中環在線：安德魯王子訪滙豐 李華華
2008-09-17 AppleDaily
滙 控（005）上個禮拜有同鄉到訪佢哋喺越南嘅辦公室，佢就係英國安德魯王子！呢位約克公爵因乜會出訪同鄉，仲跑到越南咁遠？原來安德魯王子有另一個身份， 就係英國國際貿易及投資特別代表。獅子行上年入股越南保險公司（Bao Viet），做咗對方嘅唯一外資策略夥伴，王子上個禮拜一到埗，就去視察吓滙豐保險嘅辦公室，同行嘅仲有滙豐集團常務總監（保險業務）白樂達。
咁王子駕 到，越南政府當然唔咁怠慢，派咗常務副總理阮生雄及財務部長武文寧接待。白樂達話，海外投資者喺越南，同當地企業合作發展業務唔多，安德魯王子安排探訪滙 豐保險及越南保險，係肯定咗兩家公司合作嘅成功。呢個行程雖則係上個禮拜嘅，之但係咁啱呢兩日美國又有金融機構爆煲嘅消息，安德魯呢次專程視察獅子行投資 喺新興市場嘅業務，可以話係用名人效應幫獅子行打番支強心針。
中環在線：小肥羊總裁年食九隻羊 李華華
2008-09-17 AppleDaily
叫 得小肥羊（968），最出名當然係羊肉，做得呢個集團嘅高層，似乎都對羊情有獨鍾。華華噚日見到小肥羊總裁盧文兵，佢老家喺內蒙古呼和浩特，可以話係食羊 肉大嘅，佢同華華講開食羊，更係停唔到口，大讚食羊肉對身體好。
盧文兵話，一年夾埋食咗180公斤羊肉，以平均一隻羊20公斤計，一年就食咗9隻羊。好多 香港人覺得，食羊肉燥熱。盧文兵聽到，即時反駁話，如果日日食，過量當然唔好，仲話飲水飲得過量都唔好。佢跟住數畀華華聽，食羊有三高三低，就係蛋白、胺 基酸同礦物質高；脂肪、膽固醇同溶解度低。
佢仲力勸華華食多啲羊肉，夏天食都冇問題，一個星期食兩三次，冬天可以食三四次，對身體有益喎，跟住食番多啲蔬 菜平衡吓就得。呢個相信係盧總嘅養生之道囉。
中環在線：李超人風水屋換新裝 李華華
2008-09-17 AppleDaily
之 前李超人話住咗幾十年嘅深水灣道79號風水大宅，因為屋企人越嚟越多，所以要重新起間大啲。超人差唔多兩年前已經攞咗重建間屋嘅建築圖則，因為佢要多起一 層，兼想要大啲樓面，但塊地張地契限咗只可以起三層，所以佢就要向政府申請改契兼科水喇。本嚟只係幾千萬嘅數，超人唔覺意打個乞嚏都冇咗啦，但估唔到搞咗 成年幾，最近先至畀咗錢，要5413萬。
睇番呢幢大宅，超人喺63年以65萬銀買入，住咗40幾年，舊有嘅3層樓面大約6000呎。o依家就可以連車房起 到4層高，樓面亦增至8850呎，每呎樓面補價都要成萬九蚊，唔怪得一向慳家見稱嘅李超人，要同政府傾咁耐補價啦。
新世界（017）早兩月亦同政府搞掂咗 幾個項目嘅補價，貢獻超過67億銀畀政府，涉及項目包括元朗龍田村、尖沙嘴新世界中心同馬鐵車公廟上蓋發展等。
中環在線：加碼投資意馬羅康瑞：我洗濕個頭 李華華
2008-09-17 AppleDaily
噚日大家最關心嘅應該係，身邊有冇朋友喺AIG投保。華華噚日咁啱見到瑞安建業（983）兼瑞安房地產（272）主席羅康瑞，第一時間問佢有冇事，點知佢話自己冇買保險，仲話：「車死咗又賠得幾多吖！」咁又係，佢身家豐厚，使乜買保險。
身家豐厚冇買保險
講 開羅康瑞身家厚，今個月初，佢無端端出手襄助電腦動畫製作公司意馬國際（585)，斥資7792萬元增持意馬股權。噚日佢就呻，加碼投資都係因為自己「已 經洗濕咗個頭」，以後肯定唔會再增持意馬咁話。佢噚日解話，指自己以前曾經拎幾百萬美元出嚟，投資喺Winnington Capital旗下嘅基金。Winnington係意馬第二大股東，介紹羅康瑞另外拎錢出嚟投資，一開始買咗3%意馬股份。最近意馬想重組，需要更多資 金，雖然羅康瑞揸住嘅股份已經蝕緊錢，但既然已經「洗濕咗個頭」；意馬大股東又肯送4000萬舊股出嚟，條款都幾吸引，所以就決定加碼，持股量增至 10.99%。但佢講明，批股份o依家仲蝕緊，唔會再增持o架喇。
不過，早排有報紙踢爆， Winnington創辦人洪錦標嘅老婆Jocelyn Chu係羅康瑞好朋友朱玲玲胞姊，簡言之，都係籐lung瓜，瓜lung籐嘅關係啦。唔知係咪成件事太張揚， Winnington本身又有投資喺瑞房嘅內地項目，費事關係太過複雜，羅康瑞自爆，為咗劃清界線，已經結束咗自己喺Winnington嘅基金投資，攞 番一大筆錢，好高興咁話。李華華電郵：
[email protected]
中環在線：花旗海嘯中搞派對 李華華
2008-09-19 AppleDaily
美 國金融機構爆煲潮未完，老家在美國嘅花旗集團似乎唔多擔心，噚晚仲喺四季搞咗個迎新雞尾酒會，為新上任香港區行長章晟曼洗塵。派對請咗300幾個賓客，都 係客戶同業務夥伴等，唔少仲係大孖沙同上市公司高層，包括鷹君集團（041）主席兼董事總經理羅嘉瑞、利豐（494）董事總經理馮國綸、恒隆地產 （101）主席陳啓宗同太古（中國）主席陳南祿，可以話係畀面派對。
大孖沙齊撐場
花旗老家o依家咁亂，章行長第一次蒲頭，都唔敢怠慢，點都要派啲定心丸畀大家。佢喺派對上演講時提到，花旗集團家陣存款約8000億美金，仲係分散喺唔同嘅產品同地區。即係話佢哋水頭充足，仲因為咁，美國聯儲局穩定市場都搵佢哋做支援咁話。
中環在線：潘石屹送書應景 李華華
2008-09-19 AppleDaily
SOHO 中國（410）噚日公佈中期業績，一向出雙入對嘅潘石屹同太太張欣，噚日冇一齊出現，得番潘太拍住兩個高層支撐大局。潘石屹雖然唔出現，但就送咗本今年5 月出嘅新書《我用一生去尋找》畀記者。本書除咗講工作及第一桶金，亦講咗好多個人感想。集團公佈見紅嘅中期業績居然派書畀記者，係百無禁忌，抑或用嚟應 景?
由地產鬥到出版
潘石屹一向鍾意寫嘢，佢網誌經常update，集團又出月刊，十足文化雜誌。講番本書，其實唔係潘石屹第 一本，佢之前出過《童年的糖是最甜的》，趣怪嘅係，潘石屹喺大陸做地產，但就喺台灣出呢兩本書。不過鍾意寫嘢唔止佢一個，對手──萬科王石亦有同好。王石 年初出過本新書《讓靈魂跟上腳步》，講佢考察「玄奘之路」嘅經歷，兩人可以話由地產爭到去出版。
中環在線：歐資行大客齊逃亡 李華華
2008-09-19 AppleDaily
金 融圈最驚就係好事不出門，壞事傳千里，好似近幾日美國啲投資銀行咁，好多本來未必有事，出事只因為人心虛怯，一個傳聞或者消息就令到投資者恐慌，要錢唔要 貨，結果好好哋一家銀行，股價就係咁俾人掟散，資金就係咁俾人draw爆。華華聽個金融圈嘅朋友講，某家歐資大銀行近期就有好多大客去平倉攞錢走。人心虛 怯，費事俾人話華華引起公眾恐慌，所以邊間歐資行就唔講嘞，只可以講佢係其中一隻御貓。
越洋平倉添沽壓
華華個朋友話，見到歐 資銀行個個嗌救命，佢放心唔落。又係嘅，家陣都唔知邊家銀行先至穩陣，最穩陣可能放喺枕頭底。所以華華個friend撥咗個輪畀嗰間歐資行，話要平倉計數 攞錢走。雖然佢都知要花上一段時間，皆因做得投行大客，買嘢一球球美金做單位，沽貨仲要越洋做，梗要花時間。不過，佢點都估唔到，單係平倉都要等足幾個鐘 對方先搞得掂。嗰時華華朋友先知道，好似佢咁平倉走嘅客原來好多。佢講到呢度，華華終於知點解呢兩日個市沽壓咁大。
中環在線：郭氏兄弟身家縮完又脹 李華華
2008-09-19 AppleDaily
繼 舊年8.17之後，港股噚日又嚟另一個大奇迹日，驚心動魄嘅場面，比舊年8月17號更誇。散戶當然迷失方向，大戶有錢佬亦唔好受，一升一跌，一日講緊過百 億上落。香港富豪中，以超人李嘉誠最傷，佢揸住嘅四成長實（001），股價朝早兩個鐘最多急跌9蚊，低見86蚊，賬面身家蒸發84億銀，後嚟股價跟隨大市 反彈約6蚊，賬面身家即時又增加番57億銀，但全日計賬面身家仍少咗27億銀。
超人跌咗追唔番
俾隻碧桂園（2007）拖累、 大呻輸得好慘嘅四叔李兆基，旗下恒地（012）噚日上晝最多跌4.25蚊，四叔揸住53%恒地，賬面身家一度損失近49億，好彩晏晝一開市反彈3蚊，臨收 市前差唔多追貼前日收市價，賬面只係損失2.3億。至於彤叔鄭裕彤嘅新世界發展（017），開市唔夠20分鐘就跌穿10蚊，急挫一成或1.13蚊。彤叔揸 住37%新世界，賬面身家即時蒸發15.6億銀。晏晝開市冇耐，新世界股價陸續收復失地，收報9.89蚊，跌0.45蚊，賬面身家損失收窄一半至6.2億 銀。唔係個個都唔見錢嘅，講到好彩算係郭氏三兄弟。新地（016）噚日朝早急跌7.25蚊，郭氏兄弟持有42%新地，賬面身家單喺一個上晝就蒸發超過79 億銀。好在晏晝回穩，仲越升越有，收市前半個鐘，股價反彈超過6蚊，收報91.15蚊，股價仲較前日高1.1蚊，賬面身家唔單止冇少到，仲多咗12億銀， 唔知係咪同郭老太鄺肖卿家陣坐鎮新地主席有關。
富豪身家單日變幅
李嘉誠持有公司：長實昨最低價（元）：86.00
身家最多蒸發（億元）：-84.31昨收報（元）：92.15
身家變幅（億元）：-27.02
郭氏兄弟持有公司：新地昨最低價（元）：82.80
身家最多蒸發（億元）：-79.04昨收報（元）：91.15
身家變幅（億元）：+11.99
李兆基持有公司：恒地昨最低價（元）：33.75
身家最多蒸發（億元）：-48.73昨收報（元）：37.80
身家變幅（億元）：-2.29
鄭裕彤持有公司：新世界昨最低價（元）：9.21
身家最多蒸發（億元）：-15.63昨收報（元）：9.89
身家變幅（億元）：-6.22
資料來源：港交所
李華華
中環在線：華爾街華人返中國打工 李華華
2008-09-22 AppleDaily
雷曼兄弟破產之後，華爾街又多人失業，當中仲有唔少華人精英。呢個消息對祖國金融機構講，可能係好事。話說祖國金融機構，無論國營或者民營，一直都好缺國際金融人才。原因係祖國金融市場冇外國咁成熟，本土人才經驗不足等。花旗國呢一次金融危機，正好間接令到金融人才回流我祖國。
高層親往招兵買馬
華華噚日睇到新浪財經報道話，好多國內金融機構高層已經把握機會，豐厚回報不在話下，更親自飛過花旗國招兵買馬，誠意十足。報道引述國內一家知名保險公司人力資源總監講，最吃香係有豐富實戰經驗，對國際金融市場同埋國內金融產品規則都清楚了解高級人員。良禽擇木而棲，華華覺得，祖國經濟前景好過美國，機遇比美國多，都係令到華爾街金融圈華人願意減薪返祖國幫手原因。
中環在線：福布斯選最佳亞洲企業彤叔乖孫交足貨 李華華
2008-09-22 AppleDaily
過周末，《福布斯》公佈「200家最佳亞洲企業榜」，上榜包括自中、港、台華資上市公司，合共88家，佔個榜44%。個榜係按企業過去3年，營業額、盈利增長等選出，其中條件係過去1年營業額10億美金樓下（即78億港銀）。當中市值最大係阿里巴巴（1688），市值65.36億美元（509.8億港銀），雖然阿里巴巴股價唔生性，上個禮拜五市值得番407.7億港銀，但無損佢呢個榜市值一哥地位。至於盈利最高企業，係合景泰富（1813）。
理文李文俊踢出榜
華華留意到，香港有個富豪新一代入榜──彤叔鄭裕彤旗下新世界百貨（825）今年上榜，呢檔百貨雖然由阿仔鄭家純做主席，但近年都由乖孫鄭志剛（Adrian）擔大旗，今次佢都算交到成績畀阿爺睇。同人唔同命，同係新一代富豪李文俊，檔理文造紙（2314）就被踢出榜。據《福布斯》講，佢市值由上年30億美金（即234億港元），跌到得番5.88億美金（即45.86億港銀）。今年踢出榜，仲有上年營業額仲係6.93億美金、市值216.95億美金港交所（388）。美國金融企業巨無霸逐一檔，睇怕當地經濟有排衰。香港勝在背後仲有大陸頂住，一靠做內地生意上市公司，受影響反而冇咁大，有更加受惠北京奧運，好似李寧（2331）同內地運動服裝品牌鴻星爾克，都齊齊入榜。
福布斯200佳企業榜部份香港上市公司
‧港上市公司：李寧（2331）07年營業額：45‧港上市公司：合景泰富（1813）07年營業額：42‧港上市公司：信義玻璃（868）07年營業額：28‧港上市公司：阿里巴巴（1688）07年營業額：24‧港上市公司：稻香（573）07年營業額：21 ‧港上市公司：新世界百貨（825）07年營業額：10‧港上市公司：味千中國（538）07年營業額：9‧港上市公司：現代美容（919）07年營業額：8‧港上市公司：安東油田服務（3337）07年營業額：5單位：億港元電郵：
[email protected]
Next Page