210756&search=1

                      

五一黃金周期間，萬南有位大陸熟客嚟香港血拼，小弟負責盡地主之誼，招呼佢一家飲飲食食及安排酒店，以為酒店貴到飛起啦，點知尖沙咀五星酒店都係千零蚊一晚，平到嚇一跳，問酒店老友先知，今年全港酒店入住率都差咗。



  
             喺呢個時候，鷹君(041)主席羅嘉瑞宣布有意分拆旗下3間酒店，分別係尖沙咀嘅朗廷及逸東、以及旺角嘅朗豪酒店獨立上市，形成類似派高息嘅Reits，目標係一眾息魔。有高人進言咪幫襯，事關酒店業已開始轉勢，而且鷹君嘅分拆眼光甚準，06年趁市旺分拆冠君(2778)上市，如果由第一日揸到依家，股價跌咗唔少，買家就算有息收都冇甜頭呢。                    

夜期滿月帶旺食肆
唔經唔覺，港交所(388)夜期已經滿月，結果生意一般，唔少夜期經紀都相當得閒，上網打機多過接柯打。不過，夜期亦帶挈一批開到夜深嘅茶餐廳，有啲經紀會趁夜期收市後約埋過嚟食宵夜，亦有一批經紀情願叫外賣。
以前未有夜期，中環除咗老蘭一帶之外，其他地方都冇乜人氣，但自從夜期開始，好多茶記都延長咗開工時間，原本更有意多請員工送外賣，不過最低工資啱啱加到$30，老闆大呻好難請人，惟有睇定啲再算。

新地飯堂大廚被挖
香港唯一嘅米芝蓮三星中菜龍景軒，一向係好多中環富貴人家嘅飯堂，新地(016)郭氏兄弟一家係四季酒店嘅老闆，自然經常嚟捧場，據聞郭老太非常咁欣賞大廚馬仔嘅手藝，每次老太食飯都例必搵馬仔親自揸鑊鏟炮製美食。
早兩日萬南幫襯龍景軒，諗住順道叫馬仔出樓面敍舊，點知經理話馬仔已經冇做喎。幾經八卦，先知馬仔被內地富豪賞識，請佢到上海搞新會所食肆，專門招呼非富則貴嘅內地人。有熟人話要龍景軒大廚薪金已經唔嘢少，而且年尾花紅好大嚿，強國富商能夠請得馬仔離鄉別井，出手肯定非常高啦。

金舖谷數奇招賣金
黃金周假期，大批強國人湧嚟血拼，正因為金價插水，所以滿城盡掃黃金飾物，金舖生意好到不得了，金至尊老闆黃英豪話生意多咗五成，金器幾乎賣清光。某的金舖老闆更呻補貨都嚟唔切，於是叫夥計搵返啲倉底賣剩蔗出嚟應市，照樣畀人掃晒。
呢位金舖老友話聽聞有啲規模較細嘅行家，趁住呢次大浪，出咗怪招力谷其他生意。條橋相當簡單：金器呢期唔憂賣，所以有人收起金飾扮缺貨，人客嚟到就冧佢地順手買玉，咁就確保有金買。呢招真係奏效，令到玉嘅去貨急增，有玉器批發商話，近期多咗零售商大手入啲幾千蚊貨色㖭。
PermaLink: https://articles.zkiz.com/?id=282814

馬雲財技高 舐盡美港資金 周顯

1 : GS(14)@2014-03-17 22:57:43

http://www.mpfinance.com/htm/fin ... mnist/en30_en30.htm


【明報專訊】因為文化中國(1060)所造成的「大屠殺」，所以細價股市場也變得淡靜起來了。原本每日都有幾隻股票貼士來料，忽然也變得靜英英起來。

由此可以見得，馬雲的阿里巴巴不能在香港上市，或者是一件好事，因為這條友的財技實在太高，每次在香港市場出現，都會發生一場大屠殺。在股票這個弱肉強食的世界，天天都有殺戮的災禍，可是，馬雲的屠殺卻是大範圍的、全方位的，他的屠宰方法的深度和廣度，都是「八號仔」的級數的，所以，如果給他擁有一隻萬億市值的大殺傷力武器，在香港市場大玩特玩，那將是香港股民的一場災難。

細價股看好家夢

現時阿里巴巴不停在香港買殼，我認為它是決定了在美國上市，但是又捨不得香港市場(香港的股民太好ṃ了)，所以它的大策略是﹕主體在美國上市，但是下面的業務則化整為零，在香港拆件注資進這些殼上，一於舐盡美國和香港這兩大市場的資金。且看我的預測，是對還是不對。

在這個市，還待觀察「文化中國大屠殺」之後，散戶的復元情，才知道細價股還有沒有繼續可炒的餘地。不過，就我本人而言，還是看好一些有潛力的小股票，例如家夢控股(8101)，我手頭已經有貨，還想繼續買入，不過這股票已經提過好幾次了，也沒有再講的必要性。

最後一提，我的新書《2017普選中共的大戰略 梁振英上台及黨人治港》快要再版了，多謝各位讀者的支持和捧場！
PermaLink: https://articles.zkiz.com/?id=284413
Next Page
ZKIZ Archives @ 2019